Miba Mihe Shi ni Mina Miishɛɛ

YƐ 1970 mli lɛ, no mli lɛ miye afii 23 ni misumɔɔ hiɛnyam taomɔ. Afee mi klakefonyo nukpa, yɛ he ni mitsuɔ nii yɛ lɛ, yɛ tsɔnetsɛmɛi akuu ko mli, yɛ Ivrea, yɛ Italy. Mitswa mifai shi akɛ mi hu masumɔ ni matsɔ gbɔmɔ wulu. Shi kɛlɛ miyɛ nɔnyɛɛ shihilɛ mli ni minaaa miishɛɛ. Mɛni hewɔ?

Miwu kɛ be babaoo yataa hiɛtserɛjiemɔ hei ni ekɛ enanemɛi tswaa spa, ni eshiɔ mikometoo ni mitsuɔ weku lɛ mli gbɛnaa nii lɛ pii ahe nii. Enɛ ha wɔgbalashihilɛ lɛ bɔi fitemɔ. Wɔbeɔ yɛ nibii bibii kwraa po he. Nɔ ni jɛ mli ba ji, mijwɛŋmɔ bayi obɔ kɛ susumɔi fɔji sɔŋŋ.

Mikɛɔ mihe akɛ: ‘Mɔ ko mɔ ko bɛ ni susuɔ ohe diɛŋtsɛ. Amɛmiitao amɛkɛ gbɛhe ni ohiɛ lɛ atsu amɛsɛɛnamɔi ahe nii kɛkɛ. Efeee mi akɛ Nyɔŋmɔ yɛ, ejaakɛ kɛji eyɛ lɛ, eŋmɛŋ amanehulu babaoo kɛ efɔŋfeemɔ gbɛ nɛkɛ. Wala jeee nɔ ko nɔ ko fe foidamɔ kɛmiiya gbele mli kɛkɛ.’ Minuuu nɔ hewɔ ni enɛ ji nakai lɛ shishi.

Tsakemɔ ko Shishijee

Gbi ko yɛ 1977 mli lɛ, Yehowa Odasefoi enyɔ komɛi batswa wɔshinaa lɛ. Miwu, Giancarlo ha amɛba mli, ni amɛtee amɛyatara asa lɛ nɔ ni amɛbɔi sane gbaa. Ejwɛŋmɔ ji ni eha amɛtsɔmɔ mɛi ni heɔ sutsakemɔ amɛyeɔ tamɔ lɛ, shi amɛ moŋ amɛnyɛ amɛtsake miwu susumɔ!

Etsɛɛɛ kɛkɛ ni Giancarlo bɔi tsakemɔi afeemɔ yɛ eshihilɛ hu mli. Ebafee mɔ ni toɔ etsui shi waa, ni enaa be babaoo ehaa mi kɛ wɔbiyoo lɛ. Ebɔɔ mɔdɛŋ akɛ ekɛ mi baagba nibii ni ekaseɔ lɛ he sane, shi be fɛɛ be lɛ mikɛ mlifu wiemɔi haa sanegbaa lɛ baa naagbee.

Kɛkɛ ni gbi ko beni Odasefoi lɛ ba lɛ, mita shi ni mibo amɛ toi diɛŋtsɛ. Amɛgba nibii agbɛjianɔtoo nɛɛ naagbee lɛ kɛ Nyɔŋmɔ Maŋtsɛyeli lɛ, Paradeiso shikpɔŋ Iɛ, kɛ gbohii Iɛ ashitee he sane. Mihe jɔ̃ mihe waa diɛŋtsɛ! Miwɔɔɔ enɔ gbii etɛ ni nyiɛ sɛɛ lɛ! Miitao male nibii babaoo, shi henɔwomɔ haaa manyɛ mabi miwu saji. Kɛkɛ ni, gbi ko lɛ, ekɛ wiemɔ ni mli wa kɛɛ mi akɛ: “Obaabo toi ŋmɛnɛ. Miyɛ hetoi kɛha osanebimɔi lɛ fɛɛ.” Kɛkɛ ni efɔse Biblia mli anɔkwalei lɛ eshwie shi eha mi.

