Hesaamɔ Kɛha Wiemɔi ní Ahaa yɛ Asafo lɛ Mli

ATO Teokrase Sɔɔmɔ Skul lɛ he gbɛjianɔ koni asafo muu lɛ fɛɛ aná he sɛɛ. Akɛ saji ni he hiaa hu haa yɛ asafoŋ kpeei krokomɛi ashishi kɛ agbɛnɛ hu kpeei bibii kɛ kpeei wuji ashishi. Kɛ aha bo nifeemɔ yɛ gbɛjianɔtoo nɛɛ eko mli lɛ, no lɛ sɔ̃ ni tsii kã onɔ. Bɔfo Paulo wo Kristofonyo nɔkwɛlɔ Timoteo hewalɛ koni ekwɛ bɔ ni etsɔɔ nii lɛ jogbaŋŋ. (1 Tim. 4:16) Mɛi ni baa Kristofoi ahenaabuamɔi ashishi lɛ eto be ni he hiaa he gbɛjianɔ—ni mɛi komɛi ebɔ mɔdɛŋ waa—koni amɛba ni atsɔse amɛ yɛ saji ni kɔɔ amɛkɛ Nyɔŋmɔ teŋ wekukpaa he lɛ amli. Nakai tsɔsemɔ lɛ ni okɛhaa lɛ ji hegbɛ ni yɔɔ naakpɛɛ lɛɛlɛŋ! Te ooofee tɛŋŋ otsu nakai hegbɛ lɛ he nii jogbaŋŋ?

Saji Otii ni Jɛ Biblia Kanemɔ Mli

Nɛkɛ skul nifeemɔ nɛɛ damɔ Biblia kanemɔ ni akɛha yɛ otsi lɛ mli lɛ nɔ. Esa akɛ ama bɔ ni sane lɛ saa wɔhe ŋmɛnɛ lɛ nɔ mi. Taakɛ abɔ he amaniɛ yɛ Nehemia 8:8 lɛ, Ezra kɛ ehefatalɔi lɛ kane Nyɔŋmɔ Wiemɔ lɛ yɛ faŋŋ, ni amɛtsɔɔ shishi, ni ‘amɛha eshishinumɔ fee faŋŋ,’ ni anu shishi. Bɔ ni otsuɔ Biblia mli saji otii anɔmimaa lɛ he nii ohaa lɛ haa onáa hegbɛ ni okɛfeɔ nakai.

Te esa akɛ osaa ohe yɛ nakai nifeemɔ lɛ mli oha tɛŋŋ? Kɛ eeehi lɛ, okɛ otsi loo nɔ ni fe nakai akane Biblia lɛ fã ko ni akɛha lɛ kɛtsɔ hiɛ. No sɛɛ lɛ, susumɔ osafo lɛ kɛ ehiamɔ nii ahe. Sɔlemɔ yɛ he. Mɛɛ ŋaawoo, mɛɛ nɔkwɛmɔnii, mɛɛ shishitoo mlai ni yɔɔ Nyɔŋmɔ Wiemɔ lɛ fã nɛɛ mli baatsu nakai hiamɔ nii lɛ ahe nii?

Nibii amlitaomɔ he miihia. Ani Watchtower Library ní yɔɔ CD-ROM nɔ loo Watch Tower Publications Index lɛ eko yɛ omaŋ wiemɔ mli? Kɛ eko yɛ lɛ, okɛtsu nii jogbaŋŋ. Kɛji otao nɔ ni akala yɛ kukuji ni ohala akɛ obaagbala ojwɛŋmɔ kɛba nɔ lɛ he lɛ, obaanyɛ oná he ni sane lɛ jɛ lɛ he shishinumɔ babaoo, ni obaaná gbalɛi lɛ amlibaa he shishitsɔɔmɔ, kɛ nɔ ni ŋmalɛi komɛi jieɔ lɛ kpo yɛ Yehowa he lɛ he shishitsɔɔmɔ, loo shishitoo mlai amlitsɔɔmɔ. Kaabɔ mɔdɛŋ akɛ ooowie otii babaoo he. Gbalamɔ jwɛŋmɔ kɛya kukuji fioo komɛi ni ohala lɛ anɔ. Ehi akɛ ooowie kukuji fioo he ni ofee lɛ jogbaŋŋ.

