Yehowa Odasefoi ni Yɔɔ Jeŋ Fɛɛ Nigeria
NIGERIA hɔ kɔntɔŋ ko mli yɛ Afrika anaigbɛ shikpɔŋ ni efu kɛje kpo lɛ mli. Eka Gulf of Guinea lɛ nɔ yɛ hulu liamɔ loo equator lɛ kooyigbɛ tuuŋtu ni, emlibii fa fe akpekpei 88.a
Buu Mɔɔ Asafo lɛ Nigeria nitsumɔ he nine lɛ eje gbɛ egbala ejwɛŋmɔ kɛtee obalaŋtai lɛ anɔ waa yɛ sɔɔmɔ afii enyɔ ni eho nɛɛ amli. Nibii amlipɛimɔ ko ni afee yɛ Yehowa Odasefoi asafoi lɛ amli lɛ jie lɛ kpo akɛ mɛi ni je sanekpakpa lɛ shiɛmɔ shishi yɛ Nigeria yɛ 1992 lɛ ateŋ oha fɛɛ mli 80 ji mɛi ni eye kɛjɛ afii 10 kɛmiiya 20. Mɛi ni abaptisi amɛ yɛ afi lɛ mli lɛ ateŋ oha fɛɛ mli 63 jɛ afii ni atsɔɔ yɛ yiteŋgbɛ nɛɛ mli.
Obalahii kɛ Obalayei kɛ Amɛhe Ha Gbɛgbamɔ
Obalahii kɛ obalayei pii kɛ amɛhe miiwo be-fɛɛ shiɛmɔ nitsumɔ lɛ mli akɛ gbɛgbalɔi. Gbɛgbalɔ ko ni atsɛɔ lɛ Hannah kɛɛ: “Beni eshwɛ fioo ni mibagbe skul naa lɛ, miyasara mɛi ni yaa Gbɛgbamɔ Sɔɔmɔ Skul lɛ, ni mikɛ nyɛmimɛi yei onukpai enyɔ yakpe yɛ jɛmɛ. Mikɛɛ mihe akɛ, ‘Kɛ mɛi enyɔ nɛɛ baanyɛ afee gbɛgbalɔi lɛ, mɛni hewɔ minyɛŋ?’
“No hewɔ lɛ, beni migbe skul naa lɛ, mibatsɔ gbɛgbalɔ. Nyɔji etɛ sɛɛ lɛ, mikɛ Josephine ni eye afii 26 ni jaa wɔŋ lɛ kpe. Ekɛɛ mi akɛ: ‘Nyɛ Yehowa Odasefoi lɛ nyɛhiii. Nyɛyeee Blonya ni asaŋ nyɛkɛ sɛbɛi tsuuu nii.’ Miha lɛ hetoo akɛ, kɛ eŋmɛ mi gbɛ ni mikɛ lɛ kase Biblia lɛ, ebaale nɔ hewɔ ni wɔkɛ wɔhe wooo nakai nibii lɛ amli lɛ. Efɔ mi nine koni miba eŋɔɔ ekoŋŋ. Etsɛɛɛ ni ebɔi kpeei baa, ni efee tsakemɔi pii yɛ eshihilɛ mli. Ni abaptisi lɛ yɛ December 1990 mli. Josephine batsɔ gbɛgbalɔ kɛjɛ August 1991 kɛbaa. Beni etee Gbɛgbamɔ Sɔɔmɔ Skul lɛ yɛ nyɛsɛɛ afi lɛ mli lɛ, ekɛ mi tsɔɔ enanemɛi klasbii lɛ akɛ emumɔŋ nyɛ ji mi!”
Video lɛ kɛ Maŋtsɛyeli Asa Lɛ
Asafo lɛ video mfonirii lɛ ekome ye bua asafo bibioo ko ni amɛnine shɛ shikpɔŋ nɔ kɛha Maŋtsɛyeli Asa. Beni amɛtaoɔ shikpɔŋ ko amɛhe lɛ, nyɛmimɛi hii ejwɛ tee Onojie, ni ji akutso lɛ maŋkralo lɛ ŋɔɔ. Ekɛ shikpɔŋ ko ni ejara ji naira 20,000 ($1,025, U.S.) ha amɛ. Asafo lɛ nyɛŋ awo shika ni fa nakai, ejaakɛ shiɛlɔi 17 pɛ yɔɔ ni baanyɛ aye abua yɛ tsu lɛ maa mli. Onojie lɛ kɛɛ akɛ ebaatao he kroko eha amɛ.
Nyɔji komɛi asɛɛ lɛ, asafo lɛ mli onukpai lɛ ateŋ mɔ kome tee Onojie lɛ shia. Onojie lɛ miikwɛ be mli ni awó lɛ maŋkralo lɛ yɛ video nɔ. Asafoŋ onukpa lɛ kɛɛ lɛ akɛ: “Miyɛ video ko ni masumɔ ni ona. Atsɛɔ lɛ Jehovah’s Witnesses—The Organization Behind the Name.”
Yɛ sɛɛ mli lɛ, asafoŋ onukpa lɛ bi Onojie lɛ nɔ ni esusuɔ yɛ video lɛ he. Onojie lɛ kɛɛ: “Mikwɛ mfoniri lɛ shii enumɔ.” Asafoŋ onukpa lɛ gbala Onojie lɛ jwɛŋmɔ kɛtee Maŋtsɛyeli Asai ni ena yɛ video lɛ mli lɛ anɔ ni etsɔɔ mli akɛ asafo ni yɔɔ emaŋ lɛ mli lɛ miitao ni amɛma nɔ ko ni tamɔ nakai nɔŋŋ. Kɛkɛ ni onukpa lɛ bi lɛ kɛji asafo lɛ baanyɛ ahe shikpɔŋ ko ni bɛŋkɛ shikpɔŋ bibioo ko ni asafo lɛ yɔɔ momo lɛ masɛi lɛ. Onojie lɛ ha hetoo akɛ: “Nakai nɔŋŋ misusu beni mikwɛ video lɛ nyɛ gbɛkɛ lɛ.” Kɛkɛ ni Onojie lɛ susu shikpɔŋ ni elɛɛmɔ dalɛ shɛɔ mitai 6 ni ka shikpɔŋ ni asafo lɛ yɔɔ momo lɛ masɛi lɛ eha amɛ. Ekɛɛ amɛ akɛ: “Nyɛbaanyɛ nyɛkɔ enɛ. Yɛ ekɛlɛ gbɛfaŋ lɛ nyɛŋɔa bɔ ni aaahia nyɛ. Nyɛtoa shikpɔŋ lɛ he woji lɛ ahe gbɛjianɔ koni mikɛ miwaonaa gbɛi awo shishi.”
[Shishigbɛ niŋmai]
a Kɛha maŋ lɛ he saji krokomɛi lɛ, kwɛmɔ 1994 Calendar of Jehovah’s Witnesses.
[Akrabatsa ni yɔɔ baafa 9]
MAŊ LƐ HE SANE
1993 Sɔɔmɔ Afi
YIFALƐ NI FE FƐƐ NI YAA SHIƐMƆ: 174,582
EMLIJAA: Odasefonyo 1 kɛha 507
MƐI NI BA KAIMƆ LƐ: 473,245
GBƐGBALƆI AMLIJAA: 19,777
BIBLIA KASEMƆI AMLIJAA: 242,028
MƐI Ni ABAPTISI: 8,888
ASAFOI Sɔrɔtoi AYIBƆ: 3,289
NITSUMƆ He NINE: BENIN CITY, EDO STATE