Ani Okaiɔ?

Ani onya Buu-Mɔɔ ni akala nyɛsɛɛ nɛɛ akanemɔ he? Kɛji nakai ni lɛ, belɛ ŋwanejee ko bɛ he akɛ obaanya saji ni nyiɛ sɛɛ nɛɛ akaimɔ he:

▫ Mɛɛ odaseyeli ni tsɔɔ mɔ yiŋ mumɔ krɔŋkrɔŋ lɛ nitsumɔi loo nifeemɔi sɔrɔtoi yɛ klɛŋklɛŋ afii oha lɛ mli lɛ kɛha?

Nɛkɛ nifeemɔi loo nitsumɔi nɛɛ kɛ odaseyeli ni anaa faŋŋ ha akɛ Nyɔŋmɔ kɛ Israel asafo ni eye afii 1,500 lɛ tsuuu nii dɔŋŋ akɛ ewebii krɛdɛɛ, shi enɔkpɛlɛmɔ yɛ Kristofoi asafo hee lɛ ni e-Bi koome lɛ to lɛ nɔ. (Okɛto Hebribii 2:​2-4 he.)​—8/15, baafa 5.

▫ Mɛni eha Yehowa Odasefoi eshwere babaoo nakai lɛ?

Titri lɛ, enɛ jɛ Nyɔŋmɔ jɔɔmɔ. Eji Nyɔŋmɔ nitsumɔ. Nɔ ni Yehowa Odasefoi tsɔɔ yɛ amɛ sanekpakpa shiɛmɔ nitsumɔ lɛ mli lɛ damɔ Biblia lɛ nɔ. Nɔ titri kroko ni ha amɛye omanye ji Kristo Yesu ni amɛkpɛlɛɔ enɔ kwraa akɛ Kristofoi asafo lɛ Yitso ni ahala lɛ lɛ.​—9/1, baafa 19.

▫ Mɛni hewɔ Yehowa na David mɔbɔ yɛ efɔŋ kpeteŋkpele ni efee yɛ Batsheba sane Iɛ mli lɛ?

Titri lɛ enɛ jɛ Maŋtsɛyeli kpaŋmɔ ni Nyɔŋmɔ kɛ David efee lɛ hewɔ, shi ejɛ David diɛŋtsɛ mɔbɔnalɛ kɛ enɔkwa tsuitsakemɔ lɛ hewɔ. (1 Samuel 24:​4-7; 2 Samuel 7:​12; 12:​13; Lala 51:​3, 4, 19)​—9/15, baafai 10, 11.

▫ Mɛɛ odaseyelii sɔrɔtoi etɛ Kristofoi a-Hela Ŋmalɛi lɛ kɛhaa akɛ nɔ ni fiɔ Mesia ni Yesu ji lɛ sɛɛ?

Yesu wekukpaa lɛ ji klɛŋklɛŋ odaseyeli (Mateo 1:​1-16; Luka 3:​23-38) Odaseyeli kroko ji gbalɛ ni eba mli. Gbalɛi ohai abɔ yɛ tamɔ nɔ ni anaa yɛ Daniel 9:​25, ni haa aleɔ Yesu akɛ Mesia lɛ. Odaseyeli ni ji etɛ ji nɔ ni Nyɔŋmɔ diɛŋtsɛ kɛha; ekɛ lɛ diɛŋtsɛ egbee fee nakai yɛ bei sɔrɔtoi etɛ mli. (Mateo 17:5; Luka 3:​21, 22; Yohane 12:28)​—10/1, baafai 10, 12.

▫ Mɛni Yesu tsɔɔ beni ewie taakɛ aŋma yɛ Mateo 24:37 (NW) lɛ akɛ: “Shi bɔ ni Noa gbii lɛ fee lɛ, nakai ba ni gbɔmɔ Bi lɛ eba lɛ baatamɔ” lɛ?

Noa miikpɛ adeka lɛ ni eebɔ gbɔmɛi lɛ kɔkɔ afii nyɔŋmai abɔ dani Nu Afua lɛ ba ni ebakpata nakai jeŋ gbɛjianɔtoo ni ekpɔtɔ lɛ hiɛ. Nakai nɔŋŋ hu ba ni Kristo eba ni anaaa lɛ lɛ hiɔ shi afii nyɔŋmai abɔ komɛi, beni akɛ odaseyeli miiha yɛ je lɛŋ fɛɛ, dani no hu baa naagbee yɛ hiɛkpatamɔ kpeteŋkpele ko mli.​—10/1, baafa 16.

▫ Mɛni ji nibii ni he hiaa kɛha weku Biblia mli nikasemɔ kpakpa lɛ ekomɛi?

