Ani Ohiɛ Sɔɔ Yehowa Gbɛjianɔtoo Ni Yɔɔ Shikpɔŋ Nɔ Lɛ?

KWƐMƆ ojarawa-tɛ fɛfɛo ko ni asha he jogbaŋŋ lɛ akɛ mɛni onaa? Ojarawa-tɛ ko ni yɔɔ fɛo waa diɛŋtsɛ. Agbɛnɛ kwɛmɔ nakai ojarawa-tɛ lɛ nɔŋŋ kɛtsɔ shwɛde ko mli, ni okwɛ akɛ mɛni onaa? Ekolɛ obaana akɛ ehiɛ eŋmala, aloo emli egbala, ni sũ mli nibii krokomɛi ebote mli, aloo tɔmɔi krokomɛi yɛ he.

Ani obaafite nɛkɛ ojarawa-tɛ nɛɛ aloo obaashɛ ofɔ yɛ bɔ ni onaa lɛ yɛ shwɛde lɛ shishi lɛ hewɔ? Eka shi faŋŋ akɛ ofeŋ nakai! Shi, shĩ shwɛde lɛ ekoŋŋ ni okwɛ, ni obaana akɛ ohiɛ baasɔ efɛo kɛ bɔ ni ekpɛlɛmɔ yɔɔ sɔrɔto kwraa ha, ni no hewɔ esoroɔ lɛ kwraa yɛ jwetrii krokomɛi fɛɛ he lɛ ekoŋŋ.

Taakɛ ojarawa-tɛ ji lɛ, esoro Yehowa shikpɔŋ nɔ gbɛjianɔtoo lɛ kwraa yɛ gbɛi babaoo nɔ. Gbɛjianɔtoo kroko ko kwraa bɛ shikpɔŋ nɛɛ nɔ ni ekɛ Bɔlɔ lɛ naa wekukpaa ni bɛŋkɛ mli ŋɔɔmɔ. Yɛ wolo ko ni eŋma eyaha klɛŋklɛŋ afii oha lɛ mli Kristofoi ni afɔ amɛ mu, ni buɔ amɛ ŋwɛi hiɛnɔkamɔ lɛ waa lɛ mli lɛ, bɔfo Petro tsi nɛkɛ wekukpaa krɛdɛɛ nɛɛ ta. Ekɛɛ: “Shi nyɛ lɛ, ‘weku ni ahala ji nyɛ, maŋtsɛmɛi ni yeɔ osɔfoi, jeŋmaŋ krɔŋkrɔŋ, maŋ ni eŋɔfee enɔ.’” (1 Petro 2:⁠9) Ŋmɛnɛ, asafo babaoo ni ji “tooi krokomɛi,” ni yɔɔ naanɔ wala yɛ shikpɔŋ nɔ he hiɛnɔkamɔ lɛ ebafata nakai “maŋ krɔŋkrɔŋ” lɛ mlibii ni eshwɛ lɛ ahe kɛmiija Nyɔŋmɔ. (Yohane 10:16) Nɛkɛ kui enyɔ nɛɛ fɛɛ ni abua amɛnaa lɛ feɔ gbɛjianɔtoo ko ni esoroɔ lɛ kwraa tamɔ jwetri fɛfɛo ko ni kpɛlɛɔ kaŋkaŋ lɛ.

Tsi Ohe Kɛjɛ Mɛi Krokomɛi Atɔmɔ Taomɔ He

Shi esa akɛ wɔyoo akɛ gbɔmɛi adesai ni yeee emuu ji mɛi ni feɔ nɛkɛ jeŋ muu fɛɛ gbɛjianɔtoo nɛɛ. No hewɔ lɛ, kɛji wɔkwɛ lɛ kɛtsɔ mfoniri-feemɔŋ shwɛde mli lɛ, mɛni wɔbaana? Hɛɛ, wɔbaana eshafeemɔ henumɔi kɛ su kɛ baŋ mli gbɔjɔmɔi yɛ aŋkroaŋkroi ni fata he lɛ agbɛfaŋ​—Romabii 3:⁠23.

