Kpléxɔ Axɔ́súɖuto ɔ tɔn mǐtɔn lɛ́ hinhɛn ɖó mǐmɛ́ jí

Nɔví nyɔ̌nu wínnyáwínnyá Colombie tɔn ɖé nɔ nyí Nicole bo ɖɔ: “Un yí wǎn nú kpléxɔ Axɔ́súɖuto ɔ tɔn ce! Un nɔ kpé wú bo nɔ nɔ kpɔ́ xá xwédo gbigbɔ tɔn ce ɖo fínɛ́.” Nǔ ka nɔ cí mɔ̌ nú hwi lɔ a?

Kúnnuɖetɔ́ Jexóva tɔn lɛ́ nɔ bló kplé ɖo kpléxɔ Axɔ́súɖuto ɔ tɔn 63 000 mɔ̌ mɛ gbɔn gbɛ ɔ bǐ mɛ. Nɔtɛn énɛ́ lɛ́ nɔ nyí fí e mǐ nɔ vo bo nɔ sɛn Mawu ɖe lɛ́ é. Amɔ̌, yě lɛ́ nyí nǔ hú mɔ̌. Gběxosín-alijítɔ́ hwebǐnu tɔn Colombie tɔn ɖé nɔ nyí David bo ɖɔ: “Kpléxɔ Axɔ́súɖuto ɔ tɔn mǐtɔn lɛ́ nɔ zɔ́n bɔ wɛn mǐtɔn nɔ dɔn mɛ hú gǎn. Ényí mɛ lɛ́ wá bo mɔ lěe mǐ nɔ kpé nukún dó xɔ mǐtɔn lɛ́ wú sɔ é ɔ, é nɔ jí wǔ nú yě.” Nǔkpédónǔnu wɛ énɛ́ nɔ nyí ǎ. Azɔ̌ syɛ́nsyɛ́n wɛ mǐ nɔ wa dó jlá kpléxɔ Axɔ́súɖuto ɔ tɔn mǐtɔn lɛ́ ɖó, bo nɔ lɛ́ hɛn yě ɖó mǐmɛ́ jí. Nɛ̌ è ka nɔ nɔ gǔdo nú azɔ̌ énɛ́ gbɔn?

Lěe è nɔ to azɔ̌ lɛ́ gbɔn é

Agun e nɔ zán kpléxɔ Axɔ́súɖuto ɔ tɔn lɛ́ é wɛ nɔ kpé nukún dó mǐmɛ́jíninɔ tɔn wú. Bónú é ná kpa yě ɔ, nɔví súnnu lɛ́ kpó nɔví nyɔ̌nu lɛ́ kpó nɔ za kpléxɔ Axɔ́súɖuto ɔ tɔn yětɔn mɛ hwɛhwɛ. Yě nɔ lɛ́ jlá nǔ e ja gblěgblé gbé lɛ́ é ɖó, bo nɔ jlá éé ko gblé lɛ́ é ɖó.

Bo ná dó d’alɔ nɔví lɛ́ bɔ yě ná nɔ hɛn kpléxɔ Axɔ́súɖuto ɔ tɔn yětɔn lɛ́ ɖó mǐmɛ́ jí ɔ, gbɛ̌ta e nɔ kpé nukún xɔgbígbázɔ́ lɛ́ wú ɖo alaxɔ mɛ é sɔ́ nɔví súnnu ɖé lɛ́ bɔ yě nɔ kplɔ́n azɔ̌ mɛ ɖo ali énɛ́ nu. Nɔví énɛ́ lɛ́ e nɔ kplɔ́n azɔ̌ mɛ é ɖokpó ɖokpó nɔ kpé nukún dó kpléxɔ Axɔ́súɖuto ɔ tɔn ayizɛ́n jɛ wǒ mɔ̌ wú. É nɔ yi kpɔ́n kpléxɔ Axɔ́súɖuto ɔ tɔn lɛ́, bo nɔ kplɔ́n wɛnjlátɔ́ e ɖo agun lɛ́ mɛ lɛ́ é lěe yě ná kpé nukún dó kpléxɔ yětɔn wú gbɔn é. Xwe atɔn mɛ tɛgbɛ ɔ, é nɔ gbéjé xɔ énɛ́ lɛ́ kpɔ́n ɖɔ è ka sixú kpo ɖo ayijayǐ mɛ ɖo yě mɛ a jí, alǒ è ka ɖó ná wa nǔvɔ́jláɖózɔ́ ɖé ɖo yě wú wɛ a jí.

