Shishinumɔ ni Ahaa Mɛi Naa Yɛ Namibia

WIEMƆI enyiɛ mli onu ni aatsi wiemɔ, “Minuuu shishi” lɛ ta yɛ? Herero awura ni wo emaŋ atade kakadaŋŋ ni fi duku ko ni tamɔ akolonto lɛ kɛɛ: “Hi nokuzuva.” Kwanyama obalayoo lɛ kɛ ŋmɔlɔ ha hetoo akɛ: “Nghi udite ko.” Ndonga akrowanyo lɛ ha hetoo kɛ ekɔji anɔ holemɔ akɛ: “Kandi uvite ko.” Kwangali tookwɛlɔ ko kɛɛ: “Kapi na kuzuvha.”

Aŋkroaŋkroi nɛɛ fɛɛ miikɛɛ akɛ, “Minuuu shishi.” Kwɛ bɔ ni enɛ tsɔɔ jogbaŋŋ akɛ Yehowa Odasefoi ni yɔɔ Namibia lɛ kɛ wiemɔ mli naagbai ni mli wawai kpeɔ beni amɛbɔɔ mɔdɛŋ ni amɛnine ashɛ gbɔmɛi 1,370,000 ni yɔɔ shikpɔŋkuku agbo ni edalɛ shɛɔ shitoi aaafee 318,000 koji ejwɛ nɛɛ mli lɛ anɔ lɛ!

Ni ebɛ naakpɛɛ! Ejaakɛ jeee Herero kɛ Namabii lɛ pɛ yɔɔ amɛmaŋ wiemɔ, shi Ovambo, Kavango, Tswana, Caprivian, Himba, Bushman, kɛ Damarabii ni yɔɔ Namibia lɛ hu yɛ amɛ diɛŋtsɛ amɛmaŋ wiemɔi. Nɔ ni tamɔɔɔ nakai lɛ, nɔ ni Odasefoi lɛ yɔɔ pɛ ji Biblia kasemɔ he woji ni yɔɔ Ŋleshi kɛ Afrikaan wiemɔi amli. Eka shi faŋŋ akɛ, kɛ gbɔmɛi pii aaanu anɔkwale lɛ shishi lɛ, belɛ woji ashishitsɔɔmɔ nitsumɔ he miihia. Aje enɛ feemɔ shishi yɛ gbɛ bibioo ko nɔ afii pii ni eho nɛ, yɛ Windhoek, nɔ ni ale yɛ nakai be lɛ mli akɛ South-West Afrika lɛ maŋtiase lɛ mli.

Dick Waldron wie akɛ, “sɔlemɔ lɛ kɛ polisifoi te shi wo wɔnitsumɔ lɛ waa yɛ Windhoek.” Ekɛ eŋa, Coralie ba maŋ nɛɛ mli yɛ 1953 akɛ mɛi ni ekase nii yɛ Buu-Mɔɔ Biblia Gilead Skul lɛ mli. Ekɛɛ, “Aŋmɛɛɛ wɔ gbɛ ni wɔya hei ni mɛidiji hiɔ lɛ, ni yɛ bei komɛi amli lɛ agbaa wɔ naa kɛ wɔkɛ mɛidiji miiwie. Yɛ naagbee lɛ wɔna he ko ni agbaaa wɔ naa yɛ​—Gammans Faa lɛ shishi ni jɛmɛ egbi lɛ! Enɛ yɛ maŋ lɛ sɛɛ. Ni akɛni ama tsei ayibaai etsi wɔhiɛ hewɔ lɛ, wɔfeɔ Biblia mli nikasemɔi lɛ yɛ jɛmɛ.”

Biɛ hu ji he ni atsɔɔ Buu Mɔɔ Asafo lɛ klɛŋklɛŋ woji lɛ ashishi kɛtee maŋ lɛ mli wiemɔi lɛ amli yɛ. Nɔ ni fata he ji dɛhiɛmɔ woji komɛi yɛ Kwanyama wiemɔ mli kɛ wolo bibioo, “Maŋtsɛyeli lɛ He Sanekpakpa Nɛɛ” yɛ Nama wiemɔ mli. Nyɛmi nuu Waldron kaiɔ niiashikpamɔ ko ni yɔɔ ŋmɔlɔ yɛ nɛkɛ wolo bibioo nɛɛ ni mɔ ko ni yɔɔ wiemɔ lɛ he miishɛɛ lɛ miiye abua ni atsɔɔ shishi lɛ he. Anaaa Nama wiemɔ ni baanyɛ atsɔɔ wiemɔ, “Adam ji nuu ni eye emuu” shishi. No hewɔ lɛ nuu ni yɔɔ wiemɔ lɛ he miishɛɛ lɛ kɛɛ lɛ akɛ: “Ŋmaa kɛkɛ akɛ Adam tamɔ aduawa ko ni etsu. Namabii lɛ baanu shishi akɛ eye emuu.” Nɛkɛ ji gbɛ ni atsɔ nɔ aje shishi akɛ Ŋmalɛi lɛ ashishinumɔ ha mɛi pii yɛ Namibia jakumɛi ateŋ.​—Okɛto Daniel 11:33 he.

