15-21 JUIN 2026
HAN 122 Syɛ́nlǐn, bo lí dǒ!
Nɔ ɖó linlin e sɔgbe é dó wǔvɛ́ lɛ́ wú
“Aluwɛ kpó xɛsi kpó wá xwedó wǔ ce; amɔ̌, nǔ e a zɔ́n lɛ́ wiwa nɔ víví nú mì.”—ÐƐH. 119:143.
XÓNUSƆ́ÐÓTE
Linlin e sɔgbe é ɖíɖó dó wǔvɛ́ lɛ́ wú sixú d’alɔ mǐ bɔ mǐ ná ɖí xwi xá yě b’ɛ ná kpa mǐ.
1-2. Bo ná dó ɖí xwi xá wǔvɛ́ mǐtɔn lɛ́ bónú é ná kpa mǐ ɔ, étɛ́ mǐ ka ɖó ná wa? (Kpɔ́n ɖiɖe ɔ lɔmɔ̌.)
A ÐO xwi ɖí xá nǔagɔwaxámɛ, gbeklánxámɛ xwédo tɔn, alǒ yadónúmɛ wɛ, ɖó nǔ e a ɖi nǔ ná lɛ́ é wú wɛ a? A ɖo xwi ɖí xá azɔn, alǒ mɛxóxwe wɛ wɛ a? Kabǐ, awě xo we, bóyá, mɛvívɛ́ towe ɖé kú wɛ a? Lɛ̌ngbɔ́ xɔ akwɛ́ Jexóva tɔn lɛ́ gěgé ɖɔhun ɔ, é sixú nyí “tagba kpó ya kpó” wɛ gɔ́ gbɛzán towe mɛ.—Ðɛh. 90:10.
2 Bo ná dó ɖí xwi xá tagba lɛ́ bónú é ná kpa mǐ ɔ, mǐ ɖó ná ɖó linlin e sɔgbe é. Étɛ́wú énɛ́ ka ɖo tají? Nǔjlɛ́dónǔwú ɖé ɖíe: Tagba e a nɔ mɔ ɖo gbɛ mɛ lɛ́ é sixú cí awǒvinú e sixú wá xwetɔ́n hwenu e a ɖo ali jí xwe fí ɖé é ɖɔhun. Awǒvinú ɔ sixú zɔ́n bɔ a ná zɛ d’amyɔxwé, alǒ dó ɖisíxwé, wa dɛ̌dɛ̌, alǒ nɔ te nú hwenu ɖé. Amɔ̌, cóbónú a ná tuun nǔ e a ná wa é ɔ, a ɖó ná mɔ awǒvinú ɔ ganjí hwɛ̌. É sixú sín amǔ, alǒ babá e kɔn nyi wěkpɛ́n towe nukúnmɛ é wú bɔ a ná gɔn awǒvinú ɔ mɔ. Mɔ̌ ɖokpó ɔ, bo ná dó ɖí xwi xá wǔvɛ́ lɛ́ bónú é ná kpa mǐ ɔ, mǐ ɖó ná nɔ kpɔ́n yě lěe Jexóva nɔ kpɔ́n gbɔn é. Ðo xóta élɔ́ mɛ ɔ, mǐ ná gbéjé (1) ali ɖagbe e nu mǐ ná nɔ kpɔ́n wǔvɛ́ mǐtɔn lɛ́ ɖe é, (2) lěe linlin masɔgbe ɖíɖó dó ninɔmɛ mǐtɔn wú sixú wa nǔ dó mǐ wú gbɔn é kpó (3) afɔ e mǐ sixú ɖe bá dó kpo ɖo linlin e sɔgbe é ɖó wɛ hwenu e wǔvɛ́ ɖé wá xwetɔ́n é ɖé lɛ́ kpó kpɔ́n.
Mǐ ɖó ná ɖó linlin e sɔgbe é dó wǔvɛ́ mǐtɔn lɛ́ wú, bá dó ɖí xwi xá yě b’ɛ ná kpa mǐ (Kpɔ́n akpáxwé 2)
LINLIN E SƆGBE É ÐÍÐÓ DÓ WǓVƐ́ LƐ́ WÚ
3. Ényí gbɛ nyanya élɔ́ mɛ jɛ́n mǐ ɖe ɔ, étɛ́ mǐ ma ka sixú gbɛ́ ǎ?
