Ekomefeemɔ Baaba Kɛ̃ Kɛtsɔ Kristo Nɔ
Saji Otii ni jɛ Efesobii Awolo lɛ Mli
AFl 52 Ŋ.B. mra mli ni bɔfo Paulo shiɛ yɛ Efeso. Nɛkɛ jarayeli maŋ ni yɔɔ nii babaoo ni yɔɔ Asia Bibioo lɛ hu ji apasa jamɔ shihemɔ he. Shi Kristo jamɔ shwere yɛ jɛmɛ yɛ be mli ni Paulo ku esɛɛ kɛtee Efeso lɛ, aaafee afi 52/53 Ŋ.B. lɛ fɛi be mli. Eha maŋshiɛmɔi yɛ skul nikasemɔ he ko ni eshiɛɔ yɛ shia kɛ shia yɛ afii etɛ ni ekɛhi jɛmɛ lɛ mli.—Bɔfoi lɛ Asaji 19:8-10; 20:20, 21, 31.
Yɛ be mli ni awo lɛ tsuŋ yɛ Roma aaafee afi 60-61 Ŋ.B. lɛ mli ni Paulo ŋma wolo eyaha Efeso Kristofoi lɛ. Ewolo lɛ yitso ji ekomefeemɔ kɛ Kristo ni agbɛnɛ kɛtsɔ enɔ. Yɛ anɔkwale mli lɛ ewie ewiemɔi ni ji ‘ekomefeemɔ kɛ Kristo’ he shii 13 sɔŋŋ yɛ mli fe woji krokomɛi fɛɛ ni Paulo ŋmala lɛ. Taakɛ Efesobii lɛ ji lɛ, Paulo wiemɔi ni kɔɔ Kristo nitsumɔ, jeŋba shara ni wɔɔkwa kɛ mumɔi fɔji ni yi wa ni wɔɔte shi wɔwo amɛ lɛ he lɛ he baaba sɛɛnamɔ aha wɔ.
Ekomefeemɔ Ji Nyɔŋmɔ Yiŋtoo
Klɛŋklɛŋ lɛ, Paulo tsɔɔ bɔ ni Nyɔŋmɔ baatsɔ Kristo nɔ ni ekɛ ekomefeemɔ aba lɛ mli. (1:1-23) Yehowa eto eyiŋ akɛ ebaabua nibii fɛɛ ni yɔɔ ŋwɛi kɛ shikpɔŋ nɔ lɛ naa ekoŋŋ kɛtsɔ “nɔkwɛmɔ gbɛjianɔtoo” nɔ, (gbɛ ko ni aaatsɔ nɔ akwɛ nibii anɔ). Nyɔŋmɔ baatsɔ Kristo nɔ aha mɛi ni ahala amɛ kɛha ŋwɛi shihilɛ kɛ mɛi krokomɛi ni baahi shikpɔŋ nɔ lɛ kɛ lɛ afee ekome. Ŋmɛnɛ, Nyɔŋmɔ eha mɛi ni afɔ amɛ mu lɛ kɛ “asafo babaoo” lɛ efee ekome, ni ‘nibii fɛɛ ni yɔɔ shikpɔŋ nɔ lɛ anaabuamɔ’ lɛ baaya nɔ kɛyashi be mli ni mɛi ni yɔɔ kaimɔ gbohii abui amli lɛ baanu Yesu gbee ni amɛje kpo. (Kpojiemɔ 7:9; Yohane 5:28, 29) Esa akɛ wɔda shi yɛ enɛ he, taakɛ bɔ ni Paulo sɔle akɛ Efesobii lɛ ahiɛ baasɔ gbɛjianɔ ni Nyɔŋmɔ eto kɛha amɛ lɛ.
Yɛ no sɛɛ lɛ agbala jwɛŋmɔ kɛtee Kristofoi ni ji jeŋmajiaŋbii, mɛi ni tsutsu lɛ amɛgboi yɛ amɛhe eshai amli lɛ anɔ. (2:1–3:21) Atsɔ Kristo nɔ agu Mla lɛ, ni akɛ shishitoo ni aaatsɔ nɔ afee Yudafoi kɛ Jeŋmajiaŋbii lɛ ekome ni amɛbatsɔmɔ sɔlemɔtsu ni Nyɔŋmɔ baatsɔ emumɔ lɛ nɔ ahi mli lɛ fɔ shi. Paulo nitsumɔ ji ni eha ale teemɔŋsane krɔŋkrɔŋ lɛ akɛ Jeŋmajiabii baanyɛ amɛkɛ Kristo afee ekome, ni amɛtsɔ enɔ amɛba Nyɔŋmɔ ŋɔɔ kɛ wiemɔ mli heyeli. Paulo sɔle eha Efesobii lɛ ekoŋŋ, ni yɛ nɛkɛ be nɛɛ mli lɛ ebi ni Yehowa aha amɛfi shi shiŋŋ kɛtsɔ hemɔkɛyeli kɛ suɔmɔ nɔ.