Esa akɛ ahe be ko aha nikasemɔ lɛ. Esaaa akɛ wɔŋmɛɔ gbɛ koni TV loo nibii krokomɛi abaye najiaŋ. Esa akɛ asusu nɔ ni he hiaa weku lɛ titri lɛ he. Akɛ sanebimɔi ni tsɔɔ bɔ ni mɔ ko tsɔɔ ejwɛŋmɔ loo enuɔ nɔ ko shishi ehaa lɛ atsu nii koni akɛna nɔmimaa akɛ gbekɛbii lɛ miinu nɔ ni akaseɔ lɛ shishi. (Mateo 17:25) Aha nikasemɔ lɛ afee nɔ ni tsuifaa bɛ mli. Ajie miishɛɛ kpo, ni akwɛ ni mɔ fɛɛ mɔ kɛ ehe awo nikasemɔ lɛ mli.​—10/15, baafa 17.

▫ Mɛɛ hehiamɔ esa akɛ Kristofoi kɛtsu nii yɛ be mli ni ekolɛ akɛ la mli nibii komɛi efutu niyenii komɛi ni afeɔ ni ahɔɔ lɛ amli lɛ?

Esa akɛ Kristofoi akwɛ jogbaŋŋ ni amɛkafee yeyeeye yɛ nyɛ ni eeenyɛ eba loo akɛɛ-akɛɛ saji ni amɛaanu lɛ ahe, ni hiɛshikamɔ he miihia yɛ guɔyeli mli nibii ni akɛ woji ekpɛtɛ he loo loo-hɔɔlɔi ni aaabibii amɛ saji lɛ mli. Shi kɛ ana ale akɛ akɛ la tsuɔ nii babaoo yɛ he ni ayɔɔ lɛ​—yɛ niyenii loo tsofa-feemɔ mli lɛ​—no lɛ esa akɛ Kristofoi akwɛ jogbaŋŋ ni amɛbo Nyɔŋmɔ famɔ akɛ atsi he kɛjɛ la he lɛ toi. (Bɔfoi lɛ Asaji 15:​28, 29)​—10/15, baafai 30-1.

▫ Abɛi awolo Iɛ maa bɔ ni nitsɔɔmɔ gbɛi ni akɛtsuɔ nii yɛ lsrael lɛ yaa shɔŋŋ yɛ mumɔŋ lɛ nɔ mi yɛ mɛɛ gbɛ nɔ?

Abɛi awolo lɛ tsɔɔ akɛ eyiŋtoo ji ni etsɔɔ “mɛi ni nako jwɛŋmɔ lɛ” nibii ni nɔ kwɔlɔ tamɔ nilee, tsɔsemɔ, sane shishinumɔ, sanesɛɛkɔmɔ, kojomɔ kpakpa, hiɛtɛɛ, ŋaalee, kɛ nyɛmɔ ni akɛsusuɔ sane he​—enɛɛmɛi fɛɛ yɛ “Yehowa gbeyeishemɔ” mli. (Abɛi 1:​1-7; 2:​1-14)​—11/1, baafai 12.

▫ Mɛɛ woloŋlee he jwɛŋmɔ ni ŋmɛɔ pɛpɛɛpɛ esa akɛ obalaŋtai ana ŋmɛnɛ?

Esa akɛ Kristofoi asusu woloŋlee he akɛ nɔ ni amɛmiitsɔ nɔ ni amɛkɛna nɔ ko. Amɛyiŋtoo yɛ naagbee gbii nɛɛ amli ji ni amɛsɔmɔ Yehowa babaoo bɔ ni amɛaanyɛ yɛ gbɛ ni mɔɔ shi nɔ yɛ be-fɛɛ sɔɔmɔ lɛ mli kɛ amɛaanyɛ.​—11/1, baafa 18.

▫ Mɛni hewɔ Yehowa bi ni Israel maŋ lɛ atsu mlijaai nyɔŋma mli ekome he too lɛ?

Klɛŋklɛŋ lɛ, koni amɛkɛtsɔɔ pɔtɛɛ akɛ amɛhiɛ sɔɔ ejurɔ ni Yehowa feɔ amɛ lɛ. Nɔ ni ji enyɔ lɛ, koni amɛna nɔ ko ni amɛkɛye amɛbua Levibii lɛ, ni no hu baaha amɛnyɛ amɛya nɔ amɛtsu gbɛnaa nii ni jwere amɛnɔ lɛ ahe nii, ni Mla lɛ tsɔɔmɔ hu fata he. (Kwɛmɔ 2 Kronika 17:​7-9.)​—12/1, baafa 9.

▫ Mɛni ji mlijaai nyɔŋma mli ekome ni afɔɔ Kristofoi anine akɛ amɛkɛba lɛ? (Maleaki 3:⁠10)

Mlijaai nyɔŋma mli ekome lɛ damɔ shi kɛha nɔ ni ji wɔnɔ̃ ni wɔkɛbahaa Yehowa loo nɔ ni wɔkɛtsuɔ nii yɛ esɔɔmɔ mli. Eji suɔmɔ ni wɔyɔɔ kɛha lɛ kɛ bɔ ni wɔyɔseɔ akɛ enii ji wɔ lɛ he okadi.​—12/1, baafa 15.