Ani Anɔkwayeli Be Eho?
ANƆKWAYELI mlihiɛmɔ akɛ shihilɛ gbɛ—ani enɛ be eho yɛ ŋmɛnɛŋmɛnɛ je lɛ mli, akpa enɛ kɛ nitsumɔ akɛ ehe ehiaaa aloo enɛ he bɛ sɛɛnamɔ ko kwraa dɔŋŋ? Ebaanyɛ etamɔ nakai. Bo lɛ susumɔ bɔ ni anɔkwayeli ni bɛ efa, gbɛi anɔ ni enɛ tsɔɔ kɛbaa, heni eye awui kɛyashɛ kɛ bɔ ni ebatsɔ jatsu ni tsii eha lɛ he nɔkwɛmɔ nii fioo nɛɛ ahe okwɛ.
Yɛ nyɛsɛɛ afii nɛɛ amli lɛ, abu too ni aju yɛ West Germany lɛ naa akɛ efeɔ Amerika shika dɔlai akpekpei toi akpei 10 daa afii, ni yɛ Sweden hu lɛ enɛ feɔ Amerika shika dɔlai 720 kɛha mɔ kome daa afi. No hewɔ lɛ, kɛ shikpɔji nɛɛ eko nɔ oyɔɔ lɛ, belɛ anɔkwale ni ayeee lɛ saa too ni owoɔ lɛ he. Shishiumɔ efa yɛ nyɔmɔwoo nɔ too ni awoɔ yɛ U. S. Amerika lɛ mli aaahu akɛ enɛ haa nɔyeli lɛ laajeɔ dɔlai ni naa shɛɔ akpekpei toi akpei 100 yɛ tooyeli mli daa afi. Susumɔ nɔyeli lɛ nyɔji ni kulɛ abaanyɛ akɛ shika nɛɛ awo lɛ he okwɛ! Agbɛnɛ, nitsumɔi ni mla eŋmɛɛɛ gbɛ juɔ U. S. Amerika nɔyeli lɛ dɔlai akpekpei toi akpei 10 kroko hu. Nibii ni ajuɔ yɛ shwapoi amli kɛ juu bibii bɔɔ U. S. Amerika shwapoi lɛ nyɔmɔ dɔlai akpekpei toi akpei 4 daa afi, ni enɛ haa nibii ajara waa. Anɔkwale ni ayeee yɛ tɛlifon ni atswaa kɛyaa shɔŋŋ lɛ he nyɔmɔwoo ni akɛfɔɔ mɔ kroko nyɔmɔ nɔ lɛ mli lɛ haa Amerikabii bɔɔ nyɔmɔ dɔlai akpekpei 1 daa afi.
Mɛi ni fiteɔ be yɛ nitsumɔ nɔ haa Kanada nitsumɔtsɛmɛi bɔɔ nyɔmɔ Kanada dɔlai akpekpei toi akpei 15 daa afi, “enɛ fa fe shika ni nitsumɔi nɛɛ laajeɔ kɛtsɔɔ nitsulɔi aniji ni kɔlɔɔ shi, juu, inshuɔrans mli shishiumɔ, nibii ahiɛkpatamɔ, nyɔɔŋnihamɔ, nibii ni ajeɔ gbɛ ashaa kɛ nitsumɔ mli ojotswaa krokomɛi anɔ lɛ toi etɛ.” Taakɛ bɔ ni nikasemɔ ko ni afee yɛ 1986 lɛ tsɔɔ lɛ, nyɔmɔ ni abɔɔ yɛ be ni ajuɔ nɛɛ mli yɛ U. S. Amerika lɛ ji dɔlai akpekpei toi akpei 170 daa afi.
Nitsumɔi wuji ni eye omanye ni hiɛ dɔlai akpekpei toi akpei abɔ lɛ po kɛ hiɛkɔɔ juɔ amɛ diɛŋtsɛ amɛnɔyelii ashika. Yɛ mɛɛ gbɛ nɔ? Kɛtsɔ dɛŋdadei kɛ nibii krokomɛi ni amɛhɔɔ amɛhaa amɛ kɛ jara ni fe nine lɛ nɔ: ahɔɔ nitsumɔ dadei ni jara ji Amerika shika cent 12 lɛ ahaa amɛ dɔlai 9,606; ahɔɔ radio mli dade ko ni jara ji cent 67 lɛ ahaa amɛ dɔlai 814; akɛ sɛi naji ni akɛ rɔba fee ni jara ji cent 17 lɛ heɔ dɔlai 1,118. U. S. Amerika bɛgwafonyo ko kɛɛ akɛ, ‘Nyɛmiigbee nɔyeli lɛ shi dɔlai akpekpei toi akpei abɔ.’
Kɛfata he lɛ, nɔkwɛmɔ nɔ gbonyo ni mɛi komɛi ni yɔɔ gbɛi feɔ lɛ baa anɔkwayeli shi. Taake bɔ ni ekolɛ okadi lɛ, shikpɔji komɛi anɔ hiɛnyiɛlɔi maleɔ, amɛfeɔ osato, amɛshishiuɔ mɛi ni amɛjɔɔ gbɛnaa nitsumɔi anaa foi—hɛɛ; amɛgbɛɔ mɛi ni kɛ amɛ shiɔ akaŋ yɛ maŋkwramɔ mli lɛ ekomɛi po ni amɛhaa efeɔ tamɔ nɔ ni mɔ kroko fee enɛ.
No hewɔ lɛ, ani anɔkwale ni aaaye lɛ be eho? Ani enɛ jeee gbɛjianɔtoo kpakpa dɔŋŋ? Ani anɔkwayeli he yɛ sɛɛnamɔ akɛni Nyɔŋmɔ Wiemɔ lɛ kɛɔ wɔ akɛ wɔye anɔkwale hewɔ? Sane ni nyiɛ sɛɛ nɛɛ he baaba sɛɛnamɔ aha bo kɛ oosumɔ ni ona hetoo oha sanebimɔi nɛɛ.