Susumɔi ni Fiɔ Hemɔkɛyeli Sɛɛ

BENI naagbee afii oha ni ho lɛ baa naagbee lɛ, no mli lɛ susumɔi ni jeɔ kpo kɛfiɔ jeŋ nilee, woloŋlee, kɛ hiɛ ni akuɔ ashwieɔ jamɔ nɔ lɛ sɛɛ lɛ miina hewalɛ fɔŋ yɛ Nyɔŋmɔ mli hemɔkɛyeli kɛ mumɔŋ ni Biblia lɛ jɛ lɛ nɔ.

Shi jeee nomɛi pɛ ji susumɔi ni je kpo. Nii amlipɛilɔi pii na akɛ abaanyɛ awie nibii babaoo kɛfi Nyɔŋmɔ mli hemɔkɛyeli ni ayɔɔ lɛ sɛɛ, fe bɔ ni abaanyɛ akɛfi nɔ ni akɛɔ akɛ Nyɔŋmɔ bɛ lɛ sɛɛ. Amɛ nikasemɔi lɛ hu jie odaseyelii babaoo kpo ni tsɔɔ akɛ Biblia lɛ ji Nyɔŋmɔ Wiemɔ ni jɛ mumɔŋ.

Mɛi ni jie nɛkɛ susumɔi nɛɛ kpo lɛ ateŋ mɔ ko ni ale lɛ waa ji C. T. Russell. Mɛi akpekpei abɔ kane wolo ko ni eŋma yɛ 1886 mli ni gbɛi ji The Divine Plan of the Ages lɛ. Yitso ko ni mli wa waa yɛ mli ji “Ama Shihilɛ Mli ni Bɔlɔ ko ni Yɔɔ Nilee ni Nɔ Kwɔ Fe Fɛɛ lɛ Yɔɔ lɛ Nɔ Mi.”

Yɛ afii nyɔŋmai abɔ ni nyiɛ sɛɛ lɛ amli lɛ, Russell ŋmala saji, dɛhiɛmɔ woji, kɛ woji wuji ni kɛ yiŋtoi ni mli wa ha yɛ Nyɔŋmɔ kɛ Biblia lɛ mli hemɔkɛyeli namɔ he. Mɛi ni kala nɛkɛ woji nɛɛ ji Buu Mɔɔ Biblia kɛ Woji Bibii Asafo lɛ. Esɛinɔtalɔ ni ji enyɔ, J. F. Rutherford ŋma Creation wolo lɛ (1927) kɛ woji krokomɛi ni tee nɔ efi susumɔi ni wieɔ haa hemɔkɛyeli lɛ sɛɛ jogbaŋŋ.

Nakai asafo lɛ eŋmala saji heei krokomɛi ni sa yɛ be naa yɛ nɛkɛ saji nɛɛ ahe. Yehowa Odasefoi baanyɛ amɛha bo nɛkɛ woji nɛɛ eko kɛha bo diɛŋtsɛ oniiahesusumɔ.

Kɛji obaasumɔ ni ole nibii babaoo aloo ni mɔ ko aba oŋɔɔ ni ekɛ bo afee shia Biblia mli nikasemɔ ni aheee nɔ ko lɛ, ofainɛ ŋmaa kɛya Watch Tower, Box 760, Accra, Ghana, aloo kɛya adrɛs ni atsɔɔ yɛ baafa 2 lɛ mli nɔ ni sa.