Bɔfo Paulo kpɛlɛ nɔ akɛ eyɛ gbɔjɔmɔi ni tamɔ nakai. Ekɛɛ: “Mi ni misumɔɔ akɛ mafee nɔ ni hi lɛ, efɔŋ moŋ kpɛtɛ mihe.” (Romabii 7:21) Kristofonyo fɛɛ Kristofonyo kɛ nakai hepelemɔ lɛ kpeɔ. Mɔ fɛɛ mɔ tɔ̃ɔ. Ni kɛfata he, etsɛɛɛ ni mɛi babaoo naa amanehulu yɛ mɔ kroko tɔmɔ ko hewɔ. Ani esa akɛ wɔnijiaŋ aje wui aloo wɔyiŋ afee wɔ kɔshikɔshi kɛji wɔnaanyo Kristofonyo ko gbɔjɔmɔi loo emuu ni eyeee lɛ baje la hiɛ lɛ? Ani esa akɛ enɛ aha hiɛsɔɔ ni wɔyɔɔ kɛha Yehowa gbɛjianɔtoo lɛ alaaje kwraa? Eka shi faŋŋ akɛ dabi! Shi moŋ, esa akɛ wɔnyiɛ kɛshĩ shwɛde lɛ he, ni kɛji wɔɔkɛɛ lɛ, wɔkpa wɔjwɛŋmɔ ni wɔɔgbala kɛya emuu ni nakai mɛi aŋkroaŋkroi lɛ yeee lɛ nɔ lɛ kwraa.

Ŋmalɛi lɛ eto naa etsɔɔ kadimɔ nii komɛi ni baaha ayoo mɛi ni mumɔ krɔŋkrɔŋ lɛ tsuɔ nii yɛ amɛnɔ lɛ. Amɛteŋ ekomɛi ji “suɔmɔ, miishɛɛ, hejɔlɛ, tsuishitoo, mlihilɛ, ejurɔfeemɔ, hemɔkɛyeli, mlijɔlɛ, hiɛshikamɔ.” (Galatabii 5:​22, 23) Yɛ gbɛ kroko kwraa nɔ lɛ, jeŋ nɛŋ jamɔ, maŋkwramɔ, kɛ jarayeli gbɛjianɔtoi lɛ fɔɔ nɔ ni Biblia lɛ tsɛɔ lɛ akɛ heloo lɛ nitsumɔ lɛ kpojiemɔ bei babaoo: “bei, awuŋayelii, mlilawoi, bolɔmɔi, atuatsemɔi, mligbalamɔi, hiɛkɔi, awuiyelii, daatɔi, shwɛmɔ fɔŋ, kɛ nii ni tamɔ enɛɛmɛi.” (Galatabii 5:​20, 21) No hewɔ lɛ, taakɛ ojarawa-tɛ fɛfɛo ko ji yɛ tɛi foji amli lɛ, nakai Yehowa webii jeɔ kpo faŋŋ akɛ mɛi ni esoro amɛ kwraa yɛ jeŋ ni ekpɔtɔ yɛ mumɔŋ nɛɛ mli.​—Mateo 5:​14-16.

“Nyɛyitsoŋ kɛ Nyɛjwɛŋmɔ Afee Ekome”

Kadimɔ nɔ kome ni akɛyooɔ ojarawa-tɛ ji bɔ ni emli atɔm lɛ fɛɛ etsara amɛhe ni amɛfee ekome lɛ. Nakai nɔŋŋ hu Yehowa shikpɔŋ nɔ gbɛjianɔtoo lɛ jieɔ ekomefeemɔ yɛ tsɔɔmɔ kɛ nyɛmi-feemɔ mli yɛ gbɛ ni sa kadimɔ waa nɔ. Mɛi ni fata nakai gbɛjianɔtoo lɛ he lɛ kɛ ŋaawoo ni wɔnaa yɛ Biblia lɛ mli yɛ 1 Korintobii 1:10 lɛ tsuɔ nii, he ni kɛɔ nɛkɛ lɛ: “Shi, anyɛmimɛi, miikpa nyɛ fai yɛ wɔ-Nuŋtsɔ Yesu Kristo gbɛi amli, akɛ nyɛnaabu afee ekome ni mligbalamɔi akaba nyɛteŋ, shi moŋ nyɛ fɛɛ nyɛyitsoŋ kɛ nyɛjwɛŋmɔ afee ekome.”

