Apasa Hemɔkɛyeli Kɔsɔŋkɔsɔ Lɛ

Ani oheɔ apasa hemɔkɛyeli oyeɔ? Kɛ nakai oji lɛ, belɛ jeee okomeŋ. Mɔ ko ni taoɔ nibii amli na apasa hemɔkɛyelii sɔrɔtoi fe akpei ohai ejwɛ yɛ jeŋ muu lɛ fɛɛ. Anɔkwale ni eji akɛ gbɔiatoohei pii bɛ nsɔɔdoi nyɔŋma kɛ etɛ, aloo gbɔmɛi sumɔɔɔ ni amɛnyiɛ atswerei ashishi aloo amɛhaa alɔŋte diŋ ko nyiɛɔ amɛhiɛ lɛ tsɔɔ bɔ ni apasa hemɔkɛyeli nɛɛ hu yɔɔ Anai je lɛ mli. Bɔ ni apasa hemɔkɛyeli ena mɛi anɔ hewalɛ yɛ gbɛ fɔŋ nɔ lɛ hu jeɔ kpo yɛ Afrika, taakɛ niiashikpamɔ ni nyiɛ sɛɛ nɛɛ yeɔ he odase lɛ.

Aaafee afii nyɔŋmai enyɔ ni eho nɛ ni Wawa wu gbo yɛ be ni ehe eye be kakadaŋŋ. Yɛ gbii etɛ ni nyiɛ egbele lɛ sɛɛ lɛ fɛɛ mli lɛ, Wawa ka shikpɔŋ yɛ saatso ni ewu lɛ́ gbo yɛ nɔ lɛ masɛi ni eefo ni ewerɛ eho ehe, yɛ be mli ni gbɔmɛi babaoo ni amɛhu amɛmiifo, aaye awerɛho, aajo, aanu hu kɛmiishi kpe kɛmiibɔle lɛ yɛ mɔ ni egbo lɛ hewɔ. Bɔ ni yarafeelɔi nɛɛ ateŋ mɛi komɛi kɛ amɛhe ewo enɛ mli sɔŋŋ eha lɛ haaa amɛwɔ ni amɛyaaa nitsumɔ po. Mɛni hewɔ? Amɛmiisumɔ ni amɛjie lɛ kpo amɛtsɔɔ mɔ ni egbo lɛ susuma kɛ eweku lɛ akɛ amɛji eshieŋtsɛmɛi

Shi Ni Ahiɔ Yɛ Gbohii Lɛ Agbeyeishemɔ Mli

Akɛ gbonyo lɛ tee fuu he yɛ gbi ni ji etɛ lɛ nɔ, ni mɔ fɛɛ mɔ tee jɛmɛ. Akɛ adeka lɛ wo su lɛ mli ni aloo su kɛ tɛi bibii ashwie nɔ. Mɛni hewɔ? Wawa ha hetoo akɛ,“Koni mikɛ miwu ni egbo lɛ susuma lɛ aye shɛɛ.” Kɛkɛ lɛ dani aaaloo su lɛ awo bu lɛ mli kwraa lɛ, Wawa ka kita yɛ mɔ fɛɛ mɔ hiɛ akɛ eye ewu lɛ anɔkwale kɛyashi naagbee. Ejaje akɛ: “Kɛ jeee nakai lɛ, esusuma lɛ atswa mi nɔ ni magbo.” Kɛjɛ nɛkɛ be nɛɛ nɔ kɛyaa nɛɛ Wawa wu ni egbo lɛ susuma ji nɔ ni baaye eshihilɛ nɔ.

Ewu lɛ wekumɛi tee nɔ amɛkɛɛ lɛ akɛ: “Kɛ ofee nɔ ko kirikiri [“ni shishinumɔ bɛ mli, yɛ Sango wiemɔ mli lɛ], emumɔ lɛ baaba ni ebagbe bo.” Bɔni afee ni ekɛtsɔɔ akɛ esumɔɔ ewu lɛ lɛlɛŋ lɛ, efɔɔɔ ehe juu tsɔ nyɔji etɛ, ebuɔ mama kuku ko kɛkɛ ekɛhaa ehe ni ewɔɔ saa folo nɔ yɛ shikpɔŋ ni ewo muji lɛ nɔ. Wawa he ye akɛ ewu ni egbo lɛ miikwɛ enifeemɔi fɛɛ. Nuu ni esumɔɔ lɛ ni egbo eshi lɛ lɛ ebatsɔ ehenyɛlɔ ni fe fɛɛ.

Wekui lɛ ekomɛi yɛ ni amɛsumɔɔ ni okulafo lɛ ahiɛ kakala bɔni afee ni ekɛshwie ewu ni egbo lɛ susuma kɛjɛ ehe. Esaaa akɛ ekwɛɔ la mli kɛ eeshɛre la ejaakɛ ekolɛ ebaana ewu lɛ hiɛ yɛ mli. Eteɔ shi daa maŋkɛ̃ ŋmɛji etɛ loo ŋmɛji ejwɛ ni ewoɔ yara ni efoɔ koni ekɛtsɔɔ akɛ esumɔɔ ewu lɛ. Etsɔɔ hiɛ ehaa lɛ niyenii klɛŋklɛŋ kɛtsɔ niyenii lɛ eko ni etiɔ ekɛfɔɔ shikpɔŋ ehaa lɛ lɛ nɔ.

