Mɛni Hewɔ Odasefoi lɛ Yaa Nɔ Amɛsaraa Mɛi Lɛ?
‘NÁA amɛ ekoŋŋ! Shi otsii fioo komɛi pɛ nɛ ni amɛba biɛ!’ Ani nakai ji nɔ ni baa ojwɛŋmɔ mli kɛ Yehowa Odasefoi ba oŋɔɔ? Yehowa Odasefoi yaa mɛi akpekpei abɔ ŋɔɔ daa ŋmɛnɛ. Ooobi akɛ, Mɛni hewɔ ni amɛmiaa amɛhiɛ nakai yɛ be mli ni amɛle akɛ mɛi babaoo yɛ amɛ diɛŋtsɛ amɛjamɔ loo amɛbɛ he miishɛɛ lɛ? Esa akɛ aha nakai sanebimɔ lɛ hetoo.
Gbɛnaa Nii Kã Amɛnɔ yɛ Nyɔŋmɔ Hiɛ
Yehowa Odasefoi ekase kɛjɛ Ŋmalɛi lɛ amli akɛ kɛjɛ afi 1914, ní Jeŋ Ta I je shishi kɛbaa nɛɛ, jeŋ shihilɛi miiha Biblia gbalɛi ni kɔɔ ŋmɛnɛŋmɛnɛ je lɛŋ nibii agbɛjianɔtoo lɛ naagbee kɛ Nyɔŋmɔ Maŋtsɛyeli ni baa ni baaye shikpɔŋ nɛɛ nɔ lɛ he lɛ miiba mli. Etamɔ nɔ ni awuiyeli, lashishwiemɔ, kɛ hetsɛ̃ ni etee nɔ aaafee afii oha sɔŋŋ lɛ eha adesai kɛ amɛ naagbai anaa tsabaa ni maŋkwramɔ kɛbaaha amɛ lɛ teŋ ejɛkɛ kwraa fe tsutsu ko. Tawuui sɔrɔtoi kɛ hegbeyeiwoo ni baa adesai aweku lɛ nɔ lolo lɛ ji odaseyeli ni tsɔɔ akɛ adesai anɔyeli nyɛɛɛ atsake gbɔmɛi atsuii, jwɛŋmɔi, kɛ amɛ jeŋba. Saji ni tee nɔ tsutsu ko lɛ he mlifu-namɔ ni etsɛ waa lɛ yaa nɔ efiteɔ wekukpaai ni ka maŋbii, hewolo nɔ sui sɔrɔtoi, kɛ jamɔ kui ateŋ lɛ. Enɛ ji anɔkwale yɛ hei ni yɔɔ shɔŋŋ diɛŋtsɛ tamɔ Afghanistan, India, Middle East, Northern Ireland, South Africa, kɛ tsutsu Yugoslavia lɛ ahe. Belɛ, mɛni ji tsabaa pɛ ni hiɔ shi daa?
Mɛni Kanyaa Odasefoi lɛ?
Yehowa Odasefoi yɔseɔ akɛ tsabaa ni jɛ Nyɔŋmɔ ŋɔɔ—e-Maŋtsɛyeli ni ewo shi yɛ he ni Kristo Yesu baaye nɔ lɛ—ji tsabaa pɛ ni baanyɛ atsu he nii. Yesu kɛ nakai Maŋtsɛyeli nɔyeli lɛ he nibimɔ po fata esɔlemɔ nɔkwɛmɔ nɔ ni ale waa lɛ he akɛ: “No hewɔ lɛ nyɛsɔlea nɛkɛ: ‘Wɔ-Tsɛ ni yɔɔ ŋwɛi, ogbɛi lɛ he atse; omaŋtsɛyeli lɛ aba; afee nɔ ni osumɔɔ yɛ shikpɔŋ lɛ nɔ, taakɛ afeɔ yɛ ŋwɛi lɛ.’ ” Odasefoi heɔ amɛyeɔ akɛ nɛkɛ sɔlemɔ nɛɛ miibi diɛŋtsɛ koni Nyɔŋmɔ kɛ ehe awo adesai asaji amli.—Mateo 6:9, 10.
