“Shia Nɛɛ Onɔ Ni”

“SHIA nɛɛ onɔ ni​—wɔkɛ no hu efata he.” Kwɛ bɔ ni nɛkɛ wiemɔi nɛɛ muɔ mɛi ni gbe nitsumɔ babaoo ni amɛkɛ afii enyɔ tsu yɛ Watch Tower Asafo lɛ nitsumɔ he nine ni yɔɔ Australia lɛ naa lɛ henumɔi anaa yɛ gbɛ ni ja nɔ! Yehowa Nyɔŋmɔ akɛwie wiemɔi nɛɛ, ni eji lala ko ni afo kɛha nifeemɔ krɛdɛɛ ko lɛ fa. Mɛɛ nifeemɔ? Tsui heei ni amamɔ kɛlɛɛ Betel shia kɛ nitsumɔ he lɛ mli lɛ nɔ jɔɔmɔ lɛ.

Ani Ehe Ebahia ni Alɛɛ Mli Oya Nakai?

Nɔ ni yɔɔ naakpɛɛ ji akɛ, nɔ ni shɛko afii kpawo mli nɛ ni abajɔɔ Betel shia hee ni ama yɛ nakai beaŋ yɛ Ingleburn, yɛ Sydney maŋ lɛ klotia yɛ wuoyi-anaigbɛ, yɛ Australia lɛ nɔ yɛ gbɛ ni tamɔ nakai nɔŋŋ nɔ. Mɛni hewɔ ni ehe bahia ni alɛɛ mli ekoŋŋ oya nakai lɛ?

Nɔ kome ji akɛ, Odasefoi ni yɔɔ Australia lɛ ayi efa kɛjɛ nɔ ni shɛɛɛ 32,000 yɛ 1981 mli kɛyashɛ yibɔ ni fa fe fɛɛ ni ji 51,152 yɛ October 1989 mli, ni enɛ ha ehe bahia ni mɛi ni tsuɔ nii yɛ Betel lɛ ayi afa. Kɛfata he lɛ, woji ni Australia nitsumɔ he nine lɛ kɛmaje nitsumɔ he niji krokomɛi lɛ falɛ tee hiɛ waa yɛ naakpɛɛ gbɛ nɔ. Amrɔ nɛɛ, Australia feɔ woji yɛ wiemɔi sɔrɔtoi 37 mli bɔni afee ni etsu Fiji, Indonesia, Papua New Guinea, New Caledonia, New Zealand, Solomon Islands, Tahiti, Vanuatu, Niue, Western Samoa, Tonga, Tuvalu, kɛ Wallis Islands, kɛ agbɛnɛ Australia diɛŋtsɛ hiamɔ nii ahe nii. No hewɔ lɛ Betel weku lɛ eda kɛtee hiɛ oyaayai kɛyashɛ mɛi 164.

Bɔni afee ni anyɛ ana he ko aha weku ni daa nɛɛ, agbe nitsumɔ he nɔtsamɔ ŋsɔɔdoi etɛ lɛ naa yɛ afi 1987 shishijee mli, ni eha anyɛ ana tsui babaoo afata ɔfis lɛ he. No sɛɛ lɛ, Nɔyeli Kuu lɛ kpɛlɛ nɔ ni ama tsu ŋsɔɔdoi etɛ ni akɛlɛɛ nitsumɔ he lɛ mli kɛ ŋsɔɔdoi enumɔ hu kɛha wɔɔhe lɛ mlilɛɛmɔ. Aje ehee ni abaama afata nitsumɔ he lɛ he, ni kɛ tsu mli dalɛ ni feɔ ninetalɔi 38,800 yɛ ekɛlɛ kɛ elɛɛmɔ fɛɛ mli baafata he lɛ shishi yɛ January 1988. Yɛ no sɛɛ nyɔji fioo mli lɛ, aje nitsumɔ ni akɛlɛɛɔ wɔɔhe lɛ hu mli, ni baaha ana tsui 51 afata he lɛ shishi.