Nɔví súnnu kpó nɔví nyɔ̌nu kpó mǐtɔn lɛ́ nɔ yí wǎn nú azɔ̌ e nɔví súnnu azɔ̌kplɔ́nmɛtɔ́ énɛ́ lɛ́ nɔ kplɔ́n yě é. Nɔví nyɔ̌nu Inde tɔn ɖé nɔ nyí Indhumathi bo ɖɔ: “Azɔ̌kplɔ́nmɛ ɔ víví tawun. É víví nú mǐ ɖɔ è kplɔ́n mǐ lěe mǐ ná nɔ hɛn kpléxɔ mǐtɔn ɖó mǐmɛ́ jí gbɔn é.” Nɔví súnnu Kenya tɔn ɖé nɔ nyí Evans bo ɖɔ: “Mǐ kplɔ́n alɔ nyinyi nú akwɛ́ gěgé zínzán gbɔn nǔ kléwún kléwún lɛ́ jíjláɖó cóbɔ yě ná gblé bǐ gblamɛ.”

Akwɛ́zínzán lɛ́

Akwɛ́ nabí e è nɔ zán xwewú xwewú dó kpé nukún dó kpléxɔ Axɔ́súɖuto ɔ tɔn ɖé wú é sixú yi ɖɔ̌laa Amɛlíka tɔn kanweko mɔ̌kpán alǒ afatɔ́n mɔ̌kpán, sɔgbe xá fí e kpléxɔ ɔ ɖe é, è gbá din é ɔ, xwe nabí e é ko bló é, kpó agun nabí e nɔ kplé ɖ’é mɛ é kpó. Fítɛ́ è ka nɔ ba akwɛ́ sín dó kpé nukún dó akwɛ́zínzán énɛ́ lɛ́ wú?

Nǔníná lɛ́ wɛ è nɔ zán dó kpé nukún dó kpléxɔ Axɔ́súɖuto ɔ tɔn lɛ́ wú. Nɔví súnnu Kazakhstan tɔn ɖé nɔ nyí Alexander bo tínmɛ ɖɔ: “È nɔ zán nǔníná lɛ́ ɖě dó kɔnɛsyɔ́ɔn Ɛntɛnɛ́ti gɔ́ nú nǔ ɖěvo lɛ́ ɖi sin kpó kuláan kpó tamɛ. È nɔ zán akpáxwé ɖěvo dó dandannú ɖěvo lɛ́ ɖi wěma e è nɔ hɛn yi adado jí é, gǎan, nǔ e è nɔ zán dó jlá ayǐ ɖó lɛ́ é kpó sɛn kpó tamɛ.” È nɔ ná nǔníná e kpo lɛ́ é dó d’alɔ ɖo azɔ̌ ɖaxó ɖaxó e nɔ byɔ́ akwɛ́ zínzán hú gǎn bɔ è nɔ wa gbɔn gbɛ ɔ bǐ mɛ dó xɔ tutoblónúnǔ ɔ tɔn lɛ́ hinhɛn ɖó mǐmɛ́ jí tamɛ é mɛ.

