Sanebimɔi Ni Jɛ Kanelɔi Adɛŋ

Mɛni Kristofonyo baanyɛ afee kɛ enaaa gbalashihilɛ mli hefatalɔ ni sa lɛ?

Eyɛ mli akɛ wɔji Kristofoi ni wɔtuu wɔhe wɔha maŋ, shi wɔbaanyɛ wɔhao kɛji akɛ wɔmiikpa nɔ ko gbɛ shi nii lɛ baaa mli. Ajieɔ wɔhenumɔi lɛ akpo jogbaŋŋ yɛ Abɛi 13:​12, he ni kɛɔ akɛ: “Hiɛnɔkamɔ ni baaa mli mra lɛ, ewoɔ mɔ tsui hela.” Nakai ji bɔ ni Kristofoi komɛi nu he, beni amɛsumɔɔ ni amɛbote gbalashihilɛ mli shi amɛnaaa hefatalɔ ni sa lɛ. Nakai enɛ ji titri lɛ yɛ mɛi ni bɔfo Paulo tsɔɔ mli akɛ ‘akɔnɔ haoɔ amɛ’ lɛ agbɛfaŋ.​—1 Korintobii 7:⁠9.

Yehowa kɛ anɔkwa hefatalɔ ni sa ni aaana he suɔmɔ wo adesai ni ji gbalashihilɛ mli hefatalɔ lɛ mli. No hewɔ lɛ ebɛ naakpɛɛ akɛ Kristofoi oshijafoi aaana henumɔi ni mli wa ni tamɔ nɛkɛ. (1 Mose 2:18) Gbɔmɛi loo hiŋmɛigbelemɔi ni maa gbalashihilɛ mlibotemɔ nɔ mi waa, (loo amɛboteɔ gbalashihilɛ mli beni amɛye afi ko lɛ) aloo yɛ be mli ni gbalashihilɛ mli hefatalɔi ni yɔɔ miishɛɛ yɛ asafo lɛ mli lɛ ebɔle ehe kɛkpe lɛ maa adebɔɔ mli henumɔi ni tamɔ nɛkɛ nɔ mi waa diɛŋtsɛ. Shi, esaaa akɛ aŋmɛɔ gbɛ ni nɛkɛ yeyeeye feemɔ nɛɛ yaa shɔŋŋ loo esɛɛ tsɛɔ tsɔ. No hewɔ lɛ te Kristofoi anɔkwafoi aaafee tɛŋŋ amɛtsu shihilɛ lɛ he nii ni amɛhaaa egba amɛnaa fe nine?

Shihilɛ lɛ he nitsumɔ bɛ mlɛo, ni esaaaa akɛ mɛi krokomɛi susuɔ enɛ he akɛ eji nɔ ko bibioo ni he ehiaaa ni awo he tsɔ. Shi nyɛmɔ ni akɛaadamɔ shihilɛ lɛ naa loo akɛtsu he nii lɛ damɔ nɔ ni oshija lɛ aaafee lɛ nɔ titri.

Wɔnaa tsabaa ko yɛ Biblia shishitoo mla ni anyɛɔ atsuɔ he nii nɛɛ mli: “Nɔ hamɔ mli yɛ jɔɔmɔ fe hemɔ.” (Bɔfoi lɛ Asaji 20:35) Nuu oshijafonyo, Yesu Kristo, ji mɔ ni wie nakai ni ele nɔ ni ewieɔ he lɛ. Nii ni aaafee aha mɛi krokomɛi ni pɛsɛmkunya su ko bɛ mli lɛ ji tsabaa kpakpa ni aaaye abua wɔteŋ mɔ fɛɛ mɔ koni eye henumɔi ni jɛɔ gbɛkpamɔi ni baaa mli lɛ amli baa lɛ anɔ kunim. Mɛni ji nɔ ni enɛ tsɔɔ kɛha kristofonyo oshija lɛ?

