Ekaafeemɔ ni Sɛɛ Efooo Jɛɛhe

“GBEE ko ni tamɔ duguma gbee ha wɔwa kpi wɔdamɔ shi. Kɛkɛ ni loofɔji enyɔ ni amɛgbɛ amɛfijiaŋ jɛ koo ni yɔɔ wɔ abɛku lɛ mli filiki kɛba wɔnɔ. Nɔ ni jwere wɔhiɛ ji wɔji enyɔ ni jwere shikpɔŋ yɛ bu fioo ko ni mli ekwɔɔɔ tsɔ mli. Loofɔji lɛ tsi wɔ gbɛ koni wɔkanaanaa amɛtsu lɛ nɔ ni wɔleee. Be fɛɛ be ni wɔɔbɔ mɔdɛŋ wɔbɛŋkɛ ni wɔsha wɔji fɛfɛji kɛ amɛhe turuntarai tamɔ asara su lɛ mfoniri lɛ, loofɔji nɛɛ tiɔ wɔhe gbeyeiwoo lɛ mli. Nɔ ni wɔsusu ji, ‘kwɛ bɔ ni amɛyɔɔ ekãa babaoo.’ ”

Enɛ ji onukpai ejwɛ ni bɛŋkɛ loofɔji komɛi ni atsɛɔ amɛ dikkop kɛ ehe turuntrai lɛ tsu lɛ aniiashikpamɔ. Loofɔlɔ lɛ eko ni yɔɔ bibioo fe enɛ ji blacksmith plover lɛ. Loofɔji ahe nikaselɔi Sinclair kɛ Mendelsohn tsɔɔ mli yɛ wolo, Everyone’s Guide to South African Birds lɛ mli akɛ: “Enyɔ ni ŋmɛɔ wɔji lɛ kɛ ekãa buɔ amɛ tsũi kɛ amɛbii ahe waa ni amɛkɛ hiɛdɔɔ tutuaa mɔ fɛɛ mɔ ni aaabɛŋkɛ jɛmɛ lɛ. Mɔ ni baa jɛmɛ lɛ dalɛ wooo amɛhe gbeyei shi amɛfilikiɔ kɛyaa ŋwɛi ni amɛbolɔɔ waa, ni amɛkɛ gbeyeishemɔ ni bɛ maa amɛyi shi vii kɛbaa shikpɔŋ kɛbaa gbɔmɛi aŋɔɔ po koni amɛkɛbɔ amɛ kɔkɔ.”

Mɛi komɛi ena bɔ ni shuɔi wuji aŋkroaŋkroi nyiɛɔ kɛyaa blacksmith plover loofɔlɔ lɛ tsu lɛ naa gbɛ ni amɛlee, kɛkɛ lɛ eha loofɔji lɛ eje amɛnifeemɔ lɛ shishi. Shuɔi lɛ nuɔ shishi ni amɛtsɔɔ afa kɛyaa.

Nɛgbɛ loofɔji na ekãa ni tamɔ nɛkɛ kɛjɛ? Ejɛ Mɔ ni bɔ amɛ lɛ ŋɔɔ. Yehowa Nyɔŋmɔ ebɔ henumɔi komɛi ewo bɔɔ nii bibii nɛɛ amli koni etsi kooloi ni dara lɛ agbɛ koni amɛkaye amɛtsui loo amɛbii bibii lɛ awui.

