Ðɔ ɖěɖěe è nɔ dó wlí hweví ná ɖo Biblu sín táan mɛ é

Bibluxatɔ́ lɛ́ sixú flín ɖɔ ahwanvú Jezu tɔn ɖé lɛ́ nyí hwehutɔ́. (Mak. 1:16-20) Yě nɔ zán ɖɔ lɛ́ dó wlí hweví ɖo Galilée xu ɔ mɛ.

Kan, alǒ lɛ̌ɛnkan wɛ è nɔ sɔ́ dó lɔn ɖɔ e nɔ wlí hweví lɛ́ é ná. Hweví alɔkpa e ná wlí wɛ è ɖe é wú wɛ gblogblo ɖɔ ɔ sín ali lɛ́ tɔn nɔ sín. Hwɛhwɛ ɔ, ɖɔ kpɛví kpɛví lɛ́ nɔ cí toboo, bɔ è nɔ sin nǔɖé lɛ́ dó tó yětɔn bónú yě ná dó sixú syɔ́, bɔ ɖɔ ɖaxó lɛ́ nɔ ɖó nǔ e kpɛn é ɖé ɖo tɛ́ntin, bɔ è nɔ sɔ́ atín dó bló nǔ e ná zɔ́n bɔ yě ná fo tɔ lɛ́ é gbɔn to yětɔn.

Ðɔ e è nɔ dó wlí hweví ná lɛ́ é nɔ vɛ́ axi tawun. Awǐnnya e nɔ nɔ xuzan jí lɛ́ é sixú hɛn ɛ gblé, alǒ ényí é wlí hweví nú agban kpɛn ɛ ɔ, é sixú vún. (Luk. 5:6) Biblu ɖɔ ɖɔ Jaki kpó Jaan kpó “ɖo ɖɔ yětɔn lɛ́ blóɖó wɛ,” bɔ é sixú ko nyí ɖɔ nyɛ̌ví kpó kan kpó zán wɛ yě ɖe. (Mat. 4:21) É sixú byɔ́ ɖɔ ényí hwehutɔ́ lɛ́ zán ɖɔ ɔ hweɖébǔnu ɔ, yě ná nɔ jlá ɖó. Luki lɔ ɖɔ xó dó hwehutɔ́ lɛ́ wú bo ɖɔ ɖɔ yě “ɖo ɖɔ yětɔn lɛ́ hú wɛ” bá dó ɖe kɔ́, alǒ nǔ kwíji sín yě mɛ. (Luk. 5:2) Énɛ́ gúdo ɔ, yě nɔ xyá ɖɔ lɛ́, bá dó bló bónú yě ní ma wɔ ó.—Ezek. 47:10.

Jezu byɔ́ súnnu ɖěɖěe ɖó walɔ ɔ bo nɔ zán ɖɔ lɛ́ é ɖɔ yě ní wá “wlí gbɛtɔ́ lɛ́ hweví wlí wɛ [yě] ɖe ɖɔhun.”