Linlin Biblu Tɔn Dó Asigbigbɛ Abǐ Asugbigbɛ kpo Kínklán kpo Wu

Jehovah nɔ ɖó nukún ɖɔ mɛ e wlí alɔ lɛ é ni nɔ gbeji nú alɔwliwli sín akpá e ye dó é. Hwenu e Jehovah wlí alɔ nú sunnu kpo nyɔnu kpo nukɔntɔn ɔ é ɔ, é ɖɔ: “Sunnu na . . . jɛ kpɔ́ xá asì tɔn, bɔ ye mɛ wè lɛ na huzu ɖokpo géé.” Nukɔn mɛ ɔ, Jezu Klisu lɛ́ vɔ́ xó enɛ ɖɔ bo ɖɔ gɔ́ na ɖɔ: “Enyi mɔ̌ hǔn, gbɛtɔ́ ni bo ma klán nǔ e Mawu dɔn cá ɔ ó.” (Bǐbɛ̌mɛ 2:24; Matie 19:3-6) Enɛ wu ɔ, Jehovah kpo Jezu kpo nɔ kpɔ́n alɔwliwli dó mɔ kancica e na nɔ ayǐ kaka jɛ hwenu e mɛ e wlí alɔ lɛ é ɖokpo na kú é. (1 Kɔlɛntinu lɛ 7:39) Ðó alɔwliwli nyí nǔ mímɛ́ ɖé wutu ɔ, è ɖó na sɔ́ nukún vlɛkɛsɛ́ɛ ɖé dó kpɔ́n asugbigbɛ abǐ asigbigbɛ na ǎ. Nugbǒ ɔ, Jehovah gbɛ́ wǎn nú asugbigbɛ abǐ asigbigbɛ e ma junjɔn Biblu jí ǎ lɛ é.​—Malacíi 2:15, 16.

Etɛ ka nyí dodonú Biblu tɔn nú asugbigbɛ abǐ asigbigbɛ? É ɖò wɛn ɖɔ Jehovah gbɛ́ wǎn nú nyɔnu ɖevo biba alǒ afɔdogbě kpo agalilɛ kpo. (Bǐbɛ̌mɛ 39:9; 2 Samuwɛli 11:26, 27; Ðɛhan 51:6) Nugbǒ ɔ, é nɔ kpɔ́n agalilɛ dó mɔ nǔ nyanya na sɔmɔ̌ b’ɛ sín enɛ wu bɔ é ɖɔ ɖɔ é wɛ nyí dodonú nú asugbigbɛ abǐ asigbigbɛ. (Nú a na mɔ tinmɛ dó nǔ e agalilɛ nyí é jí hǔn, kpɔ́n Wemata 9gɔ́ ɔ sín akpáxwé 7gɔ́ ɔ.) Jehovah na acɛ asú alǒ asì xomɛvɔnɔ ɔ ɖɔ é vo bo na gbɛ́ mɛ e é da é alǒ gbɔ. (Matie 19:9) Enɛ wu ɔ, enyi xomɛvɔnɔ ɔ ba na gbɛ́ asú alǒ asì ɔ, é nyí afɔ e Jehovah gbɛ́ wǎn na é wɛ é jló na ɖè ǎ. É ɖò mɔ̌ có, ɖò hwe ɖokpo ɔ nu ɔ, agun Klisanwun tɔn nɔ dó wusyɛn lanmɛ nú mɛɖebǔ ɖɔ é ni gbɛ́ asú alǒ gbɛ́ asì ǎ. Ninɔmɛ ɖé lɛ sixu sísɛ́ xomɛvɔnɔ ɔ bɔ é gbɔ asú alǒ asì gbɛ́, ɖò taji ɔ, hwenu e mɛ e dó nǔ ɔ sìn é lɛkɔ sín hwɛ tɔn gudo nugbǒ nugbǒ é. Amɔ̌ lóò, mɛ ɖěɖee ɖó hwɛjijɔ e junjɔn Biblu jí bo kúnkplá asugbigbɛ alǒ asigbigbɛ é ɖesunɔ wɛ na wá gbeta ɖokpo kɔn bo ka na lɛ́ ɖò gbesisɔmɛ bo na hɛn nǔ e é sixu jì lɛ é sín agban.​—Galatinu lɛ 6:5.

Ðò ninɔmɛ syɛnsyɛn ɖé lɛ mɛ ɔ, Klisanwun e wlí alɔ é ɖé lɛ ko klán alǒ gbɛ́ mɛ e ye da é é cobɔ é ka sín agalilɛ wu ǎ. Ðò ninɔmɛ mɔhun mɛ ɔ, Biblu byɔ ɖò mɛ e wà mɔ̌ é sí ɖɔ é “ni ma sɔ́ vɔ́ asú [alǒ asì] ɖevo da ó.” (1 Kɔlɛntinu lɛ 7:11) Klisanwun mɔhun ko vo bo na wlí alɔ xá mɛ ɖevo ǎ. (Matie 5:32) Mǐ ni ɖɔ xó dó ninɔmɛ syɛnsyɛn e mɛɖé lɛ mɔ ɖɔ ye nyí dodonú nú kínklán é klewun ɖé jí.

