Kpɔ́ndéwú “Mawu e nɔ dó gbɔ nú mɛ ɖo ali bǐ nu é” tɔn ní kplɔ́n nǔ we

1. Étɛ́wú mǐ ka ɖó ná nɔ dó gbɔ nú mɛ ɖěvo lɛ́?

MǏ BǏ wɛ “mɛtɛ́nkpɔ́n vovo lɛ́ nɔ zɔ́n bɔ mǐ nɔ nɔ aluwɛ mɛ,” énɛ́ wú ɔ, hweɖélɛ́nu ɔ mǐ nɔ ɖó hudó gbɔdónúmɛ kpó wǔsyɛ́n dó lanmɛ nú mɛ kpó tɔn. (1 Pi. 1:6) Lěe mǐ nɔ ba ɖɔ mɛ ɖěvo lɛ́ ní dó gbɔ nú mǐ gbɔn é ɔ, mɔ̌ wɛ mǐ ɖó ná ɖo gbesisɔmɛ bo ná dó gbɔ nú mɛ e ɖo wǔvɛ́ mɔ wɛ lɛ́ é gbɔn. (Mat. 7:12) Jexóva e nyí “Mawu e nɔ dó gbɔ nú mɛ ɖo ali bǐ nu é” xlɛ́ mǐ lěe mǐ ná “dó gbɔ nú mɛ ɖěvo lɛ́ ɖo mɛtɛ́nkpɔ́n alɔkpa ɖěbǔ mɛ” gbɔn é. Mǐ sixú xwedó kpɔ́ndéwú tɔn bo ná nɔ dó “gbɔ . . . nú [mǐɖée] lɛ́.” (2 Kɔ. 1:3, 4; 1 Tɛ. 4:18) Mǐ nɔ wa mɔ̌ ɖó è hɛn mǐ gǎnnugǎnnu wútu wɛ ǎ, loɔ, mǐ yí wǎn nú nɔví súnnu kpó nɔví nyɔ̌nu kpó mǐtɔn lɛ́ wú wɛ. Ðo xóta élɔ́ mɛ ɔ, mǐ ná gbéjé (1) nǔ e gbɔdónúmɛ sín tínmɛ nyí ɖo Biblu mɛ é, (2) lěe mǐ sixú dó gbɔ nú mɛ ɖěvo lɛ́ gbɔn é, kpó (3) nǔ e mǐ sixú wa hwenu e mǐ ɖó hudó gbɔdónúmɛ tɔn é kpó kpɔ́n.

NǓ E BIBLU ÐƆ DÓ GBƆDÓNÚMƐ WÚ É

2. Ðo Biblu mɛ ɔ, tínmɛ tɛ́ lɛ́ xókwín e è tínmɛ dó “gbɔdónúmɛ” é ka sixú ɖó?

² Ðo Biblu mɛ ɔ, xókwín Glɛ̌kigbe tɔn e è tínmɛ dó “gbɔdónúmɛ” é sixú ɖó tínmɛ vovo sɔgbe xá ninɔmɛ e mɛ è zán ɖe é. Tínmɛ tɔn sixú nyí “è dó wǔsyɛ́n lanmɛ nú mɛ,” “è byɔ́ nǔɖé mɛ,” alǒ “sísɛ́ mɛ nú è ná wa nǔɖé.” (Hlɔ̌. 12:8) Tínmɛ xókwín énɛ́ tɔn blǔju ɔ wɛ nyí ɖɔ “è ní yi mɛɖé kpá.” Énɛ́ wú ɔ, mǐ sixú jlɛ́ dó mɛ e hwlɛndó bo yi d’alɔ xɔ́ntɔn tɔn é wú. É ná bo nyí alɔ ɖěbǔ wɛ é dó è ɔ, nǔ e gbɔ nǔgbó e è dó nú mɛ é nɔ wa é jɛ́n é ná wa, é wɛ nyí ɖɔ é ná dó wǔsyɛ́n lanmɛ nú mɛ e ɖo wǔvɛ́ se wɛ é, bo lɛ́ ná ɛ hlɔ̌nhlɔ́n.