3 Wǔvɛ́ lɛ́ sixú hán ɖo gbɛ nyanya élɔ́ mɛ ǎ. Ényí gbɛtɔ́ hwɛhutɔ́ nyí wɛ jɛ́n mǐ ɖe, bɔ Satáan ɖo acɛ kpa dó gbɛ ɔ jí wɛ ɔ, mǐ sixú gɔn wǔvɛ́ mɔ ǎ. Gɔ́ ná ɔ, ée gbɛ élɔ́ xwe vivɔnu é ɔ, mǐ tlɛ ná lɛ́ mɔ tagba lɛ́ hú gǎn; é sixú nyí adla e nɔ j’ayǐ ɖo jɔwámɔ linu lɛ́ é, alǒ ée gbɛtɔ́ nɔ zɔ́n bɔ yě nɔ j’ayǐ lɛ́ é, alǒ nǔ nyanya e gbɛtɔ́ lɛ́ nɔ wa é wú. (Mat. 24:8; 2 Tim. 3:13) Ényí Jexóva nɔ ɖe ɖɛ tagba mɔ̌hun lɛ́ bǐ din ɔ, é ná cí ɖɔ é ɖo alɔ dó Satáan wɛ, bónú é ná kpa acɛ dó gbɛ ɔ jí ɖɔhun. Ényí Satáan jɛ́n ɖo acɛ kpa dó gbɛ ɔ jí wɛ ɔ, mǐ ná gɔn wǔvɛ́ lɛ́ mɔ ǎ.—Nǔt. 9:12.
4. Wǔvɛ́ ɖěvo tɛ́ lɛ́ klisánwun lɛ́ ka nɔ mɔ?
4 Klisánwun lɛ́ nɔ lɛ́ mɔ wǔvɛ́ ɖěvo lɛ́. Jezu nɔ ɖɔ nú ahwanvú tɔn lɛ́ hwɛhwɛ ɖɔ è ná dó ya nú yě ɖó nǔɖiɖi yětɔn wú. (Mat. 24:9; Jaan 16:2) Énɛ́ tuuntuun nɔ d’alɔ mǐ bɔ nǔɖiɖi mǐtɔn sɔ́ nɔ xo ɖo wǔvɛ́ mɔ̌hun lɛ́ hwenu ǎ. (1 Tɛ. 3:3, 4) Ényí nǔɖiɖi ɖaxó e mǐ ɖó é zɔ́n bɔ mǐ dɛ ɖo wǔvɛ́ lɛ́ nu ɔ, mǐ sixú kú d’é jí ɖɔ mǐ kpo ɖo ali e nɔ kplá mɛ yi gbɛ mavɔmavɔ mɛ é jí. Gɔ́ ná ɔ, mǐ nɔ ɖe akpá e xwé mǐ ɖe ɖo Jexóva kpó Satáan kpó tɛ́ntin é xlɛ́. Satáan ɖɔ ɖɔ cejɛ́nnábí kɛ́ɖɛ́ wú wɛ gbɛtɔ́ lɛ́ ɖo Mawu sɛn wɛ. Bo ná dó ɖe xlɛ́ ɖɔ nǔgbó ɖɔ wɛ émí ɖe ɔ, é nɔ tɔ́n ahwan mɛsɛntɔ́ Jexóva tɔn lɛ́ dó nǔjɔnǔ mɛ. (Jɔb. 1:9-11) Ényí mǐ ɖo didɛ wɛ ɖó wǎn e mǐ yí nú Jexóva é wútu ɔ, xomɛ nɔ hun i.—Nǔx. 27:11.
5. Étɛ́ Nǔnywɛ́tɔ́xó 7:13, 14 ka sixú kplɔ́n mǐ? (Kpɔ́n ɖiɖe lɛ́ lɔmɔ̌.)
