Ani Emi Yona?

Biblia lɛ kɛɔ wɔ akɛ, Yona ni ji Yehowa gbalɔ ni hi shi yɛ afii ohai nɛɛhu D.Ŋ.B. lɛ jo nitsumɔ ko naa foi, ni ebote lɛlɛ mli. Lɛlɛ kudɔlɔi lɛ shɛ Yona amɛfɔ ŋshɔ lɛŋ mli beni amɛfaa gbɛ kɛ emli ahum yɛ Mediteranea ŋshɔ lɛ mli lɛ. “Yehowa esaa ŋshɔŋ loo kpeteŋkpele ko eto ni emi Yona. Ni Yona hi ŋshɔŋ loo lɛ musuŋ jetsɛremɔ kɛ jenamɔ gbii etɛ.”​—Yona 1:​3–2:1

Mɛi komɛi kɛɛ akɛ, ‘Enyeŋ eba lɛ nakai! Bɔɔ nɔ ko bɔɔ nɔ ko bɛ ŋshɔ lɛ mli ni baanyɛ emi gbɔmɔ.’ Shi bonso wulu kɛ edaaŋ nyanyɔjii loo ogboole agbo ko ni yeɔ gbɔmɔ lɛ baanyɛ ami gbɔmɔ. National Goegraphic (December 1992) kɛ loo agbo kroko hu ni baanyɛ emi gbɔmɔ lɛ hu he sane ba nyɛsɛɛ nɛɛ ni ji​—bonso ni tamɔ ogboole lɛ. Ogboole ni da fe fɛɛ lɛ baanyɛ ada aaafee ninetalɔ 70 yɛ ekɛlɛ gbɛfaŋ ni etsiimɔ baanyɛ afee tɔn 70.

“Bɔ ni bonso ni tamɔ ogboole lɛ musuŋ niyenii agbɛlɛmɔ yɔɔ lɛ haa anuɔ Yona sane lɛ shishi. Ewaaa akɛ ooofee ohe mfoniri ni oleee ohe be, ni bonso ni tamɔ ogboole miigbala bo kɛmiiwo edaa wulu lɛ mli . . . . Bonso ni tamɛ ogboole ni edako tsɔ po daŋŋ hatoo lɛ baanyɛ ami Yonai enyɔ oya.”

Bonso ni tamɔ ogboole lɛ yeɔ kooloi loo tsei bibiibii komɛi, ni “tsɔɔ esɛ̃ kpaa lɛ mli kɛboteɔ emusu asa ni mli lɛɛ ni eyɔɔ tswaa ni ji emusu kotoku lɛ mli.” Ni kɛlɛ, te aaafee tɛŋŋ ni mɔ ko aaaje kpo kɛaajɛ emli hu? National Geographic lɛ kɛɛ akɛ: “Ogboolei yɛ gbɛ ni amɛtsɔɔ nɔ amɛjieɔ nibii wuji ni tamɔ nɔ ni ehii gbɛlɛmɔ ni amɛmiɔ lɛ amɛshweɔ shi blɛoo . . . Ogboole lɛ baanyɛ ashwe emusuŋ nibii lɛ eshie kɛtsɔ edaaŋ . . . No hewɔ lɛ, obaanyɛ oje kpo blɛoo kɛjɛ emli ni yɔɔ trotro nɛɛ mli, ni ohe fɛɛ miishãmɔ, shi ekolɛ okase nɔ ko kɛjɛ emli.”

Eyɛ mli akɛ anaaa bonsoi ni tamɔ ogbolei yɛ Mediteranea ŋmɛnɛ moŋ, shi anaa amɛ yɛ New York kooyigbɛ Maŋ lɛ mli tɔ̃ɔ. Ani amɛ yɛ Mediteranea yɛ Yona gbii lɛ amli? Namɔ baanyɛ ale diɛŋtsɛ? Biblia lɛ etsɔɔɔ bɔɔ nɔ pɔtɛɛ ni Yehowa kɛtsu nii lɛ, shi Yesu diɛŋtsɛ ma nɔ ni akɛ Yona sane lɛ yɛ mli anɔkwale.​—Mateo 12:​39, 40.

[He ni Mfoniri ni yɔɔ baafa 32 lɛ Jɛ]

Norbert Wu/Peter Arnold Inc.