Ani Otamɔ Enɛɛmɛi Ateŋ Ekome?

Ehi akɛ ootsɔ jata gbi kome fe ni ooofee too gwantɛŋ bi afii oha. Akɛɛ Benito Mussolini, be ko Italia nɔyelɔ yiwalɔ lɛ wie nakai.

Taakɛ Mussolini ji lɛ, mɛi pii basumɔŋ akɛ akɛ amɛ aaato toobi loo too gwantɛŋ he. Shi, blema Israel lalatsɛ kɛ maŋtsɛ lɛ jaje akɛ: “Yehowa ji mi-Kwɛlɔ tookwɛlɔ . . . Ehaa mibuɔ shi yɛ lɛɛhei ni yɔɔ frɔfrɔ.” (Lala 23:​1, 2) Hɛɛ, Yehowa Nyɔŋmɔ ji Tookwɛlɔ kpeteŋkpele, ni kwɛɔ ewebii blɛoo, tamɔ nɔ ni amɛji tooi ni nyɛɛɛ aye mɔ ko awui.

Awieɔ Nyɔŋmɔ webii ahe akɛ okadi tooi yɛ Lala 95:​7, he ni wɔkaneɔ yɛ akɛ: “Ejaakɛ, Yehowa ji wɔ Nyɔŋmɔ, ni wɔ lɛ, elɛɛhe lɛ maŋ kɛ edɛŋ tooi ji wɔ.” Ekolɛ mɛi komɛi baakpa gbɛ ni lalatsɛ lɛ awie “elɛɛhe lɛ tooi’” kɛ “edɛŋ gbɔmɛi” ahe. Shi atsake saji yɛ biɛ, ni awieɔ Yehowa webii ahe akɛ etooi. Amɛnaa Nyɔŋmɔ lɛɛhe lɛ mli sɛɛnamɔi amli ŋɔɔmɔ ni esuɔmɔ nine nyiɛɔ amɛhiɛ.

Yehowa Bi, Yesu Kristo, ji Tookwɛlɔ Kpakpa lɛ. Efɔɔ gbɔmɛi ahe wiemɔ akɛ tooi. Akɛ nɔkwɛmɔnɔ lɛ, Yesu wie “asafoku bibioo” kɛ “tooi krokomɛi” ahe. (Luka 12:​32; Yohane 10:​14-16) Yesu wie ekaselɔi heshibalɔi ni tamɔ tooi lɛ ahe akɛ: “Mitooi lɛ nuɔ migbee, ni mile amɛ, ni amɛnyiɛɔ misɛɛ, ni mi nɔŋŋ mihaa amɛ naanɔ wala, ni amɛhiɛ kpataŋ kɛaatee naanɔ, ni asaŋ mɔ ko shɔŋ amɛ yɛ midɛŋ.” (Yohane 10:​27, 28) Nɔyelɔ ejurɔfeelɔ lɛ shishibii naa ehewalɛ, eduromɔ, egbɛtsɔɔmɔ, kɛ hebuu he sɛɛ.​—Kpojiemɔ 1:​16, 20; 2:⁠1.

Mɔ ko mɔ ko nyɛŋ ashɔ gbɔmɛi ni tamɔ tooi diɛŋtsɛ lɛ kɛjɛ Yesu dɛ ni ekɛbuɔ amɛhe lɛ mli. Ŋmɛnɛ, eegbala gbɔmɛi amli akɛ “abotiai” ni bɛ eduromɔ kɛ “gwantɛŋi” ni baana naanɔ wala yɛ Nyɔŋmɔ ŋwɛi Maŋtsɛyeli lɛ nɔyeli shishi. (Mateo 25:​31-46) Ani abaana bo akɛ tooi ni ajɔɔ amɛ lɛ ateŋ mɔ ko?

[He ni Mfoniri ni yɔɔ baafa 32 lɛ Jɛ]

Garo Nalbandian