No hewɔ lɛ mɛni hewɔ Yehowa Odasefoi nuɔ he akɛ ehe miihia ni amɛya shia-kɛ-shia daa koni amɛbɔ mɔdɛŋ ni amɛkɛ nakai shɛɛ sane lɛ aha? Yɛ famɔi enyɔ komɛi ni Yesu ma nɔ mi lɛ ahewɔ, akɛ: “ ‘Suɔmɔ Nuŋtsɔ [Yehowa, NW] o-Nyɔŋmɔ lɛ, kɛ otsui muu lɛ fɛɛ kɛ osusuma muu lɛ fɛɛ kɛ ojwɛŋmɔ muu lɛ fɛɛ.’ Kitai lɛ amli otu kɛ ewulu nɛ. Ni nɔ ni nyiɛ sɛɛ lɛ tamɔ no, akɛ, ‘Suɔmɔ onaanyo tamɔ bɔ ni osumɔɔ bo diɛŋtsɛ ohe.’ ”—Mateo 22:37-39.
Odasefoi miisumɔ ni amɛná Nyɔŋmɔ jɔɔmɔ, ni akɛni amɛmiisumɔ amɛnanemɛi hewɔ lɛ, amɛmiisumɔ ni amɛnanemɛi lɛ ana jɔɔmɔ ni tamɔ nakai nɔŋŋ. No hewɔ lɛ, be mli ni amɛnyiɛɔ Yesu nɔkwɛmɔ nɔ lɛ sɛɛ lɛ, amɛnuɔ he akɛ suɔmɔ ni pɛsɛmkunya bɛ mli lɛ kanyaa amɛ koni amɛya amɛnanemɛi aŋɔɔ. Amɛmiisumɔ ni kɛ hoo lɛ amɛkɛ hegbɛ akɛ aaale nɔ ni ‘miishɛɛ Nyɔŋmɔ lɛ’ ewo adesai ni feɔ toiboo lɛ ashi yɛ he ni kɔɔ shikpɔŋ ni aha enɔ etse lɛ he lɛ aha amɛ.—1 Timoteo 1:11; 2 Petro 3:13.
Kristofonyo Paulo ni ji maŋsɛɛ sanekpakpa shiɛlɔ lɛ he Nyɔŋmɔ shiwooi lɛ anɔ eye ni no hewɔ ni enyɛ eŋma akɛ: “Paulo, ni ji Nyɔŋmɔ tsulɔ, kɛ Yesu Kristo bɔfo hu yɛ Nyɔŋmɔ halamɔbii ahemɔkɛyeli kɛ Nyɔŋmɔ-jamɔ naa anɔkwale lɛ he nilee lɛ naa, yɛ naanɔ wala lɛ he nɔhiɛkamɔ lɛ naa, nɔ̃ wala ni Nyɔŋmɔ ni maleee lɛ wo shi eha dani abɔ jeŋ bei lɛ.” Hɛɛ, Nyɔŋmɔ, “ni maleee lɛ,” “wo shi” eha naanɔ wala kɛha mɛi ni kɛ heshibaa taoɔ akɛ amɛaale lɛ ni amɛsɔmɔ lɛ lɛ.—Tito 1:1, 2; Zefania 2:3.
Ani Awoɔ Odasefoi lɛ Nyɔmɔ?
Mɛi komɛi ewie yɛ gbɛ ni ejaaa nɔ yɛ bei komɛi amli akɛ awoɔ Odasefoi lɛ anyɔmɔ yɛ amɛsɔɔmɔ nitsumɔ lɛ hewɔ. Jwɛŋmɔ ni tamɔ nɛkɛ ejaaa kwraa! Amɛkɛ Paulo wiemɔi ni ekɛha asafo ni yɔɔ Korinto lɛ tsuɔ nii kɛ hiɛdɔɔ akɛ: “Wɔjeee mɛi ni hɔ̃ɔ Nyɔŋmɔ wiemɔ lɛ, taakɛ mɛi pii feɔ lɛ, shi moŋ anɔkwayeli mli wɔjɛɔ, hɛɛ, taakɛ ejɛ Nyɔŋmɔ ŋɔɔ kɛba, yɛ Nyɔŋmɔ jwɛŋmɔ naa, ni kɔɔ Kristo he lɛ naa wɔwieɔ yɛ.”—2 Korintobii 2:17, NW.
Jamɔ mli hiɛnyiɛlɔi komɛi shiɛɔ koni awo amɛ ehe nyɔmɔ, kɛ eji nyɔmɔwoo kɛha jamɔŋ nifeemɔi loo kɛha amɛshiɛmɔ ni amɛtsuɔ he nii yɛ TV nɔ ni amɛkɛtaoɔ shika lɛ hewɔ. Jamɔi pii yɛ osɔfoi akuu ni amɛwoɔ amɛ nyɔmɔ.