Onifeemɔ lɛ hu baabi ni ofɔ̃ toibolɔi lɛ anine koni amɛtsɔɔ bɔ ni amɛná otsi lɛŋ Biblia kanemɔ lɛ he sɛɛ amɛha. Mɛni amɛná ni amɛbaaná he sɛɛ yɛ amɛteemɔŋ kɛ weku nikasemɔ mli loo yɛ amɛshiɛmɔ nitsumɔ lɛ mli loo yɛ amɛshihilɛ gbɛ nɔ? Mɛɛ sui ni Yehowa yɔɔ lɛ ajie lɛ kpo yɛ bɔ ni ekɛ gbɔmɛi kɛ jeŋmaji ye ha lɛ mli? Mɛni toibolɔi lɛ kase ni waje amɛhemɔkɛyeli lɛ ni etswa hiɛsɔɔ ni amɛyɔɔ kɛha Yehowa lɛ ema shi? Kaawie otii ni yɔɔ haŋtsii ahe. Maa shishinumɔ kɛ bɔ ni atsuɔ otii ni ohala lɛ ahe nii ahaa lɛ nɔ mi.

Tsɔsemɔ Wiemɔ

Enɛ damɔ sane ni akala, tamɔ saji ni yɔɔ Buu-Mɔɔ loo Awake! lɛ mli, loo ekolɛ wolo ko fã ko nɔ. Yɛ bei babaoo mli lɛ, nibii lɛ fa fe bɔ ni sa kɛha be ni ato lɛ. Te esa akɛ otsu nifeemɔ lɛ he nii oha tɛŋŋ? Ákɛ tsɔɔlɔ, shi jeee mɔ ni miiwie saji ahe kɛkɛ. Esa akɛ nɔkwɛlɔ lɛ afee “mɔ ni le nitsɔɔmɔ.”—1 Tim. 3:2.

Jee ohesaamɔ lɛ shishi kɛtsɔ nifeemɔ ni akɛha bo lɛ kasemɔ nɔ. Kwɛmɔ ŋmalɛi lɛ. Jwɛŋmɔ nɔ. Bɔɔ mɔdɛŋ ni ofee enɛ jogbaŋŋ kɛtsɔ hiɛ dani gbi ni okɛbaaha owiemɔ lɛ ashɛ. Ha ni ehi ojwɛŋmɔ mli akɛ awoɔ nyɛmimɛi lɛ hewalɛ koni amɛkane wolo ni wiemɔ lɛ baadamɔ nɔ lɛ kɛtsɔ hiɛ. Onifeemɔ lɛ jeee ni okɛti mli loo ni okɛwie he kuku, shi moŋ koni okɛtsɔɔ bɔ ni abaanyɛ akɛtsu nii. Okɛ saji lɛ amli fãi komɛi ni he hiaa lɛ atsu nii yɛ gbɛ ni he baanyɛ aba sɛɛnamɔ diɛŋtsɛ kɛha asafo lɛ nɔ.

Taakɛ bɔ ni gbekɛ fɛɛ gbekɛ yɔɔ lɛ diɛŋtsɛ esu lɛ, nakai nɔŋŋ asafo fɛɛ asafo yɔɔ sui ni sa kadimɔ waa. Fɔlɔ ni tsɔɔ nii jogbaŋŋ kɛmɔɔ shi lɛ ewieee jeŋba he mlai etsɔɔɔ ebi lɛ kɛkɛ. Ekɛ gbekɛ lɛ susuɔ he. Esusuɔ gbekɛ lɛ sui kɛ naagbai ni gbekɛ lɛ kɛkpeɔ lɛ ahe. Nakai nɔŋŋ tsɔɔlɔ ni yɔɔ asafo lɛ mli lɛ bɔɔ mɔdɛŋ koni amɛnu kuu ni amɛkɛwieɔ lɛ hiamɔ nii ashishi ni amɛtsu he nii. Shi kɛlɛ, tsɔɔlɔ ni yɔɔ sɛɛyoomɔ lɛ kɛ nɔkwɛmɔnii ni baanyɛ awo mɔ ko ni yɔɔ toibolɔi lɛ ateŋ hiɛgbele lɛ tsuŋ nii. Ebaawie sɛɛnamɔi ni anáa mli ŋɔɔmɔ bianɛ yɛ Yehowa gbɛ̀i ni akɛtsuɔ nii lɛ hewɔ lɛ ahe, ni ebaama ŋaawoi ni jɛ Ŋmalɛi lɛ amli ní baaye abua asafo lɛ koni amɛtsu naagbai ni amɛkɛkpeɔ lɛ ahe nii yɛ omanyeyeli mli lɛ anɔ mi.