Afɔleshai kɛ Nibii ni Ajɛɔ Tsuiŋ Akɛkeɔ

Akɛ ninefɔɔ maje kɛyaha asafoi ni yɔɔ maŋ lɛ mli lɛ fɛɛ akɛtao mɛi ni kɛ amɛhe baaha akɛ amɛbaafee “nitsulɔi aweku” lɛ mlibii, kɛyashi afii enyɔ. Bɔ ni ahere nɔ aha lɛ yɛ naakpɛɛ, ni mɛi ni ekase ninenaa nitsumɔi sɔrɔtoi kɛ amɛhe ha amrɔ nɔŋŋ. Nine shɛ gbɛbimɔ woji sɔrɔtoi fe 700 nɔ, ni yɛ be mli ni amamɔɔ tsui lɛ, mɛi fɛɛ ni kɛ amɛhe ha ni amɛbatsu nitsumɔ lɛ eko, kɛ be falɛ ni shɛɔ otsii enyɔ kɛyashi nɔ ni miihe ashɛ afii enyɔ lɛ ayifalɛ ji 270.

Odasefoi lɛ ateŋ mɔ kome yɛ nitsumɔ ko ni tsaa shikpɔŋ sũ yɛ Queensland maŋ ni yɔɔ kooyigbɛ lɛ mli. Ehɔɔ enitsumɔ nɛɛ fa, ni lɛ kɛ eŋa bafee nitsulɔi aweku lɛ fa kɛjɛ eshishijee mli tɔ̃ɔ. Eyahe tsɔne agbo ko ni akɛtsaa shikpɔŋ ni lɛ diɛŋtsɛ ekɛtsu shitsaa nitsumɔ ni he hiaa lɛ mli babaoo ni eheee Asafo lɛ nɔ ko. Beni agbe shitsaa nitsumɔ lɛ tsiimɔ naa lɛ, ehɔɔ tsɔne lɛ ni ehi shi ni etsu nii lolo yɛ nitsumɔ lɛ hei krokomɛi. He-kɛhamɔ mumɔ fɛfɛo ni mɛi fɛɛ jie lɛ kpo yɛ nitsumɔ lɛ mli lɛ mli nɔkwɛmɔ nɔ kome pɛ nɛ.

Odasefoi kɛ tsɔnei ni akɛshiɔ kɔnkret baha koni akɛwo kɔnkret ni naa shɛɔ abasaŋ 4,300 ni he hiaa kɛha ŋsɔɔdoi kpaanyɔ ni yɔɔ tsui enyɔ lɛ fɛɛ mli lɛ. Mɛi krokomɛi kɛ nibii ni he hiaa ni akɛmaa tsu bake kɛha kɔnkret nu bui etɛ ni nu galɔŋ 5,800 yaa mli lɛ feemɔ, ni Odasefoi ni tsuɔ nii yɛ Asafo lɛ nitsumɔ he lɛ kɛ amɛbe ha ni akɛmamɔ nu bui lɛ.

Eji anɔkwale akɛ jeee mɛi fɛɛ ni kɛ amɛhe ha lɛ le ninenaa nitsumɔi. Lɛlɛŋ, obalahii babaoo kase nitsumɔi heei yɛ be mli ni amaa tsu lɛ. Mɛi babaoo batsɔmɔ gbogbotswalɔi ni he esa yɛ be mli ni amɛwaa ni akɛtswaa brikisii akpei ohai enumɔ ni he hiaa kɛha nitsumɔ lɛ. Mɛi krokomɛi kase bɔ ni atswaa gbogbo he kɛ shikpɔŋ tile fɛɛ, ni yɛ otsii fioo ko pɛ mli lɛ, nyɛmiyoo ko he basa waa yɛ gbɛ nɔ ni atsɔɔ ni akɛ wolo haa gbogbo he lɛ mli.

Enɔjɔɔmɔ Gbi Lɛ

Enɔjɔɔmɔ gbi yɛ Hɔɔ, November 25, 1989 lɛ bashɛ, ni je batsɛre ni hulu je​—agbiɛnaa naagbee gbɛ gbi fɛfɛo ko. Asaa tsu ni ama afata nitsumɔ he lɛ he lɛ ŋsɔɔdo ni ji enyɔ lɛ mli bɔni afee ni akɛ jɛmɛ atsu nii akɛ tsui ni abaatara mli kɛha enɔjɔɔmɔ lɛ mli klɛŋklɛŋ nɔ. Akɛ televishin sha nibii ni tee nɔ yɛ nitsumɔ he tsui krokomɛi enyɔ lɛ amli kɛ he ni ajɛɔ ajaa woji lɛ, kɛ Betel kpee he lɛ, kɛ he ni ayeɔ nii yɛ yɛ Betel shia lɛ mli lɛ fɛɛ atsɔɔ ni mɛi ni eba lɛ na. Enɛ ha ana shitaramɔ hei ni hejɔlɛ yɔɔ mli akɛha mɛi ni fe 3,000.