5 Jexóva nɔ tin bɔ è nɔ mɔ wǔvɛ́. Jexóva nɔ wa nǔ nyanya gbeɖé, alǒ sɔ́ nǔ nyanya dó tɛ́n mǐ kpɔ́n ná ǎ. (Ja. 1:13) É ɖo mɔ̌ có, axɔ́sú Salomɔ́ɔ wlán ɖɔ “awěxomɛzán” ɔ, “azɔ̌ Mawu nǔgbó ɔ tɔn” wɛ. (Xa Nǔnywɛ́tɔ́xó 7:13, 14.) É nyí ɖiɖɔ wɛ é ɖe ɖɔ Jexóva wɛ nɔ zɔ́n bɔ nǔ nyanya lɛ́ nɔ jɛ ǎ, loɔ, yě nɔ jɛ, ɖó é sú ali dó yě, bɔ yě gɔn jijɛ ǎ wútu wɛ. Salomɔ́ɔ ɖe wě ɖagbe ɖěɖěe sixú d’alɔ mǐ bɔ mǐ ná ɖó linlin e sɔgbe é dó tagba mǐtɔn lɛ́ wú é xá mǐ. Nukɔntɔn, mǐ ɖó ná ɖó linlin e ɖo jlɛ̌ jí é dó gbɛ ninɔ ɖo gbɛ Satáan tɔn mɛ wú. Azǎn ɖagbe lɛ́ ná wá, bɔ azǎn nyanya lɛ́ lɔ ná wá. Ényí azǎn ɖé nyí ɖagbe nú mǐ ɔ, mǐ sixú dó kú nú Jexóva, ɖó gɔ̌n tɔn wɛ nǔ ɖagbe bǐ nɔ gosín. Wegɔ́, Salomɔ́ɔ flín mǐ ɖɔ mǐ kún sixú tuun nǔ e ná jɛ ɖo sɔ é ó, énɛ́ wú ɔ, mǐ sixú tuun nú azǎn ɖé ná hɛn nǔ nyanya nu, alǒ hɛn nǔ ɖagbe wá nú mǐ ǎ, ɖó nǔmaɖónukún lɛ́ nɔ jɛ dó nǔjlɔ́jlɔ́watɔ́ kpó nǔagɔwatɔ́ kpó bǐ jí.
Mǐ ɖó ná nɔ jlɛ̌ jí, bo tuun ɖɔ gbɛ Satáan tɔn élɔ́ mɛ ɔ, azǎn ɖagbe lɛ́ kpó azǎn nyanya lɛ́ kpó ná wá ba jǒnɔ mǐ (Kpɔ́n akpáxwé 5)
6. Étɛ́wú Jexóva ka sixú tin bɔ mǐ mɔ mɛtɛ́nkpɔ́n lɛ́? (Eblée lɛ́ 12:7, 11)
6 Ényí mǐ nɔ ɖó linlin e sɔgbe é dó tagba mǐtɔn lɛ́ wú ɔ, mǐ ná mɔ ɖɔ nǔ kplɔ́n mǐ wɛ Jexóva ɖe bónú mǐ ná nɔ ɖeji dó wǔ tɔn, b’ɛ ná nɔ nyí dó mǐɖésúnɔ wú ǎ. Jexóva nɔ gɔn tagba mǐtɔn lɛ́ mɔ ǎ, wǔvɛ́ mǐtɔn lɛ́ ka nɔ lɛ́ gɔn ayi mɛ ɖu n’i ǎ. Ényí é ná bo tin bɔ mǐ “ɖo tɔdo mɛ gbɔn wɛ ɖo ablu gɔngɔn mɛ” ɔ, é nɔ kpo ɖo ali xlɛ́ mǐ wɛ, bo nɔ kpo ɖo jiɖe ná mǐ wɛ ɖɔ émí yí wǎn nú mǐ, bo ná lɛ́ kpo ɖo hlɔ̌nhlɔ́n e sín hudó mǐ ɖó bá dɛ é ná mǐ wɛ. (Ðɛh. 23:4) Wǔvɛ́ lɛ́ sixú lɛ́ d’alɔ mǐ bɔ mǐ ná ɖ’ayi gǎnmaɖó mǐtɔn lɛ́ wú, bɔ kpó alɔdó Mawu tɔn kpó ɔ, mǐ ná w’azɔ̌ ɖo mɛ alɔkpa e mǐ nyí é wú. (Xa Eblée lɛ́ 12:7, 11.) Ði kpɔ́ndéwú ɔ, Jɔbu ɖó ná w’azɔ̌ ɖo mɛɖéesɔ́hwe tɔn wú. Jexóva wɛ zɔ́n Jɔbu sín wǔvɛ́ ǎ; é ɖo mɔ̌ có, Jexóva tin dó, bo gbɔn yɛkan tɔn mɛ do kplɔ́n ɛ nǔ xɔ akwɛ́ lɛ́. (Jɔb. 42:1-6) É ɖo mɔ̌ có, ényí mǐ ná bo ɖo wǔvɛ́ ɖěbǔ mɛ ɔ, mǐ nɔ tuun ɖɔ tin e Jexóva tin é kún ná zɔ́n bónú é ná wa nǔ dó mǐ wú káká sɔ́yi ó. Ényí mǐ dɛ kpó gbejíninɔ kpó ɖo tagba lɛ́ nu ɔ, mǐ nɔ xo yě zlɛ́ “mlɛ́mlɛ́ kpó ɖuɖéjí kpó.”—Hlɔ̌. 8:35-39.