Nitsɔɔmɔ kpakpa saa mɛi ni yɔɔ toibolɔi lɛ ateŋ lɛ atsuii ahe. Jeee anɔkwalei lɛ atã tsĩi pɛ enɛ biɔ, shi moŋ hiɛsɔɔ ni aaaná aha nɔ ni enɛɛmɛi tsɔɔ lɛ hu. Ebiɔ ni asusu mɛi ni atsɔɔ amɛ nii lɛ ahe jogbaŋŋ. Esa akɛ mumɔŋ tookwɛlɔi lɛ ale tookuu lɛ. Kɛji amɛha naagbai ni gbɔmɛi srɔtoi lɛ kɛkpeɔ lɛ hi amɛjwɛŋmɔ mli lɛ, no lɛ amɛbaanyɛ amɛwo amɛ hewalɛ, ni amɛjie sane shishinumɔ, musuŋtsɔlɛ, kɛ mɔ hesusumɔ kpo.

Taakɛ tsɔɔlɔi ni he esa lɛ le lɛ, esa akɛ wiemɔ lɛ ahiɛ yiŋtoo ko ni yɔɔ faŋŋ. Esa akɛ akɛ nifeemɔ lɛ aha bɔ ni otii titrii lɛ baaje kpo jogbaŋŋ koni anyɛ akai. Esa akɛ toibolɔi lɛ anyɛ akai susumɔi ni anyɛɔ atsuɔ he nii ni baanyɛ aná amɛshihilɛi anɔ hewalɛ.

Sɔɔmɔ Kpee

Kɛji ooha wiemɔ ni damɔ Wɔ Maŋtsɛyeli Sɔɔmɔ lɛ mli sane ko nɔ lɛ, no lɛ kaa lɛ baanyɛ afee nɔ ni yɔɔ srɔto. Obaana yɛ no mli akɛ aatao ni okɛ nɔ ni akɛha bo lɛ aha toibolɔi lɛ jogbaŋŋ, shi jeee ni ohala nɔ ni sa yɛ mli kɛkɛ. Ye obua toibolɔi lɛ koni amɛjwɛŋ ŋmalɛi ni feɔ nɔdaamɔ nɔ kɛha ŋaawoo ni akɛha lɛ nɔ. (Tito 1:9) Be lɛ faaa, ni bei babaoo lɛ ehaaa bo hegbɛ ni okɛ saji krokomɛi afata he.

Yɛ gbɛ kroko nɔ lɛ, abaanyɛ aha obaha wiemɔ ni damɔ sane ni bɛ Wɔ Maŋtsɛyeli Sɔɔmɔ lɛ mli lɛ nɔ. Abaanyɛ atsɛ Buu-Mɔɔ eko mli sane sɛɛ, loo nifeemɔ lɛ baanyɛ adamɔ sane fioo ko ni aŋma lɛ nɔ. Ákɛ tsɔɔlɔ lɛ, esa akɛ osusu bɔ ni nifeemɔ ní akɛha bo lɛ kɔɔ asafo lɛ hiamɔ nii ahe lɛ he. Ekolɛ ehe baahia ni okɛ nɔkwɛmɔnii fioo ko atsu nii loo ogba niiashikpamɔ ni sa. Kaimɔ akɛ onifeemɔ lɛ jeee ni owie sane ni akɛha bo lɛ he kɛkɛ, shi moŋ ni otsu he nii yɛ gbɛ ni baaye abua asafo lɛ koni enyɛ etsu nitsumɔ ni yɔɔ Nyɔŋmɔ Wiemɔ lɛ mli kɛha wɔ lɛ he nii ni wɔna efeemɔ he miishɛɛ.—Bɔf. 20:20, 21.