Nɔ ni tamɔɔɔ nakai lɛ, Odasefoi lɛ bɛ osɔfoi ni amɛwoɔ amɛ nyɔmɔ. Mɛi pii lɛ, hiɛsɔɔ ni amɛnaa lɛ tsirɛɔ amɛ ni amɛjɛɔ amɛsuɔmɔ mli ni amɛyeɔ too. Kɛkɛ lɛ akɛ shika nɛɛ ewo shika ni afiteɔ yɛ jeŋ muu fɛɛ shiɛmɔ nitsumɔ lɛ he lɛ he nyɔmɔ. Odasefoi lɛ kɛ amɛ nibii, kɛ amɛbe kɛ hewalɛ tsuɔ nii yaka koni amɛkɛ ŋmɛlɛtswai akpekpei abɔ atsu nii daa afi yɛ Nyɔŋmɔ sɔɔmɔ mli akɛ nɔ ni kɛ Yesu ŋaawoo lɛ kpaa gbee, akɛ: “Yaka nyɛná, yaka nyɛŋɔhaa.” No hewɔ lɛ, amɛtsɔɔ mɛi ni yɔɔ he miishɛɛ lɛ nii kɛtsɔɔ shia-kɛ-shia Biblia mli nikasemɔ nɔ.—Mateo 10:8; 28:19, 20; Bɔfoi lɛ Asaji 20:19, 20.
Anɔkwa saji lɛ tsɔɔ akɛ akɛ aŋkroaŋkroi lɛ, Yehowa Odasefoi bɛ shika-taomɔ he yiŋtoo ko kɛha asafoi ni amɛyɔɔ mli lɛ, loo kɛha Buu Mɔɔ Asafo lɛ. Awooo mɔ ko mɔ ko nyɔmɔ yɛ shia-kɛ-shia ni eyaa lɛ hewɔ. Belɛ mɛɛ gbɛ nɔ atsɔɔ akɛ shika fĩɔ nitsumɔ lɛ sɛɛ mɔ? Afeɔ enɛ kɛtsɔɔ too ni jɛɔ mɛi ni yɔɔ je lɛŋ hei sɔrɔtoi fɛɛ ni hiɛ sɔɔ enɛ tsumɔ he lɛ aŋɔɔ kɛbaa lɛ nɔ. Aheee shika kɛjɛɛɛ mɔ ko dɛŋ kɔkɔɔkɔ.
Hewalɛ ni Amɛ Odaseyeli lɛ Naa yɛ Mɛi Anɔ
Ani maŋbii lɛ ena amɛle Odasefoi lɛ a-shia-kɛ-shia sɔɔmɔ nitsumɔ kɛ trukaa odaseyeli lɛ he sane kwraa? Odaseyeli ni yɔɔ adafitswaa woji kɛ niŋmaa amli haa nakai sanebimɔ lɛ yaa nɔ ejijieɔ kɛ hetoo akɛ, hɛɛ. Atsi Yehowa Odasefoi agbɛi ta yɛ TV nifeemɔi kɛ sinii amli ni miitsɔɔ mɔ ko ni miishi shinaa ko sɛɛ. Atɛ̃ŋ Odasefoi lɛ yɛ mfonirii ni akɛgbaa nibii ahe saji lɛ amli. Ale amɛnii ni amɛtsuɔ kɛ ekãa lɛ jogbaŋŋ aahu akɛ mfoniri-tɛŋlɔi ni yɔɔ je lɛŋ hei sɔrɔtoi fɛɛ lɛ wieɔ Yehowa Odasefoi ahe yɛ saji amli. Enɛɛmɛi baafee tamɔ hefɛoyeli nibii moŋ, shi bei pii lɛ edamɔ anɔkwa sane ni ja lɛ nɔ—akɛ ale Odasefoi jogbaŋŋ yɛ shia-kɛ-shia shiɛmɔ ni amɛyaa nɔ amɛkɛ amɛhe woɔ mli daa lɛ hewɔ.—Bɔfoi lɛ Asaji 20:20.