3. Nɛ̌ Baanabási ka sɔ́ kpɔ́ndéwú ɖ’ayǐ ɖo gbɔ dó nú mɛ ɖěvo lɛ́ kpáxwé gbɔn? (Kpɔ́n ɖiɖe ɔ lɔmɔ̌.)

³ Kpɔ́ndéwú tɔn e è ná ɖo Biblu mɛ é ɖokpó ɖíe. Klisánwun ɖé nɔ nyí Jozɛ́fu bo nɔ dó wǔsyɛ́n lanmɛ nú mɛ ɖěvo lɛ́, lobo nɔ lɛ́ dó gbɔ nú yě sɔmɔ̌ bɔ mɛsɛ́dó lɛ́ sun nyǐ i ɖɔ Baanabási, bɔ tínmɛ tɔn nyí “gbɔdónúmɛtɔ́.” (Mɛ. 4:36) Nyǐkɔ énɛ́ jɛxá ɛ sɔmɔ̌ bɔ Biblu sɔ́ zán nyǐkɔ éɖésúnɔ tɔn dó dó gesí i ɖo fí ɖě gbeɖé ǎ. Ðo ninɔmɛ gěgé mɛ ɔ, Baanabási wa nǔ sɔgbe xá nyǐkɔ tɔn, bo nɔ d’alɔ hǎgbɛ́ tɔn lɛ́ hwenu e yě ɖo hudó mɛ é. Ði kpɔ́ndéwú ɔ, hwenu e Pɔ́lu húzú klisánwun tlóló bo wá Jeluzalɛ́mu é ɔ, é ba ná xo go ahwanvú lɛ́. Amɔ̌, xɛsi ɖi yě dó wǔ tɔn ɖó yadónúmɛtɔ́ e é nyí ɖ’ayǐ é wú. Amɔ̌, Baanabási ɖeji dó Sólu wú bo dó è gesí nú mɛsɛ́dó lɛ́.—Mɛ. 9:26-28.

LĚE È NÁ DÓ GBƆ NÚ MƐ ÐĚVO LƐ́ GBƆN É

4. Ðɔ ali ɖagbe hú gǎn e nu è sixú dó gbɔ nú mɛ ɖe é ɖokpó. (Hlɔ̌manu lɛ́ 1:11, 12)

⁴ Ényí a kpé wú hǔn, yi ba yě kpɔ́n. Jexóva nɔ zán mɛsɛntɔ́ tɔn lɛ́ dó dó gbɔ nú mɛ ɖěvo lɛ́. Ði kpɔ́ndéwú ɔ, hwenu e awakanmɛ kú gbeyíɖɔ Elíi é ɔ, Jexóva zán wɛnsagun ɖokpó dó dó wǔsyɛ́n lanmɛ n’i. (1 Axɔ́. 19:4-7) Mɛsɛ́dó Pɔ́lu lɔ tuun ɖagbe e nɔví tɔn lɛ́ yi ba kpɔ́n tlɔlɔ bo dó wǔsyɛ́n lanmɛ nú yě nɔ wa é. (Xa Hlɔ̌manu lɛ́ 1:11, 12.) Ényí a yi gbɔ dó nú mɛɖé gbé hǔn, ma nɔ kplakpla jí bo lɛ́ kɔ kpowun ó. (1 Kɔ. 16:7) Ényí a ma sixú yi ba mɛ e ɖo hudó mɛ é ɖé kpɔ́n ǎ hǔn, ma hu tɛ́ nú lě do ylɔ̌ylɔ́ ɛ, alǒ nǔ wlán sɛ́ dó è sixú ná ɛ hlɔ̌nhlɔ́n sɔ é ó. A ka ná yí gbe bɔ Jexóva ná zán we dó dó gbɔ nú mɛ ɖěvo lɛ́ a?