Azɔ̌ ɖaxó ɖaxó e è nɔ wa dó jlá xɔ tutoblónúnǔ ɔ tɔn lɛ́ ɖó é

Ényí é byɔ́ ɖɔ è ná wa nǔvɔ́jláɖózɔ́ ɖo kpléxɔ Axɔ́súɖuto ɔ tɔn ɖé wú bɔ akwɛ́ e é ná ɖu é ná zɛ éé è nɔ zán ayǐvɔ̌gbe dó kpé nukún d’é wú ɖo sun we alǒ atɔn vlamɛ é wú ɔ, mɛxó agun tɔn lɛ́ ɖó ná ɖɔ xó ɖó kpɔ́ xá nɔví súnnu azɔ̌kplɔ́nmɛtɔ́ e è sɔ́ b’ɛ nɔ kpé nukún dó kpléxɔ yětɔn wú é. Ényí azɔ̌xɔsá e nɔ kpé nukún dó xɔgbígbázɔ́ lɛ́ wú ɖo alaxɔ mɛ é yí gbe nú nǔvɔ́jláɖózɔ́ ɔ ɔ, nǔníná e è nɔ ná dó azɔ̌ e wa wɛ è ɖe gbɔn gbɛ ɔ bǐ mɛ é tamɛ é wɛ è nɔ zán dó wa nǔvɔ́jláɖózɔ́ énɛ́. Ðo xwe sinsɛnzɔ́ tɔn 2023 tɔn mɛ ɔ, nǔvɔ́jláɖózɔ́ mɔ̌hun 8 793 wɛ è wa, bɔ yě ɖu lǐva 43 jɛjí. Mǐ ní ɖɔ xó dó we ɖo nǔvɔ́jláɖózɔ́ énɛ́ lɛ́ mɛ wú.

Ðo Angola ɔ, é byɔ́ ɖɔ è ní wa nǔvɔ́jláɖózɔ́ ɖaxó ɖé ɖo kpléxɔ Axɔ́súɖuto ɔ tɔn e è gbá é ɔ, é ko bló xwe 15 é ɖé wú. È ɖó ná vɔ́ kuláankan lɛ́ bǐ dɔn, dǒ lɛ́ ko zɛ, bɔ mɛ e ɖo kpléxɔ ɔ kpá lɛ́ é ɖɔ ɖɔ sin nɔ sa wá xwé émítɔn lɛ́ gbe. Azɔ̌xɔsá e nɔ bló tuto xɔgbígbá tɔn ɖo alaxɔ mɛ é ná gbe bɔ è vɔ́ nǔ énɛ́ lɛ́ jlá ɖó. Lǐvi 5 jɛjí wɛ nǔvɔ́jláɖózɔ́ énɛ́ ɖu. É su mɛ e ɖo kpléxɔ ɔ kpá lɛ́ é nukún mɛ tawun, bɔ lěe è wa azɔ̌ ɔ gbɔn é jí wǔ nú yě.

Ðo Pologne ɔ, kpléxɔ Axɔ́súɖuto ɔ tɔn ɖokpó nɔ kun sin, bɔ tapíi tɔn gblé bǐ. Azɔ̌xɔsá e nɔ bló tuto xɔgbígbá tɔn ɖo alaxɔ mɛ é ná gbe bɔ è vɔ́ xɔta ɔ blóɖó bɔ sin sɔ́ sixú xozlɛ́ ǎ, bo lɛ́ ɖyɔ́ tapíi ɔ. Lǐvi 5 adaɖé mɔ̌ wɛ nǔvɔ́jláɖózɔ́ énɛ́ ɖu. Mɔ̌ mɛ ɔ, é sɔ́ ná byɔ́ ɖɔ è ní wa nǔvɔ́jláɖózɔ́ ɖaxó ɖo kpléxɔ énɛ́ wú ǎ nú xwe gěgé.