Nikasemɔ Kɛha Kristofoi

Kristofoi baanyɛ akase nii kɛjɛ enɛ mli, eyɛ mli akɛ amɛmiisumɔ ni amɛya amɛhiɛ fe henumɔŋ ekãafeemɔ kɛkɛ. Aabi ni amɛkase amɛ-Nuntsɔ, Yesu Kristo, ni bo Nyɔŋmɔ kitai atoi ni gbeyeishemɔ bɛ mli lɛ. (Hebribii 12:1-3) Biblia lɛ wieɔ shiɔ gbeyeilɔi ni joɔ Nyɔŋmɔ sɔɔmɔ naa foi lɛ. (Hebribii 10:39; Kpojiemɔ 21:8) Yɛ nakai beaŋ nɔŋŋ lɛ, Yehowa nuɔ wɔ su kɛ baŋ ni yeee emuu lɛ shishi, ni ele akɛ wɔbaanyɛ wɔfee esha yɛ bei komɛi amli loo wɔnaŋ ekãa ni he hiaa ni wɔkɛaafee esuɔmɔnaa nii kɛmɔ shi. (Lala 103:12-14) Mɛni mɔ ko baanyɛ afee kɛ gbeyeishemɔ tsi lɛ gbɛ koni ekafee nɔ ni ja gbɛ lɛ?

Esa akɛ Kristofonyo lɛ kɛ sɔlemɔ atsɔ ehe kɛya Nyɔŋmɔ ŋɔɔ kɛha hewalɛwoo koni enyɛ ekpee kaai anaa ni eya nɔ efee ŋwɛi suɔmɔnaa nii lɛ. Yehowa yelikɛbuamɔ he shiwoo ni nɔmimaa yɔɔ mli nɛɛ yɛ Biblia lɛ mli: “Lɛ ehaa mɔ ni egbɔjɔ lɛ hewalɛ, ni mɔ ni bɛ nyɛmɔ lɛ ehaa ehewalɛ faa. Obalahii ni eje nɔ lɛ, amɛgbɔjɔɔ ni etɔɔ amɛ, ni mɛi ni eshɛ obalahii tete lɛ, amɛgbeegbeeɔ shi; shi mɛi ni hiɛ ka Yehowa nɔ lɛ naa hewalɛ hee, amɛholeɔ amɛfiji anɔ tamɔ okropɔŋi, amɛjoɔ foi, ni etɔɔɔ amɛ, amɛnyiɛɔ hu, ni amɛgbɔjɔɔɔ.” (Yesaia 40:29-31) Adesai ni yeee emuu lɛ ateŋ mɛi pii ekpa anɔkwale ni nɛkɛ wiemɔi nɛɛ ji lɛ ashi, ni “amɛna hewalɛ kɛjɛ gbedemɔ mli.” (Hebribii 11:34) Enɛ he nɔkwɛmɔ nɔ kpakpa ji Kristofonyo bɔfo Paulo, ni ŋma akɛ: “Shi Nuntsɔ lɛ fi misɛɛ ni ewo mi hewalɛ, koni atsɔ minɔ ama shiɛmɔ lɛ nɔ mi, ni jeŋmaji lɛ fɛɛ anu.”—2 Timoteo 4:17.

Mɛi heei ni yɔɔ wiemɔ lɛ he miishɛɛ ni sumɔɔ ni amɛtsɔmɔ Yesu Kristo sɛɛnyiɛlɔi lɛ po baanyɛ akpa hewalɛwoo ni yeɔ buaa nɛɛ shi. Susumɔ South Africa nuu ko ni atsɛɔ lɛ Henry, ni eji esɔlemɔ lɛ shikatolɔ, ni shia bɛŋkɛ esɔfo lɛ he lɛ he okwɛ. Henry miitao anɔkwale lɛ. Yɛ bɔ ni ekɛ ehe ebɔ sɔlemɔ lɛ he eha lɛ fɛɛ sɛɛ lɛ, gbi ko lɛ ekpɛlɛ ni Yehowa Odasefoi kɛ lɛ akase Biblia lɛ yɛ shia ni aheee lɛ nɔ ko. Yɛ be ni sa mli lɛ ewie akɛ eesumɔ ni etsɔ Odasefonyo ni ebi ni atsɔɔ lɛ nɔ ni esa akɛ efee koni enine ashɛ oti nɛɛ nɔ. Atsɔɔ mli aha lɛ akɛ, klɛŋklɛŋ lɛ, esa akɛ eshi esɔlemɔ lɛ. (Kpojiemɔ 18:4) Akɛni osɔfo lɛ ji enaanyo kɛ ekutsoŋnyo hewɔ lɛ, Henry nu he akɛ enyɛŋ eŋma wolo akɛ eshi sɔlemɔ lɛ kɛkɛ, shi ehe baahia ni etsɔɔ sane lɛ mli hiɛ-kɛ-hiɛ. Ekɛ ekaa fee nakai.

