Ni Wɔkpɛ Akɛ Kanei yɛ Je lɛ Mli

ESA akɛ anɔkwa Kristofoi ni yɔɔ je lɛŋ fɛɛ lɛ afee la jɛɛhei yɛ jeŋ ni jeŋba shara kɛ subaŋ gbonyo efite lɛ nɛɛ mli. Esa akɛ amɛfee kanei yɛ jeŋ ni mli ewo duŋ mli. (Filipibii 2:15) Mɛi akpei abɔ miisumɔ ni amɛfee enɛ akɛ gbɛgbalɔi, aloo be-fɛɛ shiɛlɔi. Amɛteŋ mɛi pii kɛ be babaoo ehi nɛkɛ sɔɔmɔ nɛɛ mli, ni awo amɛ nyɔmɔ kɛtsɔ gbɔmɛi sɔrɔtoi fɛɛ ni amɛnaa akɛ amɛmiifee tsakemɔi yɛ amɛshihilɛi amli koni amɛbatsɔmɔ Yesu Kristo anɔkwa kaselɔi lɛ nɔ.​—Mateo 28:⁠19.

Bɔni afee ni akɛwo gbɛgbalɔi nɛɛ hewalɛ ni amɛya nɔ yɛ nɛkɛ sɔɔmɔ krɔŋŋ nɛɛ mli ni amɛha amɛnitsɔɔmɔ ŋaai aya hiɛ lɛ, Yehowa Odasefoi eto Gbɛgbamɔ Sɔɔmɔ Skul lɛ he gbɛjianɔ. Eji nikasemɔ ko ni damɔ Biblia lɛ nɔ ni akɛ gbii nyɔŋma feɔ, ni ato he gbɛjianɔ koni eye ebua gbɛgbalɔi yɛ gbɛi sɔrɔtoi etɛ nɔ: ni amɛkɛ Yehowa anyiɛ akɛ Yesu Kristo sɛɛnyiɛlɔi; ni suɔmɔ ni amɛyɔɔ kɛha nyɛmimɛi asafo muu lɛ fɛɛ lɛ afa kɛteke nɔ; ni amɛkpɛ akɛ kanei yɛ je lɛ mli.

Gbɛgbalɔ Skul yɛ Central African Republic

Yɛ Bangui, ni ji Central African Republic maŋtiase lɛ, nikaselɔi 48 kɛ tsɔɔlɔi 2 bua amɛhe naa kutuu yɛ August 1991 mli. Nikaselɔi lɛ anine baashɛ amɛnitsumɔ lɛ he gbɛtsɔɔmɔi kɛ ŋaawoi ni anyɛɔ atsuɔ he nii nɔ. Mɛni yɔɔ miishɛɛ yɛ nakai Bangui nikaselɔi akuu nɛɛ he?

Nɔ kome ji akɛ, nikaselɔi lɛ ateŋ mɛi 21 miiya skul diɛŋtsɛ lolo. Beni amɛkã he amɛyɔɔ skul lolo lɛ, amɛnyɛ amɛto gbɛjianɔ ni amɛna be kɛha daa gbɛgbalɔi asɔɔmɔ lɛ. Amɛkɛ nyɔji ni amɛkɛbaa gbɛhamɔ lɛ kɛ otsii anaagbee ni amɛfeee nɔ ko lɛ kɛ amɛ shwane bei shiɛɔ ni amɛkɛtsɔɔ nii.

Nɛkɛ obalaŋtai nɛɛ ena bɔ ni ehe hiaa waa akɛ amɛaasɔmɔ amɛ-Bɔlɔ lɛ bianɛ (Jajelɔ 12:1; ekɛto 1 Korintobii 7:29 he.) Nɔ ni sa kadimɔ jogbaŋŋ hu ji akɛ amɛteŋ mɛi 12 afɔlɔi jeee heyelilɔi. Amɛ pɛ amɛyɔɔ anɔkwale lɛ mli yɛ shia. Gbekɛbii hii enyɔ, ni ji heloonaa nyɛmimɛi atsɛ nyɛ amɛnɔ ni amɛshi shia yɛ amɛhemɔkɛyeli lɛ hewɔ. Gbalashihilɛ mli hefatalɔi ni hi shi etsɛko tsɔ, ni yɔɔ asafo lɛ mli lɛ he gbekɛbii enyɔ nɛɛ kɛba amɛshia.