Kpléxɔ mǐtɔn lɛ́ jíjláɖó nɔ kpa susu nú Jexóva

Kpléxɔ mǐtɔn lɛ́ jíjláɖó nɔ zɔ́n bɔ mǐ nɔ zán nǔníná lɛ́ ganjí, bo nɔ lɛ́ kpa susu nú Jexóva. Nɔví súnnu Tonga tɔn ɖé nɔ nyí Shaun bo ɖɔ: “Nǔvɔ́jláɖózɔ́ lɛ́ nɔ zɔ́n bɔ mǐ nɔ kpé wú bo nɔ sɛn Jexóva ɖo kpléxɔ Axɔ́súɖuto ɔ tɔn e mɛ́, ɖo tito jí, bo lɛ́ ɖo ganjí é ɖé mɛ, bɔ énɛ́ nɔ sɔ́ nyǐkɔ tɔn su ganjí ɖo xá ɔ mɛ. Mǐ nɔ gó dó mɛ lɛ́ ylɔ́ylɔ́ wá kpléxɔ Axɔ́súɖuto ɔ tɔn mǐtɔn mɛ wú.”

Nɛ̌ a ka sixú d’alɔ gbɔn?

Mǐ mɛ bǐ sixú d’alɔ bɔ è ná nɔ hɛn fí e mǐ nɔ sɛn Mawu ɖe lɛ́ é ɖó mǐmɛ́ jí, bo lɛ́ hɛn ɖó ganjí. Nɔví súnnu e nɔ kplɔ́n nǔvɔ́jláɖózɔ́ mɛ é ɖé nɔ nyí Marino bo nɔ nɔ Australie. Nǔ e é ɖɔ é ɖíe: “Mǐ bǐ sixú ɖ’alɔ ɖo wǔ ɖaxó e è jɔ mǐ bɔ mǐ ná nɔ kpé nukún dó kpléxɔ Axɔ́súɖuto ɔ tɔn mǐtɔn wú é mɛ. Mɔ̌ wiwa nɔ zɔ́n bɔ mǐ nɔ zán nǔníná lɛ́ ganjí, bɔ mɔ̌ mɛ ɔ, è nɔ zán yě ɖo fí e è ɖó hudó yětɔn nǔgbó nǔgbó ɖe lɛ́ é.”

Nɔví súnnu ɖé nɔ nyí Joel bo nɔ nɔ Inde, alɔ ɖíɖó ɖo kpléxɔ Axɔ́súɖuto ɔ tɔn yětɔn jíjláɖó mɛ nɔ víví n’i. É ɖɔ: “Azɔ̌ wiwa ɖó kpɔ́ xá nɔví súnnu ce lɛ́ nɔ zɔ́n bɔ un nɔ mɔ lěe gbɛ yɔ̌yɔ́ ɔ mɛ ná cí é sɛ́dó.” Nɔví nyɔ̌nu Nicole e xó mǐ ɖɔ wá yi é ɖɔ: “Agaɖanu din ɔ, un súnsún kpléxɔ ɔ mɛ hwenu e nɔví súnnu lɛ́ ɖo nǔ e tɔ́n é ɖé tlɛ wɛ ɖo wǔlɛkpá ɔ mɛ é. Nyi wɛ tlɛ́ nǔ e tɔ́n é ǎ có, un ka d’alɔ bɔ è ná nɔ ayijayǐ mɛ ɖo kpléxɔ ɔ mɛ.”

Ényí a ba ná ɖ’alɔ ɖo kpléxɔ Axɔ́súɖuto ɔ tɔn towe hinhɛn ɖó mǐmɛ́ jí mɛ hǔn, ɖɔ nú mɛxó agun tɔn towe lɛ́. Gɔ́ ná ɔ, ényí kpléxɔ Axɔ́súɖuto ɔ tɔn towe hinhɛn ɖó mǐmɛ́ jí kɛ́ɖɛ́ tamɛ wɛ è nɔ zán nǔníná towe lɛ́ dó ǎ, è nɔ lɛ́ zán dó kpléxɔ e gbɔn gbɛ ɔ bǐ mɛ lɛ́ é tamɛ. A sixú ná nǔníná dó gbǎ nǔnína tɔn lɛ́ mɛ ɖo kpléxɔ towe mɛ alǒ ɖo donate.jw.org jí. Alɔhundónánǔmɛ towe nɔ su nukún mǐtɔn mɛ tawun.