Sinsɛngán ɔ Mɔ Xósin Lɛ

Eliso e nyí Kúnnuɖetɔ́ Jehovah tɔn ɖé é ɖò Biblu kplɔ́n xá nawe jlǒɖotɔ́ ɖé wɛ ɖò xwé tɔn gbè gbè ɖokpo, bɔ jonɔ maɖónukún we wá nawe ɔ gɔ́n. Sinsɛngán ɖé kpo asì tɔn kpo wɛ xwetɔ́n ɖò hɔnli ɔ nu. Eliso sè ɖɔ asú kpo asì kpo enɛ sín vǐ sunnu kwín ɖokpo ɔ kú é ɔ, é kún lín ó.

Hwenu e Eliso ɖò lee nǔ ɔ vɛ́ n’i sɔ́ é ɖɔ nú ye wɛ é ɔ, sinsɛngán ɔ kpo asì tɔn kpo jɛ avǐ ya jí hohoho. Sinsɛngán ɔ wá ɖɔ kpo xomɛsin kpo ɖɔ: “Un tuùn nǔ e wu Mawu tin bɔ adǎn mɔhun gbò mì é ǎ! Nɛ̌ é ka sixu yí vǐ sunnu ce kwín ɖokpo ɔ sín así ce gbɔn? Un ko ɖò Mawu sɛn wɛ sín xwè 28 ɖíe, un ɖò nǔ ɖagbe gegě wà wɛ, lee é ka wá s’axɔ́ mì gbɔn é nɛ! Etɛwu Mawu ka hu vǐ sunnu ce?”

Eliso tinmɛ nú asú kpo asì kpo ɔ ɖɔ Mawu kún hu vǐ sunnu yetɔn ɖě ó. É lɛ́ ɖɔ xó xá ye dó xóta lěhun lɛ jí: gbɛxixɔ ɔ, fínfɔ́n sín kú, kpo hwɛjijɔ e wu Mawu tin bɔ nǔ nyanya lɛ tíìn lɛ é kpo. Sinsɛngán ɔ kpo asì tɔn kpo ɖɔ nú Eliso ɖɔ nǔ e tamɛ emi xoɖɛ dó lɛ é sín xósin wɛ é na emi.

Ðò aklunɔzán gbla e bɔ d’ewu é mɛ ɔ, sinsɛngán ɔ kpo asì tɔn kpo lɛkɔ wá, bo nɔ kpɔ́ xá nawe ɔ ɖò Biblu kplɔnkplɔn ɔ hwenu. Eliso kpo nawe ɔ kpo ɖò nǔ kplɔ́n wɛ ɖò wema Etɛ Biblu ka Kplɔ́n Mɛ Tawun? mɛ ɖò wemata “Nukúnɖiɖó Jɔ Nukúnɖiɖó nú Mɛvívɛ́ Towe E Kú lɛ É” mɛ. Asú kpo asì kpo ɔ ɖ’alɔ ɖò xóɖɔɖókpɔ́ ɔ mɛ kpo akpakpa sɔ́ mɛ kpo.

Ye mɛ we lɛ bǐ wɛ wá yì kpléɖókpɔ́ bǔnɔ Kúnnuɖetɔ́ Jehovah tɔn lɛ tɔn ɖò Tbilisi ɖò Géorgie, bɔ wanyiyi adodwé kpo bǔninɔ kpo e wu ye ɖ’ayi é jiwǔ nú ye tawun; ye ko tɛ́n kpɔ́n kaka bonu mɛ e ɖò amǐsa yetɔn mɛ lɛ é na ɖó jijɔ mɔhun lɛ có, é ka kpa ye ǎ.