Ani Gbohii lɛ Baanyɛ Ana Wɔ?

YOO ko gbe ewu. Afii kpawo sɛɛ lɛ, lamɔ ko ni ha ehe eye akɛ eji ewu ni egbo lɛ mlifu he okadi wo ehe gbeyei. Bɔni afee ni ekpãta ewu lɛ “mumɔ” lɛ, etsu ebiyoo koni ekɛ dãa ayaye ŋkpai yɛ esãi nɔ.

Biyoo lɛ leee nɔ ni ebaakɛɛ etsɛ lɛ mumɔ lɛ, ejaakɛ dãa ni akɛshwieɔ shi lɛ jɛ enyɛ ni gbe lɛ lɛ ŋɔɔ. Enyɛmi nuu fioo ko eyatee ehe ni eekwɛ nɔ ni yaa nɔ lɛ. Efa kpo, ni ekɛ enyɛmi yoo lɛ ye ŋkpai amɛha amɛtsɛ lɛ koni eye ebua amɛ ni amɛtɔ mɔ ni gbe lɛ lɛ nɔ owele.

Nifeemɔ nɛɛ jɛ The Libation Bearers, Hela shwɛmɔ ko ni aŋma nɔ ni fe afii 2,400 ni eho nɛ lɛ mli. Yɛ je lɛŋ hei komɛi, titri yɛ Afrika lɛ, ayeɔ ŋkpai ni tamɔ nɛkɛ yɛ sãii anɔ ŋmɛnɛ.

Akɛ nɔkwɛmɔ nɔ lɛ, susumɔ Ibe, ni yɔɔ Nigeria lɛ he okwɛ. Akɛni ebii etɛ gboi hewɔ lɛ, etee tsofatsɛ ni yɔɔ jɛmɛ lɛ ŋɔɔ, ni ekɛɛ Ibe akɛ, gbelei lɛ jeee efolo—Ibe tsɛ ni egbo momo lɛ mli efu ejaakɛ afuuu lɛ yɛ gbɛ ni sa nɔ.

Beni etsuɔ tsofatsɛ lɛ ŋaawoo lɛ he nii lɛ, Ibe kɛ too sha afɔle, ni ekɛ gin kɛ wein ye ŋkpai yɛ etsɛ lɛ sãi nɔ. Ebo etsɛ́ etsɛ lɛ mumɔ lɛ, ni ekpa eshaifaa he fai, ema bɔ ni esumɔɔ lɛ lɛ nɔ mi, ni ebi edɛŋ jɔɔmɔ.

Ákɛ etsɛ lɛ baanyɛ ana lɛ ni enu ewiemɔi lɛ, Ibe ejeee enɛ he ŋwane. Eheee eyeee akɛ etsɛ lɛ bɛ wala mli, shi moŋ beni egbo lɛ, “efo mli” kɛjɛ je ni anaa lɛ mli kɛtee je ni anaaa jɛmɛ lɛ mli. Ibe heɔ yeɔ akɛ etsɛ lɛ eshi heloo kɛ la je lɛ kɛtee mumɔi aje lɛ mli, blematsɛmɛi lɛ ashihilɛ he lɛ.

Ibe susuɔ nii ahe yɛ nɛkɛ gbɛ nɔ: ‘Eyɛ mli akɛ Ataa bɛ je nɛɛ mli moŋ, shi ekaiɔ mi lolo ni eyɛ mihilɛ-kɛhamɔ he miishɛɛ. Ni akɛni amrɔ nɛɛ eji mumɔ ni yɔɔ hewalɛi pii hewɔ lɛ, ebaje gbɛhe ni baanyɛ aha eye ebua mi babaoo mli fe be mli ni eji gbɔmɔ yɛ shikpɔŋ nɔ lɛ. Agbɛnɛ hu, ebaanyɛ ebɛŋkɛ Nyɔŋmɔ tɛɛ eha mi, ejaakɛ Nyɔŋmɔ lɛ mumɔ hu ji lɛ. Ekolɛ Ataa mli efu bianɛ, shi kɛ mijie bulɛ ni sa kpo mitsɔɔ lɛ lɛ, ekɛbaake mi ni ejɔɔ mi.’

Yɛ Afrika lɛ, he ni aheɔ ayeɔ akɛ gbohii lɛ naa gbɔmɛi yɛ shikpɔŋ nɔ, ni amɛnaa amɛshihilɛ nɔ hewalɛ lɛ egbɛ eshwa mɛi ni heɔ kusum-nifeemɔi amɛyeɔ lɛ ateŋ. Ejeɔ kpo yɛ mɛi ni kɛɔ akɛ Kristofoi ji amɛ lɛ po ateŋ. Akɛ nɔkwɛmɔ nɔ lɛ, beni ákpee yoo ko yɛ sɔlemɔ lɛ mli lɛ, ejeee nɔ ni ekaaa akɛ eeeya efɔlɔi ashia koni ayaye ŋkpai aha lɛ ni akɛjɔɔ lɛ. Atsɛɔ blematsɛmɛi ni egboi lɛ, ni akɛ dãa shwieɔ shi ahaa amɛ. Mɛi pii heɔ yeɔ akɛ enɛ ni afeŋ lɛ kɛ naagba baaba gbalashihilɛ lɛ nɔ.

Asusuɔ akɛ blematsɛmɛi ni egboi lɛ, loo amɛmumɔi lɛ, haa amɛwekui ni yɔɔ shikpɔŋ nɔ lɛ hiɔ shi shweshweeshwe ni amɛshwereɔ. Yɛ jwɛŋmɔ nɛɛ naa lɛ, amɛji hefatalɔi ni he wa, amɛhaa akpaa ŋmɔshi nii babaoo, amɛhaa ashwereɔ yɛ shihilɛ mli, ni amɛbuɔ gbɔmɛi ahe kɛjɛɔ awui ni aaaye amɛ lɛ he. Amɛdamɔɔ mli amɛhaa gbɔmɔ. Shi kɛ aku hiɛ ashwie amɛnɔ loo afee amɛ efɔŋ lɛ, amɛkɛ haomɔ baa—hela, ohia, kɛ gbele po. No hewɔ lɛ, gbɔmɛi bɔɔ mɔdɛŋ ni amɛha wekukpaa kpakpa ahi amɛkɛ gbohii lɛ ateŋ, kɛtsɔ afɔleshãai kɛ kusum-nifeemɔi sɔrɔtoi anɔ.

Ani oheɔ oyeɔ akɛ gbohii lɛ kɛ amɛhe ewo hiɛkalɔi ashihilɛ mli nibii amli diɛŋtsɛ? Ani oyadamɔ suɔlɔ ko sãi nɔ ni owie wiemɔi fioo ko, akɛ aleee nɔ̃ mɔ ni egbo lɛ aaanu lo? Ojogbaŋŋ, kɛji akɛ gbohii lɛ naa wɔ ni amɛnuɔ wɔ wiemɔi loo jeee nakai eji hu lɛ damɔ nɔ ni baa yɛ gbele mli lɛ nɔ. Nyɛhaa wɔpɛia nɔ ni Biblia lɛ kɛɔ yɛ sane ni he hiaa nɛɛ he lɛ mli.