Maŋtsɛyeli Jajelɔi Bɔ Amaniɛ

Ajie kpeeyalɔi Ayi

BƆFO PAULO kɛɛ yɛ Romabii 13:3 akɛ: “Feemɔ ekpakpa, ni ooona jiemɔ yɛ edɛŋ.” Enɛ bafee anɔkwale yɛ nyɛsɛɛ afii enyɔ “Maŋtsɛyeli Nɔyaa” kpeei ni afee yɛ Brazil lɛ shishi.

Akɛ nɔkwɛmɔ lɛ, beni agbe kpee ni afee yɛ Joao Pessoa naa lɛ, stadium ni afee kpee lɛ yɛ jɛmɛ lɛ nɔkwɛlɔ lɛ kɛɛ kpee ajinafoi lɛ akɛ: “Miijie nyɛyi waa yɛ kpee fɛfɛo ni nyɛfee nɛɛ kɛ bɔ ni nyɛ kɛ nyɛbii ba nyɛjeŋ fɛfɛo nyɛha lɛ hewɔ. Jamɔ ko bɛ ni jieɔ subaŋ kpakpa ni tamɔ nɛkɛ kpo. Beni wɔkɛ tsu nɛɛ hanyɛ lɛ, no mli lɛ wɔle akɛ wɔsheŋ gbeyei. Wɔ shwɛmɔ he nɛɛ shinaai lɛ anaa kamɔ kɛha nyɛ be fɛɛ be ni nyɛaaba biɛ.”

Anu wiemɔi komɛi ni tamɔ nakai nɔŋŋ kɛjɛ hei sɔrɔtoi:

◻ Maracanazinho Stadium ni yɔɔ Rio de Janeiro lɛ nɔkwɛlɔ wie nɛkɛ: “Mikɛ gbɔmɛi asafoi pii etsu nii afii pii, shi nyɛji gbɔmɛi ni yɔɔ gbɛjianɔtoo kpakpa fe fɛɛ, mɛi ni he tse, ni kpaa lɛ efee klalo akɛ amɛbaasɔmɔ gbee yɛ nɔ fɛɛ nɔ mli fe fɛɛ.”

Nitsulɔi ni gbɛɔ lɛ yɛ Rio de Janiero kpee lɛ shishi lɛ ateŋ mɔ kome wie nɛkɛ:

◻ “Nyɛ gbɛjianɔtoo lɛ eha minaa ekpɛ mihe. Kɛji akɛ Yesu Kristo aaaba biɛ bianɛ lɛ, miheɔ miyeɔ akɛ nyɛjamɔ lɛ ji nɔ ni ebaakpɛlɛ nɔ.”

Polisinyo ko ni kudɔɔ gbɛ yɛ kpee ni afee yɛ Curitiba lɛ shishi lɛ wie akɛ: ◻ “Nyɛgbaaa wɔ polisifoi lɛ anaa kwraa. Mina ni kulɛ mɔ fɛɛ mɔ tamɔ nyɛ. Kulɛ ebaafee naakpɛɛ. Kɛ mikpã miblɛ lɛ, mile akɛ ebaabo mi toi ni ŋwanejee loo naataamɔ ko bɛ mli.”

Wɔ kpee lɛ nɔkwɛlɔ lɛ nine shɛ wolo ko ni Santo Andre Maŋkralo lɛ ŋma lɛ nɔ. Ewolo lɛ kaneɔ nɛkɛ:

◻ “Wɔmiisumɔ ni wɔŋɔ nɛkɛ hegbɛ nɛɛ ni wɔkɛha nyɛ aekoo yɛ nyɛgbɛjianɔtoo kpakpa kɛ tsɔsemɔ kpakpa lɛ hewɔ, ni wɔmibii ni nyɛye omanye yɛ wɔsɛɛ he kpeei ni nyɛaafee lɛ fɛɛ mli, ni wɔ maŋtiase nitsumɔ he lɛ efee klalo akɛ amɛbaasɔmɔ nyɛ yɛ be fɛɛ mli.”