7. Ényí è ná bo ɖo ya dó nú we wɛ ɖó nǔɖiɖi towe wú ɔ, étɛ́wú a ka sixú ɖ’awǎjijɛ?
7 È ná bo ɖo ya dó nú mǐ wɛ ɔ, mǐ hɛn ɔ, mǐ ná ɖó awǎjijɛ. Ényí è ɖo ya dó nú we wɛ ɖó nǔɖiɖi towe wú hǔn, ma lin ɖɔ Jexóva kún sɔ́ ɖo nyɔ̌ná kɔn dó jǐ émítɔn wɛ ó ó. É nyɔ́ wa ɔ, gbeklánxámɛ mɔ̌hun nɔ xlɛ́ ɖɔ nǔ towe nyɔ́ nukún tɔn mɛ. (Mat. 5:10-12) Ényí a nɔ ɖó linlin ɖagbe ɔ, a sixú ɖ’awǎjijɛ, bo lɛ́ kpo ɖo wi ɖó ɖo ta wɛ hwenu e è ɖo ya dó nú we wɛ ɖó klisánwun e a nyí é wútu é, lěe é nyí gbɔn nú mɛsɛ́dó lɛ́ é ɖɔhun. (Mɛ. 5:40-42) Gɔ́ ná ɔ, a sixú d’alɔ mɛ e ma nyí Kúnnuɖetɔ́ ǎ lɛ́ é bɔ yě ná kplɔ́n nǔgbó ɔ, bo “kpa susu nú Mawu.” (1 Pi. 2:12) Jozɛ́fu ɖɔhun ɔ, a sixú mɔ nǔ e wa wɛ a ɖe lɛ́ é sín nu, é ná bo tlɛ nyí hwenu e tagba ɔ kpo ɖo ayǐ é ɔ nɛ́.—Bǐb. 39:3, 23.
8. Étɛ́ ka sixú lɛ́ dó wǔsyɛ́n lanmɛ nú mǐ bɔ mǐ ná dɛ ɖo mɛtɛ́nkpɔ́n lɛ́ nu?
8 Mɛtɛ́nkpɔ́n mǐtɔn lɛ́ ná wá vivɔnu. Nǔ e xá Jɔbu é nɔ flín mǐ ɖɔ mɛtɛ́nkpɔ́n mǐtɔn lɛ́ ná wá wá vivɔnu. Nǔgbó ɔ, ‘ɖagbe e Jexóva wa nú Jɔbu xwe e wá wá lɛ́ é mɛ lɛ́ é hú ée é wa n’i ɖ’ayǐ lɛ́’ é. (Jɔb. 42:12) Mɔ̌ ɖokpó ɔ, Jexóva ná kɔn nyɔ̌ná dó mǐ jí ɖo gbɛ yɔ̌yɔ́ ɔ mɛ ɖo ali jí wǔ nu. Gbɛzán mǐtɔn din tɔn e wǔvɛ́ sixú ko gɔ́ é sɔ nǔtí ɖo gbɛ mavɔmavɔ e sín vǐví mǐ ná ɖu ɖo sɔgúdo é kpá ǎ. Énɛ́ dó wǔsyɛ́n lanmɛ nú mǐ mɛ ɖokpó ɖokpó bɔ mǐ ná dɛ káká jɛ vivɔnu ǎ cé?—Mat. 24:13.