Yɛ be mli ni osaa ohe yɛ onifeemɔ lɛ mli lɛ, susumɔ shihilɛi ni mɛi ni yɔɔ asafo lɛ mli lɛ yɔɔ mli lɛ he. Jiemɔ amɛyi yɛ nɔ ni amɛfeɔ momo lɛ he. Mɛɛ gbɛ nɔ ŋaawoo ni akɛha yɛ nifeemɔ ni akɛha lɛ mli ni amɛkɛaatsu nii lɛ baaha amɛnitsumɔ kɛ miishɛɛ yɛ sɔɔmɔ nitsumɔ lɛ mli lɛ aya hiɛ?

Ani onifeemɔ lɛ biɔ ni ofee nɔkwɛmɔnɔ loo obibii mɛi saji? Kɛ́ nakai lɛ, no lɛ esa akɛ osaa ohe jogbaŋŋ kɛtsɔ hiɛ. Ekolɛ obaasumɔ ni oha mɔ kroko ato gbɛjianɔ koni efee, shi bei pii lɛ, yibii kpakpai jɛɛɛ mli kɛbaaa. Kɛ́ eeehi lɛ, nyɛfea nɔkwɛmɔnɔ loo saji abimɔ lɛ kɛtsɔa hiɛ dani kpee be lɛ ashɛ. Kwɛmɔ koni otsu onifeemɔ nɛɛ he nii yɛ gbɛ ni haa gbɛtsɔɔmɔ ni akɛha lɛ yaa hiɛ lɛ nɔ.

Kpeei Bibii kɛ Kpeei Wuji

Yɛ be ko sɛɛ lɛ, abaanyɛ aha nyɛmimɛi hii ni náa mumɔŋ sui kpakpai, ni amɛtsɔmɔɔ maŋ wielɔi kɛ tsɔɔlɔi ni he esa lɛ aná gbɛfaŋnɔ yɛ gbɛjianɔtoo lɛ mli yɛ kpee bibioo ko loo kpee wulu ko mli. Enɛɛmɛi ji bei krɛdɛɛ diɛŋtsɛ kɛha teokrase tsɔsemɔ. Abaanyɛ akɛ nakai nifeemɔ lɛ aha ákɛ wiemɔ ni aŋmala aha, wiemɔ he wolo, Biblia drama he gbɛtsɔɔmɔ ni abaanyɛ akɛtsu nii yɛ ŋmɛnɛŋmɛnɛ beaŋ, loo kukuji ni tsɔseɔ mɔ kɛkɛ. Kɛji oná hegbɛ akɛ ooosɔmɔ yɛ gbɛjianɔtoo nɛɛ eko mli lɛ, no lɛ kasemɔ sane ni akɛha bo lɛ jogbaŋŋ. Okɛtsu nii kɛyashi obaana bɔ ni ehe yɔɔ sɛɛnamɔ.

Esa akɛ mɛi ni akɛ nifeemɔ eha amɛ ni amɛha wiemɔ ni aŋmala aha lɛ akane nɔ fɛɛ nɔ fitsofitso. Amɛtsakeee wiemɔ lɛ loo sane lɛ. Amɛkaseɔ ni amɛleɔ nɔ ni saji otii lɛ ji kɛ bɔ ni atsuɔ enɛɛmɛi ahe nii ahaa. Amɛkaseɔ wiemɔ lɛ kanemɔ waa kɛyashi amɛnyɛɔ amɛhaa wiemɔ lɛ kɛ shishinumɔ ni yɔɔ sɛɛ lɛ nɔmimaa, ekãa, hedɔɔ, henumɔ, hiɛdɔɔ, kɛ nɔmimaa, kɛ agbɛnɛ hu gbeewalɛ ni sa kɛha toibolɔi babaoo lɛ.

