Nyɔŋmɔ Ji Naanyo Ni Hi Fe Fɛɛ Ni Obaanyɛ Oná

Nyɔŋmɔ naanyo ni oootsɔ lɛ ji nɔ ni hi fe fɛɛ ni baanyɛ aba onɔ. Nyɔŋmɔ baatsɔɔ bo bɔ ni ooofee oná miishɛɛ ni ohi shi shweshweeshwe; ebaaha oye ohe kɛjɛ hemɔkɛyelii gbohii kɛ nifeemɔi ni yeɔ mɔ awui lɛ babaoo he. Ebaabo osɔlemɔi atoi. Ebaaye ebua bo koni oná mligbɛ toiŋjɔlɛ kɛ hekɛnɔfɔɔ. (Lala 71:5; 73:28) Nyɔŋmɔ baafi osɛɛ yɛ haomɔ bei amli. (Lala 18:19) Ni Nyɔŋmɔ kɛ hegbɛ ni baanyɛ aha onine ashɛ enikeenii ni ji naanɔ wala nɔ lɛ miiha bo.—Romabii 6:23.

Yɛ be mli ni obɛŋkɛɔ Nyɔŋmɔ lɛ, obaabɛŋkɛ Nyɔŋmɔ nanemɛi hu. Amɛ hu amɛbaatsɔmɔ onanemɛi. Yɛ anɔkwale mli lɛ, amɛbaatsɔmɔ tamɔ nyɛmimɛi hii kɛ nyɛmimɛi yei amɛha bo. Amɛbaaná he miishɛɛ akɛ amɛaatsɔɔ bo Nyɔŋmɔ he nii ni amɛbaaye amɛbua bo ni amɛwo bo hewalɛ.

Wɔkɛ Nyɔŋmɔ yeee egbɔ. Yɛ be mli ni otaoɔ ni okɛ Nyɔŋmɔ abɔ naanyo lɛ, esa akɛ onu anɔkwale ko ni he hiaa lɛ shishi. Nyɔŋmɔ ni akɛ lɛ bɔɔ naanyo lɛ jeee naanyobɔɔ ni kã tipɛŋfoi ateŋ. Eye wɔ onukpa kwraa, ni ele nii kwraa fe wɔ, ni ehe wa kwraa fe wɔ. Lɛ ji wɔ Nɔyelɔ ni sa. No hewɔ lɛ kɛ́ wɔmiisumɔ ni wɔtsɔmɔ enanemɛi lɛ, esa akɛ wɔbo lɛ toi ni wɔfee nɔ ni ekɛɔ wɔ akɛ wɔfee lɛ. Enɛ he baaba sɛɛnamɔ kɛha wɔ daa.—Yesaia 48:18.