Ŋaa Nitsumɔ—Eji Nikeenii ni Jɛ Nyɔŋmɔ Suɔmɔ Mli
YEHOWA mii shɛɔ ehe yɛ edebɔɔ nitsumɔi lɛ ahe. (Lala 104:31) Awieɔ bɔ ni etsui nyɔɔ emli waa yɛ enibɔɔ nitsumɔ lɛ mli lɛ he yɛ 1 Mose 1:31 akɛ: “Nyɔŋmɔ kwɛ nibii fɛɛ ni efee lɛ, ni naa, ehi naakpa.”
Yehowa etsiii miishɛɛ nɛɛ naa ehaaa ekome pɛ ehe. Eha Yesu hegbɛ akɛ efee najiaŋdamɔlɔ, aloo dɛŋdade ni ekɛtsu nii, mɔ ni etsɔ enɔ ebɔ nibii krokomɛi fɛɛ. (Yohane 1:3; Kolosebii 1:16, 17) Akɛ “ŋaalɔ” lɛ, Yesu “shwɛɔ yɛ [Yehowa] hiɛ be fɛɛ be.”—Abɛi 8:30, 31.
Shi jeee ŋwɛi pɛ nyɛmɔ ni ji ŋaalee ni akɛfeɔ nii lɛ yɔɔ. “Akɛwo gbɔmɛi adesai amli hu,” taakɛ Eugene Raudsepp ŋma yɛ ewolo ni gbɛi ji How Creative Are You? lɛ mli lɛ. Enɛ jeee nɔ ko ni ba lɛ nakai kɛkɛ, ejaakɛ abɔ gbɔmɔ yɛ Nyɔŋmɔ subaŋ nɔ. (1 Mose 1:26) Enɛ hewɔ lɛ, Yehowa eha adesai ŋaalee mli nyɛmɔi komɛi ni haa enaa miishɛɛ.—Yakobo 1:17.
No hewɔ lɛ, ebɛ naakpɛɛ akɛ Biblia lɛ wieɔ lala, joo, mama-loo, nihoomɔ, ninenaa ŋaa nitsumɔ, kɛ ŋaa nitsumɔi krokomɛi ni atsuɔ lɛ ahe ni ejieɔ yi waa. (2 Mose 35:25, 26; 1 Samuel 8:13; 18:6, 7; 2 Kronika 2:13, 14) Bezaleel, ni ji ŋaa nitsulɔ lɛ, kɛ enilee lɛ tsu nii ni “ekɛshwie eyiŋ ŋaai” ni ekɛye ebua kpeebuu lɛ maa. (2 Mose 31:3, 4) Ekolɛ tookwɛlɔ Yabal ji mɔ ni kɛ buu-feemɔ ba, ni ebatsɔ ŋaa nifeemɔ ko ni hi jogbaŋŋ kɛha mɛi ni kwɛɔ kooloi yɛ ŋa nɔ lɛ ashihilɛ. (1 Mose 4:20) David jeee lalatsɛ kɛ lalafolɔ kɛkɛ, shi moŋ eji mɔ ni feɔ lalatswaa saŋkui heei hu. (2 Kronika 7:6; Lala 7:17; Amos 6:5) Ekolɛ Miriam ji mɔ ni fo miishɛɛ lala kɛ joo ni Israelbii lɛ kɛye amɛjiemɔ yɛ naakpɛɛ gbɛ nɔ kɛtsɔ Ŋshɔ Tsuru lɛ mli lɛ he gbijurɔ lɛ.—2 Mose 15:20.
Bei pii lɛ, ŋaa nitsumɔ he baa sɛɛnamɔ waa kɛhaa anɔkwa jamɔ shweremɔ. Yesu kɛ abɛbuai kɛ nɔkwɛmɔ nii afeemɔ tsu nii yɛ ŋaa mli ni ekɛha eshɛɛ sane lɛ shɛ gbɔmɛi lɛ aŋɔɔ. Nakai nɔŋŋ awoɔ esɛɛnyiɛlɔi lɛ hu hewalɛ ni “[amɛbɔ] wiemɔ kɛ tsɔɔmɔ he mɔdɛŋ.” (1 Timoteo 5:17) Hɛɛ, amɛ shiɛmɔ nitsumɔ lɛ jeee nitsumɔ ko ni amɛmiitsu kɛkɛ. Eji ŋaa nitsumɔ ni biɔ nitsɔɔmɔ gbɛi ni akɛaatsu nii yɛ ŋaa mli. (Kolosebii 4:6) Enɛ he hiaa waa, titri lɛ kɛji mɔ ko miitsɔɔ ebii anii.—5 Mose 6:6, 7; Efesobii 6:4.
Enɛ hewɔ lɛ, Yehowa haa mɛi krokomɛi hu naa miishɛɛ ni nibii heei afeemɔ kɛhaa lɛ lɛ eko. Mɛɛ nikeenii ni jɛ suɔmɔ mli nɛ!