LĚE LINLIN MASƆGBE ÐÍÐÓ SIXÚ WA NǓ DÓ MǏ WÚ GBƆN É
9. Nɛ̌ linlin masɔgbe ɖíɖó dó tagba mǐtɔn lɛ́ wú ka sixú wa nǔ dó mǐ wú gbɔn?
9 Mǐ ná bo ɖo tagba ɖěbǔ ɖí xwi xá wɛ ɔ, mǐ ɖó ná ɖó linlin ɖagbe, bo ma wá dɔn tagba ɖěvo lɛ́ dó kɔ ó. Ði kpɔ́ndéwú ɔ, mǐ sixú lin ɖɔ Jexóva wú wɛ wǔvɛ́ mǐtɔn sín. Nú hwenu ɖé ɔ, Jɔbu mɔ ɖɔ Jexóva wú wɛ wǔvɛ́ émítɔn lɛ́ sín, bɔ linlin masɔgbe énɛ́ zɔ́n bɔ é tɛ́n kpɔ́n bo ba hwɛjijɔ nú éɖée, é nyí nú Mawu ǎ. (Jɔb. 32:2) Mɔ̌ ɖokpó ɔ, Nɔemíi dó hwɛ Jexóva ɖo bǐbɛ́mɛ ɖó adǎn e gbo è lɛ́ é wú. (Hwli. 1:13, 20, 21) Ényí Jɔbu kpó Nɔemíi kpó ma ko jó linlin masɔgbe mɔ̌hun lɛ́ dó wɛ ǎ ɔ, yě ná ko wa nǔ dó xɔ́ntɔn e yě zun xá Jexóva é wú. (Nǔx. 19:3) É ɖo mɔ̌ có, Jexóva d’alɔ yě bɔ yě lɛ́vɔ́ wá ɖó linlin e sɔgbe é dó tagba yětɔn lɛ́ wú, bɔ wǎgbɔ tɔn ɔ, é kɔn nyɔ̌ná dó yě jí ɖó gbejíninɔ yětɔn wú.
10. Ényí mǐ ɖo tagba lɛ́ ɖí xwi xá wɛ ɔ, étɛ́ mǐ ka sixú jɛ kinkanbyɔ́ mǐɖée jí?
10 Ényí mǐ ná bo kú d’é jí ɖɔ é kún nyí Jexóva wú wɛ tagba mǐtɔn lɛ́ sín ó ɔ, mǐ sixú jɛ kinkanbyɔ́ mǐɖée ɖɔ nǔ mǐtɔn ka kpo ɖo ayi mɛ ɖu n’i wɛ a jí. Linlin masɔgbe mɔ̌hun sixú vɔ gǎn nú mǐ. (Nǔx. 24:10) Axɔ́sú Davídi kpó gbeyíɖɔ Xabakúku kpó bǐ wɛ mɔ tagba lɛ́, bɔ hweɖélɛ́nu ɔ, yě kanbyɔ́ yěɖée ɖɔ Jexóva ka ɖo tó ɖó xó e sú dó byɔ́ alɔdó wɛ émí ɖe é a jí. (Ðɛh. 10:1; Xab. 1:2) É ɖo mɔ̌ có, yě gɔn ɖɛ xo ǎ. Jexóva ná gǎnjɛwú súnnu gbejínɔtɔ́ énɛ́ lɛ́ ɖɔ émí ɖo gǔdo nú yě; é ná wa nǔ ɖokpó ɔ nú hwi lɔ.—Ðɛh. 10:17.
11. Ényí mǐ ma nɔ ɖó linlin e sɔgbe é dó tagba lɛ́ wú ǎ ɔ, étɛ́ ka sixú xá mǐ?
11 Ényí mǐ ma nɔ ɖó linlin e sɔgbe é dó tagba lɛ́ wú ǎ ɔ, yě sixú wá fyán mǐ, bɔ mǐ sixú lin ɖɔ nǔ mɔ̌hun lɛ́ kún ɖó ná jɛ dó mǐ jí ó. (1 Pi. 4:12) É vɛ́ wǔ nú ahwanvú Jezu tɔn lɛ́ bónú yě ná yí gbe nú ɖɔ e é ɖɔ ɖɔ è ná dó ya nú émí syɛ́nsyɛ́n é. (Luk. 18:33, 34) Jezu ko ɖɔ nǔ e ɖo te kpɔ́n ɛ é nyi wɛn có, mɛsɛ́dó Piyɛ́ɛ ka ɖɔ n’i ɖɔ Mawu ní ma lɔn bónú nǔ mɔ̌hunkɔtɔn xá ɛ ó. Jezu tuun ɖɔ linlin mɔ̌hun sixú zɔ́n bɔ émí ná gɔn jlǒ Jexóva tɔn wa, énɛ́ wú ɔ, é gbɛ́ nǔ nú Piyɛ́ɛ. (Mak. 8:31-33) Gɔ́ ná ɔ, Jezu tlɛ ko kú có, nukúnnú mimɔ jɛ nǔ énɛ́ lɛ́ e jɛ é mɛ kpo ɖo wǔ vɛ́ nú ahwanvú tɔn lɛ́ wɛ. É ɖo mɔ̌ có, Jezu ka jó gbe dó yě wú ǎ. Ðo fínfɔ́n sín kú tɔn gúdo ɔ, é d’alɔ yě bónú yě ná ɖó linlin e sɔgbe é dó wǔvɛ́ e é se lɛ́ é wú gbɔn ‘Nǔwlánwlán mímɛ́ lɛ́ tíntínmɛ nú yě’ gblamɛ. (Luk. 24:25-27, 32, 44-48) Tamɛ linlin dó nǔ e Jezu ɖo kplɔ́nkplɔ́n yě wɛ é jí ná d’alɔ yě bɔ yě ná ɖo gbesisɔmɛ nú gbe e è ná klán xá yě ɖo malínmálín mɛ ɖó ahwanvú tɔn lɛ́ e yě nyí é wú é. Nǔgbó Biblu tɔn lɛ́ gbígbéjé kpɔ́n sixú d’alɔ mǐ lɔmɔ̌ bɔ mǐ ná ɖo gbesisɔmɛ nú mɛtɛ́nkpɔ́n lɛ́.
