Maŋtsɛyeli Jajelɔi Bɔ Amaniɛ

Suɔmɔ, “Ekomefeemɔ Kpaa Ni Yeɔ Emuu” Lɛ

SUƆMƆ ni yɔɔ Kristofoi ateŋ lɛ ji “ekomefeemɔ kpaa ni yeɔ emuu,” ni kɛ ajie lɛ kpo lɛ, nɔ ni jɛɔ mli baa ji je muu fɛɛ nyɛmifeemɔ. (Kolosebii 3:​14, NW) Wɔnyɛmimɛi ni yɔɔ Afrika lɛ jieɔ nɛkɛ “ekomefeemɔ kpaa ni yeɔ emuu” nɛɛ kpo yɛ be mli ni amɛjieɔ suɔmɔ kpo amɛtsɔɔ amɛhe kɛ Yehowa, Wala-Halɔ kɛ Yibaalɔ lɛ.​—Lala 36:​10; Bɔfoi lɛ Asaji 17:⁠28.

◻ Akɛni nugbɔ enɛɛɛ aahu afii etɛ yɛ Zimbabwe hewɔ lɛ nibii amli bawa kɛha mɛi pii yɛ hei nɛɛ. Ni enɛ sa wɔnyɛmimɛi ni yɔɔ hei nɛɛ lɛ ahe. Shi nanemɛi Odasefoi lɛ here tsɛmɔ akɛ aye abaa lɛ nɔ oya yɛ naakpɛɛ gbɛ nɔ. Yɛ anɔkwale mli lɛ akɛ atadei kɛ mamai babaoo maje akɛ ehe bahia ni akɛɛ nyɛmimɛi lɛ akɛ efa shi akɛ eko akaba dɔŋŋ kɛyashi be mli ni ehe aaahia da. Enɛ kɛ yelikɛbuamɔ ni nɔyeli lɛ kɛha lɛ ha nyɛmimɛi lɛ anine shɛ nɔ ni he hiaa amɛ lɛ anɔ. Asafo lɛ nitsumɔ he nine lɛ bɔ amaniɛ akɛ “aakwɛ mɛi ni yelikɛbuamɔ he hiaa amɛ lɛ anɔ lolo.”

Yelikɛbuamɔ ni wɔnyɛmimɛi lɛ jɛ amɛsuɔmɔ mli akɛha lɛ jeee nɔ ni afee ni anaaa. Nuu ko ni heee yeee kɛɛ eŋa ni ji Odasefonyo lɛ akɛ: “Yɛ be mli ni mɛi krokomɛi miishɔ̃ nɔ fɛɛ nɔ ni gbɔmɛi lɛ yɔɔ lɛ yɛ amɛdɛŋ lɛ, nyɛ Odasefoi lɛ kɛ niyenii kɛ hehaa nii miiha amɛ.” Mɛi pii ewie wɔhe ekpakpa tamɔ nɛkɛ nɔŋŋ.

◻ Suɔmɔ ni yɔɔ Yehowa Odasefoi ateŋ lɛ tsuɔ nii akɛ “ekomefeemɔ kpaa ni yeɔ emuu,” ni ekadiɔ amɛ akɛ anɔkwale Kristofoi.​—Yohane 13:⁠35.

Suɔmɔ kɛ ekomefeemɔ ni yɔɔ Yehowa webii ateŋ lɛ he nɔkwɛmɔ nɔ kroko ji nɔ ni ana yɛ “Maŋtsɛyeli Ekomefeemɔ” Kpokpaa Wuji anɔ kpeei ni afee yɛ Freetown, Sierra Leone lɛ. Nyɛmimɛi jɛ Guinea kɛ Liberia amɛba nɛkɛ kpee nɛɛ. Afee kpeei nɛɛ enyɔ ni fɛɛ tee nɔ yɛ be kome too lɛ nɔŋŋ mli​—ekome yɛ Ŋleshi kɛ Krio wiemɔ mli, ni ekroko lɛ yɛ Kisi kɛ French wiemɔ mli. Nitsumɔ he nine lɛ amaniɛbɔɔ lɛ tsɔɔ suɔmɔ kɛ ekomefeemɔ ni ajie lɛ kpo yɛ nɛkɛ be nɛɛ mli lɛ mli akɛ:

“Ebafee miishɛɛ be waa yɛ be mli ni nyɛmimɛi ni wieɔ Kisi lɛ kɛ French lɛ bafata mɛi ni wieɔ Ŋleshi lɛ ahe kɛha naagbee lala kɛ sɔlemɔ lɛ. Amɛteŋ mɛi pii fó yɛ miishɛɛ hewɔ yɛ be mli ni amɛna bɔ ni nyɛmimɛi aaafee 400 ba amɛbafata amɛhe koni amɛkɛ ekomefeemɔ aja Yehowa yɛ Lala kɛ sɔlemɔ mli lɛ.” Atse wiemɔ ko kɛjɛ mɔ ko ni damɔ shi ni kwɛɔ nɔ ni yaa nɔ lɛ wiemɔi amli akɛ: “Yehowa le gbɛ ni etsɔɔ nɔ etoɔ ewebii gbɛjianɔ. Mɛɛ ekomefeemɔ kpojiemɔ ni kashi faŋŋ po nɛ!”

Nɛkɛ ekomefeemɔ nɛɛ feɔ nɔ ni ama nɔ mi waa, kɛ wɔsusu he akɛ mɛi ni ábua amɛnaa nɛɛ jɛ wekui kɛ wiemɔi sɔrɔtoi amli, ni kɛlɛ amɛbua amɛhe naa yɛ ekomefeemɔ mli lɛ. Yehowa mumɔ lɛ pɛ baanya afee enɛ. Agba nɛkɛ ekomefeemɔ nɛɛ he sane afɔ shi yɛ Kpojiemɔ 7:9: “Nii nɛɛ asɛɛ lɛ mikwɛ ni naa asafo babaoo ni mɔ ko mɔ ko nyɛŋ akane ni jɛ jeŋmaŋ fɛɛ jeŋmaŋ kɛ akutsei kɛ maji kɛ majianɔ wiemɔi amli damɔ maŋtsɛsɛi lɛ hiɛ kɛ Toobi lɛ hiɛ, ni amɛwo atadei yɛji, ni amɛhiɛ blɛoi yɛ amɛdɛ.” Yitso nɛɛ kuku 10 lɛ nɔŋŋ tsɔɔ nɛkɛ ekomefeemɔ nɛɛ jɛɛhe, akɛ: “Ni amɛbolɔɔ kɛ gbee waa amɛkɛɔ akɛ: ‘Wɔyiwalaheremɔ jɛ wɔ-Nyɔŋmɔ ni ta maŋtsɛsɛi lɛ nɔ lɛ kɛ Toobi lɛ.’”

August Daa Gbi Ŋmalɛ

(Kɛ́ ootao ona bɔ ni saji nɛɛ ji diɛŋtsɛ lɛ, no lɛ kwɛmɔ wolo lɛ mli)