Shihilɛ lɛ yɛ sɔrɔto kwraa kɛha Michée kɛ Sulamithe Kaleb. Gbɛgbalɔi ji mɛi enyɔ lɛ fɛɛ ni amɛyaa skul hu, shi amɛfɔlɔi lɛ, Yehowa Odasefoi ji amɛ. Yɛ anɔkwale mli lɛ, amɛtsɛ fata nikaselɔi lɛ ahe yɛ nakai kuu lɛ mli!

Asafoi ni yɔɔ Bangui lɛ hu kɛ amɛhe wo skul lɛ mli, shi yɛ gbɛ sɔrɔto ko kwraa nɔ. Amɛtsu heloonaa hiamɔ nii ahe nii, tamɔ niyenii nɛkɛ. Akɛ nibii tamɔ shika, kɛ wuɔi, sikle, omɔ kɛ duade bake koni akɛkwɛ nikaselɔi lɛ.

Asafoi ni bɛŋkɛ lɛ to kpata shi nitsulɔi akui ahe gbɛjianɔ koni amɛbahoo niyenii ni hoomɔ waaa, shi eŋɔɔ. Ale Central African Republic lɛ waa yɛ ngunza, ni ji niyenii ko ni mɔ fɛɛ mɔ sumɔɔ waa lɛ hewɔ. Mɛni akɛhoɔ? Duade baai, mũ tsuru, sabolai, ayoo babaoo, kɛ ŋkatiɛ ni agbɛlɛ hu saŋŋ, kɛ tsuishitoo, koni enyɛ ebe jogbaŋŋ. Kuu fɛɛ kuu yɛ lɛ diɛŋtsɛ egbɛ krɛdɛɛ ni etsɔɔ nɔ ehoɔ. Eye omanye waa diɛŋtsɛ; mɔ ko kwraa ekɛɛɛ akɛ eyeee ejaakɛ eŋɔɔ waa.

Afee klas krokomɛi enyɔ hu yɛ Bangui sɛɛ, ekome yɛ Bouar kɛ ekome hu yɛ Bambari, ni no ha nikaselɔi lɛ fɛɛ ayifalɛ shɛ mɛi 68. Yɛ afi enyɔ ni eho lɛ amli lɛ, Central African Republic ena nɔyaa babaoo yɛ gbɛgbalɔi lɛ ayifalɛ mli. Yɛ January 1992 mli lɛ, ayɛ daa gbɛgbalɔi 149 kɛ gbɛgbalɔi krɛdɛɛi 17 kɛ gbɛgbalɔi awalɔi hu 78 ni fata amɛhe. Nɔ ni ejɛ enɛ mli eba ji nitsumɔ babaoo ni atsuɔ yɛ maŋ muu lɛ fɛɛ mli, kɛ yifalɛ heei hu yɛ shiɛlɔi, ŋmɛlɛtswai, sɛɛsaramɔi kɛ Biblia mli nikasemɔi gbɛfaŋ. Kɛji nitsulɔi lɛ fa babaoo lɛ, nikpamɔ lɛ hu yaa hiɛ​—Yesaia 60:​21, 22; Mateo 9: 37, 38.

Wɔkɛ shidaa haa Yehowa Nyɔŋmɔ kɛha nɛkɛ nibii nɛɛ, kɛ agbɛnɛ eshikpɔŋ nɔ gbɛjianɔtoo lɛ hu yɛ nɛkɛ nikasemɔi ni eto he gbɛjianɔ nɛɛ ahewɔ. Amɛyeɔ amɛbuaa nikaselɔi kɛ tsɔɔlɔi lɛ fɛɛ koni amɛkpɛ akɛ kanei yɛ nɛkɛ jeŋ ni mli ewo duŋ nɛɛ mli.

[Mfoniri ni yɔɔ baafa 24]

Gbɛgbalɔi askul nikaselɔi nyɔŋmai-enyɔ kɛ ekome ni yaa nɔtsamɔ skul lolo lɛ

[Mfoniri ni yɔɔ baafa 25]

Ehe bahia ni gbekɛbii hii enyɔ nɛɛ ashi shia yɛ anɔkwale lɛ hewɔ