Giancarlo kɛɛ mi akɛ Bɔlɔ lɛ gbɛi ji Yehowa, ni akɛ E-sui lɛ amli oti fe fɛɛ ji suɔmɔ, ni E-tsu E-Bi lɛ akɛ kpɔmɔ nɔ bɔni afee ni wɔna naanɔ wala, ni akɛ yɛ mɛi fɔji lɛ ahiɛkpatamɔ yɛ Harmagedon mli lɛ sɛɛ lɛ, Yesu Kristo baatee gbohii lɛ ashi yɛ e-Afii Akpe Maŋtsɛyeli lɛ mli. Ewie akɛ mɛi ni abaatee amɛ shi lɛ baatsa nɔ kɛya jwɛŋmɔŋ kɛ gbɔmɔtsoŋ emuuyeli mli, ni amɛbaana hegbɛ akɛ amɛhi shi kɛya naanɔ yɛ shikpɔŋ nɔ yɛ Paradeiso mli.

Enɔ jetsɛremɔ lɛ, mifata miwu he kɛtee Maŋtsɛyeli Asa lɛ nɔ klɛŋklɛŋ kwraa. Yɛ sɛɛ mli lɛ, mikɛɛ lɛ akɛ: “Gbɔmɛi nɛɛ sumɔɔ amɛhe waa. Miisumɔ ni matsa nɔ maba biɛ daa ejaakɛ amɛyɛ miishɛɛ diɛŋtsɛ.” Mibɔi kpeeiyaa daa, ni akɛ mi fee Biblia mli nikasemɔ. Misusu nɔ ni mikaseɔ lɛ he waa diɛŋtsɛ, ni etsɛɛɛ kɛkɛ ni miyiŋ batsɔ kwraa akɛ mina Nyɔŋmɔ anɔkwa webii lɛ lɛlɛŋ. Mikɛ miwu fee wɔ henɔjɔɔmɔ kɛha Yehowa lɛ he okadi kɛtsɔ baptisimɔ nɔ, yɛ January 1979 mli.

Be-Fɛɛ Sɔɔmɔ Nitsumɔ Lɛ

Yɛ kpokpaa nɔ kpee ni afee yɛ nakai afii lɛ naagbee gbɛ lɛ shishi lɛ, aha wiemɔ ko ni wo be-fɛɛ shiɛmɔ nitsumɔ lɛ he hewalɛ. Minu he akɛ nɔ ko miikanya mi ni mikɛ mihe awo nakai sɔɔmɔ lɛ mli, ni mikɛ sane lɛ fɔ Yehowa hiɛ yɛ sɔlemɔ mli. Shi etsɛɛɛ nɔŋŋ ni mina musu, ni efite migbɛjianɔtoo lɛ fioo. Wɔfɔ bii etɛ yɛ afii ejwɛ ni nyiɛ sɛɛ lɛ mli. Amɛteŋ mɛi enyɔ na gbɔmɔtsoŋ fatɔɔi ni nyɛɔ ekɛ wala woɔ oshara mli, yɛ bei sɔrɔtoi amli. Shi midaa shi waa akɛ amɛyi enyɔ lɛ fɛɛ amɛyi na wala.

Agbɛnɛ minu he akɛ minyɛŋ matsi migbɛjianɔtoo kɛha be-fɛɛ sɔɔmɔ nitsumɔ lɛ mato sɛɛ dɔŋŋ. Mikpa miheloonaa nitsumɔ lɛ, bɔni afee ni mana be ni sa maha migbɛnaa nii akɛ ŋa kɛ nyɛ lɛ. Mikɛ miwu to gbɛjianɔ akɛ wɔbaahi shi yɛ shika ni ekome enaa lɛ pɛ naa, ni tsɔɔ akɛ wɔbaaŋmɛɛ nibii ni he ehiaaa fɛɛ he. Ni kɛlɛ, Yehowa jɔɔ wɔ babaoo diɛŋtsɛ, ni eshiii wɔ yɛ ohia loo fimɔ shihilɛ mli kɔkɔɔkɔ.

