Kúnnuɖetɔ́ Jexóva tɔn lɛ́ kpó mɛhuhu tɛ́ kpó: Étɛ́ Biblu ka ɖɔ?

Ðo 27 janvier 2023 ɔ, mɛ gěgé ná flín hwenu e è hu gbɛtɔ́ tɛ́ é gbɔn gbɛ ɔ bǐ mɛ. Nǔ baɖabaɖa e jɛ bɔ é ko bló xwe 75 jɛjí wá yi lɛ́ é sixú zɔ́n bɔ a ná kanbyɔ́ hwiɖée ɖɔ étɛ́wú Mawu ka tin bɔ è hu mɛ tɛ́ gbɔn mɔ̌.

• Bo ná dó tuun nǔ e Biblu ɖɔ é ɔ, xa xóta “Étɛ́wú mɛ lɛ́ ka hu gbɛtɔ́ tɛ́ (Shoah)? Étɛ́wú Mawu ma ka ɖó nǔ nu ǎ?”

Jwifu lɛ́ se wǔvɛ́ tawun ɖó mɛhuhu tɛ́ ɔ wútu. Yě mɛ lǐvi mɔ̌kpán wɛ è hu zɛ̌ɛ́n. È lɛ́ dó ya nú gbɛtɔ́ gbɛ̌nu ɖěvo lɛ́ bo hu yě ɖo mɛhuhu tɛ́ ɔ hwenu. Kúnnuɖetɔ́ Jexóva tɔn lɛ́ ɖo mɛ énɛ́ lɛ́ mɛ, ɖó nǔ e yě ɖi nǔ ná b’ɛ jínjɔ́n Biblu jí lɛ́ é wútu.

• Bo ná dó kplɔ́n nǔ d’é jí hǔn, xa xóta “Étɛ́ ka jɛ dó Kúnnuɖetɔ́ Jexóva tɔn lɛ́ wú hwenu e Nazi lɛ́ hu mɛ vantankánnyá é?”

“Sɔgúdo ɖagbe kpó nukúnɖíɖó kpó”

Mɛ gěgé nɔ ɖi xɛsi ɖɔ è sixú lɛ́ wá hu mɛ tɛ́ gbɔn mɔ̌. Xomɛ hun mǐ ɖɔ Biblu dó sɔgúdo ɖé sín akpá, bɔ hwenɛ́nu ɔ, nǔ baɖabaɖa mɔ̌hun lɛ́ ɖě sɔ́ ná jɛ ǎ.

• “‘Ðó un tuun nǔ e ná wa nú mi wɛ un ɖe é,’ wɛ Jexóva ɖɔ, ‘un ná ná mi fífá, un ná sɛ́ nǔ nyanya dó mi ǎ, bónú mi ná dó ɖó sɔgúdo ɖagbe kpó nukúnɖíɖó kpó.’”—Jelemíi 29:11, nwt.a

Nukúnɖíɖó énɛ́ ná jɛnu hwenu e Jexóva Mawu ná sú nǔnyanyawiwa kún dó, bo ná vɔ́ nǔ e è hɛn gblé lɛ́ é bǐ jlá ɖó é. Zaanɖé din ɔ, é ná:

• Sú kún dó nú mɛ e nɔ xo dǎka mɛ ɖěvo lɛ́ wú lɛ́ é.—Nǔnywɛ́xó 2:22.

• Súnsún ɖasin sín nukúnmɛ nú mɛ e se wǔvɛ́ lɛ́ é bǐ.—Nǔɖexlɛ́mɛ 21:4.

• Fɔ́n mɛ e ko kú lɛ́ é wá gbɛ ɖo ayǐkúngban jí.—Jaan 5:28, 29.

A sixú gán jɛ nukúnɖíɖó e Biblu ná mǐ b’ɛ dó gbɔ nú mɛ é wútu. Bo ná dó tuun nǔ e wú wɛ é ɔ, mǐ byɔ́ we ɖɔ a ní tɛ́n Biblu kplɔ́nkplɔ́n xá nǔkplɔ́nmɛtɔ́ ɖé vɔ̌nu mǐtɔn kpɔ́n.