Mfoniri ko ni atɛŋ nyɛsɛɛ nɛɛ tsɔɔ nuu ko ni miikwɔ gɔŋ koni eyana “guru” ko. Ekɛɛ akɛ: “Gbaa mi naakpɛɛ nibii ni baaba lɛ he saji!” Te “guru” lɛ ha hetoo eha tɛŋŋ? “Ha ni wɔkwɛ . . . Hɔmɔ, tsɛŋemɔ helai, kɛ shikpɔŋ-hosomɔi baaba. Hulu aaatsɔ duŋ, ni nyɔŋtsere aaatsɔ lá.” Nibilɔ lɛ bi akɛ: “Mɛni ji sanekpakpa lɛ?” Ni “guru” lɛ ha hetoo akɛ: “Nyɔŋmɔ aaatsumɔ hiɛaŋ yaafonui fɛɛ . . . ni gbele bɛ dɔŋŋ ni ŋkɔmɔyeli ko kɛ nɔnaa ko hu bɛ dɔŋŋ!” Saralɔ lɛ bi akɛ: “Te ofee tɛŋŋ ole nibii ni tamɔ nɛkɛ?” Mɛɛ hetoo ekɛha? “Mɔ ko nyɛŋ ajo Yehowa Odasefoi anaa foi!” Ni Yehowa Odasefoi ni mɔ ko nyɛɛɛ ajo amɛnaa foi lɛ kɔɔ mfoniri-tɛŋlɔ lɛ diɛŋtsɛ hu he!
Nɔ ni he hiaa yɛ mfoniri ni tamɔ enɛ kɛ ekrokomɛi ahe lɛ ji akɛ, jeee bɔ ni Odasefoi lɛ yaa mɛi aŋɔɔ kpitiokpitio lɛ pɛ kɛkɛ ejieɔ lɛ kpo etsɔɔ, shi ejieɔ bɔ ni amɛ shɛɛ sane lɛ eteee shi ewooo ehe lɛ hu kpo etsɔɔ. Yɛ ekukufoo mli lɛ, mfoniri-tɛŋlɔ lɛ kɛ amɛ shia-kɛ-shia lɛ fa titri he sane ha ni etsɛ ŋmalɛi hu ekɛfi sɛɛ.—Okɛto Mateo 24:7, 29; Kpojiemɔ 21:3, 4 he.
Anɔkwale ni eji akɛ mɛi pii kpooɔ amɛshɛɛ sane lɛ ejeee Odasefoi lɛ anijiaŋ wui loo ni eeeha ekãa ni amɛyɔɔ lɛ aba shi. Bɔfo Petro bɔ kɔkɔ akɛ: “Naagbee gbii lɛ anɔ lɛ hefɛoyelɔi aaaba kɛ hefɛoyeli, mɛi ni aaanyiɛ yɛ amɛ diɛŋtsɛ amɛkɔnɔi lɛ anaa, ni amɛaakɛɛ: ‘Nɛgbɛ ebaa lɛ he shiwoo lɛ yɔɔ? Ejaakɛ kɛjɛ beyinɔ ni tsɛmɛi lɛ tee yawɔwɔi nɛɛ, bɔ ni nibii yɔɔ kɛjɛ jeŋbɔɔ shishijee mli lɛ, nakai nɔŋŋ amɛyɔɔ nɛɛ.’ ” Yɛ enɛ fɛɛ sɛɛ lɛ, akɛni suɔmɔ kanyaa amɛ hewɔ lɛ, Odasefoi lɛ yaa nɔ amɛyasaraa amɛnanemɛi, ni amɛbaaya nɔ amɛfee nakai aahu kɛyashi be ni Nyɔŋmɔ kɛ ŋmɛnɛŋmɛnɛ nibii agbɛjianɔtoo ni ekpɔtɔ nɛɛ baaba naagbee.—2 Petro 3:3, 4.
Yesu kɛɛ akɛ yɛ naagbee gbii lɛ amli lɛ, esa akɛ atsɔ hiɛ ashiɛ sanekpakpa lɛ. Kwɛmɔ nikasemɔi enyɔ ni nyiɛ sɛɛ lɛ, kɛha nɔ hewɔ kɛ bɔ ni abaashiɛ sanekpakpa lɛ atsɔɔ aha lɛ ahe saji amlipɛimɔ ni yaa hiɛ.—Marko 13:10.
[Mfoniri ni yɔɔ baafa 9]
Yehowa Odasefoi bɛ osɔfoi akuu ni awoɔ amɛ nyɔmɔ—sɔɔlɔi ni kɛ amɛhe eha ji amɛ fɛɛ