Luki 1:37: “Ðó nǔ ɖěbǔ gló Mawu ǎ”

“Ðó xó e Mawu ɖɔ é ɖěbǔ ná gblá ǎ.”—Luki 1:37, Biblu gbɛ yɔ̌yɔ́ ɔ tɔn.

“Ðó nǔ ɖěbǔ gló Mawu ǎ.”—Luki 1:37, MAWUXÓWÉMA.

Tínmɛ Luki 1:37 tɔn

Mawu Nǔbǐwúkpétɔ́ ɔ sixú wa nǔ e gbɛtɔ́ mɔ ɖɔ è kún sixú bló ó é ɖěbǔ. Nǔ ɖěbǔ sixú glɔ́n ali nú nǔ e é ɖɔ é, alǒ nǔ e sín akpá é dó é ɖěbǔ bónú é gɔn jijɛnu ǎ.

Xókwín e è zán ɖo gbe dodó ɔ mɛ bo ɖɔ ‘xó e é ɖɔ é’ é ɔ, è sixú lɛ́ tínmɛ bo ɖɔ “nǔ e zɛ hwɛ sín nu mɛ é,” bɔ ɖo fí ɔ, nǔ e zɛ hwɛ sín Mawu nu mɛ é. É sixú lɛ́ ɖo gesí dó nǔ e mɛ xó e Jexóvaa Mawu ɖɔ é ná tɔ́n kɔ dó é wɛ. Ðó xó e Mawu ɖɔ é nɔ jɛnu hwebǐnu wútu ɔ, è sixú lɛ́ tínmɛ Luki 1:37 bo ɖɔ: “Ðó akpá e Mawu dó lɛ́ é nɔ jɛnu jɛ́n wɛ” alǒ “Ðó kpó Mawu kpó ɔ, è nɔ kpé nǔ bǐ wú.” Nǔgbódodó ɖokpó ɔ xó ɖɔ wɛ tínmɛ énɛ́ lɛ́ e è bló nú nǔwlánwlán Glɛ̌kigbe dodó ɔ tɔn é ɖe: Xó e Mawu ɖɔ é alǒ akpá e é dó é ɖěbǔ ná gɔn jijɛnu ǎ, ɖó é kpé nǔ bǐ wú.—Ezayíi 55:10, 11.

Xógbe mɔ̌hun e ɖɔ xó dó akpá Mawu tɔn lɛ́ wú é gěgé ɖo Biblu mɛ. Ði kpɔ́ndéwú ɔ, Jexóva gbɔn wɛnsagun ɖé jí bo ɖɔ ɖ’ayǐ ɖɔ Ablaxámu sín asi Sala e ma ɖó vǐ ɖě ǎ, bo ko kpo é ná mɔ xo. Mawu ɖɔ gɔ́ ná ɖɔ: “Nǔɖé gló [Jexóva] wɛ a?” (Bǐbɛ́mɛ 18:13, 14) Ée tɔ́gbó Jɔbu lin tamɛ dó nǔɖíɖó Mawu tɔn lɛ́ jí gúdo é ɔ, é yí gbe bo ɖɔ: “Un mɔ ɖɔ a kpé nǔ bǐ wǔ.” (Jɔbu 42:2) Bɔ hwenu e ahwanvú Jezu tɔn lɛ́ tínmɛ ado e ɖo yě hu wɛ dó lěe yě ná wa nǔ gbɔn bá jɛxá bɔ Mawu ná hwlɛ́n yě gǎn é wú é ɔ, Jezu flín yě ɖɔ: “Nǔ ɖěbǔ gló Mawu ǎ.”—Matíe 19:25, 26.b

Nǔ e lɛ́ lɛ̌ dó Luki 1:37 lɛ́ é

Wɛnsagun e nɔ nyí Gabliyɛ́li é ɖɔ xó e ɖo Luki 1:37 mɛ é nú ɖyɔ̌vǐ ɖo alɔjí Jwifu e nɔ nyí Mali é. Gabliyɛ́li ɖɔ n’i kpowun ɖɔ é ná jí “Ajalɔ̌nlɔn sín Vǐ” bo “ná sun nyǐ i ɖɔ Jezu.” É ná húzú Axɔ́sú nú Axɔ́súɖuto Mawu tɔn e ná kpa acɛ káká sɔ́yi é.—Luki 1:26-33; Nǔɖexlɛ́mɛ 11:15.

Mali kanbyɔ́ ɖɔ nɛ̌ nǔ mɔ̌hun ka ná jɛ gbɔn a jí, ɖó é ko da asú ǎ, é ka lɛ́ “tuun súnnu kpɔ́n ǎ.” (Luki 1:34, 35) Gabliyɛ́li yí gbe n’i ɖɔ Mawu ná zán gbigbɔ mímɛ́ tɔn alǒ hlɔ̌nhlɔ́n tɔn e é nɔ dó wa azɔ̌ ná é dó bló mɔ̌. Hwenɛ́nu ɔ, Jezu ka kpo ɖo vǐ gbigbɔ tɔn Mawu tɔn nyí wɛ ɖo jǐxwé. Énɛ́ wú ɔ, Jexóva zán gbigbɔ mímɛ́ tɔn dó sɔ́ gbɛ Vǐ tɔn tɔn dó adɔgo Mali tɔn mɛ. (Jaan 1:14; Filípunu lɛ́ 2:5-7) Mɔ̌ mɛ ɔ, é mɔ xo ɖo nǔjíwǔ linu. Bo ná dó ná hlɔ̌nhlɔ́n ji e é ɖe ɖɔ Mawu ɖó hlɔ̌nhlɔ́n é ɔ, wɛnsagun ɔ ɖɔ n’i ɖɔ hɛ̌nnumɔ tɔn Elizabɛ́ti e “ko kpo” é mɔ xo agaɖanu din. Elizabɛ́ti kpó asú tɔn Zakalíi kpó ɖó vǐ ɖě ǎ, ɖó Elizabɛ́ti nyí wɛnsinɔ wútu. (Luki 1:36) Vǐ súnnu yětɔn wɛ wá nyí Jaan Batɛ́mublónúmɛtɔ́ ɔ e Jexóva ko ɖɔ sinsɛnzɔ́ tɔn sín xó jɛ nukɔn é.—Luki 1:10-16; 3:1-6.

Hǔn, xó ɖěɖěe Gabliyɛ́li ɖɔ ɖo Luki 1:37 mɛ lɛ́ é ɔ, Mali kpó Elizabɛ́ti kpó bǐ wɛ sixú ko ɖo ayi tɔn mɛ hwenu e é ɖo ɖiɖɔ wɛ é. Xó énɛ́ lɛ́ ɖokpó ɔ nɔ ná gǎnjɛwú mɛsɛntɔ́ Jexóva tɔn lɛ́ ɖo égbé ɖɔ é ná kpo ɖo akpá tɔn lɛ́ ɖe wɛ. Akpá e é dó ɖɔ émí ná sɔ́ acɛkpikpa jlɔ́jlɔ́ Vǐ tɔn Jezu Klísu e nyí Axɔ́sú nú Axɔ́súɖuto jǐxwé tɔn é tɔn dó ɖyɔ́ acɛkpikpa gbɛtɔ́ lɛ́ tɔn ná é lɔ ɖ’é mɛ.—Daniyɛ́li 2:44; 7:13, 14.

Kpɔ́n video kléwún élɔ́ bo ná dó mɔ nǔ tawun tawun e jí wěma Luki tɔn ɖɔ xó dó lɛ́ é.