Sɔ̃ kã nyɛmimɛi hii ni ahaa amɛ wiemɔ ni amɛkɛ wiemɔ wolo atsu nii lɛ nɔ ni amɛtsu amɛsane lɛ he nii yɛ gbɛ ni kɛ wiemɔ wolo lɛ nyiɛɔ pɛpɛɛpɛ nɔ. Yɛ nɔ najiaŋ ni wielɔ lɛ baakane wiemɔ wolo lɛ beni ehaa wiemɔ lɛ loo eeeto he gbɛjianɔ tamɔ wiemɔ ni ahaa ni aŋma emli wiemɔi fɛɛ lɛ, esa akɛ ewie sane lɛ tɛ̃ɛ, kɛjɛ etsui mli. Ehe miihia ni okɛ be ni akɛha yɛ wiemɔ wolo lɛ nɔ lɛ atsu nii bɔni afee ni owie saji otii ni ajie lɛ kpo lɛ eko fɛɛ eko he. Esa akɛ wielɔ lɛ kɛ susumɔi kɛ ŋmalɛi ni yɔɔ nakai saji otii lɛ amli lɛ atsu nii jogbaŋŋ. Esaaa akɛ ekɛ otii krokomɛi ni lɛ diɛŋtsɛ esumɔɔ lɛ fataa he ní ejieɔ nɔ ni akɛha yɛ wiemɔ wolo lɛ mli lɛ. Yɛ anɔkwale mli lɛ, nɔ ni tsɔsemɔ lɛ damɔ nɔ ji Nyɔŋmɔ Wiemɔ lɛ. Gbɛnaa nii ni kã Kristofoi onukpai anɔ ji ní ‘amɛshiɛ wiemɔ lɛ.’ (2 Tim. 4:1, 2) No hewɔ lɛ, esa akɛ wielɔ lɛ agbala ejwɛŋmɔ titri kɛba ŋmalɛi ni yɔɔ wiemɔ wolo lɛ mli lɛ nɔ—ni esusu he ni etsɔɔ bɔ ni ekɔɔ amɛhe ehaa.

Kaatsi Be Oto

Ani oosɔmɔ yɛ asafo ko ní hegbɛi ni okɛaawie yɛ mli lɛ fa babaoo? Te ooofee tɛŋŋ otsu fɛɛ he nii jogbaŋŋ lɛ? Kwa ohe ni ooosaa yɛ onifeemɔ lɛ mli yɛ naagbee kwraa lɛ.

Wiemɔi ni asafo lɛ náa he sɛɛ lɛɛlɛŋ lɛ biɔ ni akɛ be ni sa asusu he. No hewɔ lɛ, ha ni efee osu akɛ kɛji onine shɛ nifeemɔ ko nɔ nɔŋŋ lɛ, obaakane emli sane lɛ. Enɛ baaye ebua bo koni ojwɛŋ nɔ yɛ be mli ni otsuɔ nitsumɔi krokomɛi lɛ. Yɛ gbii loo otsii ni tsɔɔ hiɛ dani oooha owiemɔ lɛ, ekolɛ obaanu wiemɔi ni baaye abua bo koni ona gbɛ ni hi fe fɛɛ ni obaanyɛ otsɔ nɔ okɛ sane lɛ atsu nii. Shihilɛi komɛi baanyɛ aba ni baatsɔɔ bɔ ni eba yɛ ebe naa lɛ. Onifeemɔ lɛ ni oookane ni osusu he yɛ be mli ni onine eshɛ nɔ nɔŋŋ lɛ baahe be, shi enɛ feɔ be ní akɛtsu nii yɛ gbɛ kpakpa nɔ. Kɛji ota shi yɛ naagbee mli koni oto wiemɔ wolo lɛ he gbɛjianɔ lɛ, no lɛ obaaná he sɛɛ akɛ osusu he jogbaŋŋ kɛtsɔ hiɛ. Kɛji otsu nifeemɔi ahe nii yɛ nɛkɛ gbɛ nɔ lɛ, ebaaba nɔnyɛɛ shi babaoo ni ebaaha okɛ sane lɛ aha yɛ gbɛ ni anyɛɔ atsuɔ he nii, ni shɛɔ mɛi ni yɔɔ asafo lɛ mli lɛ atsuii ahe lɛ nɔ.

Kɛji ojie hiɛsɔɔ babaoo kpo yɛ nikeenii ni atuu awo odɛŋ ni kɔɔ Yehowa tsɔsemɔ he gbɛjianɔtoo kɛha ewebii lɛ he lɛ, obaawo ehiɛ nyam, ni ebaafee jɔɔmɔ kɛha mɛi ni sumɔɔ lɛ lɛ.—Yes. 54:13; Rom. 12:6-8.