5. Wǔvɛ́ tɛ́ lɛ́ mǐ ka sixú ɖó nukún?

⁵ Ée azǎn gǔdo gúdo tɔn lɛ́ ná ɖo syɛ́nsyɛ́n d’é jí wɛ é ɔ, mǐ sixú ɖó nukún ɖɔ gbɔ dídó nú nɔví súnnu kpó nɔví nyɔ̌nu kpó mǐtɔn lɛ́ cɔɔ lě ná vɛ́ wǔ d’é jí. Hwenu e Pɔ́lu ɖo ganxó ɖo Hlɔ̌ma é ɔ, Onɛzifɔ́ɔ gosín Efɛ́zi bo yi ba ɛ mɔ; mɔ̌ e é wa é sixú zɔ́n bɔ è ná sɔ́ ɛ dó ganxó, alǒ tlɛ hu i. (2 Tim. 1:16-18) Kúnnuɖetɔ́ e ɖo Russie lɛ́ é lɔ wa nǔ mɔ̌hun hwenu e è ɖo ya dó nú nɔví súnnu kpó nɔví nyɔ̌nu kpó yětɔn lɛ́ wɛ ɖó nǔɖiɖi yětɔn wú é. Ényí è dɔn Kúnnuɖetɔ́ lɛ́ yi hwɛ nukɔn ɔ, nɔví súnnu kpó nɔví nyɔ̌nu kpó yětɔn lɛ́ nɔ wá hwɛɖɔxɔsá ɔ dó xlɛ́ ɖɔ émí ɖo gǔdo nú yě, ényí mɔ̌ wiwa tlɛ sixú zɔ́n bónú è sɔ́ yě dó gan mɛ ɔ nɛ́. A sixú kplɔ́n lěe mɛsɛntɔ́ Mawu tɔn hwexónu tɔn lɛ́ kpó égbé tɔn lɛ́ kpó nɔ gǔdo nú yěɖée lɛ́, bɔ gbeklánxámɛ lɛ́ ɖo fínɛ́ có yě lɛ́ ɖó awǎjijɛ gbɔn é dó sɔ́ nǔ nú hwiɖée bá dó xwedó kpɔ́ndéwú akɔ́nkpinkpan tɔn yětɔn.

6. Nɛ̌ mǐ ka sixú xwedó kpɔ́ndéwú Jexóva tɔn hwenu e mǐ ɖo gbɔ dó nú mɛ ɖěvo lɛ́ wɛ é gbɔn? (Kpɔ́n ɖiɖe ɔ lɔmɔ̌.)

⁶ Nɔ ɖótó yě. Hwenu e gbeyíɖɔ Elíi mɔ ɖɔ gbɛ émítɔn ɖo axɔ́ nu é ɔ, é hun ayi tɔn nú Jexóva. Mawu wǎnyíyínɔ mǐtɔn ko tuun nǔ e ɖo ayi gba dó nú gbeyíɖɔ Elíi wɛ é có, hwenu e Elíi ɖo nǔ e ɖo ayi tɔn mɛ é ɖɔ wɛ é ɔ, é ɖótó è. Jexóva tlɛ lɛ́ xwe sɔ bo ɖótó Elíi hwenu e Elíi ɖo nǔ ɖokpó ɔ lɛ́ vɔ́ ɖɔ wɛ é. (1 Axɔ́. 19:9, 10, 14) Gbeyíɖɔ Xabakúku lɔ ɖɔ linkpɔ́n tɔn lɛ́ kpó nǔ e ɖo adohu adohu ɖó n’i wɛ lɛ́ é kpó nú Jexóva ɖo ali ɖé nu bɔ é cí ɖɔ gǔ fɔ́n dó acɛ e Mawu ɖó é jí wɛ é ɖe ɖɔhun có, Jexóva tin bo ɖótó è kpó suúlu kpó. (Xab. 1:2, 3) Égbé ɖésú ɔ, Jexóva nɔ ɖótó ɖɛ mǐtɔn lɛ́ kpó sɔxwixwe kpó, é ná bo tlɛ ko tuun nǔ e hudó mǐ lɛ́ é ɔ nɛ́. Mǐ sixú xwedó kpɔ́ndéwú Jexóva tɔn bo ná nɔ ɖótó nɔví súnnu kpó nɔví nyɔ̌nu kpó mǐtɔn lɛ́ kpó sɔxwixwe kpó, kpódó sísí kpán. Mǐ ɖó ná nɔ ɖo gbesisɔmɛ bo ná nɔ ɖótó yě hwenu e yě ɖo xó ɖɔ wɛ é. Bɔ ényí é tlɛ cí ɖɔ yě ɖo xó ɖɔ wɛ kpó xomɛsin kpó, alǒ ɖo nǔ ɖokpó ɔ lɛ́ vɔ́ ɖɔ wɛ ɖɔhun ɔ, mǐ ná lɔn bo gbo xó dó nu nú yě, alǒ sin xomɛ ǎ.—Ja. 1:19; Nǔt. 7:9.