Okɛ ahe aha ni otsu mlihilɛ nitsumɔi aha bo diɛŋtsɛ oweku lɛ kɛ mɛi krokomɛi ni yɔɔ asafo lɛ mli lɛ, ni ofee babaoo hu yɛ sɔɔmɔ nitsumɔ lɛ mli. Ŋaawoo nɛɛ jeee ni aakɛɛ kɛkɛ akɛ, ‘Feemɔ babaoo, ni ohiɛ baakpa gbalashihilɛ ni osumɔɔ ni obote mli lɛ nɔ.‘ Dabi. Kɛ okɛ ohe wo Kristofoi anitsumɔi ni woɔ yibii nɛɛ amli lɛ, obaana akɛ ‘obaanyɛ odamɔ shi shiŋŋ yɛ otsui mli ejaakɛ onyɛɔ oyeɔ osuɔmɔnaa nifeemɔ nɔ’, ni obaanyɛ okɛ shihilɛ ni oyɔɔ mli bianɛ lɛ atsu nii ni sɛɛnamɔ yɔɔ he.​—1 Korintobii 7:⁠37.

Mɛi komɛi ni yasumɔ babaoo akɛ amɛaabote gbalashihilɛ mli lɛ eŋmɛ gbɛ ni nɛkɛ suɔmɔ nɛɛ etsu nitsumɔ ko ni eŋɔ amɛ nom kwraa. Eha amɛtee shɔŋŋ yɛ nifeemɔ nɛɛ mli aahu akɛ amɛmiitswa gbalashihilɛ mli hefatalɔi ni amɛtaoɔ lɛ he adafi yɛ adafitswaa woji amli. Shi kwɛ bɔ ni ehi jogbaŋŋ moŋ akɛ, akɛ hiɛsɔɔ aaama sɛɛnamɔi ni jɛɔ oshijayeli mli baa lɛ anɔ mi.​—Ofainɛ kwɛmɔ saji, ‘Amɛboteko Gbalashihilɛ Mli shi Amɛshɛ kɛha Nyɔŋmɔ Sɔɔmɔ’ kɛ ‘Oshijayeli​—Shihilɛ Gbɛ ni Nyɔmɔwoo Yɔɔ Mli’ ni yɔɔ November 15, 1987 Watchtower lɛ mli lɛ kɛ “Ani Gbalashihilɛ Ji Nɔ Kome Pɛ ni kɛ Mishɛɛ Baa?” ni yɔɔ May 15, 1992 Buu-Mɔɔ lɛ mli lɛ.

Sɔlemɔ oha Yehowa koni eye ebua bo ni oŋmɛ otsui shi yɛ oshijayeli shihilɛ lɛ mli. (Filipibii 4:​6, 7, 13) Kristofoi pii ni boteko gbalashihilɛ mli lɛ ena akɛ kɛ amɛkɛ be ni amɛyɔɔ lɛ kase ni amɛsusu Nyɔŋmɔ Wiemɔ lɛ he ni amɛkɛ amɛhe wo Kristofoi akpeei amli lɛ, amɛbaana akɛ amɛna hejɔɔmɔ kɛfata he amɛha amɛsusumai lɛ,‘ taakɛ Yesu wo mɛi ni nyiɛɔ esɛɛ lɛ ashi lɛ. (Mateo 11:​28-30) Enɛ eye ebua amɛ ni amɛtsɔmɔ mumɔŋ gbɔmɛi ni baaha amɛfee wumɛi loo ŋamɛi kpakpai kɛ amɛna hefatalɔ ni sa yɛ be kpakpa mli.

Kaaha ohiɛ miikpa nɔ akɛ Yehowa nuɔ shihilɛ ni oshijafoi ni sɔmɔɔ lɛ lɛ fɛɛ yɔɔ mli lɛ shishi. Ele akɛ ekolɛ onuŋ he akɛ shihilɛ ni oyɔɔ mli bianɛ lɛ ji nɔ ni osumɔɔ. Wɔ ŋwɛi Tsɛ ni yɔɔ suɔmɔ lɛ hu le nɔ ni baahi aha bo kɛya naanɔ, yɛ mumɔŋ kɛ henumɔŋ fɛɛ. Yɛ no sɛɛ lɛ okɛ nɔmimaa baale enɛ: Kɛ okɛ tsuishiŋmɛɛ mɛ Yehowa, ni okɛ Biblia mli shishitoo mlai tsu nii yɛ oshihilɛ mli daa gbi lɛ, obaanyɛ ona nɔmimaa akɛ ebaatsu ahiamɔ nii ni fe fɛɛ lɛ he nii yɛ gbɛ ni aaahi ahao kɛya naanɔ lɛ nɔ.​—Okɛto Lala 145:16 he.