Kpan akɔ́n, bo lɛ́ nɔ gbejí Benayáhu ɖɔhun

Ahwanfuntɔ́ alɔsekpɛ́nnánɔ wɛ Benayáhu nyí, bo wa azɔ̌ ɖo axɔ́sú Davídi glɔ́, bo lɛ́ wa ɖo axɔ́sú Salomɔ́ɔ glɔ́. Vɔ̌sánúxwlémawutɔ́ sín vǐ wɛ Benayáhu nyí, bɔ nǔ ɖo ganjí wɛ nyí ɔ, é ɖó ná fun ahwan ǎ có, é fun ahwan gěgé dó Jexóva tamɛ kpó kanɖódónǔwú kpó. É ɖe akɔ́nkpinkpan ɖaxó xlɛ́. Ði kpɔ́ndéwú ɔ, é hu kinnikínní ɖo sitɛ́nu mɛ, bo lɛ́ hu ahwanfuntɔ́ jinganjingan ɖokpó. Davídi ɖeji dó Benayáhu wú sɔmɔ̌, bo sɔ́ ɛ ɖó sɔ́ja e nɔ cɔ́ hɔnmɛ tɔn lɛ́ é nu.—2 Sam. 23:20-23.

Benayáhu nɔ gbejí nú Davídi hwenu e Abusalɔ́mu kpó Adoniyási kpó fɔ́n gǔ dó Davídi jí é. (2 Sam. 8:18; 15:18; 1 Axɔ́. 1:8) Hwenu e Davídi ɖo kpikpoxɔmɛ é ɔ, Benayáhu lɛ́ nɔ gǔdo n’i bɔ è sɔ́ Salomɔ́ɔ axɔ́sú. (1 Axɔ́. 1:32-40) Ɛɛn, Benayáhu nɔ gbejí nú Jexóva kpó mɛ e É sɔ́ lɛ́ é kpó hwenu e mɛ ɖěvo lɛ́ tlɛ gɔn gbejí nɔ é.

Mǐ lɔ ɖó hudó akɔ́nkpinkpan tɔn bá dó húzú kpan nukɔn kɛntɔ́ mǐtɔn Satáan kpó mɛ e ɖo gǔdo n’i lɛ́ é kpó. Gɔ́ ná ɔ, mǐ ɖó ná kán ɖ’é jí bo ná kpo ɖo gbɛ zán sɔgbe xá nǔgbódodó Jexóva tɔn lɛ́ wɛ. (Efɛ́. 6:11; 1 Pi. 5:8, 9) Mɛɖé lɛ́ ná bo tlɛ wá gbeta ɔ kɔn bo jó Jexóva dó ɔ, mǐdɛɛ lɛ́ ná tɛ́ dó wǔ tɔn kpó gbejíninɔ kpó, bo kú d’é jí ɖɔ é ná d’ajɔ mǐ.—2 Sam. 22:26.