Nilee Gbɛ Dani Oshara Ba

AKƐNI Mary bii lɛ edara hewɔ lɛ, eyɛ be ni ekpɛ eyiŋ akɛ ebaatao nitsumɔ ni ekɛ ebe fa baatsu. Beni egba ewu Enos enɛ lɛ, ewu lɛ fee lɛ faŋŋ kɛha lɛ akɛ ehe ehiaaa ni efee nakai. Ekɛɛ lɛ akɛ: “Kɛji akɛ minyɛ mikwɛ bo kɛ gbekɛbii lɛ, belɛ manyɛ makwɛ wɔyi enyɔ lɛ hu bianɛ.” No hewɔ lɛ ni eŋa kɛ ehe aaawo heloo gbɛfaŋ nitsumɔ mli lɛ, ewolɛ ŋaa akɛ esɔle ni esusu gbɛgbalɔ, be fɛɛ Maŋtsɛyeli shiɛlɔ ni eeetsɔ lɛ he.

Eyɛ mli akɛ Mary nyaa Maŋtsɛyeli lɛ he sane lɛ ni ekɛ ekutsoŋbii jaa lɛ he moŋ, shi ehiɛ gboɔ nii ni ebɛ hekɛnɔfɔɔ. Shi kɛlɛ, eesumɔ ni ebo ewu lɛ ŋaawoo lɛ toi. No hewɔ lɛ ekɛ yiŋkɔshikɔshi-feemɔ kpɛlɛ nɔ ni ekɛ ehe ha akɛ gbɛgbalɔi awalɔ yɛ April 1981.

Etsɛɛɛ ni Mary kɛ oyaiyeli na suɔmɔ kɛha Maŋtsɛyeli shiɛmɔ nitsumɔ lɛ fe bɔ ni efee nakai pɛŋ. Etsɛɛɛ ni ana ni ekɛ mɛi ni yɔɔ wiemɔ lɛ he miishɛɛ lɛ miifee shia Biblia mli nikasemɔi ejwɛ. Ebatsɔ daa gbɛgbalɔ yɛ afi mli, ni eefee shia Biblia mli nikasemɔi nyɔŋma. Christine, Yehowa Odasefonyo ni ebii enyɔ yaa skul lolo lɛ kɛ miishɛɛ yafata Mary he akɛ ehefatalɔ yɛ gbɛgbamɔ mli. Mɛi heei ni amɛna wiemɔ lɛ he miishɛɛ lɛ bɔi kpeei baa yɛ Maŋtsɛyeli Asa lɛ nɔ, he ni gbɛgbamɔ mumɔ miida yɛ lɛ. Ni Mary miishɛɛ lɛ bada fe fɛɛ yɛ be mli ni lɛ diɛŋtsɛ ebi, Christopher, hala akɛ ebaanyiɛ enɔkwɛmɔ nɔ lɛ sɛɛ ni lɛ hu ebatsɔ gbɛgbalɔ lɛ.

Kɛkɛ ni trukaa, yɛ 1985 lɛ oshara ba. Mary hiɛ di lɛ ni egbee shi. Hela ko ni haa la hoɔ yɛ ansɔ lɛ mli emɔ lɛ, ni yɛ gbii etɛ pɛ mli lɛ, Mary ni eye afii 45 lɛ gbo.

Shi yɛ nakai afii ejwɛ ni Mary kɛfee gbɛgbalɔ lɛ mli lɛ, ekɛtswa shidaamɔ kpakpa ema shi yɛ akutso lɛ mli. Mɛi fe 300 ba eyarafeemɔ lɛ shishi, kɛ akutso lɛ mlibii pii. Mɛi ni ba jɛmɛ lɛ ateŋ mɔ kome ji eskul naanyo ni hiɛ sɔ Mary hemɔkɛyeli, ni eesumɔ ni ekase babaoo yɛ he, ni ebi ni akɛ lɛ akase Biblia lɛ. Mary sɔɔmɔ lɛ miiwo yibii lolo.

Enos kɛɛ: “Amrɔ nɛɛ mi diɛŋtsɛ miji gbɛgbalɔi awalɔ bianɛ, shi mina ni kulɛ mikɛ mihe bɔ Mary he yɛ be mli ni eyɔɔ gbɛgbamɔ sɔɔmɔ lɛ mli lɛ. Egbaa eniiashikpamɔi lɛ daa, ni ehe yɛ miishɛɛ naakpa. Yɛ anɔkwale mli lɛ, nakai afii fioo lɛ ji miishɛɛ afii yɛ wɔshihilɛ be fɛɛ mli, ni kpaako mihiɛ sɔɔ nɔ hewɔ lɛ.”

Mɔ ko mɔ ko nyɛŋ ale be mli ni “be kɛ nibii ni baa trukaa ni aleee” baanyɛ aba mɔ ko nɔ taakɛ eba Mary nɔ trukaa lɛ. Shi mɛi ni hiɔ shi akɛ Maŋtsɛyeli jajelɔi anɔkwafoi lɛ naa hiɛsɔɔ kpakpa yɛ Nyɔŋmɔ kɛ gbɔmɛi ahiɛ, yɛ haomɔi fɛɛ sɛɛ.​—Jajelɔ 9:​11; 11:​1, 2.

[Mfonirii ni yɔɔ baafa 31]

Sɔɔmɔ lɛ mli gbɛfaŋnɔ ni anaa lɛ ji be ni akɛtsuɔ nii yɛ gbɛ kpakpa nɔ