Saji Lɛ Asɛɛkɔmɔ
Ani Ebe Eho?
Taakɛ Anglican osɔfo ko ni yɔɔ Adelaide, Australia lɛ kɛɔ lɛ, kɔkɔbɔi ni akɛhaa ashiɔ gbɔmɔtso Iɛ henumɔi ni ateɔ amɛ shi ni baanyɛ ekɛ mɔ aya ajwamaŋbɔɔ kɛ gbalafitemɔ mli Iɛ be eho ni amɛjɛɛɛ Kristofoi aŋɔɔ. Ewie yɛ nikasemɔ ko ni kɔɔ bɔlɛnamɔ he ni efee nyɛsɛɛ nɛɛ mli akɛ mɛi ni taoɔ amɛbote gbalashihilɛ mli Iɛ efeee esha kɛ amɛna bɔlɛ dani amɛbote gbalashihilɛ mli. Nikasemɔ lɛ kpɛlɛɔ nɔ akɛ abaanyɛ akpɛlɛ hii ni kɛ hii feɔ yakayaka nii Iɛ anɔ yɛ shihilɛi lɛ ekomɛi amli. Taakɛ Brisbane Courier Mail lɛ ŋma lɛ. Uniting Church ni yɔɔ Australia lɛ naawielɔ ko “kɛ sane ni aŋma nɛɛ mli saji otii lɛ kpaa gbee.”
Shi kɛlɛ, Biblia lɛ kɛɔ akɛ Nyɔŋmɔ suɔmɔnaa nii kɛha mɛi fɛɛ ji ni ‘amɛtsi amɛhe kɛjɛ ajwamaŋbɔɔ he,’ ni akɛ “ajwamaŋbɔlɔi loo wɔŋjalɔi loo gbalaŋkulɔi loo mɛi ni kɛ amɛ diɛŋtsɛ amɛheloo feɔ yakayaka nii loo hii ni kɛ hii feɔ yakayaka nii . . . anine shɛŋ Nyɔŋmɔ maŋtsɛyeli lɛ nɔ kwraa.” (1 Tesalonikabii 4:3, 4; 1 Korintobii 6:9, 10) Eka shi faŋŋ akɛ, mɛi ni kpɛlɛɔ Biblia Iɛ nɔ akɛ Nyɔŋmɔ Wiemɔ ni jɛ mumɔŋ lɛ yooɔ akɛ bɔ ni esusuɔ bɔlɛnamɔ he lɛ jɛ Bɔlɔ ni le nii fe fɛɛ lɛ ŋɔɔ. Hewalɛ ni enaa yɛ mɛi ni hiɔ shi yɛ tɛi ni Biblia lɛ efolɔ eshwie shi Iɛ naa lɛ anɔ Iɛ maa nɔ mi akɛ nɛkɛ jeŋba he gbɛtsɔɔmɔi ni akɛɛ amɛbe eho nɛɛ yeɔ ebuaa yɛ weku ekomefeemɔ mli ni ebuɔ mɔ he kɛjɛɔ henumɔŋ pilamɔi kɛ helai ni enyaŋeɔ ni jɛɔ jeŋba shara mli baa Iɛ ahe.
Gbɛ ni Hi fe Fɛɛ ni Aaatsɔ nɔ Atsi Naa
Tsofai ni akɛtsuɔ nii yɛ gbɛ fɔŋ nɔ Iɛ ka he eji naagba wulu. No hewɔ lɛ, mɛni ji gbɛ ni hi fe fɛɛ ni aaanyɛ atsɔ nɔ abu obalaŋtai ahe kɛjɛ tsofai fɔji kɛ nitsumɔ he? French woloŋlelɔ kɛ jwɛŋmɔ he datrɛfonyo Claude Olievenstein ma bɔ ni ehe hiaa ni akɛ gbɛtsɔɔmɔi aha ni afi amɛ sɛɛ yɛ suɔmɔ mli lɛ nɔ mi yɛ saji ni eha hetoo ni aŋma yɛ Brazil adafitswaa wolo ni ji O Estado de S.Paulo Iɛ mli lɛ mli. Ekɛɛ: “Kɛ gbɔmɛi miiwie tsofai ahe ŋmɛnɛ lɛ, amɛmaa nɔ ni polisifoi, kojomɔ he gbɛjianɔtoo, kɛ skul tsuɔ lɛ nɔ mi waa. Shi kɛlɛ, nɔ ni he hiaa titri ji weku lɛ [tsofai fɔji kɛ nitsumɔ] naatsii. . . . Gbekɛbii pii yɛ ni amɛleee nɔ ni ji tsɛmɛi ahewalɛ. Tsɛ lɛ bɛ; etamɔ nɔ ni ekpa nitsumɔ.”
Yɛ be mli ni etsɔɔ nɔ hewɔ ni ehe hiaa ni atsi tsofai ni akɛtsuɔ nii yɛ gbɛfɔŋ nɔ lɛ naa yɛ weku lɛ mli lɛ shishi lɛ. Dr. Olievenstein kɛfata he akɛ: “Wɔyɛ jeŋ ko ni asumɔɔ ni ana he sɛɛ waa ni gbɔmɛi ahiɛ gboɔ yɛ jeŋba kpakpa he lɛ mli. Kɛji yɛ tsofai fɔji ahewɔ lɛ, wɔbii lɛ bɔi jeŋbai komɛi akpojiemɔ lɛ, ejɛ bɔ ni wɔhaaa amɛle nɔ ni ji jeŋba kpakpa lɛ hewɔ. Wɔ je lɛ etsɔ nɔ ni mli wa, mɛi ni bɛ yitseiaŋ, kɛ mɛi ni etee hiɛ yɛ tsɔnei ahe nilee mli. Nɔ pɛ ni gbɔmɛi jwɛŋɔ he ji bɔ ni amɛaafee amɛhi shi.”
Taakɛ wolo tɛtrɛɛ ni atsɛɔ lɛ Superinteressante lɛ tsɔɔ lɛ, nibii amlitaomɔ ko ni afee yɛ U.S. Amerika lɛ maa bɔ ni fɔlɔi ahewalɛ he hiaa lɛ nɔ mi. Wolo lɛ kɛɔ akɛ: “Obalaŋtai ni bɔɔ mɔdɛŋ waa yɛ skul kaai amli ni amɛhenumɔi yɔɔ shiŋŋ hu lɛ jɛ wekui ni fɔlɔi lɛ kɛ amɛhewalɛ tsuɔ nii ni amɛkɛ jeŋba he mlai ni yɔɔ faŋŋ mamɔɔ shi ni agbɛnɛ amɛhaa amɛ heyeli kɛyashɛɔ he ko lɛ amli. Ni nakai nɔŋŋ hu, obalaŋtai ni kɛ tsofai tsuɔ nii loo amɛnuɔ dãa ni amɛnyɛɛɛ amɛkpa Iɛ ayi faaa kwraa yɛ wekui ni tamɔ nɛkɛ mli.”
Biblia lɛ kɛ yiŋtoo kpakpa woɔ fɔlɔi aŋaa akɛ: “Tsɔsemɔ obi, ni eeeha ohe ajɔo; ni eeeha osusuma mii ashɛ ehe.” (Abɛi 29:17) Hɛɛ, jajemɔ ni adamɔɔ Biblia lɛ nɔ akɛhaa Iɛ baanyɛ aye abua fɔlɔi ni amɛtsi tsofai ni akɛtsuɔ nii yɛ gbɛ fɔŋŋ nɔ lɛ naa ni amɛha shihilɛ yɛ weku muu lɛ fɛɛ mli aya hiɛ.