7. Nɛ̌ mǐ ka sixú tuun nǔ e hudó mɛ e ɖo linkpɔ́n mɛ é ɖé é gbɔn?

⁷ Tɛ́n kpɔ́n bo tuun nǔ e hudó mɛ ɔ lɛ́ é. Mǐ sixú mɔ nǔ jɛ ayi mɛ Jexóva ɖɔhun ǎ, énɛ́ wú ɔ, nǔ ɖokpó e mǐ sixú wa dó tuun gbɔdónúmɛ e sín hudó mɛ ɔ ɖó é wɛ nyí ɖɔ mǐ ní ɖótó è kpó sɔxwixwe kpó. Ma wá gbeta ɔ kɔn ɖɔ émí tuun nǔ e sín hudó mɛ ɔ ɖó é ɖó a tuun nǔ e sín hudó hwɛ ná ɖó hwenu e a ná ɖo ninɔmɛ mɔ̌hun ɖé mɛ é wútu ó. Mǐ nyí nǔ ɖokpó ɔ ǎ. Énɛ́ wú ɔ, xwe sɔ bo ɖótó mɛ ɔ ganjí, bo kan nǔɖé lɛ́ byɔ́ kpó nǔnywɛ́ kpó bá dó tuun lěe nǔ cí n’i é.—Nǔx. 20:5.

8. Nɛ̌ Jezu ka dó gbɔ nú Mata kpó Mali kpó hwenu e Lazáa kú é gbɔn? (Kpɔ́n ɖiɖe ɔ lɔmɔ̌.)

⁸ Lin tamɛ dó lěe Jezu dó gbɔ nú Mata kpó Mali kpó gbɔn hwenu e nɔví yětɔn Lazáa kú é jí. Yě mɛ we lɛ́ bǐ wɛ nǔ wa, amɔ̌, ali vovo nu wɛ Jezu dó gbɔ nú yě ɖe. Ée Mata ɖɔ xó xá Jezu gúdo é ɔ, Jezu má nǔgbó ɖěɖěe ɖɔ xó dó fínfɔ́n sín kú wú lɛ́ é xá ɛ, bo d’alɔ ɛ b’ɛ ná hlɔ̌nhlɔ́n nǔɖiɖi e é ɖó dó fínfɔ́n sín kú wú é. Amɔ̌, hwenu e Mali ɖo avǐ ya wɛ bo wá é ɔ, é cí ɖɔ Jezu kún ɖɔ xó dó fínfɔ́n sín kú wú ó. É nyɔ́ wa ɔ, é y’avǐ xá Mali, bo kan fí e è sɔ́ Lazáa ɖó é byɔ́. (Jaan 11:20-35) Étɛ́ ka nyí nǔkplɔ́nmɛ ɔ? Ényí mǐ ɖo gbɔ dó nú mɛ ɖěɖěe ɖo wǔvɛ́ se wɛ lɛ́ é wɛ ɔ, é ná nyɔ́ ɖɔ mǐ ní tuun nǔ e sín hudó yě ɖó tawun é, bo ma nɔ wa nǔ ɖokpó ɔ ɖo ninɔmɛ lɛ́ bǐ mɛ ó.

