Jezu “kplɔ́n tónúsise”

Hwebǐnu wɛ Jezu se tónú nú Jexóva. (Jaan 8:29) Bɔ étɛ́wú Biblu ka ɖɔ xó élɔ́: “É kplɔ́n tónúsise, gbɔn nǔ e sín wǔvɛ́ é se lɛ́ é gblamɛ”?—Ebl. 5:8.

Hwenu e Jezu ɖo ayǐkúngban jí é ɔ, é gbɔn ninɔmɛ ɖěɖěe ma tíin ɖo jǐxwé ǎ lɛ́ é mɛ. Mɛjitɔ́ ɖěɖěe sɔ́ yěɖée jó nú Mawu bo ka nyí hwɛhutɔ́ lɛ́ é wɛ kplɔ́n ɛ bɔ é su. (Luk. 2:51) É se wǔvɛ́ ɖo sinsɛngán nǔagɔwatɔ́ lɛ́ kpó acɛkpatɔ́ nǔagɔwatɔ́ lɛ́ kpó sín alɔ mɛ. (Mat. 26:59; Mak. 15:15) Gɔ́ ná ɔ, “é sɔ́ éɖée hwe bo se tónú káká yi kú;” wǔvɛ́ kú wɛ é kú.—Filí. 2:8.

Nǔ énɛ́ lɛ́ e jɛ lɛ́ é zɔ́n bɔ Jezu kplɔ́n tónúsise ɖo ali e nu é ma ko kplɔ́n ɖe kpɔ́n ɖo jǐxwé ǎ é. Mɔ̌ mɛ ɔ, é sixú húzú Axɔ́sú kpó Vɔ̌sánúxwlémawutɔ́ ɖaxó kpó e wú nǔ bǐ vɔ ɖe bo sixú se wǔvɛ́ xá mǐ é. (Ebl. 4:15; 5:9) Ée Jezu kplɔ́n tónúsise gbɔn nǔ e sín wǔvɛ́ é se lɛ́ é gblamɛ gúdo é ɔ, é wá xɔ akwɛ́ nú Jexóva hú gǎn, bo lɛ́ nyɔ́ zán n’i hú gǎn. Mǐ lɔ sixú xɔ akwɛ́ nú Jexóva hú gǎn bo lɛ́ jɛxá azɔ̌ ɖěbǔ e è sixú sɔ́ d’así nú mǐ é ényí mǐ kpo ɖo tónú se wɛ ɖo ninɔmɛ syɛ́nsyɛ́n lɛ́ mɛ ɔ nɛ́.—Ja. 1:4.