Jlǒ sísɔ́ dó gbɛ́ ɖɔ è kún na kpé nukún dó xwédo mɛtɔn wu ó. Xwédo ɖé sixu jɛ hɛ̌n bo ba dandannú gbɛmɛ tɔn lɛ kpò, ɖó asú ɔ ɖó nǔwukpikpé bo na kpé nukún dó xwédo tɔn wu bo ka gbɛ́ mɔ̌ wà wutu. Biblu ɖɔ: “Enyi mɛɖé ma nɔ kpé nukún dó . . . mɛ e ɖò hɛ̌n tɔn nu lɛ wu ǎ ɔ, mɛ enɛ ɔ gbɛ́ nùɖiɖi, lobo nyla hú nùmaɖitɔ́.” (1 Timɔtée 5:8) Enyi mɛ mɔhun gbɛ́ jijɔ huzu ɔ, asì ɔ sixu wá gbeta ɔ kɔn ɖɔ emi na klán sɔgbe xá sɛ́n bo na mɔ tɛn dó cyɔn alɔ ganjininɔ emi kpo vǐ emitɔn lɛ kpo tɔn jí. É ɖò gaàn ɖɔ mɛxo agun tɔn lɛ ɖó na ba dò na ganji ɖɔ hwɛ e dó Klisanwun ɖé wɛ è ɖè ɖɔ é gbɛ́ ɖɔ emi kún na kpé nukún dó xwédo emitɔn wu ó é ka nyí nugbǒ à jí. Enyi mɛɖé gbɛ́ ɖɔ emi kún na kpé nukún dó xwédo emitɔn wu ó ɔ, è sixu ɖè é sín agun mɛ.

Adakaxomɛwu zɛ xwé wu. Asú alǒ asì adakaxotɔ́ ɖé sixu nɔ xò adaka mɛ e é da é wu kaka bɔ lanmɛ na nɔ ganji tɔn kpo gbɛ̀ tɔn kpo na ɖò axɔ nú. Enyi asú alǒ asì adakaxotɔ́ ɔ nyí Klisanwun ɖé ɔ, mɛxo agun tɔn lɛ ɖó na ba dò na ganji ɖɔ nugbǒ alǒ adingban wɛ à jí. Xomɛ sìnsìn zɛ xwé wu kpo adakaxomɛwu sísɔ́ dó ɖó aca kpo ɖò hwɛjijɔ e wu è na ɖè mɛ sín agun mɛ lɛ é mɛ.​—Galatinu lɛ 5:19-21.

Hwenu e Jehovah sinsɛn wá vɛwǔ bǐ é. Asú alǒ asì ɖé sixu nɔ tɛnkpɔn hwɛhwɛ bo na sú Mawu sínsɛ́n sín ali dó mɛ e é da é é alǒ tlɛ sixu nɔ tɛnkpɔn bo na hɛn ɛ gannugánnú b’ɛ na gbà sɛ́n Mawu tɔn lɛ ɖò ali ɖé lɛ nu. Ðò ninɔmɛ mɔhun lɛ mɛ ɔ, mɛ e Jehovah sinsɛn wá vɛwǔ na bǐ é sixu mɔ ɖɔ ali ɖokpo e nu emi na ‘setónú nú Mawu hú gbɛtɔ́’ ɖè é wɛ nyí ɖɔ emi ni klán sɔgbe xá sɛ́n.​—Mɛsɛ́dó 5:29.

Ðò ninɔmɛ syɛnsyɛn e jí mǐ ɖɔ xó dó dìn lɛ é kpo ɖevo lɛ bǐ kpo mɛ ɔ, mɛɖebǔ ɖó na zín asú alǒ asì xomɛvɔnɔ ɔ jí ɖɔ é ni klán alǒ nɔ kpɔ́ kpo mɛ e é da é kpo ǎ. Nugbǒ wɛ ɖɔ Klisanwun e ko zin lɛ é alǒ mɛxo agun tɔn lɛ sixu d’alɔ asú kpo asì kpo lɛ bo lɛ́ ɖè wě e junjɔn Biblu jí lɛ é xá ye, amɔ̌, ye sixu tuùn nǔ e ɖò jijɛ wɛ ɖò tɛntin yetɔn lɛ é bǐ ǎ. Jehovah kɛɖɛ wɛ sixu tuùn. É ɖò gaàn ɖɔ enyi asì alǒ asú Klisanwun ɖé dó sìn tagba e kpé wɛ é ɖè ɖò xɔsa lɛ é jí bo na mɔ tɛn dó klán ɔ, é ɖò Mawu alǒ tuto alɔwliwli tɔn sɔ́ sù wɛ ǎ nɛ. Jehovah tuùn ayi winniwinni ɖebǔ e kàn wɛ mɛɖé ɖè bo na klán lɛ é bǐ, enyi mɛ ɔ na bo sɔ́ hwla gbɔn ɖebǔ ɔ nɛ. Nugbǒ ɔ, “nǔ lɛ bǐ wɛ é nɔ mɔ ɖò mɛ̌, bo nɔ mɔ ye ɖò wěxo; é wɛ mǐ bǐ ɖó na ɖó gbè na.” (Eblée lɛ 4:13) Amɔ̌, enyi ninɔmɛ syɛnsyɛn ɖé kpa zinkpo bo gbɛ́ te sí bonu Klisanwun ɖé gbɔ bo klán ɔ, mɛɖebǔ ɖó na mɔ xó ɖɔ dó wǔ tɔn ǎ. Amɔ̌ lóò, “mɛ ɖokpo ɖokpo na ɖó nǔ e éɖesunɔ wà ɔ sín gbè nú Mawu.”​—Hlɔmanu lɛ 14:10-12.