Mɛni He Hiaa Fe Fɛɛ Yɛ Oshihilɛ Mli?
ABUƆ LƐ akɛ eji nuu niiatsɛ ni fe fɛɛ yɛ je lɛ mli. Kɛ abu nibii ni eyɔɔ lɛ naa lɛ, eshɛɔ Amerika shika dɔla akpekpei toi akpekpei abɔ. Mɛi pii buɔ lɛ akɛ eyashɛ he ni kwɔ fe fɛɛ yɛ omanyeyeli mli. Shi afii enyɔ dani eeegbo lɛ, J. Paul Getty kɛɛ akɛ: “Shika kɛ miishɛnamɔ bɛ tsakpaa tsɔ̃ ko. Ekolɛ ekɛ miishɛɛ ni bɛ moŋ nyiɛ.”
Eka shi faŋŋ akɛ mɔ ni na gbɛ́i yɛ mu ni atsaa kɛjɛɔ shikpɔŋ he nitsumɔ mli nɛɛ ye omanye kɛyashɛ shɔŋŋ diɛŋtsɛ yɛ nɔ ni mɛi komɛi baasusu akɛ eji nɔ ni he hiaa fe fɛɛ yɛ shihilɛ mli lɛ sɛɛdii mli. Shi ani etamɔ nuu ni yɔɔ miishɛɛ yɛ nii ni etsu waa ni ekɛbua naa lɛ hewɔ? Aloo etamɔ mɔ ni bayoo yɛ naagbee akɛ yɛ fɛɛ sɛɛ lɛ, nɔ ni etsu nii waa ni ekɛbua naa lɛ jeee nɔ ni he hiaa fe fɛɛ po?
Yiŋsusumɔ Kɛ Pɔtɛɛ Lɛ
Mɛni ji nɔ ni osusuɔ akɛ ehe ehiaa fe fɛɛ yɛ oshihilɛ mli? Mɛi komɛi baakɛɛ akɛ heyeli ji nɔ ni amɛbuɔ fe fɛɛ. Mɛi krokomɛi hu baakɛɛ akɛ omanyeyeli ji nɔ ni tsɔɔ nɔ titri yɛ amɛshihilɛ mli. Mɛi krokomɛi hu kɛ nɔ ni amɛbaanyɛ amɛtsu yeɔ nɔ fɛɛ nɔ hiɛ.
Eyɛ mli akɛ amɛsumɔɔɔ ni amɛkpɛlɛɔ nɔ moŋ, shi mɛi pii yɛ ni amɛshihilɛ kɛ nifeemɔi tsɔɔ akɛ shika kɛ miishɛɛnamɔ ji nibii ni he hiaa fe fɛɛ yɛ amɛshihilɛ mli. Bɔ ni amɛtswa amɛfai shi amɛha akɛ amɛbaatsɔmɔ niiatsɛmɛi aloo amɛmiifee nɔ fɛɛ nɔ ni amɛaanyɛ ni ‘amɛna be kpakpa mli ŋɔɔmɔ’ hewɔ lɛ, ejeee amɛhe sane ko akɛ amɛaaku amɛhiɛ amɛshwie amɛweku, amɛgbɔmɔtsoŋ hewalɛnamɔ kɛ amɛmumɔŋ nibii anɔ yɛ nakai feemɔ mli. Nɔ ni yɔɔ miishɛɛ ji akɛ Biblia lɛ gba fɔ shi akɛ “yɛ naagbee gbii lɛ amli lɛ” gbɔmɛi baatsɔmɔ “hesuɔlɔi, shikasuɔlɔi” kɛ “mɛi ni sumɔɔ shwɛmɔ kɛ ŋɔɔmɔ fe Nyɔŋmɔ.”—2 Tim. 3: 1, 2, 4.
Nɔ Ko Ni He Hiaa Fe Fɛɛ
Yesu Kristo, Kristojamɔ ‘shishitolɔ lɛ bi sane ko ni kanyaa mɔ jwɛŋmɔ. Ebi akɛ: “Ani gbɔmɔ naa nɔ ko kɛji akɛ enine shɛ jeŋ muu lɛ fɛɛ nɔ shi elaaje ewala lɛ?” (Marko 8:36, Today’s English Version) Susumɔ enɛ he. Mɛni ji nɔ ni gbɔmɔ baanyɛ afee kɛ ebɛ wala? Nɔ ko nɔ ko bɛ ni ebaanyɛ efee!—Jajelɔ 9: 5, 10.
Ekolɛ oka he oji obalanyo ni onuɔ he akɛ oyɛ be babaoo ni okɛaafee nɔ fɛɛ nɔ ni osumɔɔ akɛ ofee. Shi ani nakai eji diɛŋtsɛ? Tai, awuyeli, helai kɛ osharai ekpata hii kɛ yei babaoo ni yɔɔ hewalɛ ahiɛ—trukaa ni akpaaa gbɛ. Mɛni ba amɛgbɛjianɔtoi kɛ otii ni amɛkɛmamɔ amɛhiɛ lɛ fɛɛ nɔ?
Ekolɛ oyɛ weku aloo oda yɛ afii amli. No hewɔ lɛ onuɔ he akɛ esa akɛ okɛ obe ni eshwɛ lɛ fɛɛ abɔ mɔdɛŋ ni okɛtswa wɔsɛɛ be ko ni yɔɔ shweshweeshwe oha bo diɛŋtsɛ kɛ mɛi ni osumɔɔ amɛ lɛ dani osusu nɔ kroko he. Shi mɛni ji nɔ ni obuɔ no akɛ no ji nɔ ni yɔɔ shweshweeshwe lɛ? Taakɛ ole lɛ, nibii ajara ni waa, nitsumɔi ni fiteɔ, kɛ nitsumɔ ni anaaa atsu ekpata shika ni mɛi pii kɛto yɛ amɛshihilɛ he mli lɛ fɛɛ hiɛ, ni eshi amɛ akɛ mɛi ni bɛ nɔ ko nɔ ko ni amɛbɛ shia po. Kɛfata he lɛ, akɛni shihilɛi ni ebɔle je Iɛ he kɛkpe lɛ damɔɔɔ shi shiŋŋ hewɔ lɛ, mɛɛ nɔmimaa yɔɔ akɛ nibii ni otsu nii waa koni onine ashɛ nɔ lɛ ebafeŋ nibii ni etsɛŋ nɔ ko ni baaba trukaa baakpata fɛɛ hiɛ?
Ŋwanejee ko bɛ he akɛ belɛ oona bɔ ni ehe hiaa akɛ oootao otii ni okɛmamɔ shi oha bodiɛŋtsɛ ohe lɛ amli. No hewɔ lɛ, mɛni ji nɔ ni osusuɔ akɛ ehe hiaa fe fɛɛ yɛ oshihilɛ mli?