Yehowa Odasefoi eye hewolonɔ sui ahe jwɛŋmɔ fɔŋ namɔ kɛ maŋ nɔ ni mɔ ko jɛ lɛ he henɔwomɔ su lɛ hu nɔ kwraa. Akɛni amɛyɛ “nilee ni jɛ ŋwɛi lɛ” hewɔ lɛ, amɛkɛ ‘mligbalamɔi bibii’ baaa amɛteŋ. (Yakobo 3:17) Wɔkɛ anunyam lɛ haa Yehowa yɛ nɔ ni etsu yɛ enɛ gbɛfaŋ yɛ gbɛjianɔtoo ni emlibii ji gbɔmɛi adesai ni yeee emuu lɛ mli lɛ hewɔ.

Yɛ gbɛ kroko kwraa nɔ lɛ, wolo tɛtrɛɛ ni atsɛɔ lɛ The Christian Century lɛ jaje, beni ewieɔ 1990 afi lɛ he lɛ akɛ “etamɔ nɔ ni jamɔi amli kui kɛ weku kɛ maŋ nɔ ni mɔ ko jɛ lɛ mli henumɔi ni kɛ jamɔ mli hemɔkɛyelii tsaa lɛ egbala je lɛ mli fɛɛ babaoo fe bei fɛɛ ni eho. Kɛjɛ India kɛyashi Europa kɛ agbɛnɛ kɛjɛ Boka Teŋgbɛ kɛyashi Pasifik fɛɛ lɛ, jamɔ kɛ weku kɛ maŋ nɔ he ni mɔ ko jɛ lɛ he henumɔi fɛɛ efutu​—ni yɛ be babaoo mli lɛ ekɛ maŋkwramɔŋ shihilɛi ni sɛɛ etsɛɛɛ baa.” Eyɛ faŋŋ akɛ, mɛi ni sumɔɔ akɛ amɛsɔmɔ Nyɔŋmɔ lɛ baanyɛ amɛtsɔ amɛhe kɛya gbɛjianɔtoo kome ni naa Yehowa mumɔ lɛ kɛ ejɔɔmɔi amli ŋɔɔmɔ lɛ pɛ he.

‘Miha Ohiɛŋtso Efee Taomɔ Diamente’

Diamente ji tɛ ni wa fe fɛɛ yɛ adebɔɔ su naa ni gbɔmɛi adesai le. Biblia lɛ wieɔ diamente kɛ nitsumɔ he akɛ nɔ ni akɛtĩtĩɔ loo akɛŋmalaa nii yɛ dadei anɔ. (Yeremia 17:⁠1) Kadimɔ Yehowa wiemɔ ni ekɛ Ezekiel wie lɛ hu: “Naa, miha ohiɛ ewa yɛ amɛhiɛ, ni ohiɛŋtso hu ewa ewo amɛhiɛŋtsei; naa, miha ohiɛŋtso efee tamɔ diamente ni wa fe tswrɛbo lɛ.” (Ezekiel 3:​8, 9) Yehowa ha Ezekiel faishitswaa ko ni mli wa waa tamɔ diamente ni no ye ebua lɛ ni enyɛ egba etsɔɔ nakai gbɔmɛi kuɛŋtilɔi lɛ.​—Ezekiel 2:⁠6.