9. Nɛ̌ a ka sixú zán Biblu dó dó gbɔ nú mɛ ɖěvo lɛ́ gbɔn? (Hlɔ̌manu lɛ́ 15:4, 5)

⁹ Nɔ zán Biblu. Ényí a ɖɔ “gbɔ e Nǔwlánwlán mímɛ́ lɛ́ nɔ dó nú mɛ é” sín xó nú mɛɖé ɔ, é sixú zɔ́n b’ɛ ná ɖó nukúnɖíɖó. (Xa Hlɔ̌manu lɛ́ 15:4, 5.) Wǎgbɔ tɔn ɔ, nukúnɖíɖó énɛ́ ná dó gbɔ n’i bo lɛ́ dó wǔsyɛ́n lanmɛ n’i d’é jí. (Eza. 40:31) Nɛ̌ a ka sixú mɔ akpáxwé Biblu tɔn e a ná zán dó dó wǔsyɛ́n lanmɛ nú mɛɖé é gbɔn? Mɛɖé lɛ́ nɔ sɔ́ kɛ́n wěmafɔ ɖé lɛ́ tɔn bo nɔ wá kpɔ́n hwenu e yě ɖó hudó tɔn é, é sixú nyí wěmafɔ ɖěɖěe ɖo “Gbɔdónúmɛ” glɔ́ ɖo Wěmafɔ́ lɛ́ nú klisánwun gbɛ zínzán mɛ lɛ́ é. Byɔ̌ Jexóva ɖɔ é ní d’alɔ we bónú a ní zán Xó tɔn ɖo ali ɖagbe hú gǎn ɔ nu bá dó dó wǔsyɛ́n lanmɛ nú mɛ. Gbigbɔ tɔn sixú d’alɔ we bɔ a ná flín wěmafɔ e jɛxá lɛ́ é hwenu e a ná ɖó hudó tɔn dó é.—Jaan 14:26.

10. Étɛ́wú mǐ ka ɖó ná ɖɔ xó kpó xomɛnyínyɔ́ kpó hwenu e mǐ ɖo wǔsyɛ́n dó lanmɛ nú mɛɖé wɛ é?

¹⁰ Nɔ ɖɔ xó kpó xomɛnyínyɔ́ kpó. È sixú lɛ́ tínmɛ xókwín e è zán ɖo gbe dodó ɔ mɛ nú “gbɔdónúmɛ” é dó “è byɔ́ nǔɖé mɛ,” alǒ “sísɛ́ mɛ nú è ná wa nǔɖé.” Hweɖélɛ́nu ɔ, é sixú byɔ́ ɖɔ a ní byɔ́ mɛ e dó gbɔ ná wɛ a ɖe é alǒ sísɛ́ ɛ ɖɔ é ní jlá linlin tɔn ɖó. Ényí é byɔ́ ɖó mɔ̌ jɛ́n wɛ hǔn, lin tamɛ ganjí cóbó ɖɔ xó bónú xó towe lɛ́ ní ma gblé wǔ i ó, loɔ, yě ní gbɔ azɔn n’i. (Nǔx. 12:18) Elíi ɖó linlin e ma sɔgbe ǎ é dó lěe azɔ̌ e è sɔ́ d’así n’i é xɔ akwɛ́ sɔ é kpó lěe gǔfɔ́ndómawují Izlayɛ́li ví lɛ́ tɔn vun kan sɔ é kpó wú. Jexóva kɛ nu dó nǔwanyido Elíi tɔn lɛ́ wú tlɔlɔ cóbó d’alɔ ɛ kpó xomɛnyínyɔ́ kpó b’ɛ jlá linlin tɔn ɖó ǎ. (1 Axɔ́. 19:15-18) Xomɛnyínyɔ́ kpó tamɛ linlin ganjí kpó sixú d’alɔ we bɔ a ná wa nǔ ɖokpó ɔ. Ényí a ɖo xóɖiɖɔ xwlé mɛ wɛ, alǒ a ɖo xósin ná wɛ ɖo kplé lɛ́ jí hǔn, nɔ ɖɔ xó kpó xomɛnyínyɔ́ kpó, bo nɔ lɛ́ ɖó linlin ɖagbe hwebǐnu, ée a ná ɖo wǔsyɛ́n dó lanmɛ nú nɔví súnnu kpó nɔví nyɔ̌nu kpó towe lɛ́ wɛ, bo ná lɛ́ ɖo hlɔ̌nhlɔ́n ná yě wɛ é.