12. Nɛ̌ linlin masɔgbe ɖíɖó dó ninɔmɛ mǐtɔn wú ka sixú zɔ́n bɔ nǔ cí nú mǐ?
12 Ényí mǐ nɔ ɖó linlin masɔgbe dó ninɔmɛ mǐtɔn wú ɔ, é sixú cí nú mǐ ɖɔ ninɔmɛ mǐtɔn nylá hú lěe é ɖe gbɔn tawun é ɖɔhun. Jezu ɖe lěe nǔ mɔ̌hun sixú jɛ gbɔn é xlɛ́ ɖo nǔjlɛ́dónǔwú tɔn e ɖɔ xó dó mɛ ɖěɖěe w’azɔ̌ ɖo vǐwungbo mɛ lɛ́ é wú é mɛ. Azɔ̌watɔ́ ɖé lɛ́ jɛ nǔ húnhún ɖɔ jí, ɖó yě lin ɖɔ azɔ̌kwɛ́ e émí yí é kún kpé ó, amɔ̌, gǎn ɔ ɖɔ nú yě mɛ ɖokpó ɖɔ: “Xɔ́ntɔn, un jɛ agɔ ɖě dó we ǎ.” (Mat. 20:10-13) É nyí nǔ agɔ wɛ è wa xá yě wú wɛ yě ɖo nǔ húnhún ɖɔ wɛ ǎ, loɔ, nǔ e ɖó nukún wɛ yě ɖe bɔ é ma sɔgbe ǎ é wú wɛ é sín. Ðo égbé ɔ, Kúnnuɖetɔ́ ɖé lɛ́ ɖó ná ɖí xwi xá linlin mɔ̌hun lɛ́. Ði kpɔ́ndéwú ɔ, hwenu e yě ɖo nukún ɖó wǔjɔmɛzɔ́ sinsɛnzɔ́ tɔn ɖé wɛ bo ma ka ɖo mimɔ wɛ ǎ é, alǒ hwenu e yě ɖó ná jó dó é. Nǔ tawun tawun tɛ́ lɛ́ a ka sixú wa bá dó ɖó linlin e sɔgbe é dó ninɔmɛ syɛ́nsyɛ́n ɖé wú?
AFƆ ÐĚÐĚE MǏ SIXÚ ÐE HWENU E TAGBA LƐ́ WÁ XWETƆ́N É
13. Ényí wǔvɛ́ lɛ́ wá xwetɔ́n ɔ, étɛ́ ka sixú jɛ?
13 A sixú ko tuun wěmafɔ ɖěɖěe ɖɔ xó dó wǔvɛ́ mimɔ wú é ɖé lɛ́. A tlɛ sixú ko má yě xá mɛ ɖěvo lɛ́ hwenu e yě ɖo tagba lɛ́ mɛ é. Amɔ̌, ényí wǔvɛ́ lɛ́ wá ba jǒnɔ hwiɖésú ɔ, é sixú vɛ́ wǔ nú we bɔ a ná kpo ɖo linlin e sɔgbe é ɖó wɛ. Ði kpɔ́ndéwú ɔ, a sixú lin ɖɔ Jexóva wɛ ɖo tó dɔn nú émí wɛ, alǒ é kun nɔ ɖótó ɖɛ émítɔn lɛ́ ó. Afɔ tɛ́ lɛ́ a ka sixú ɖe bá dó kpo ɖo linlin e sɔgbe é ɖó wɛ?