Nibii ni Haa Ekomefeemɔ Baa
Paulo tsɔɔ akɛ Nyɔŋmɔ kɛ nibii ni kɛ ekomefeemɔ baa lɛ eha. (4:1-16) Nɔ ni fata enɛɛmɛi ahe ji mumɔŋ gbɔmɔtso kome ni ji asafo lɛ. Gbɔmɔtso nɛɛ tsuɔ nii yɛ ekomefeemɔ mli yɛ Kristo yitsoyeli shishi. Ni ekɛ nikeenii yɛ gbɔmɛi ateŋ haa koni amɛye amɛbua mɛi fɛɛ kɛya ekomefeemɔ yɛ hemɔkɛyeli lɛ mli lɛ he.
Yehowa hu haa anyɛɔ ajieɔ Kritofoi asui ni kɛ ekomefeemɔ baa lɛ kpo. (4:17–6:9) Akɛni amɛwo “gbɔmɔ hee” lɛ hewɔ lɛ, Kristofoi kpooɔ nibii ni ejaaa tamɔ wiemɔ sha. Amɛkɛ nilee nyiɛɔ, amɛjieɔ bulɛ kpo amɛtsɔɔ Kristo, ni amɛbaa amɛhe shi yɛ gbɛ ni sa nɔ.
Kɛfata he lɛ, Nyɔŋmɔ yeɔ ebuaa Kristofoi ni amɛte shi amɛwo mumɔi fɔji asafo ni taoɔ afite wɔ ekomefeemɔ lɛ. (6:10-24) Mumɔŋ tawuu nii ni jɛ Nyɔŋmɔ ŋɔɔ lɛ kɛ hebuu ni tamɔ nɛkɛ haa. No hewɔ nyɛhaa ni wɔkɛtsua nii ni wɔkɛ hiɛdɔɔ asɔle, ni wɔkɛ wɔnanemɛi heyelilɔi awo wɔ nibimɔi amli.
Mɛɛ ŋaawoo kpakpa po Paulo kɛha Efesobii lɛ nɛkɛ! Eba akɛ wɔɔbo toi kɛtsɔ jeŋba gbonyo ni wɔɔkwa nɔ, ni wɔte shi wɔwo mumɔi fɔji asafoi lɛ. Ni nyɛhaa wɔhiɛ asɔa ekomefeemɔ ni wɔnaa mli ŋɔɔmɔ kɛtsɔɔ Yesu Kristo nɔ lɛ waa.
[Akrabatsa/Mfoniri ni yɔɔ baafa 24]
Gaimlibii ni Tsoɔ: Nɔ ni fata mumɔŋ tawuu nii ahe ji “hemɔkɛyeli tsɛŋ” ni wɔkɛaagbe Satan ‘gaimlibii ni tsoɔ” lɛ loo wɔkɛaaha efee yaka lɛ. (Efesobii 6:16) Gaimlibii ni Romabii lɛ kɛtsu nii lɛ ekomɛi ji galai ni fɔlɔ ka mli ni tsɛkɛ dade nii ni akɛ mu kɛ nɔ koni atsɛɔ lɛ naphtha ni akɛtsɛ̃ɔ la ewo mli lɛ mli. Atsɔ̃ɔ kɛjɛɔ gai ni mli egbɔjɔ mli koni la lɛ akagbo, ni nu ni akɛshwieɔ nɔ lɛ haa la lɛ tsoɔ waa moŋ. Shi tsɛŋ ni dara buɔ asraafoi lɛ ahe kɛjeɔ gaimlibii ni tamɔ nɛkɛ he, taakɛ bɔ ni Yehowa mli hemɔkɛyeli hu haa etsuji lɛ nyɛɔ amɛgbeɔ “mɔ fɔŋ lɛ gaimlibii ni tsoɔ lɛ fɛɛ” lɛ. Hɛɛ, hemɔkeyeli yeɔ ebuaa wɔ koni wɔte shi wɔwo nibii ni tamɔ mumɔi fɔji atutuamɔi kɛ agbɛnɛ kaa koni wɔfee efɔŋ, koni wɔdi heloo gbɛfaŋ nibii asɛɛ, ni wɔshe gbeyei ni wɔyiŋ afee wɔ kɔshikɔshi lɛ.