11. Étɛ́ sín hudó mɛ e awakanmɛ kú lɛ́ é ka nɔ ɖó hwɛhwɛ? (1 Jaan 3:18)

¹¹ Nɔ dó alɔ e sín hudó yě ɖó é yě. Hweɖélɛ́nu ɔ, é nɔ byɔ́ ɖɔ è ní wa nǔ hú gbɔdónúmɛxó lɛ́ ɖiɖɔ kpowun nú mɛ ɖěɖěe awakanmɛ kú lɛ́ é. (Xa 1 Jaan 3:18.) Baanabási zé kpɔ́ndéwú ɖagbe ɖ’ayǐ hwenu e é sa nǔɖókan tɔn ɖé lɛ́ bo ná akwɛ́ tɔn dó nɔ gǔdo nú nɔví súnnu kpó nɔví nyɔ̌nu kpó tɔn ɖěɖěe bló batɛ́mu yɔ̌yɔ́ bo ɖo hudó mɛ lɛ́ é é. (Mɛ. 4:36, 37) Klisánwun hǎtɔ́ mǐtɔn gěgé nɔ xwedó kpɔ́ndéwú tɔn ɖo égbé bo nɔ d’alɔ mɛ ɖěɖěe ɖo hudó mɛ lɛ́ é. Awakanmɛ kú Gabriela e nɔ nɔ Pologne é tawun hwenu e tɔ ɖaxó ɖé gba mɛ bo hɛn xwé tɔn gblé tawun é. É ɖɔ: “Ado hu nyi kpó mɛjitɔ́ ce lɛ́ kpó tawun. Un kan lěe un ná ɖí xwi xá gbɔn é byɔ́ nyiɖée. Amɔ̌, nɔví ɖěɖěe ɖo agun e ma lín dó mǐ ǎ lɛ́ é mɛ é wá bo w’azɔ̌ gěgé ɖo kéze ɖokpó kpowun mɛ. Nǔ énɛ́ e jɛ é ná hlɔ̌nhlɔ́n nǔɖiɖi ce ɖɔ Jexóva ɖo ali xlɛ́ togun tɔn dó dó gbɔ nú mɛ ɖěɖěe ɖo wǔvɛ́ mɔ wɛ lɛ́ é wɛ.”

12. Ényí a ɖo didɛ wɛ ɖo tagba lɛ́ nu kpó gbejíninɔ kpó ɔ, nɛ̌ é ka sixú d’alɔ nǔɖitɔ́ hǎtɔ́ towe lɛ́ gbɔn?