14. Étɛ́ lɛ́ takúnmɛ a ka sixú xo ɖɛ dó hwenu e a ɖo wǔvɛ́ mɔ wɛ é? (Filípunu lɛ́ 4:13)
14 Byɔ̌ Jexóva ɖɔ é ní d’alɔ émí. Ðɔ wǔvɛ́ e mɔ wɛ a ɖe é kpó lěe wa nǔ dó wǔ we gbɔn wɛ é ɖe é kpó nú Jexóva. A sixú xo ɖɛ bo ɖɔ lěe a ba ɖɔ Jexóva ní d’alɔ we gbɔn tawun é n’i. A sixú byɔ́ ɛ gbigbɔ mímɛ́ tɔn nú é ná ná we hlɔ̌nhlɔ́n kpó nǔnywɛ́ kpó e sín hudó a ɖó bá dɛ é. Amɔ̌, flín ɖɔ Jexóva sixú ná sin nú ɖɛ towe ɖo ali e nu a ma ɖó nukún tɔn ɖe ǎ é. (Efɛ́. 3:20) É sixú lɛ́ zán wɛnsagun lɛ́, alǒ nɔví súnnu kpó nɔví nyɔ̌nu kpó towe lɛ́ dó d’alɔ we. (Ðɛh. 34:8) Énɛ́ wú ɔ, yǐ gbe nú ali ɖěbǔ e nu Jexóva ná d’alɔ we ɖe é. É nɔ hun alɔ dó ná gbigbɔ mímɛ́ tɔn mɛ, b’ɛ sixú d’alɔ we bɔ a ná ɖu ɖo tagba ɖěbǔ jí.—Xa Filípunu lɛ́ 4:13.
15. Étɛ́ lɛ́ wiwa ka ná d’alɔ we bɔ a ná dɛ ɖo wǔvɛ́ lɛ́ nu? (Kpɔ́n ɖiɖe ɔ lɔmɔ̌.)
15 Kpo ɖo nǔ e a ko nɔ wa ɖo gbigbɔ lixo lɛ́ é wa wɛ. Ényí a ma tlɛ sɔ́ kpé wú bo ná nɔ wa nǔ e a ko nɔ wa ɖ’ayǐ lɛ́ é ǎ hǔn, nɔ wa éé wú a kpé é. A ɖó ná bɛ́ linlin Mawu tɔn lɛ́ gɔ́ ayi towe mɛ, ɖo tají ɔ, ɖo “aluwɛ kpó xɛsi kpó” hwenu. (Ðɛh. 119:143) Nɔ xa Biblu gbe bǐ gbe, nɔ kplɔ́n, bo nɔ lɛ́ lin tamɛ d’é jí. Nɔ ɖ’alɔ ɖo sinsɛnzɔ́ ɔ mɛ lěe a kpé wú gbɔn é, nɔ yi kplé lɛ́, bo nɔ lɛ́ ɖ’alɔ ɖo yě mɛ. Nɔ zán hwenu ɖó kpɔ́ xá nɔví súnnu kpó nɔví nyɔ̌nu kpó towe lɛ́. Ma lɔn bo nɔ nɔ hwiɖokpó ó.—Nǔx. 18:1.