Nyɔji etɛ sɛɛ lɛ Wawa wu lɛ wekumɛi kɛ lɛ tee faa ni bɛŋkɛ jɛmɛ lɛ toi ni akɛ lɛ wo faa lɛ mli. Enɛ ji okadi ni tsɔɔ akɛ akɛni efee ewu lɛ yara yɛ omanyeyeli mli hewɔ lɛ eye ehe kwraa kɛjɛ mumɔi fɔji fɛɛ he. Enɛ hu tsɔɔ akɛ ebɛ gbɛfaŋ nɔ ko yɛ ewu lɛ gbele mli.

Shi Mɛni Hewɔ Egbo?

Mɔ ko gbooo efolo yɛ gbɔmɛi ni yɔɔ je lɛ fa nɛɛ mli lɛ ajwɛŋmɔi amli. Mɔ fɛɛ mɔ ni gboɔ lɛ, mɔ ko kɛ̃ gbeɔ lɛ aloo hewalɛ ko ni fe adesa nɔ gbeɔ lɛ. No hewɔ lɛ, Wawa wu lɛ wekumɛi yeee amɛbuaaa lɛ yɛ epiŋmɔ lɛ mli. Ewu lɛ gbele sɛɛ nɔŋŋ ni ewu lɛ nyɛminuu fioo bolɔ wo lɛ akɛ: “Oha lɛ tsofa ni enu koni esumɔ bo, shi tsofa lɛ yafa tsɔ ni no ji nɔ gbe lɛ!” Mɛi komɛi hu folɔ enaa akɛ: “Otsɔ tsofatsɛ ko nɔ okɛ gbe lɛ.”

Yɛ be mli ni “etse ehe kɛtsɔ hejuu nɔ” yɛ nyɔji etɛ lɛ nɔ lɛ, amɛhaomɔ lɛ tee nɔ efa. Anyɛ enɔ koni eha amɛ shika, niyenii kɛ daa yɛ be fɛɛ mli. Wawa ni nii efee mɔbɔ lɛ bi lɛ diɛŋtsɛ ehe akɛ: “Miji mɔ ni ehia. Shi mɛni hewɔ esa akɛ mikɛ nɛkɛ nibii nɛɛ aha miwu lɛ wekumɛi?” Shi, ebɛ hegbɛ akɛ ekpooɔ, ejaakɛ eeshe ewu lɛ susuma lɛ gbeyei.

Naagbee lɛ, yɛ afii enyɔ ni gbeyei eyi mli obɔ mli lɛ, Wawa yarafeemɔ be lɛ ba naagbee. Aha lɛ hegbɛ ni ekɛ ewu lɛ nyɛminukpa abote gbalashihilɛ mli, kɛ agbɛnɛ ewu lɛ nyɛmimɛi bibii lɛ. Ekpoo fɛɛ, no hewɔ lɛ agbɛnɛ eyɛ hegbɛ ni ekuɔ esɛɛ eyaa lɛ diɛŋtsɛ ewekumɛi aŋɔɔ. Shi yɛ no sɛɛ po lɛ, Wawa heɔ yeɔ akɛ ewu ni egbo lɛ miitao atsɔ gbɛ ko nɔ aye lɛ awui.

Nɔ ni yɔɔ mɔbɔ yɛ mli fɛɛ ji akɛ Wawa gbeyeishemɔ lɛ bɛ shishitoo ko. “Gbohii lɛ amumɔ” ko nyɛŋ aba ni amɛbaye amɛsuɔlɔi awui. Biblia lɛ kɛɔ wɔ akɛ gbohii ‘yaa dioofeemɔ mli.’ Yɛ anɔkwale mli lɛ gbohii lɛ “leee nɔ ko nɔ ko kwraa . . . amɛsuɔmɔ jio, amɛnyɛɛ jio, amɛwuŋayeli jio, fɛɛ eho etee jeeŋmɔ beebe.”​—Lala 115:​17; Jajelɔ 9:​5, 6.

Duromɔ naa lɛ, Wawa ekase enɛ. Ele agbɛnɛ akɛ shishinumɔ ko kwraa bɛ gbeyei babaoo ni eshe lɛ mli, kɛ akɛ epasa hemɔkɛyeli ni eyɔɔ lɛ bɛ shishitoo ko. Shi gbɔmɛi akpekpei babaoo sheɔ gbeyei lolo. Mɛni hewɔ? Mɛni ji nɔ ni etsɔ tamɔ kɔsɔŋkɔsɔ ni efimɔ mɛi komɛi ewo apasa hemɔkɛyeli mli lɛ? Ani abaanyɛ atserɛ nakai kɔsɔŋkɔsɔ lɛ mli?

[Wiemɔ ni akɔ ni akɛmiitsu nii ni yɔɔ baafa 4]

Beni Wawa wu lɛ gbo sɛɛ lɛ, enyɛminuu fioo lɛ bolɔ wolɛ akɛ: “Oha lɛ tsofa koni esumɔ bo, shi oha enaa yawa tsɔ, ni no ji nɔ ni gbe lɛ!”