Akɛni gbɛ fioo ko pɛ yɔɔ hewɔ lɛ, afɔ nine atsɛ mɛi ni abaptisi amɛ nɛɛ aaafee afii 40 lɛ pɛ, kɛ Betel weku lɛ nitsulɔi aweku lɛ diɛŋtsɛ mɛi ni amɛfɔ amɛ nine. Afee nibii ni akɛjieɔ daaŋ yɛ leebi mli, ni aha niyenii kɛ ŋɔɔmɔ ko yɛ shwane mli. Afee Watchtower Society of Australia lɛ daa afi kpee lɛ yɛ 9:00 a.m., ni Australia nitsumɔ he lɛ mlibii 21 lɛ fɛɛ ba. Yɛ be mli ni atsu mla naa nibii otii lɛ fɛɛ ahe nii agbe naa lɛ, afɔ mɛi krokomɛi anine kɛba kpee lɛ shishi, ni mɛi lɛ fɛɛ na miishɛɛ waa akɛ amɛaanu wiemɔ ni Nɔyeli Kuu lɛ mli nyo Theodore Jaracz ha lɛ.

Shwane 1:45 lɛ, akɛ minitii 15 tswa Maŋtsɛyelii lalai ni akɛkpa henɔjɔɔmɔ gbɛjianɔtoo lɛ hiɛ. Toibolɔi lɛ na miishɛɛ waa akɛ amɛaanu amaniɛbɔi, mɛi aŋkroaŋkroi ahe saji ni yɔɔ miishɛɛ, niiashikpamɔi, kɛ Nɔyeli Kuu lɛ mlibii etɛ ni yɔɔ jɛmɛ lɛ hu awiemɔi. Yɛ mɛi etɛ nɛɛ ateŋ lɛ, enɛ ji klɛŋklɛŋ kwraa ni Carey Barber kɛ Daniel Sydlik faa gbɛ kɛyaa shikpɔŋ ni yɔɔ jɔɔ mli gbɛ nɛɛ nɔ. Nyɛminuu Barber wie yɛ saneyitso ni ji ‘Nikpamɔ lɛ Ji Yinɔ lɛ Naagbee’ lɛ he ni Nyɛminuu Sydlik wie yitso ni ji ‘Miishɛɛ ji Mɛi ni Amɛ-Nyɔŋmɔ Ji Yehowa Lɛ.’ Nyɛminuu Jaracz, ni sɔmɔɔ Australia nitsumɔ he nine lɛ akɛ nine nitsumɔ hei lɛ anɔkwɛlɔ lɛ ha tsu lɛ nɔjɔɔmɔ wiemɔ lɛ.

Gbɛjianɔtoo lɛ mli nɔ ko ni ha ana miishɛɛ waa ji lala ko ni hiɛ kukuji ejwɛ ni ala kɛtsɔ enɔjɔɔmɔ wiemɔ lɛ hiɛ lɛ. Lala lɛ damɔ wiemɔ ni yɔɔ Yesaia 60:22 lɛ nɔ, ni eyitso ji “Mɔ Bibioo Aaatsɔ Mɛi Akpe.” Ajie hiɛsɔɔ kpo atsɔɔ Yehowa yɛ emli wiemɔi lɛ amli akɛ nitsulɔi babaoo ni miisumɔ ejɛ amɛsuɔmɔ mli amɛkɛ amɛhe eha ni amɛna hegbɛ akɛ amɛkɛ nɔ ko aaafata ‘eshia’ ni yɔɔ jeŋ muu fɛɛ nitsumɔ lɛ mli lɛ fa nɛɛ he.

[Mfonirii ni yɔɔ baafa 15]

Tsu hee ni amɛ afata Watch Tower woji akalamɔ he Iɛ he yɛ Ingleburn, N.S.W., Australia

C. Barber

T. Jaracz

D. Sydlik