Biblia Lɛ​—Ani Eyɛ Krɔŋkrɔŋ Lɛlɛŋ?

MƐI enyiɛ buɔ Biblia lɛ ŋmɛnɛ akɛ eyɛ krɔŋkrɔŋ, akɛ eji Nyɔŋmɔ Wiemɔ? Yɛ nɛkɛ yinɔ ni ajeɔ anɔkwale he ŋwane nɛɛ mli lɛ, mɛi pii buɔ lɛ akɛ ebe eho ni ehe bɛ sɛɛnamɔ hu, ni akɛ eyɛ krɔŋkrɔŋ lɛlɛŋ lɛ, amɛjeɔ enɛ he ŋwane. Jamɔ mli hiɛnyiɛlɔi ni yɔɔ Kristendom lɛ ateŋ mɛi komɛi po tsɔɔ akɛ Biblia lɛ eyi obɔ kɛ blema saji kɛ adesai sɔŋŋ. Amɛbiɔ ‘kɛji mɔ ko ni hiɛ ka shi jogbaŋŋ lɛ baanyɛ akpɛlɛ bɔ ni Biblia lɛ tsɔɔ yinɔsane mli ehaa lɛ nɔ.’​—The Interpreter’s Dictionary of the Bible, Kpo 2, baafa 611.

Woloŋlelɔi ni ale amɛ jogbaŋŋ lɛ miidu yiŋkɔshikɔshi-feemɔ yɛ ja ni eja gbɛ akɛ aaatsɛ Biblia lɛ akɛ Nyɔŋmɔ Wiemɔ lɛ he. Amɛteŋ mɔ kome kɛɛ akɛ “kɛji mɔ ko miisumɔ ni ekɛ bɔ ni atsɛɔ lɛ Nyɔŋmɔ-Wiemɔ lɛ atsu nii lɛ, no lɛ gbɛi ni sa ni ebaanyɛ ekɛtsɛ Biblia lɛ ji Israel Wiemɔ, mra be mli Kristofoi ahiɛnyiɛlɔi lɛ ekomɛi a-Wiemɔ.” (The Bible in the Modern World, ni James Barr ŋma lɛ) Te osusuɔ tɛŋŋ? Ani Biblia lɛ ji Nyɔŋmɔ Wiemɔ? Ani eyɛ krɔŋkrɔŋ lɛlɛŋ?

Namɔ Ŋma Biblia Lɛ?

Awieɔ akɛ Mose, ni ji Hebrinyo ko ni hi shi aaafee afii 3,500 ni eho nɛɛ ji mɔ ni ŋma Biblia lɛ mli klɛŋklɛŋ wolo, ni atsɛɔ lɛ Genesis loo 1 Mose lɛ. Taakɛ Biblia lɛ diɛŋtsɛ tsɔɔ lɛ, hii ni jɛ shihilɛi sɔrɔtoi amli aaashɛ 40 na gbɛfaŋnɔ yɛ Ŋmalɛi lɛ fa ni eshwɛ lɛ aŋmalamɔ mli, ni nɔ ni jɛ mli ba ji woji, aloo Biblia lɛ fai sɔrɔtoi 66 ni abua naa. Shi kɛlɛ, nɛkɛ hii nɛɛ ebuuu amɛ diɛŋtsɛ amɛhe akɛ mɛi diɛŋtsɛ ni ŋmala Biblia lɛ. Niŋmalɔi nɛɛ ateŋ mɔ kome kɛɛ: “Ŋmalɛ fɛɛ ŋmalɛ . . . jɛ Nyɔŋmɔ mumɔ lɛŋ.” (2 Timoteo 3:16) Mɔ kroko hu ŋma yɛ Biblia ŋmalɔi lɛ ahe akɛ: “Mumɔ krɔŋkrɔŋ lɛ tsirɛɔ Nyɔŋmɔ gbɔmɛi krɔŋkrɔŋi lɛ ni amɛwieɔ.”​—2 Petro 1:⁠21.

Enɛ kɛ mɛi ni ŋmala lɛ woɔ shihilɛ ko ni haa amɛtsɔmɔɔ niŋmalɔi kɛkɛ, aloo woloŋmalɔi, ni Nyɔŋmɔ kudɔɔ amɛ loo etsɔɔ amɛ gbɛ lɛ mli. Taakɛ Biblia lɛ tsɔɔ lɛ, yɛ bei babaoo mli lɛ, aŋmɛɔ niŋmalɔ lɛ gbɛ ni ehalaa lɛ diɛŋtsɛ ewiemɔi komekomei koni ekɛŋma sane ni ajɛ ŋwɛi akɛha lɛ lɛ. (Habakuk 2:⁠2) No hewɔ ni ayɔɔ gbɛi sɔrɔtoi babaoo yɛ Biblia lɛ mli ni atsɔ nɔ akɛŋma lɛ. Shi Nyɔŋmɔ ji mɔ ni kudɔɔ niŋmaa lɛ yɛ bei fɛɛ mli.

Kɛ wɔɔkpɛlɛ nɔ lɛ, bɔ ni niŋmalɔi nɛɛ kɛɔ akɛ amɛniŋmaa lɛ jɛ Nyɔŋmɔ mumɔ mli lɛ diɛŋtsɛ jeee odaseyeli ni tsɔɔ akɛ Biblia lɛ ji ŋwɛi shɛɛ saji ni jɛ Bɔlɔ lɛ ŋɔɔ kɛha gbɔmɛi adesai. Shi yɛ fɛɛ sɛɛ lɛ, kɛji Ŋwɛi Flooflonyo lɛ ji Biblia Ŋmalɔ jio, jeee lɛ eŋma jio, kɛji akwɛ wolo lɛ diɛŋtsɛ mli jogbaŋŋ kɛ jwɛŋmɔ ni mli tse hu lɛ esa akɛ ana enɛ faŋŋ. Ani Biblia lɛ kɛ odaseyeli haa akɛ ŋwɛi ajɛ aŋma? Yɛ anɔkwale mli lɛ, ani wɔbaanyɛ wɔkɛɛ kɛ nɔmimaa akɛ Biblia lɛ yɛ krɔŋkrɔŋ lɛlɛŋ?