Osɔfo lɛ naa kpɛ ehe kɛ hejɔmɔ, ni yɛ sɛɛ mli lɛ ekɛ osɔfoi agwabɔɔ lɛ sɛinɔtalɔ kɛ sɔlemɔ lɛ mlibii krokomɛi yasara Henry. Amɛmiisumɔ ni amɛle nɔ hewɔ ni eshi amɛ sɔlemɔ lɛ ni ebatsɔ jamɔ ko ni taakɛ amɛnuɔ shishi lɛ, amɛbɛ Nyɔŋmɔ mumɔ krɔŋkrɔŋ lɛ mlinyo lɛ. Henry tsɔɔ mli akɛ, “Klɛŋklɛŋ lɛ, mishe gbeyei akɛ maha amɛ hetoo, ejaakɛ amɛnaa minɔ hewalɛ babaoo be fɛɛ be. Shi misɔle miha Yehowa kɛha yelikɛbuamɔ, ni eye ebua mi ni mifa mihe nɛkɛ: ‘Yɛ majimaji ateŋ jamɔi lɛ fɛɛ mli lɛ, amɛteŋ namɔ pɛ kɛ Nyɔŋmɔ gbɛi, Yehowa, tsuɔ nii? Ani jeee Yehowa Odasefoi ni? Ani nyɛsusuɔ akɛ Nyɔŋmɔ baaŋmɛ amɛ gbɛ ni amɛhiɛ egbɛi lɛ ni ehaŋ amɛ emumɔ krɔŋkrɔŋ lɛ?’ ” Sɔlemɔ lɛ mli onukpai lɛ nyɛɛɛ ajie susumɔ ni tamɔ nɛkɛ naa. Akɛni Henry da Nyɔŋmɔ shi yɛ nilee kɛ hewalɛ ni ekɛha lɛ lɛ hewɔ lɛ, ekɛ ekaa fataa Yehowa Odasefoi ahe bianɛ yɛ shia kɛ shia sɔɔmɔ nitsumɔ lɛ mli.

Hɛɛ, anɔkwa Kristofonyo ni mɔ ko aaaji lɛ biɔ ekãa. Beni je nɛɛ naagbee bɛŋkɛɔ lɛ, hemɔkɛyeli he kaai baafa. Satan miisumɔ ni eshɔ naanɔ wala he hiɛnɔkamɔ ni yɔɔ naakpɛɛ lɛ kɛjɛ Nyɔŋmɔ tsuji adɛŋ kɛtsɔ emuuyeli mli ni amɛhiɛɔ amɛhaa Yehowa lɛ ni eeeku mli lɛ nɔ. (Okɛto Kpojiemɔ 2:10 he.) Shi esaaa akɛ wɔŋmɛɛɔ he. Kɛji akɛ wɔtee sɛɛ fioo yɛ gbeyeishemɔ hewɔ po lɛ, Yehowa baanyɛ aye abua wɔ ni wɔbayi wɔŋɛlɛ nɔ ekoŋŋ. Nyɛyaa nɔ nyɛkwɛa lɛ gbɛ kɛhaa hewalɛwoo koni nyɛyaa nɔ nyɛfea esuɔmɔnaa nii. Kaimɔ akɛ, mɔ ni bɔ loofɔji ni sheee gbeyei lɛ ji ekaafeemɔ ni sɛɛ efooo Jɛɛhe. Yɛ anɔkwale mli lɛ, esa akɛ anɔkwa Kristofoi “ana ekãa ni amɛkɛɛ akɛ: ‘Yehowa ji mi yelikɛbualɔ; misheŋ gbeyei. Mɛni gbɔmɔ baanyɛ aafee mi?’ ”—Hebribii 13:6, NW.