¹² Dɛ ɖo wǔvɛ́ towe lɛ́ nu. Pɔ́lu ɖɔ nú Tɛsaloníkinu lɛ́ ɖɔ hwenu e émí se dɛ e dɛ wɛ yě ɖe kpó gbejíninɔ kpó é sín xó é ɔ, é dó gbɔ nú émí, bo lɛ́ ná hlɔ̌nhlɔ́n émí. É tuun ɖɔ tagba e émí jɛ dó ta yětɔn mɛ é kún nyí dó wǔvɔ́ ó. (1 Tɛ. 3:5-8) É lɛ́ tuun ɖɔ ényí émí kpo ɖo gbejí nɔ nú Jexóva wɛ ɖo wǔvɛ́ lɛ́ mɛ ɔ, émí lɔ sixú dó gbɔ nú nɔví súnnu kpó nɔví nyɔ̌nu kpó émítɔn lɛ́ bɔ yě ná kpo ɖo gbejí. (Koló. 2:1, 2) Ðo ali ɖokpó ɔ nu ɔ, ényí nǔɖitɔ́ hǎtɔ́ mǐtɔn lɛ́ mɔ lěe Jexóva ɖo alɔ dó mǐ wɛ bɔ mǐ ɖo didɛ wɛ ɖo tagba lɛ́ nu b’ɛ ɖo mǐ kpa wɛ gbɔn é ɔ, é nɔ dó wǔsyɛ́n lanmɛ nú yě tawun.

13. Étɛ́ mǐ ka ɖó ná kpo ɖo wiwa wɛ hwenu e mǐ ɖo wǔsyɛ́n dó lanmɛ nú mɛ ɖěvo lɛ́ wɛ é?

¹³ Nɔ ɖó suúlu. Nɔví súnnu kpó nɔví nyɔ̌nu kpó ɖěɖěe awakanmɛ kú bɔ mǐ ɖo gǎn dó wɛ bá dó wǔsyɛ́n lanmɛ ná lɛ́ é sixú nɔ ma mɔ yěɖée mɛ afɔjíafɔjí. Amɔ̌, Nǔwlánwlán mímɛ́ lɛ́ dó wǔsyɛ́n lanmɛ nú mǐ ɖɔ ‘mǐ ní nɔ ná akɔ́nkpinkpan mǐɖée lɛ́.’ Nukɛgbe “nɔ ná akɔ́nkpinkpan” ɔ nɔ dó gesí nǔ e è ɖó ná ɖo wiwa wɛ é. (1 Tɛ. 5:11) Énɛ́ wú ɔ, nɔ ɖó suúlu hwenu e a ɖo gbɔ dó nú mɛ e ɖo hudó mɛ lɛ́ é wɛ é. (1 Tɛ. 5:14) É ɖo wɛn ɖɔ, mǐ bǐ wɛ nɔ ɖó hudó gbɔdónúmɛ tɔn hweɖélɛ́nu. Étɛ́ mǐ ka sixú wa lo?

HWENU E A ÐÓ HUDÓ GBƆDÓNÚMƐ TƆN É

14-15. Ényí mǐ ɖo linkpɔ́n alǒ wǔvɛ́ mɛ ɔ, étɛ́ mǐ ka ɖó ná wa?

¹⁴ Nɔ xo ɖɛ sɛ́ dó Jexóva. Nɔ byɔ́ ɛ ɖɔ é ní dó gbɔ nú we hwenu e a ɖó linkpɔ́n, alǒ awakanmɛ kú we é. (Ðɛh. 94:19) Nɔ ɖɔ nǔ e ba wɛ a ɖe tawun é n’i ɖo ɖɛ towe lɛ́ mɛ, bo nɔ hun ayi towe n’i. (Ðɛh. 62:9) Nǔgbó wɛ ɖɔ Jexóva nɔ ko tuun lěe nǔ cí nú we é cóbɔ a nɔ xo ɖɛ. Amɔ̌, lěe nǔ cí nú we ɖo ayi gɔngɔn towe mɛ é ɖiɖɔ n’i ɖo ɖɛ mɛ nɔ xlɛ́ ɖɔ a ɖi nǔ n’i. Jexóva nɔ gɔn sin ná nú ɖɛ e è xo kpó nǔɖiɖi kpó é gbeɖé ǎ, é ná bo ma tlɛ nyí lěe è ɖó nukún tɔn gbɔn é ǎ ɔ nɛ́. (Mak. 11:24) Filípunu lɛ́ 4:6, 7 dó wǔsyɛ́n élɔ́ lanmɛ nú mǐ: “Mi ní nɔ byɔ́ nǔ Mawu; énɛ́ ɔ, fífá Mawu tɔn e zɛ nukúnnúmɔjɛnǔmɛ bǐ wú é ná nya xɛ ɖo ayi mitɔn kpó linlin mitɔn kpó jí.”

