Maŋtsɛyeli Jajelɔi Bɔ Amaniɛ

“Mɔɔ ni Wa Ji Yehowa Gbɛi Lɛ”

BE NI bɛ shiŋŋ mli wɔyɔɔ lɛ. Wɔshihilɛ ni tamɔ nɔ ni yɔɔ shiŋŋ lɛ nyɛɔ etsakeɔ trukaa, ni mɛi komɛi yajeɔ amanehulu shihilɛ ni mli wa mli dani amɛhiɛ baa amɛhe nɔ, ni kɔkɔbɔɔ ko tsɔɔɔ hiɛ. Oshara baanyɛ ajɛ maŋkwramɔŋ basabasa-feemɔ, awuiyeli tutuamɔ, adebɔɔ mli oshara, aloo hela ni mli wa mli aba. Bɔ fɛɛ bɔ ni eji lɛ, nɛgbɛ esa akɛ Kristofonyo atsɔ ehiɛ kɛya kɛ eshihilɛ yaje oshara mli?

David, maŋsɛɛ sanekpakpa shiɛlɔ ko ni yɔɔ Buu Mɔɔ Asafo lɛ nitsumɔ he niji lɛ ekome mli lɛ kase nakai sanebimɔ lɛ hetoo kɛjɛ niiashikpamɔ ko ni yɔɔ gbeyei mli. Ákɛ tsɔne kudɔlɔ lɛ, eje kpo gbi ko leebi maaŋkpa koni eyahole Betelbii komɛi (mɛi ni kɛ amɛhe eha, ni amɛwɔɔɔ nitsumɔ he nine) lɛ. No mli lɛ duŋ ewo lolo. Eyawo Rosalía ni eetsɔ polisifoi anitsumɔ he lɛ he kɛmiiho, kɛkɛ ni enu klɛŋklɛŋ tu gbɛɛmɔ he.

Kɛkɛ ni nibii ba oyayaayai. Enu gbɛɛmɔ ko he tamɔ la-fɛmɔ gbɛɛmɔ wulu ko ni eyoo akɛ kɔɔyɔɔ ni yɔɔ elɔle lɛ tai lɛ ekome mli lɛ miiho. Trukaa nɔŋŋ kɛkɛ ni ena asraafonyo ko damɔ gbɛ lɛ teŋ tuuŋtu ni ehiɛ tu ekɛmiitsɔɔ ehiɛ tɛɛ. Nibii etɛ tsara nɔ ba yɛ be kome too mli: Tuŋtɛi babaoo ni amɛtswia lɛ fite Jeep tsɔne ni amɛta mli lɛ fa kome, ni ejwara ashwishwɛi lɛ fɛɛ; David kɛ Rosalía tee amɛhe yɛ mli; asraafonyo lɛ tswa etu lɛ kɛtsɔ hiɛ ashwishwɛ lɛ mli yɛ yitso ŋɛlɛ nɔ.

Beni amɛyaa nɔ amɛtswiaa Jeep lɛ tu lolo lɛ, David bɔ mɔdɛŋ ni ewa tsɔne lɛ ema shi beni amɛdɔrɔ amɛmli lolo yɛ mli. David kɛ Rosalía fɛɛ susu akɛ amɛbaagboi. Amɛsɔle waa amɛha Yehowa, ni amɛbi lɛ ni ebu amɛhe. Yɛ sɛɛ mli lɛ, Rosalía wie akɛ esusu bɔ ni eweku lɛ baafee amɛha, kɛji amɛnu akɛ egbo lɛ he!

Amɛhiɛ Kamɔ Lolo!

Yɛ naagbee lɛ, tu kɛ ashwishwɛ ni jwaraa gbɛɛmɔ lɛ kpa, ni David fo ehe ni ekwɛ Rosalía. Beni ena akɛ la fioo miiho yɛ esɛɛ lɛ, eha etsui fã waa. Shi ashwishwɛ ni jwara lɛ eko ji nɔ ni etsu lɛ, shi jeee tuŋtɛ ni. Ashwishwɛ ni jwara lɛ hu ekomɛi efolɔ enakutsei anaa, ni kɛ jeee enɛɛmɛi lɛ, kulɛ nɔ ko kwraa esaaa ehe.

Hii ni wo asraafoi atadei ni amɛkɛ mama yɛŋ efimɔ amɛnine shi ba Jeep lɛ he ni amɛfamɔ amɛ akɛ amɛje kpo ni amɛhole amɛniji anɔ. Mɔ kome, ni tamɔ onukpa yɛ amɛteŋ lɛ, tsɔ ehiɛ eha asraafonyo lɛ ni ekɛɛ: “Ani akɛɛɛ nyɛ akɛ nyɛkatswa maŋbii foji atu.” Asraafonyo lɛ jie enaa, ni ekɛɛ akɛ enu tu gbɛɛmɔ he, ni esusu akɛ atswa kɛjɛ Jeep lɛ mli.

Beni David tsɔɔ akɛ Yehowa Odasefoi ji ekɛ Rosalía fɛɛ lɛ, bɔ ni amɛfee yɛ he lɛ hi jogbaŋŋ. Etsɔɔ amɛ nɔ ni etsuɔ, shi asraafoi lɛ miisumɔ lolo akɛ amɛtsi amɛnaa. Eka shi faŋŋ akɛ, nɔ ni eba ji akɛ, nakai gbi lɛ leebi maaŋkpa mli lɛ, asraafoi akuu ko ebutu nɔyeli lɛ ekaa naa, ni nɛkɛ asraafoi nɛɛ miihe amɛshɔ̃ polisifoi anitsumɔ he lɛ beni David kɛ Rosalía hoɔ kɛ Jeep lɛ.

Rosalía tsui efã waa shi ekɛ ekaa fee dioo beni David kpaa amɛ fai ni amɛŋmɛɛ amɛhe lɛ. Yɛ naagbee lɛ, aŋmɛ amɛ gbɛ ni amɛya—shi Jeep lɛ fataaa he. Amɛnyiɛ kɛtee gbɛ wulu ko ni bɛŋkɛ jɛmɛ lɛ he ni amɛyafo bɔs kɛtee nitsumɔ he nine lɛ, ni akwɛ Rosalía yɛ he ni akwɛɔ mɛi ni edara lɛ yɛ lɛ.

Hewalɛ ni Sɔlemɔ Yɔɔ

David kase nɔ ko kɛjɛ niiashikpamɔ lɛ mli—kaabu hewalɛ ni sɔlemɔ ni ekaa yɔɔ mli lɛ yɔɔ lɛ akɛ nɔ ko bibioo, ni ohiɛ akakpa nɔ akɛ bei pii lɛ ekaa ni okɛaajie ohe kpo akɛ Yehowa Odasefoi ateŋ mɔ ko lɛ feɔ hebuu. Eeenyɛ efee anɔkwale diɛŋtsɛ akɛ “mɔɔ ni wa ji Yehowa gbɛi lɛ; no mli jalɔ shaa foi kɛyaa, ni ehiɔ shi shweshweeshwe.”—Abɛi 15:29; 18:10; Filipibii 4:6.

[He ni Mfoniri ni yɔɔ baafa 19 lɛ Jɛ]

Fotografía de Publicaciones Capriles, Caracas, Venezuela