Nigeria Kojomɔ He Wulu Fi Jamɔ Mli Heyeli Sɛɛ
AKROWAIAŊBII hà okwaafonyo ko ŋmɔ shi nii ni ekpa. Mɛi krokomɛi yatutua tsutswalɔ ko yɛ eshia ni amɛshɔ enitsumɔ dadei kɛjɛ edɛŋ. Mɛi krokomɛi hu tsi yoo ko gbɛ koni ekahɔɔ nii loo ehe nii. Mɛni hewɔ afee nii ni ejaaa gbɛ nɛɛ? Ejaakɛ mɛi ni afee amɛ efɔŋ nɛɛ, ni amɛ fɛɛ amɛji Yehowa Odasefoi lɛ kɛ amɛhe wooo tipɛŋfoi ni amɛdara lɛ akui amli. Obaabi ekoŋŋ akɛ, ‘amɛkɛ amɛhe wooo mɛni mli?’
Tipɛŋfoi ni amɛdara akuu lɛ ji gbɔmɛi, titri lɛ hii ni afɔ amɛ yɛ be kome too lɛ nɔŋŋ mli yɛ akrowa kome lɛ nɔŋŋ shishi. Ale nɛkɛ tipɛŋfoi ni amɛdara akui nɛɛ yɛ Nigeria bokagbɛ waa. Amɛnyɛɔ amɛtoɔ akutso lɛ mli nitsumɔ ko he gbɛjianɔ, shi amɛkɛ amɛhe woɔ wɔŋjamɔ kɛ mumɔi atsɛmɔ nifeemɔi amli koni amɛkɛtsɔɔ akɛ emlibii lɛ edara agbɛnɛ. Akɛni Biblia lɛ wieɔ shiɔ nifeemɔ ni tamɔ nɛkɛ ni anɔkwa Kristofoi lɛ kɛ amɛhe aaawo mli lɛ hewɔ lɛ, Yehowa Odasefoi kɛ amɛhe wooo kui ni tamɔ nɛkɛ mli.—1 Korintobii 10:20, 21; 1 Yohane 5:21.
Samuel Okogbue tsu nii akɛ nikpɛlɔ yɛ Aba, Nigeria Afi 1978 mra mli ni Umunkalu Tipɛŋfoi Akuu lɛ mlibii ni yɔɔ Alayi lɛ bi lɛ ni ewo “too” koni akɛye abua helatsamɔ he ko maa. Akɛ anɔkwa Kristofonyo lɛ, Samuel miaa ehiɛ eyeɔ ebuaa mɛi krokomɛi, shi ejɛ henilee kpakpa mli ekpoo akɛ ekɛ ehe aaawo tipɛŋfoi akuu lɛ mli. Yɛ April 22, yɛ nakai afi lɛ mli lɛ, kuu nɛɛ mlibii ekpaa batutua lɛ yɛ enitsumɔ he lɛ, ni amɛshɔ mashin ni ekɛkpɛɔ nii lɛ yɛ edɛŋ, ni amɛkɛɛ lɛ akɛ amɛbaatsi naa kɛyashi be mli ni eeewo shika lɛ. Samuel te shi wo enɛ akɛ sɔ ko kaaa enɔ akɛ ewo shika ko ejaakɛ efataaa nakai kuu lɛ he. Akɛni amɛkɛ enikpɛɛ mashin lɛ haaa lɛ hewɔ lɛ, Samuel kɛ sane lɛ tee saneyeli he.
Kɛjɛ Saneyeli He Kome Kɛtee Saneyeli He Kroko
Tipɛŋfoi akuu nɛɛ mlibii lɛ fa amɛhe yɛ Saneyeli He Titri ko mli akɛ, yɛ afii ni Samuel eye lɛ hewɔ lɛ, ebatsɔɔ amɛ kuu lɛ mlinyo trukaa, ni gbɛnaa nii ka enɔ akɛ ewo too ni amɛfolɔɔ amɛhaa amɛhe lɛ. Agbɛnɛ amɛmaŋ kusum tsɔɔ akɛ kɛ emlinyo ko wooo too lɛ, abaashɔ enibii kɛjɛ edɛŋ kɛyashi be mli ni eeewo.
Saneyeli He lɛ ekpɛlɛɛɛ nɔ haaa amɛ. Amɛbua sane lɛ yɛ February 28, 1980, akɛ, anyɛŋ anyɛ Samuel nɔ koni ebatsɔ tipɛŋfoi akuu lɛ mlinyo. Kojolɔ lɛ mu sane naa akɛ: “Kusum nifeemɔ ko ni shɔ̃ɔ maŋnyo lɛ heyeli ni eyɔɔ akɛ ekɛ ehe aaabɔ kuu fɛɛ kuu ni esumɔɔ he lɛ teɔ shi ewoɔ Federal Republic of Nigeria Maŋ Nɔkwɛmɔ Gbɛjianɔtoo Mla 37 lɛ, no hewɔ lɛ amɛnyɛŋ amɛbi ni Mla aye aha amɛ.”
Tipɛŋfoi akuu lɛ kɛ sane lɛ tee Saneyeli He Wulu ni fe tsutsu nɔ lɛ, ni amɛkɛte shi amɛwo bɔ ni akojo sane lɛ aha lɛ ni amɛye bem yɛ jɛmɛ. Kojolɔ lɛ fa ni Samuel awo too lɛ, akɛ eji gbɛ ni atsɔɔ nɔ akɛyeɔ abuaa akutso ni ejɛ mli lɛ nɔyaa.