¹⁵ Nɔ byɔ́ alɔdó mɛ ɖěvo lɛ́ tɔn. Ðɔ lěe nǔ cí nú we é nú xɔ́ntɔn e zin é ɖé, alǒ ɖɔ xomɛ nú mɛxó agun tɔn ɖejidéwú ɖé. Nɔví súnnu kpó nɔví nyɔ̌nu kpó towe lɛ́ sixú nyí jɔtɛn gbɔdónúmɛ tɔn nú we, amɔ̌, yě sixú nɔ ma tuun lěe nǔ cí nú we é, alǒ nǔ e sín hudó a ɖó é, afi nú a ɖɔ nú yě ɔ nɛ́. (Nǔx. 14:10) A sixú byɔ́ yě ɖɔ yě ní ɖótó émí, alǒ má wěmafɔ alǒ xóta e yě mɔ ɖɔ é ná dó gbɔ nú émí é ɖé xá émí.

16. Étɛ́ ka sixú jɛ hwenu e mɛ ɖěvo lɛ́ ɖo gǎn dó wɛ bá dó wǔsyɛ́n lanmɛ nú we é? Étɛ́ a ka ɖó ná nɔ flín?

¹⁶ Nɔ ɖó suúlu bo nɔ lɛ́ sɔ́ hwɛ kɛ mɛ. Nɔví súnnu kpó nɔví nyɔ̌nu kpó towe lɛ́ sixú wa nǔɖé lɛ́ nyi do hwenu e yě ɖo tíntɛ́nkpɔ́n wɛ bá dó wǔsyɛ́n lanmɛ nú we é. Ði kpɔ́ndéwú ɔ, yě sixú ɖɔ alǒ wa nǔɖé b’ɛ ná zɔ́n bɔ a ná lɛ́ se wǔvɛ́ d’é jí. Ényí nǔ mɔ̌hun jɛ hǔn, ɖǒ suúlu dó yě wú. (1 Kɔ. 13:4, 7) Gɔ́ ná ɔ, flín xó élɔ́ lɛ́ e ɖo Jaki 3:2 mɛ é: “Ényí mɛɖé ma nɔ wa nǔ nyi do ɖo xóɖiɖɔ mɛ ǎ ɔ, mɛ maɖóblɔ̌ wɛ é nyí.” Flín ɖɔ alɔ ba ná dó we wɛ nɔví súnnu kpó nɔví nyɔ̌nu kpó towe lɛ́ ɖe. Nɔ hɛn xó élɔ́ ayi mɛ: “Ayi gbɛtɔ́ tɔn ɖó jlǒ syɛ́nsyɛ́n, amɔ̌, agbaza ɖó gǎn ɖé ǎ.”—Mat. 26:41.

17. Étɛ́ mǐ ka ɖó ná kán ɖ’é jí bá wa?

¹⁷ Mǐ bǐ wɛ ɖó hudó gbɔdónúmɛ kpó wǔsyɛ́n dó lanmɛ nú mɛ kpó tɔn, bɔ ée azǎn gǔdo gúdo tɔn lɛ́ ná ɖo wǔ vɛ́ d’é jí wɛ, bɔ kɛntɔ́ Mawu tɔn lɛ́ ná lɛ́ ɖo gbe klán xá mǐ dó nǔjɔnǔ mɛ wɛ é ɔ, hudó énɛ́ ná lɛ́ jɛjí. Mi nú mǐ ní kán ɖ’é jí bo ná nɔ dó gbɔ nú mǐɖée lɛ́ hú gǎn.