Wa nǔ e wú a kpé é bo kpo ɖo nǔ e a nɔ wa dó sɛn Mawu lɛ́ é wa wɛ (Kpɔ́n akpáxwé 15)
16. Étɛ́ lɛ́ wú a ka sixú xo nǔ kpɔ́n dó hwenu e tagba lɛ́ wá xwetɔ́n é? Nɛ̌ a ka sixú ɖe ɖɛ nǔxokpɔ́n énɛ́ lɛ́ gbɔn? (2 Kɔlɛ́ntinu lɛ́ 10:4, 5)
16 Ðu ɖo nǔxokpɔ́n towe lɛ́ jí. Ényí wǔvɛ́ lɛ́ wá xwetɔ́n ɔ, é sixú byɔ́ ɖɔ a ní ɖu ɖo linlin e cí “ahohó” ɖɔhun lɛ́ é jí, káká jɛ nǔ xixo kpɔ́n dó hwiɖésúnɔ, alǒ Jexóva wú jí. (Xa 2 Kɔlɛ́ntinu lɛ́ 10:4, 5.) A sixú zán Biblu kpó wěma tutoblónúnǔ ɔ tɔn lɛ́ kpó dó tuun linlin e Jexóva ɖó tawun é. Ði kpɔ́ndéwú ɔ, a nɔ kanbyɔ́ hwiɖée ɖɔ nǔ émítɔn ka kpo ɖo Jexóva nukúnmɛ nyɔ́ wɛ a jí wɛ a? Ényí mɔ̌ hǔn, kplɔ́n nǔ dó mɛsɛ́dó Pɔ́lu wú. Ðo sinsɛnzɔ́ tɔn hwenu ɔ, é gbɔn ninɔmɛ syɛ́nsyɛ́n gěgé mɛ, amɔ̌, blǒ wɛ nǔ énɛ́ lɛ́ lɛ́ bló bɔ kú e é kú d’é jí ɖɔ sinsɛnzɔ́watɔ́ Klísu tɔn e è yí wǎn ná é wɛ émí nyí é lɛ́ jɛjí. (2 Kɔ. 11:23-27) A ka nɔ kanbyɔ́ hwiɖée ɖɔ Jexóva ka sɔ́ hwɛ e émí hu wá yi lɛ́ é kɛ émí dóó a jí wɛ a? Ényí mɔ̌ hǔn, sɔ́ kɛ́n wěmafɔ ɖěɖěe xlɛ́ ɖɔ Jexóva nɔ sɔ́ hwɛ kɛ mɛ lɛ́ é tɔn. (Eza. 43:25) Énɛ́ gúdo hǔn, nɔ xa wěmafɔ énɛ́ lɛ́ bo nɔ lin tamɛ dó yě jí. (Ðɛh. 119:97) Awě ɖé xo we b’ɛ sín énɛ́ wú bɔ a nɔ xo nǔ kpɔ́n dó akpá e Mawu dó ɖɔ émí ná nɔ nya xɛ mɛsɛntɔ́ émítɔn gbejínɔtɔ́ lɛ́ jí é wú wɛ a? Ényí mɔ̌ hǔn, ba xóta ɖěɖěe ɖɔ xó dó nǔ e wú Mawu nɔ tin bɔ mǐ nɔ se wǔvɛ́ é kpó lěe é nɔ nya xɛ ɖo mǐ jí ɖo gbigbɔ lixo ɖo ninɔmɛ lɛ́ bǐ mɛ gbɔn é kpó wú é. (Ðɛh. 91:9-12) Lɛ̌ xa tan nɔví súnnu kpó nɔví nyɔ̌nu kpó ɖěɖěe ɖí xwi xá awěxomɛ b’ɛ kpa yě lɛ́ é tɔn.a
17. Étɛ́ mǐ ka ɖó ná wa ɖo wǔvɛ́ hwenu?
17 Bóyá a ɖo tagba syɛ́nsyɛ́n ɖé ɖí xwi xá wɛ din ǎ. Ényí mɔ̌ hǔn, dǒ kú nú Jexóva bo zán ali e hun nú we lɛ́ é ganjí dó lin tamɛ dó ɖagbe e é nɔ wa nú we lɛ́ é jí. (Nǔt. 7:14) Amɔ̌, ényí tagba lɛ́ wá xwetɔ́n hǔn, kpo ɖo linlin ɖagbe ɖó wɛ, bo ma lɔn nú jiɖe e a ɖó dó Jexóva wú é ní sɛ do ó. Ényí a wa mɔ̌ ɔ, Jexóva ná ‘ɖe ali e a ná gbɔn bo tɔ́n sín mɛ é, bónú a ná dó sixú kpé wú bo dɛ ɖ’é nu.’ (1 Kɔ. 10:13) Nɛ̌ mǐ ka sixú d’alɔ nɔví súnnu kpó nɔví nyɔ̌nu kpó mǐtɔn lɛ́ hwenu e yě ɖo wǔvɛ́ mɛ é gbɔn? Nǔ e jí xóta e bɔ d’é wú é ná ɖɔ xó dó é nɛ́.
HAN 150 Ba Mawu bá mɔ hwlɛngán
a Ði kpɔ́ndéwú ɔ, tan gbɛzán tɔn “Whẹndo de Jẹflumẹ, Amọ́ Yé Wá Do Ayajẹ to Godo Mẹ” éé tɔ́n ɖo jw.org jí é kpi lěe nɔví súnnu David Maza kpó xwédo tɔn kpó ɖí xwi xá vǐ súnnu yětɔn sín kú e wa nǔ dó yě wú tawun é tɔn gbɔn é sín tan.