Wɔnyɛmimɛi Rwandabii lɛ Ahemɔkɛyeli ni Yɔɔ Ekaa
AFI 1994 shishijee gbɛ lɛ, je lɛ he jɔ̃ ehe waa yɛ gbɔmɔgbee he amaniɛbɔi ni jɛɔ Afrika maŋ ni ji Rwanda kɛbaa lɛ he. Maŋ ta ko ni ehiii kwraa efɛ—ni ejɛ hetsɛ ko ni ehi shi aahu afii ohai abɔ lɛ mli kɛba.
Akɛni mla kɛ gbɛjianɔtoo ko kwraa tsuuu nii dɔŋŋ hewɔ lɛ, enɛ nyɛ Yehowa Odasefoi aaashɛ 2,000 loo nɔ ni fe nakai, ni yɔɔ Rwanda lɛ anɔ koni amɛjo foi kɛbaa amɛwala yi. Amɛteŋ mɛi aaashɛ 1,300 yana abobaa he kɛ hebuu yɛ abobalɔi ŋsarai amli yɛ Zaire kɛ Tanzania maji ni bɛŋkɛ amɛ lɛ amli, shi mɛi komɛi nyɛɛɛ amɛjo foi yɛ be ni sa mli. Wɔkɛ awerɛho miibɔ nyɛ amaniɛ akɛ wɔnyɛmimɛi hii kɛ yei aaashɛ 400—ni ji onukpai kɛ gbekɛbii fɛɛ, ni amɛ fɛɛ hu amɛji maŋbii foji—ahiɛ ekpata yɛ sɛkɛyeli kɛ yiwalɛ nifeemɔ nɛɛ mli. Kristofoi ni yɔɔ je lɛŋ fɛɛ foɔ nɛkɛ emuuyeli mlihiɛlɔi ekaalɔi nɛɛ agbele lɛ, ni amɛkɛ Biblia mli shiwoo ni ji gbohiiashitee lɛ shɛjeɔ amɛmii.—Yohane 11:25.
Te Rwanda nyɛmimɛi hii kɛ yei ni je mli lɛ ashihilɛ efee tɛŋŋ? Atsu onukpai kɛjɛ maji saŋŋ nɔ kɛtee jɛmɛ koni amɛ diɛŋtsɛ amɛyakwɛ bɔ ni shihilɛ lɛ ji. Amaniɛbɔɔ ko wie akɛ Rwanda nyɛmimɛi lɛ ekpee shihilɛ lɛ naa “yɛ woo kɛ ekaa mli.” Akɛ nɔkwɛmɔ nɔ lɛ, nibii ni nyɛmimɛi lɛ bi klɛŋklɛŋ kwraa lɛ ateŋ ekome ji Biblia kasemɔ woji. Amaniɛbɔɔ lɛ ba naagbee akɛ: ‘Etamɔ nɔ ni amɛsusuɔ mumɔŋ niyenii ni amɛnine aaashɛ nɔ lɛ he kwraa fe heloonaa yelikɛbuamɔ, eyɛ mli akɛ nibii babaoo ahe miihia amɛ waa diɛŋtsɛ.’ Ni eyɛ mli akɛ shihilɛi ni yɔɔ ŋsarai lɛ amli lɛ ehiii kwraa moŋ, ‘shi he ni wɔnyɛmimɛi lɛ yɔɔ lɛ ji he ni tse fe fɛɛ.’
Buu Mɔɔ Asafo lɛ eha shika koni akɛhe niyenii, kuntui, atadei, aspaaterei, kɛ tsofai aha amɛ. Wɔnyɛmimɛi ni yɔɔ France lɛ jɛ amɛsuɔmɔ mli amɛye too, ni beni shɛɔ June shishijee gbɛ lɛ, no mli lɛ akɛ nibii ni tsiimɔ shɛɔ tɔn enyɔ emaje nɛkɛ wɔnyɛmimɛi Rwandabii ni ehia amɛ nɛɛ.
Ebɛ naakpɛɛ akɛ nɔ ni ejɛ nɛkɛ shihilɛi nɛɛ amli eba lɛ efee odaseyeli fɛfɛo. Anɔkwale ni eji akɛ wɔnyɛmimɛi Rwandabii lɛ anine shɛ yelikɛbuamɔ kɛ sɛɛfimɔ ni tamɔ nɛkɛ nɔ kɛjɛ nanemɛi Odasefoi aŋɔɔ lɛ ha mɛi ni na nɔ ni tee nɔ lɛ nu he waa, ni amɛnyɛ amɛkɛ mɛi krokomɛi ja nɛkɛ yelikɛbuamɔ nibii nɛɛ. Mɛi komɛi ewie akɛ Odasefoi lɛ pɛ ji mɛi ni yɔɔ ŋsarai lɛ amli ni amɛjamɔ lɛ mli bii eba jɛmɛ amɛbasara amɛ!
Wɔnyɛmimɛi Rwandabii lɛ amanehulu lɛ haa wɔkaiɔ akɛ nɛkɛ “naagbee gbii” nɛɛ amli lɛ, gbɔmɛi “ahiɛ baawo la,” ni “amɛyitseaiŋ baawa.” (2 Timoteo 3:1-5; Today’s English Version) Ni eyɛ mli akɛ Yehowa wooo ewebii ashi akɛ ebaatsɔ naakpɛɛ gbɛ nɔ ebu amɛhe kɛjɛ gbɔmɔtsoŋ osharai amli moŋ, shi ewo shi akɛ ebaabaa amɛ mumɔŋ shihilɛ kɛ amɛkɛ lɛ teŋ wekukpaa yi, ni yɛ Kristo Afii Akpe nɔyeli lɛ mli lɛ, ebaatee mɛi ni baagboi bianɛ lɛ ashi. (Lala 91:1-10) Eba akɛ sɔlemɔ ni wɔsɔleɔ ni Yehowa awaje wɔnyɛmimɛi Rwandabii ni gboiii lɛ, ni eye ebua amɛ hu yɛ nɛkɛ jaramɔ be nɛɛ mli lɛ baaya nɔ lolo yɛ amɛgbɛfaŋ.—Lala 46:2.