2 Nyɛfea Ekome Kɛtsua Nii

NƆ NI ETSƆƆ

Wu kɛ ŋa ni feɔ ekome kɛtsuɔ nii yɛ gbalashihilɛ mli lɛ tamɔ ɛroplen kudɔlɔ kɛ eyelikɛbualɔ ni feɔ ekome kɛtsuɔ nii yɛ ɛroplen kome mli. Kɛ́ amɛkɛ naagbai kpe lɛ, amɛteŋ mɔ fɛɛ mɔ susuɔ bɔ ni amɛbaatsu he nii amɛhã, jeee bɔ ni mɔ kome baatsu he nii ehã lɛ he.

BIBLIA MLI SHISHITOO MLA: “Amɛjeee mɛi enyɔ dɔŋŋ, shi moŋ heloo kome.”​—Mateo 19:6.

“Jeee mɔ kome hãa gbalashihilɛ yeɔ omanye. Esa akɛ wu kɛ ŋa afee ekome kɛtsu nibii ahe nii, no dani miishɛɛ baahi amɛgbalashihilɛ lɛ mli.”​—Christopher.

NƆ HEWƆ NI EHE HIAA

Wu kɛ ŋa ni efeee ekome kɛtsuuu nibii ahe nii lɛ shwaa amɛhefatalɔ lɛ moŋ fe ni amɛkɛ amɛjwɛŋmɔ baama bɔ ni amɛbaafee amɛtsu amɛnaagba lɛ he nii lɛ anɔ. Kɛ́ eba lɛ nakai lɛ, nibii bibii ni jeee naagbai lɛ batsɔɔ naagbai wuji.

“Ekome ni wu kɛ ŋa baafee kɛtsu nibii ahe nii lɛ he miihia waa yɛ gbalashihilɛ mli. Eji miwu kɛ mi efeee ekome kɛtsuuu nibii ahe nii kulɛ, wɔbaahi shi akɛ mɛi enyɔ ni yɛ tsũ kome mli kɛkɛ, shi jeee wu kɛ ŋa; ni enɛ baahã ewa kɛhã wɔ kɛ́ ehe bahia ni wɔkpɛ yiŋ yɛ saji ni he hiaa lɛ ahe.”​—Alexandra.

NƆ NI OBAANYƐ OFEE

OKƐ SAJI NƐƐ APƐI OMLI OKWƐ

• Ani mibuɔ shika ni mináa lɛ akɛ mi mishika aloo wɔshika?

• Ani misumɔɔ ni mayahɔ he ko majɔɔ mihe ni mihefatalɔ fataaa mihe?

• Ani misumɔɔ ni matsi mihe yɛ mihefatalɔ lɛ wekumɛi lɛ ahe, tsɛbelɛ, lɛ lɛ ekɛ amɛ shãraa waa?

OKƐ OHEFATALƆ LƐ ASUSU SANEBIMƆI NI NYIƐ SƐƐ NƐƐ AHE

• Mɛɛ nibii wɔbɔɔ mɔdɛŋ wɔfeɔ ekome kɛtsuɔ he nii yɛ wɔgbalashihilɛ lɛ mli?

• Mɛɛ nibii wɔbaanyɛ wɔfee lɛ jogbaŋŋ fe bɔ ni wɔfeɔ lɛ bianɛ lɛ?

• Mɛɛ nibii wɔbaanyɛ wɔfee koni wɔnyɛ wɔfee ekome kɛtsu nibii ahe nii jogbaŋŋ fe bɔ ni wɔfeɔ bianɛ lɛ?

ŊAAWOO

• Ŋɔɔ lɛ akɛ aatswa bɔɔl. Yɛ nɔ najiaŋ ni obaahi tim kome mli, ni ohefatalɔ lɛ ahi tim kroko mli ni nyɛkɛ nyɛhe ashi akaŋ lɛ, mɛni obaanyɛ ofee koni nyɛ fɛɛ nyɛhi tim kome mli?

• Yɛ nɔ najiaŋ ni mabi mihe akɛ, ‘Te mafee tɛŋŋ maye kunim lɛ’, bi ohe moŋ akɛ, ‘Te wɔbaafee tɛŋŋ wɔye kunim?’

Okɛ ojwɛŋmɔ akaya mɔ ni sane ja kɛ mɔ ni sane ejaaa nɔ. Toiŋjɔlɛ kɛ ekomefeemɔ ni baahi nyɛgbalashihilɛ lɛ mli lɛ he miihia kwraa fe enɛ.”​—Ethan.

BIBLIA MLI SHISHITOO MLA: ‘Nyɛtaoa nibii ni hi hã mɛi krokomɛi, shi jeee nibii ni hi hã nyɛ pɛ.’​—Filipibii 2:​3, 4.