Nɔ Ni Kɛ Jeŋba Fitemɔ Ba

KWASAFO he nikaselɔi tsɔɔ nibii pii ni kɛ ŋmɛnɛŋmɛnɛ beaŋ jeŋba ni fiteɔ lɛ baa. Cunningham Geikie, ni ji afii ohai 19 lɛ mli Biblia he nikaselɔ tsɔɔ nɔ ni kɛ enɛ baa diɛŋtsɛ lɛ yɛ anɔkwale mli. Ekɛ nilee wie akɛ, “eji anɔkwale yɛ be fɛɛ mli akɛ maŋ ko subaŋ yɛ jamɔ he lɛ ji nɔ ni tsɔɔ maŋ lɛ hewalɛ namɔ.” Nɔ ni yɔɔ miishɛɛ ji akɛ, Ŋmalɛ Krɔŋkrɔŋ lɛ feɔ apasa jamɔ he mfoniri akɛ etamɔ ajwamaŋ, kɛ gbɛi ko ni haa ayoɔ lɛ yɛ ehiɛnaa ni ji​—“Babilon kpeteŋkpele.” Nɔ ni yɔɔ edɛŋ ji shika kpulu ni nihii nii kɛ ejwamaŋbɔɔ lɛ mli nibii ni he tseee eyi mli obɔ. Ŋwanejee ko bɛ he akɛ Babilon apasa jamɔ nɛɛ ji nɔ ni kɛ jeŋba shara ni ehii kwraa kɛ yiwalɛ nɛɛ ba.​—Kpojiemɔ 17:​1, 2, 4, 5, 15.