Maŋtsɛyeli Jajelɔi Bɔ Amaniɛ
Sanekpakpa ni Jɛ Europa Bokagbɛ
MIISHƐƐ nibii pii miiba mli yɛ teokrase ŋmɔ lɛ mli yɛ Europa Bokagbɛ. Nɔ ni sa kadimɔ jogbaŋŋ ji majimaji ateŋ kpee wulu ni afee yɛ Zagreb, yɛ August 16-18, 1991, beni Odasefoi 7,300 kɛ miishɛɛ kpele here amɛnyɛmimɛi ni jɛ maji 15 nɔ kɛba lɛ atuu lɛ. Kɛji abua fɛɛ naa lɛ, mɛi 14,684 ba kpee lɛ. Ebafee suɔmɔ kɛ ekomefeemɔ kpojiemɔ ni yɔɔ naakpɛɛ, yɛ maŋ ni basabasafeemɔ ehao lɛ nɛɛ mli!
Odasefoi ni yɔɔ Europa Bokagbɛ lɛ kɛ amɛ deka fɛɛ miiwie Yehowa Maŋtsɛyeli ni amɛyooɔ akɛ no pɛ ji hiɛnɔkamɔ ni yɔɔ kɛha anɔkwa toiŋjɔlɛ namɔ lɛ he sane amɛmiitsɔɔ mɛi krokomɛi. Hei komɛi yɛ ni amɛhe ni amɛkɛwooo maŋ saji amli lɛ mlihiɛmɔ bafeɔ kaa diɛŋtsɛ kɛhaa amɛ. Shi yɛ fɛɛ sɛɛ lɛ, bei pii lɛ gbɔmɛi lɛ boɔ amɛ toi, ni Odasefoi lɛ ebɔ niiashikpamɔi fɛfɛji pii ahe amaniɛ.
Gbekɛyoo ko ni eye afii 16 nu sanekpakpa lɛ kɛjɛ Yehowa Odasefonyo koome pɛ ni yɔɔ nakai maŋ lɛ mli lɛ ŋɔɔ. Amɛje daa Biblia mli nikasemɔ shishi, ni anɔkwale lɛ he hiɛsɔɔ ni eyɔɔ lɛ tee hiɛ. Akɛni eyɛ he suɔmɔ kpele akɛ eeegba mɛi krokomɛi naakpɛɛ nibii ni ekase lɛ hewɔ lɛ, eka akɛ ekɛ eskulbii lɛ baawie, shi ekɛ shitee-kɛ-woo kɛ hefɛoyeli kpe. Eskulbii lɛ ateŋ mɔ kome je gbɛ ete shi ewo lɛ, shi bɔ ni eto etsui shi eha lɛ lɛ fee lɛ naakpɛɛ ni esa ehiɛ hu, ejaakɛ nɛkɛ Biblia kaselɔ fioo nɛɛ mli fuuu yɛ jɛmɔi fɛɛ ni ejɛ lɛ lɛ sɛɛ. Sɛɛ mli lɛ, eye nɛkɛ gbekɛyoo nɛɛ odase jogbaŋŋ kɛmɔ shi, ni eyoo akɛ subaŋ ni ejie lɛ kpo lɛ ejaaa kwraa. Ekɛ lɛ je Biblia mli nikasemɔ shishi, kɛkɛ ni klɛŋklɛŋ Biblia kaselɔ lɛ kɛ ehefatalɔ hee lɛ bɔ mɔdɛŋ akɛ amɛkɛ mɛi krokomɛi baaja miishɛɛ ni amɛna lɛ, yɛ shitee-kɛ-woo ni jɛ amɛfɔlɔi, amɛtsɔɔlɔ, kɛ amɛskulbii adɛŋ lɛ fɛɛ sɛɛ.
Nɔ ni jɛ amɛ odaseyeli lɛ mli ba ji akɛ, skulnyo kroko hu kpɛlɛ anɔkwale lɛ nɔ. Amrɔ nɛɛ amɛyi efee etɛ yɛ amɛ klas lɛ, ni amɛyi etɛ lɛ fɛɛ feɔ bɔ ni amɛfee klalo akɛ amɛaaye amɛbua mɛi krokomɛi kɛ bɔ ni amɛjieɔ suɔmɔ kpo amɛtsɔɔ amɛhe lɛ he nɔkwɛmɔ nii kpakpai. Kɛkɛ ni gbekɛyoo kroko hu bafata amɛhe.
Kɛkɛ ni amɛyi bafee ejwɛ yɛ skul yale lɛ mli, yɛ he ni amɛkpeɔ kutuu yɛ ni amɛkaseɔ Biblia lɛ. Ni nɔ ni ha mɛi pii anaa kpɛ amɛhe ji amɛyi ni tee nɔ efa lɛ. Gbekɛyoo kroko hu ni jɛ amɛklas lɛ, ni na amɛjeŋba kpakpa lɛ he miishɛɛ lɛ kpɛ eyiŋ akɛ lɛ hu ebaafata Biblia mli nikasemɔ lɛ he. Mɛi enumɔ lɛ tee nɔ amɛfɔ mɛi krokomɛi anine, nikaselɔi kɛ tsɔɔlɔi fɛɛ ni amɛ hu amɛfee nakai. Shi yɛ fɛɛ sɛɛ lɛ, gbekɛbii yei nɛɛ tee nɔ amɛkɛ nɔnyɛɛ kpele kpe kɛjɛ amɛfɔlɔi adɛŋ. Fɔlɔi lɛ bɔ mɔdɛŋ fɛɛ ni amɛaanyɛ akɛ amɛaaha gbekɛbii yei lɛ akpa Biblia lɛ kasemɔ kɛtsɔ amɛwoji ni amɛfite kɛ yiwaa ni amɛkɛba amɛnɔ lɛ nɔ.
Mɛni jɛ nɛkɛ odaseyeli ni je shishi kɛ gbekɛyoo kome pɛ ni yɔɔ wiemɔ lɛ he miishɛɛ nɛɛ mli ba? Abaptisi gbekɛbii yei lɛ ateŋ mɔ kome yɛ kpokpaa wulu nɔ kpee ni afee yɛ 1990 lɛ shishi, kɛ mɛi ejwɛ ni eshwɛ lɛ hu yɛ kpokpaa nɔ kpee ni afee yɛ 1991 agbiɛnaa be mli lɛ shishi. Enɛ kɛ miishɛɛ babaoo diɛŋtsɛ ba! Ŋmɛnɛ, gbekɛbii yei enumɔ nɛɛ fɛɛ miisɔmɔ akɛ daa gbɛgbalɔi! Ni shiɛlɔi 11 yɛ maŋ nɔ he ni enɛɛmɛi fɛɛ ba mli yɛ lɛ, ni amɛteŋ mɛi 8 yɛ gbɛgbamɔ sɔɔmɔ lɛ mli.
Yehowa miiwaje e-Dasefoi lɛ ni eejɔɔ amɛ waa yɛ Europa Bokagbɛ. Eyɛ faŋŋ akɛ hegbɛ kpele diɛŋtsɛ yɛ kɛha shweremɔ yɛ mɛi ni yɔɔ shikpɔŋ lɛ fa nɛɛ mli ni yɔɔ jalɛ tsuii lɛ ateŋ.