Wala Nu Lɛ?

MƆ NI nuɔ lɛ, ha ni ekɛɛ: ‘Ba!’ Ni mɔ ni kumai yeɔ lɛ lɛ, ha ni eba, ni mɔ ni sumɔɔ lɛ, ha ni ebayɛ wala nu lɛ yaka.”(Kpojiemɔ 22:17) “Wala nu”​—no tsɔɔ gbɛjianɔ fɛɛ ni Nyɔŋmɔ eto kɛha wɔyiwalaheremɔ, ni damɔ Yesu Kristo kpɔmɔ afɔleshaa lɛ nɔ. Nɛkɛ gbɛjianɔtoi nɛɛ yɛ, ni akɛhaa yaka hu. Mɛɛ mlihilɛ ni yɔɔ naakpɛɛ yɛ wɔ-Nyɔŋmɔ lɛ gbɛfaŋ enɛ ji nɛkɛ! Shi, mɛni hewɔ akɛ nu feɔ he mfoniri lɛ?

Ojogbaŋŋ, nu diɛŋtsɛ haa tsei kɛ jwɛi nyɛɔ amɛkwɛ̃ɔ yɛ sũ mli, ni no haa adesai awala nyɛɔ ehiɔ shi. Kɛ nu bɛ lɛ, kwɛ̃ɛnii awala, kɛ agbɛnɛ hu adesai awala nyɛŋ ahi shi. Kɛfata he lɛ, nu heɔ ogbɔmɔtso lɛ mlijaa oha mli 65. Hewalɛnamɔ he nilelɔi komɛi po jieɔ yi akɛ esa akɛ wɔha nakai nu falɛ lɛ ahi wɔmli daa kɛtsɔ nu ni aaashɛ tɔi ejwɛ ni wɔɔnu daa gbi lɛ nɔ. Omligbɛ wala shihilɛ nifeemɔi fɛɛ​—kɛjɛ niyenii gbɛlɛmɔ kɛyashi ejiemɔ nɔ​—fɛɛ hiaa nu. Kɛ ohi shi otsi ni onuuu nu lɛ, obaagbo.

Nakai nɔŋŋ, “wala nu” lɛ hu haa mumɔŋ wala hiɔ shi ni ewoɔ lɛ hewalɛ. Kɛ wɔkpoo wala nu lɛ, no lɛ wɔbɛ wɔsɛɛ be ni baahi shi kɛya naanɔ. (Yohane 3:36) Kɛ wɔkpɛlɛ nɔ lɛ, wɔbaanyɛ wɔna naanɔ ewala. Ebɛ naakpɛɛ akɛ Samariayoo lɛ kɛ miishɛɛ babaoo kpɛlɛ nɔ beni Yesu kɛɛ lɛ akɛ: “Mɔ ni nuɔ nu ni mi maha lɛ lɛ eko lɛ, kumai yeŋ lɛ dɔŋŋ kɛaatee naanɔ; shi moŋ, nu ni maha lɛ lɛ, aaatsɔ nu hiŋmɛi ni baa kɛyaa naanɔ wala mli yɛ emli”! (Yohane 4:14) Eba akɛ wɔ hu wɔkɛ ekaa kɛ miishɛɛ ni tamɔ nakai nɔŋŋ aaatao wala nu lɛ ni wɔyɛ eko yaka.

[He ni Mfoniri ni yɔɔ baafa 32 lɛ Jɛ]

Garo Nalbandian