Hotel nɔkwɛlɔ ko ni yɔɔ Novo Hamburgo kɛɛ akɛ:

◻ “Sɔrɔto agbo ka nyɛ jeŋba kɛ mɛi krokomɛi ni eba wɔ Hotel nɛɛ teŋ. Amɛshi wɔ nɔ fɛɛ nɔ fɛfɛo, ni amɛtaaa nɔ ko he, amɛyɛ bulɛ kɛha mɔ fɛɛ mɔ.”

◻ “Nyɛtamɔ mɛi ni awoɔ nyɛ nyɔmɔ babaoo diɛŋtsɛ.” Enɛ ji sane ni abolooshalɔ ko ni shaa bodobodo ehaa kpee ni wɔfee yɛ Sorocaba lɛ wie, yɛ be mli ni ena bɔ ni nyɛmimɛi lɛ tsuɔ ni waa lɛ. Beni eyoo akɛ awooo nyɛmi ko nyɔmɔ shi nyɛmimɛi lɛ fɛɛ jɛɔ amɛsuɔmɔ mli amɛkɛ amɛhe kɛ amɛbe haa lɛ, eku esɛɛ kɛtee enitsumɔ he lɛ ni eyaloo enitsulɔi lɛ fɛɛ kɛba kpee he lɛ koni amɛbakwɛ bɔ ni nyɛmimɛi lɛ etu amɛhe amɛha kɛ amɛdɛŋbɔɔ lɛ!

Adafitswaa woji aŋmalalɔi bayoo kpee ni yaa nɔ yɛ Brazil lɛ. Ni Tribuna da Bahia lɛ kɛ amaniɛbɔɔ nɛɛ maje: “Amɛhiɛ Biblia, amɛmiigbele emli baafai lɛ koni amɛnu nɔ hewɔ ni adesai feɔ basabasa ni amɛshishiuɔ mɔ lɛ shishi, ejaakɛ Odasefoi lɛ ewieee maŋkwramɔ he, amɛkɛ amɛhe wooo maŋsaji amli, ni amɛleee oshikifɔɔ he nɔ ko. Nɔ ni buɔ amɛ bem yɛ enɛ mli ji akɛ mɔ fɛɛ mɔ ni yeɔ nɔ lɛ eŋmɛɛɛ pɛpɛɛpɛ, ejaakɛ Nyɔŋmɔ pɛ ji mɔ ni baanyɛ aye je lɛ nɔ yɛ emuuyeli mli. . . . Nɔ ni ji amɛhemɔkɛyeli lɛ nɔdaamɔ nɔ ji jeŋ hee ko ni baa ni nine baanyɛ ashɛ nɔ kɛtsɔ Biblia kasemɔ waa pɛ kɛ sui gbohii atsakemɔ koni ana tsui krɔŋŋ nɔ.”

Yɛ fɛɛ sɛɛ lɛ, Yehowa Odasefoi ekɛɛɛ akɛ amɛyeɔ emuu, shi amɛheɔ amɛyeɔ akɛ Nyɔŋmɔ Maŋtsɛyeli lɛ kɛ gbɛjianɔtoo hee ni yeɔ emuu baaba. No hewɔ lɛ amɛbɔɔ mɔdɛŋ koni amɛkɛ Biblia mli ŋaawoo ni yɔɔ 1 Petro 2:12 lɛ atsu nii: ◻ “Nyɛbaa nyɛjeŋ fɛfɛo yɛ jeŋmaji lɛ ateŋ, koni . . . nyɛ nitsumɔi kpakpai lɛ ni amɛnaa lɛ, amɛkɛwo Nyɔŋmɔ hiɛ nyam.”

[Mfoniri ni yɔɔ baafa 14]

Kristofonyo jeŋba woɔ Nyɔŋmɔ hiɛ nyam