Nakai nɔŋŋ hu ŋmɛnɛ, Yehowa eha ewebii lɛ shihilɛ ko ni wa tamɔ diamente ni amɛkɛkpeɔ shitee-kɛ-woo kpele ni baa amɛnɔ lɛ naa. Yehowa Odasefoi eŋmɛ amɛtsui shi yɛ amɛnitsumɔ ni aguɔ yɛ mla naa, gbɔmɛi ni feɔ basabasa atutuamɔ, basabasa-feemɔ ni kɛ gbele baa, yii, tsuŋwoo ni ejaaa, piŋmɔi, kɛ gbee diɛŋtsɛ po ni ajeɔ gbɛ agbeɔ amɛ lɛ fɛɛ mli. Ni kɛlɛ, amɛtsɔɔ akɛ anyɛɛɛ ahoso amɛhemɔkɛyeli lɛ kɔkɔɔkɔ.

“Mitsuji lɛ Aaanyá”

Biblia lɛ tsɔ hiɛ ewie be ko ni baaba beni gbɔmɛi aaana “Nyɔŋmɔ jamɔ su” ko, shi “amɛkwa emli hewalɛ lɛ” he. (2 Timoteo 3:​1, 5) Adafitswaa wolo ko bɔɔ amaniɛ akɛ “Protestantbii, Roma Katolekbii kɛ Yudafoi fɛɛ miisusu bɔ ni amɛnɔ gbɔɔ waa” yɛ amɛsɔlemɔ kɛ kpee hei amli lɛ he. Shi yɛ gbɛ kroko nɔ lɛ, Yehowa Odasefoi ji mɛi ni kɛ hiɛdɔɔ kaseɔ Biblia lɛ. Amɛyifalɛ miiya hiɛ, gbekɛbii kɛ onukpai, hii kɛ yei, ni amɛ fɛɛ amɛyaa kpeei sɔrɔtoi abɔ daa otsi. Wolo ko ni aŋma ayaha adafitswaa wolo ko lɛ wie yɛ amɛhe akɛ “amɛ jamɔ lɛ ji nɔ ni jara wa fe fɛɛ kɛha amɛ ni amɛyɔɔ, ni nɔ ni amɛsusuɔ he fe fɛɛ ji ni amɛkɛ mɛi krokomɛi agba he sane.”

Su ni tamɔ nɛkɛ ji nɔ ni haa esoroɔ Yehowa gbɛjianɔtoo lɛ kwraa tamɔ ojarawa-tɛ ko lɛ. Ni ehe yijiemɔ lɛ yaa Mɔ ni wajeɔ gbɔmɛi aŋkroaŋkroi ni yeee emuu ni etsɔɔ amɛ gbɛ kɛtsɔɔ emumɔ krɔŋkrɔŋ lɛ nɔ lɛ ŋɔɔ.

Gbalɔ Yesaia gba efɔ shi akɛ: “Bɔ ni Nuŋtsɔ Yehowa kɛɛ nɛ: ‘Naa, mitsuji lɛ aaaye nii, . . . Naa, mitsuji lɛ aaanu nii, . . . Naa, mitsuji lɛ aaanyá, . . . Naa, mitsuji lɛ aaala kɛ tsuijurɔ.’”​—Yesaia 65:​13, 14.

Ŋmɛnɛ, wɔnaa nɛkɛ gbalɛ nɛɛ mlibaa diɛŋtsɛ. Nyɔŋmɔ kwɛɔ ewebii anɔ yɛ gbɛ ni yɔɔ sɔrɔto kwraa nɔ! No hewɔ lɛ, kɛji okɛ amɛ bɔɔ lɛ, kaaŋmɛ gbɛ ni susumɔ gbonyo miihe nakai miishɛɛ ni onaa lɛ kɛmiijɛ odɛŋ. Kwɛmɔ gbɛjianɔtoo muu lɛ fɛɛ ni okai akɛ: Gbɛjianɔtoo kroko ko bɛ shikpɔŋ nɛɛ nɔ ni naa Nyɔŋmɔ kwɛmɔ krɛdɛɛ kɛ ehebuu mli ŋɔɔmɔ. Ohiɛ akakpa nɔ kɔkɔɔkɔ akɛ ooobu hegbɛ ni oyɔɔ akɛ ofata he lɛ akɛ nɔ ni jara wa waa diɛŋtsɛ.