Mɛni Hewɔ Mɛi Fɔji Shwereɔ Lɛ?

“MƐƐ hewɔ mɛi fɔji ayi naa wala?” Anɔkwafo Hiob ji mɔ ni bi nɛkɛ sane nɛɛ, afii babaoo ni eho nɛ, ni kɛjɛ egbii amli aahu kɛbaa nɛɛ fɛɛ lɛ, atĩ mli aahu. Ekolɛ eyɛ gbɔmɛi ni yɔɔ tsutsu Yugoslavia kpokpai anɔ lɛ ateŋ mɛi pii, (tamɔ yoo ni mfoniri yɔɔ wɔ wolo nɛɛ sɛɛ), ni yeɔ mɛi ni na amanehulu yɛ ta ni yɔɔ gbeyei ni awuu lɛ mli lɛ ahe awerho lɛ ajwɛŋmɔi amli. Mɛni hewɔ mɛi fɔji ayi naa wala, ni amɛshwereɔ po lɛ? Taakɛ Hiob wie lɛ, bei pii lɛ, “amɛshia teŋ jɔɔ, ni gbeyeishemɔ ko bɛ mli, asaŋ Nyɔŋmɔ mɔ-yii tso lɛ kãaa amɛnɔ.”—Hiob 21:7, 9.

Ani enɛ tsɔɔ akɛ sɛɛnamɔ ko bɛ he akɛ aaasɔmɔ Nyɔŋmɔ, ni asumɔ naanyo gbɔmɔ, ni atsi he kɛjɛ efɔŋ feemɔ he? Dabi, etsɔɔɔ nakai kwraa! Biblia lɛ haa wɔnaa jwɛŋmɔ ni sa yɛ he, beni ekɛɔ akɛ: “Kaagba ohe naa akɛ oooye efɔŋ feelɔi anɔ kunim aloo oookase mɛi ni feɔ nɔ fɔŋ lɛ. Ejaakɛ etsɛŋ ni amɛbaagbĩ tamɔ jwɛi, ni amɛaaŋala tamɔ agbiɛnaa beaŋ jwɛi fɔ. Ŋɔɔ ohiɛ ofɔ̃ NUNTSƆ lɛ nɔ ni ofee ekpakpa.”—Lala 37:1-3, The New English Bible.

Hɛɛ, nɔ ni tamɔ shweremɔ ni mɛi fɔji shwereɔ nɛɛ baahi shi be kukuoo kɛkɛ. Yɛ anɔkwale mli lɛ, amɛwala be sɛɛ kɛɛɛ kwraa, shi mɛi ni sɔmɔɔ Nyɔŋmɔ lɛ yɛ hiɛnɔkamɔ ko ni yɔɔ nyam kɛha wɔsɛɛ be. Etsɛŋ kwraa ni Nyɔŋmɔ shiwoo nɛɛ baaba mli, akɛ: “Nyɔŋmɔ aaatsumɔ amɛhiɛaŋ yaafo nui fɛɛ, ni gbele bɛ dɔŋŋ, ni ŋkɔmɔyeli ko kɛ bolɔmɔ ko kɛ nɔnaa ko hu bɛ dɔŋŋ; ejaakɛ tsutsu nii lɛ eho etee.” (Kpojiemɔ 21:4) Jalɔi pɛ baana nakai be lɛ, jeee mɛi fɔji. Mɛɛ hewalɛwoo ehaa wɔ nɛkɛ, koni wɔbɛŋkɛ Nyɔŋmɔ ni wɔkase esuɔmɔnaa nifeemɔ, ni bɔ ni mɛi ni ebɔle wɔhe kɛkpe lɛ baafee mɛi fɔji amɛha lɛ kɔɔɔ he eko!

Kɛji obaasumɔ ni ole nibii babaoo aloo ni mɔ ko aba oŋɔɔ ni ekɛ bo afee shia Biblia mli nikasemɔ ni aheee nɔ ko lɛ, ofainɛ ŋmaa kɛya Watch Tower, Box 760, Accra, Ghana, aloo kɛya adrɛs ni atsɔɔ yɛ baafa 2 lɛ mli nɔ ni sa.