Kɛkɛ ni Samuel te shi eshi nɔ ni enaa akɛ eji jalɛsane ni ayeee lɛ. Kojomɔ He Wulu ni Kwɛɔ Saji Amli Ekoŋŋ lɛ tsake bɔ ni tsutsu Saneyeli He Wulu lɛ kojo sane lɛ, ni amɛbu Samuel bem. Akɛni amɛkpɛlɛɛɛ amɛnɔ kunim ni aye lɛ hewɔ lɛ, tipɛŋfoi akuu lɛ kɛ sane lɛ tee Nigeria Kojomɔ He Wulu Fe Fɛɛ lɛ.
Beni enɛ yaa nɔ lɛ, kuu lɛ mli bii bɛ deka kwraa yɛ Samuel akrowa lɛ shishibii ateŋ. Amɛmiitsɔɔ mli akɛ Odasefoi lɛ teɔ shi woɔ akutseiaŋ nitsumɔi fɛɛ, ni amɛtsɔ onukpa ni yɔɔ akrowa lɛ shishi lɛ yiŋ koni egu Yehowa Odasefoi anitsumɔ lɛ yɛ nɛkɛ he nɛɛ. Ŋoŋotswalɔ lɛ tswa adafi akɛ abaabu mɔ fɛɛ mɔ ni kɛ Yehowa Odasefoi naa nɔ ko feemɔ lɛ fɔ ni abaahe mɔ lɛ shika. Odasefoi ni jɛ maji ni bɛŋkɛ jɛmɛ lɛ amli lɛ kɛ amɛhe wo mli ni amɛtsɔɔ sane lɛ mli faŋŋ amɛha onukpai ni yɔɔ akrowa lɛ shishi lɛ. Amɛtsɔɔ mli akɛ Nyɔŋmɔ webii lɛ eteee shi amɛwooo nɔyaa nitsumɔ ni atsuɔ yɛ akutso mli lɛ. Yɛ anɔkwale mli lɛ, Samuel kɛ receipts loo shika ni ewo kɛha akutso lɛ mli nɔyaa nitsumɔi ni jeee tipɛŋfoi akuu lɛ to he gbɛjianɔ lɛ ahe woji etsɔɔ yɛ saneyeli he lɛ. Kɛkɛ ni akrowa lɛ shishi onukpai lɛ tsake amɛyiŋkpɛɛ akɛ amɛkɛ Odasefoi lɛ naŋ nɔ ko feemɔ lɛ.
Jamɔ Mli Heyeli Ye Kunim
Yɛ October 21, 1991 lɛ, Nigeria Kojomɔ He Wulu Fe Fɛɛ lɛ kojolɔi enumɔ fɛɛ kpɛlɛ nɔ akɛ Samuel yeee fɔ. Beni Kojolɔ Nukpa Abubakar Wali tsɔɔ kojomɔ ni Kojolɔ Nukpa Paul Nwokedi kɛha lɛ mli lolo lɛ, etsɔɔ mli akɛ: “Jeee too ni akɛɛ Samuel awo lɛ ji nɔ ni ekpooɔ, shi akɛ eeefee kuu ko mlinyo, aloo tipɛŋfoi akuu ko mlinyo ji sane lɛ, ejaakɛ enɛ teɔ shi ewoɔ ejamɔ mli hemɔkɛyeli, ejaakɛ eji Yehowa Odasefoi lɛ ateŋ mɔ ko.”
Kojolɔ nukpa lɛ tee nɔ akɛ: “1963 Maŋ Nɔkwɛmɔ Gbɛjianɔtoo lɛ mla ni ji section 24(1) kɛ henilee, susumɔ, kɛ jamɔ mli heyeli ha Nigeria maŋbii fɛɛ. Mɔ ni faa ehe nɛɛ yɛ hegbɛ akɛ ehiɛɔ ejamɔ mli hemɔkɛyeli, henilee, kɛ susumɔ ni tsiɔ lɛ gbɛ koni ekɛ ehe akabɔ Tipɛŋfoi akuu lɛ he lɛ mli. Kusum nifeemɔ fɛɛ kusum nifeemɔ ni feɔ nɔ ni atsɔɔ nɛɛ teɔ shi ewoɔ Maŋ Nɔkwɛmɔ Gbɛjianɔtoo lɛ ni yɛ enɛ hewɔ lɛ sɛɛnamɔ bɛ nakai kusum nifeemɔ lɛ he.”
Yɛ ekukufoo mli lɛ, kojomɔ he lɛ fa akɛ anyɛŋ akɛ mla anyɛ mɔ ko nɔ koni ekɛ ehe abɔ tipɛŋfoi akuu he eyɛ mli akɛ eji kusum nifeemɔ yɛ akutso lɛ mli. Amɛfa hu akɛ anyɛŋ akɛ mla anyɛ mɔ ko nɔ koni ewo too eha kuu ni ejeee emlinyo, kɛji akɛ akɛ shika loo too lɛ miitsu akutso lɛ mli nɔyaa he nii po. No hewɔ lɛ sane mlitsɔɔmɔ fioo nɛɛ nɔ atsɔ afi jamɔ mli heyeli kɛha Nigeria bii fɛɛ lɛ sɛɛ.