‘Enitsumɔi lɛ Nyiɛɔ Esɛɛ’

LEEBI 8:50, yɛ Soo, July 28, 1994 lɛ, George D. Gangas gbe eshikpɔŋ nɔ shihilɛ lɛ naa. Eye afii 98. Akɛ mɛi ni afɔ amɛ mu lɛ ateŋ mɔ kome lɛ, George Gangas esɔmɔ aahu akɛ Yehowa Odasefoi a-Nɔyeli Kuu lɛ ateŋ mɔ kome kɛjɛ October 15, 1971.

Mɛi fɛɛ ni le Nyɛminuu Gangas jogbaŋŋ lɛ le suɔmɔ ni eyɔɔ kɛha jalɛ nifeemɔ kɛ nyɛɛ ni eyɔɔ kɛha efɔŋ feemɔ. Amɛkaiɔ bɔ ni ewieɔ Satan he be fɛɛ be akɛ amalelɔ wulu, kpele, yitsoŋwalɔ, ni asumɔɔɔ esane kwraa lɛ jogbaŋŋ diɛŋtsɛ. Yɛ gbɛ kroko nɔ lɛ, ewieɔ Yehowa he akɛ Tsɛ ni yɔɔ suɔmɔ, mlihilɔ, musuŋtsɔlɔ, kɛ mɔ ni susuɔ mɔ he. Mɛi babaoo hu kaiɔ bɔ ni esumɔɔ Biblia mli saji bimɔ lɛ. Yɛ sanegbaa fɛɛ sanegbaa mli lɛ, bɔ fɛɛ bɔ ni fee lɛ ebaabi saji—ekomɛi waaa, ni ekomɛi hu wa saŋŋ ni egbalaa mɔ jwɛŋmɔ mli. Yɛ anɔkwale mli lɛ, esumɔɔ Biblia mli anɔkwale lɛ waa.

Abaptisi nyɛminuu Gangas yɛ July 15, 1921. Eje eshihilɛ be mli nitsumɔ yɛ be-fɛɛ shiɛmɔ (gbɛgbamɔ) nitsumɔ lɛ mli lɛ shishi yɛ March 1928. No hewɔ lɛ, be ni ekɛhi be-fɛɛ sɔɔmɔ nitsumɔ lɛ mli lɛ fɛɛ feɔ afii 66. Ebatsɔ Buu Mɔɔ Biblia kɛ Woji Bibii Asafo lɛ nitsumɔ he yitso lɛ nitsulɔi lɛ ateŋ mɔ kome yɛ October 31, 1928.

Ewala shihilɛ he sane je kpo yɛ October 15, 1966, Watchtower lɛ mli. Ewieɔ ehe akɛ Nyɔŋmɔ mumɔŋ gbɔmɔ lɛlɛŋ. Yɛ nakai sane lɛ mli lɛ, ewie nɛkɛ wiemɔ ni yɔɔ miishɛɛ waa nɛɛ, akɛ: “Misumɔɔ wala, ni miisumɔ ni minyɛmimɛi lɛ hu ana wala. Misusuɔ he kɛfataa bɔfo Paulo hu he akɛ, nibii krokomɛi fɛɛ tamɔ ‘laajemɔ nibii yɛ Kristo Yesu he nilee ni jara wa fe fɛɛ lɛ hewɔ.’ ”—Filipibii 3:8.

Nyɛminuu Gangas tsɔ enifeemɔi anɔ etsɔɔ akɛ esumɔɔ wala lɛlɛŋ, ni ekɛ ekaa wie “Kristo Yesu he nilee” lɛ he etsɔɔ mɛi krokomɛi. Wɔhiɛ baatse lɛ waa, shi kwɛ bɔ ni wɔnaa miishɛɛ waa akɛ amrɔ nɛɛ enine eshɛ eŋwɛi nyɔmɔwoo lɛ nɔ! Agbɛnɛ, ‘ebaajɔɔ ehe yɛ edeŋmegbomɔ lɛ mli, ejaakɛ enitsumɔi lɛ nyiɛɔ esɛɛ.’—Kpojiemɔ 14:13, New International Version.