Ashɛ Shihilɛ Mli Be Ko Ni He Hiaa He

Ashɛ shihilɛ mli be ko ni he hiaa he yɛ 1970 afii lɛ shishijee mli beni atsɔɔ wolo, Anɔkwale ni kɛ Mɔ Yaa Naanɔ Wala Mli lɛ shishi kɛtee Ndonga kɛ Kwanyama wiemɔi amli lɛ. Enɛ ji wiemɔi titrii enyɔ ni Namibiabii ni yɔɔ Ovamboland, yɛ Windhoek kooyigbɛ aaafee [shitoi 450] kilomitai 700 lɛ ateŋ mɛi ni fa wieɔ. Ato gbɛgbalɔi ashia ko yɛ Ondangwa, ni ji Ovamboland shihilɛ he ko. Bɔni afee ni aye abua mɛi ni yɔɔ wiemɔ lɛ he miishɛɛ ni yɔɔ nɛkɛ he nɛɛ koni daa otsi Biblia mli nikasemɔ ni damɔ Buu-Mɔɔ lɛ nɔ lɛ he aba sɛɛnamɔ aha amɛ lɛ, akɛ nitsumɔ wo gbɛgbalɔi krɛdɛɛ ni sɔmɔɔ yɛ Ovamboland lɛ adɛŋ koni amɛtsɔɔ nikasemɔi ni yɔɔ Ŋleshi wiemɔ mli lɛ shishi kɛba Ndonga kɛ Kwanyama wiemɔi amli.

Atsĩ woji ashishitsɔɔmɔ “ɔfis” lɛ hiɛ yɛ lɔle tsu ko ni akalaa Buu-Mɔɔ lɛ ni atsɔɔ shishi yɛ woji akalamɔ tsɔne momo ko nɔ lɛ mli. Nitsumɔ ni wa nɛɛ nɔjwɛŋmɔ bɛ mlɛo, ejaakɛ anaaa nibii kpakpai ni akɛbaatsu nii, ni kɔɔyɔŋ dɔɔ waa kɛyashɛɔ jeŋ dɔlɛ susumɔ Farenheit 100 kɛmiiya 110. Ni kɛlɛ, biɛ ji he ni atsɔɔ woji bibii kɛ Obaanyɛ Ohi Shi Kɛya Naanɔ yɛ Paradeiso yɛ Shikpɔŋ Nɔ wolo lɛ shishi yɛ.

Beni atoɔ asafoi yɛ Ovamboland kɛ hei krokomɛi yɛ Namibia lɛ, bɔ ni ahereɔ anɔkwale lɛ nɔ ahaa lɛ ha ehe bahia akɛ ana shihilɛ hei kpakpai ni dara. Kɛfata he lɛ, esa akɛ ana he ko pɔtɛɛ bɔni afee ni ajɛ jɛmɛ atsu he ni sɔɔmɔ lɛ he hiaa yɛ maŋ lɛ hei krokomɛi lɛ ahe nii yɛ. No mli lɛ wɔ Maŋtsɛyeli nitsumɔ lɛ he jwɛŋmɔ fɔŋ ni ahiɛ lɛ eba shi saŋŋ. No hewɔ lɛ abi gbɛ koni ama tsu yɛ shikpɔŋ agbo ko ni Yehowa Odasefoi lɛ ateŋ mɔ ko ni yɔɔ Windhoek lɛ kɛha amɛ lɛ nɔ. Etsɛɛɛ ni ana he ko aha nitsulɔi 40 ni amɛtu amɛhe amɛha tsumaa yɛ he ni abaama tsu lɛ yɛ lɛ, ni agbe woji ashishitsɔɔmɔ nitsumɔ he loo ɔfis lɛ naa yɛ December 1990.

Agbɛnɛ, nitsumɔ ni kɛ shishinumɔ bahaa mɛi pii lɛ miiya nɔ jogbaŋŋ yɛ ŋmɛnɛŋmɛnɛ beaŋ tsu hee lɛ ɔfis kɛ nitsumɔ he tsui sɔrɔtoi lɛ amli. Aatsɔɔ woji heei ashishi daa kɛmiiya Herero kɛ Kwangali wiemɔi amli. Yɛ Ndonga kɛ Kwanyama gbɛfaŋ lɛ, wiemɔi enyɔ nɛɛ jeɔ kpo yɛ daa nyɔŋ nɔ Buu-Mɔɔ kome too lɛ nɔŋŋ mli ni ebaa yɛ sui sɔrɔtoi amli agbɛnɛ. Buu-Mɔɔ lɛ mli nikasemɔi lɛ fɛɛ kɛ saji krokomɛi yɛ mli. Esoro enɛ lɛlɛŋ, yɛ eshishijee bibioo yɛ faa ni mli egbi lɛ he afii pii ni eho nɛ lɛ.

Agbɛnɛ afɔɔɔ “Minuuu shishi” lɛ numɔ dɔŋŋ. Shi moŋ Yehowa Odasefoi fe 600 ni yɔɔ Namibia lɛ daa amɛŋwɛi Tsɛ lɛ shi babaoo, ni amɛbaanyɛ amɛkɛɛ agbɛnɛ akɛ: “Owiemɔi lɛ anaagbelemɔ haa la, ehaa kwashiai leɔ nii.”​—Lala 119:130.

[Mfonirii ni yɔɔ baafa 25]

Sanekpakpa lɛ shiɛmɔ yɛ Hererobii ateŋ

Kristofoi awoji ashishitsɔɔmɔ koni ahe eba sɛɛnamɔ aha Namibiabii

Shishitsɔɔmɔ nitsumɔ he ni yɔɔ Namibia