Yɛ 1984 mli lɛ, mibiyoo lɛ ni eye afii 16 yɛ nakai beaŋ, ni abaptisi lɛ etsɛko lɛ je be-fɛɛ sɔɔmɔ nitsumɔ lɛ shishi akɛ gbɛgbalɔ. Yɛ nakai beaŋ nɔŋŋ hu lɛ, ahala miwu akɛ onukpa. Ni mi hu? Akɛni minu he akɛ minyɛŋ mafee gbɛgbalɔ yɛ nakai beaŋ hewɔ lɛ, mikɛ oti ko ma mihiɛ ni ji ŋmɛlɛtswai 30 yɛ shiɛmɔ nitsumɔ lɛ mli daa nyɔŋ nɔ. Minyɛ mishɛ he ni mikɛɛ mihe akɛ: ‘Ayekoo! Ootsu nii babaoo diɛŋtsɛ.’

Shi, henɔwomɔ batsɔ minaagba shikome ekoŋŋ. (Abɛi 16:18) Mitee nɔ misusu akɛ miibɔ mɔdɛŋ waa, no hewɔ lɛ ehe ehiaa ni maya mihiɛ yɛ mumɔŋ. Enɛ ha mimumɔŋ shidaamɔ bɔi shibaa, ni mibɔi sui kpakpai ni mina lɛ fɛɛ po laajemɔ. Kɛkɛ ni minine shɛ tsɔsemɔ ni he hiaa mi lɛ nɔ.

Yɛ 1985 mli lɛ, nɔkwɛlɔi gbɛfalɔi enyɔ kɛ amɛŋamɛi bato wɔ yɛ wɔshia lɛ beni amɛsaraa wɔ asafo lɛ tamɔ amɛfeɔ yɛ be kɛ bei amli lɛ. Bɔ ni mina nɛkɛ Kristofoi heshibalɔi, ni kɛ amɛhe shaa afɔle nɛɛ miha lɛ ha mijwɛŋ saji anɔ waa. Mitao saji amli yɛ sane ni ji heshibaa nɛɛ he, kɛtsɔ Buu Mɔɔ Asafo lɛ woji kɛ nitsumɔ nɔ. Misusu heshibaa kpele ni Yehowa jieɔ lɛ kpo yɛ bɔ ni ekɛ wɔ adesai eshafeelɔi nɛɛ yeɔ haa lɛ mli lɛ he. (Lala 18:36) Mina mile akɛ esa akɛ matsake misusumɔ.

Mikpa Yehowa fai koni eye ebua mi ni mana heshibaa su bɔni afee ni masɔmɔ lɛ yɛ gbɛ ni etaoɔ nɔ, koni agbɛnɛ ekudɔ mi ni mikɛ nikeenii ni miyɔɔ lɛ atsu nii kɛha ehiɛnyamwoo. Miŋmala gbɛgbamɔ sɔɔmɔ lɛ he gbɛbimɔ wolo lɛ eko, ni mibɔi sɔɔmɔ yɛ be-fɛɛ sɔɔmɔ nitsumɔ lɛ mli yɛ March 1989 mli.

Manyɛ makɛɛ amrɔ nɛɛ akɛ miyɛ miishɛɛ lɛlɛŋ, ni akɛ mihe shi ni miba lɛ ji nɔ ni ha mina nɛkɛ miishɛɛ nɛɛ. Mina yiŋtoo diɛŋtsɛ yɛ mishihilɛ mli​—ni no ji yelikɛbuamɔ ni mikɛaaha mɛi ni ehia amɛ lɛ ni amɛbale akɛ Yehowa, anɔkwa Nyɔŋmɔ lɛ kɛ mɛi ni taoɔ esɛɛ gbɛ lɛ ateŋ jɛkɛɛɛ​—Taakɛ Vera Brandolini gba lɛ.