Nǔ e nǔxatɔ́ lɛ́ kanbyɔ́ lɛ́ é

Hwetɛ́nu wɛnjíjlázɔ́ e wa wɛ è ɖe din é ka ná fó?

Jezu ɖɔ: “È ná jlá wɛn ɖagbe Axɔ́súɖuto ɔ tɔn gbɔn ayǐkúngban ɔ bǐ jí, bónú é ná nyí kúnnuɖiɖe nú akɔta lɛ́ bǐ, bɔ énɛ́ ɔ gúdo ɔ, vivɔnu ɔ ná wá.” (Mat. 24:14) Xókwín Glɛ̌kigbe tɔn e è tínmɛ dó “vivɔnu” ɖo wěmafɔ élɔ́ kpó 6 kpó, gɔ́ nú 13gɔ́ ɔ mɛ é wɛ nyí teʹlos. É nɔ dó gesí vivɔnu gbɛ Satáan tɔn tɔn ɖo Aamagedɔ́ni. (Nǔɖe. 16:14, 16) Énɛ́ wú ɔ, mǐ ɖó ná kpo ɖo wɛn ɖagbe ɔ jlá wɛ káká jɛ hwenu e vivɔnu énɛ́ ná wá é. Énɛ́ vɔ́ nukúnnúmɔjɛnǔmɛ e mǐ ko ɖó ɖ’ayǐ é jlá ɖó.

Ð’ayǐ ɔ, mǐ mɔ nukúnnú jɛ mɛ ɖɔ mǐ ná ɖó wɛn ɖagbe ɔ jíjlá te hwenu e wǔvɛ́ ɖaxó ɔ ná bɛ́ kpó kún súsú dó nú Babilɔ́nu ɖaxó ɔ kpó é. (Nǔɖe. 17:3, 5, 15, 16) Mǐ ɖi ɖɔ nǔ énɛ́ ná bló bɔ “xwe” nǔjlɛ́dónǔwú tɔn e mɛ ‘Jexóva ná jɔ wǔ mɛ é’ ná wá vivɔnu. (Eza. 61:2) Mǐ lɛ́vɔ́ lin ɖɔ mɛ ɖěɖěe ná xo wǔvɛ́ ɖaxó ɔ zlɛ́ lɛ́ é ná ko xlɛ́ ɖɔ émí zé émíɖée jó nú Jexóva hwɛ̌ cóbɔ nǔ énɛ́ ná jɛ. Mǐ sɔ́ yě jlɛ́ dó Jwifu ɖěɖěe gán ɖo kún súsú dó nú Jeluzalɛ́mu hwenu ɖo 607 J.H.M. tɔn é wú. È ko ɖó wuntun mɛ énɛ́ lɛ́ ɖ’ayǐ ɖɔ yě ná gán, ɖó yě sɛn Jexóva bo lɛ́ gbɛ́ wǎn nú nǔnyanyawiwa. (Ezek. 5:11; 9:4) É ɖo mɔ̌ có, nǔjlɛ́dónǔwú énɛ́ sɔgbe xá xó Jezu tɔn e ɖo Matíe 24:14 mɛ, bo xlɛ́ ɖɔ ali sixú hun nú mɛ lɛ́ bɔ yě ná yí gbe nú wɛn ɖagbe ɔ cóbɔ vivɔnu ɔ ná wá ɖo Aamagedɔ́ni é ǎ.

Ðó nukúnnúmɔjɛnǔmɛ e mǐ ɖó dó Matíe 24:14 wú é zawě d’é jí wútu ɔ, mǐ ɖó ná lɛ́ jlá nukúnnúmɔjɛnǔmɛ e mǐ ɖó dó Nǔɖexlɛ́mɛ 16:21 éé ɖɔ xó dó kɛ́njí “ɖaxó ɖaxó” e ná “hɛn nǔ gblé tawun” é wú é ɖó. Ée è ba do nú nǔ dó nǔjɔnǔ mɛ é ɔ, é xlɛ́ ɖɔ wěmafɔ we lɛ́ gɔ́ so nú yěɖée. Gbɔn nɛ̌ é? Lěe mɛ lɛ́ nɔ yí wɛn Axɔ́súɖuto ɔ tɔn gbɔn é wɛ ɖe xósin ɔ xlɛ́. Mɛsɛ́dó Pɔ́lu wlán ɖɔ wɛn ɔ nɔ nyí wɛn ɖagbe, énɛ́ wɛ nyí ɖɔ é nɔ “hwɛ́n gbɛwán” nú “mɛ ɖěɖěe hwlɛ́n gán wɛ è ɖe lɛ́ é.” Amɔ̌, nú kɛntɔ́ Mawu tɔn lɛ́ ɔ, wɛn nyanya wɛ é nyí, énɛ́ wɛ nyí ɖɔ é nɔ hwɛ́n “kúwán.” (2 Kɔ. 2:15, 16) Yě gbɛ́ wǎn nú wɛn Axɔ́súɖuto ɔ tɔn ɖó é nɔ kɔ́n sɛ sín gbɛ e yě yí wǎn ná é jí, énɛ́ wɛ nyí gbɛ nyanya e Satáan kpa acɛ d’é nu bɔ è ná sú kún tɔn dó ɖo malínmálín mɛ é.—Jaan 7:7; 1 Jaan 2:17; 5:19.

Ðo wǔvɛ́ ɖaxó ɔ hwenu ɔ, wɛn ɔ ná ɖ’agbɔ̌n hú gǎn, bo ná jɛ mɛ gěgé tó mɛ hú ɖ’ayǐ tɔn. Wǎgbɔ tɔn ɔ, mɛ gěgé ná kplɔ́n bo tuun nyǐkɔ Jexóva tɔn. (Ezek. 39:7) Ðo hwenɛ́nu ɔ, ényí è sú kún dó nú Babilɔ́nu ɖaxó ɔ gúdo ɔ, mɛɖé lɛ́ ka ná yí wǎn nú wɛn ɔ, lěe yě ná yí wǎn nú wǎn ɖagbe ɖé gbɔn é ɖɔhun wɛ a? Nǔ sixú nyí mɔ̌. Bóyá yě sixú flín alǒ se ɖɔ, nú xwe gěgé ɔ, Kúnnuɖetɔ́ Jexóva tɔn lɛ́ ko jlá ɖɔ è ná sú kún dó nú sinsɛn nǔvú.

È sixú sɔ́ énɛ́ jlɛ́ dó nǔ e jɛ hwenu e Awě wǒ xo Ejípu hwexónu tɔn ɔ é wú. Ée Jexóva “ɖó hwɛ nú vodún e ɖo Ejípu lɛ́ bǐ” gúdo é ɔ, “akɔta tɛnmɛ tɛnmɛ” lɛ́ nyi ahwan xwedó togun tɔn. (Tín. 12:12, 37, 38) Jǒnɔ énɛ́ lɛ́ sixú ko hɔn wá su Jexóva hwenu e yě se bɔ Mɔyízi ɖo akpá gba nú mɛ wɛ dó Awě wǒ lɛ́ wú wɛ é.

Mɛ ɖěbǔ e ná hɔn wá su Jexóva hwenu e è ná sú kún dó nú Babilɔ́nu ɖaxó ɔ gúdo é ná ɖó wǔjɔmɛ ɔ bo ná nɔ gǔdo nú nɔví Klísu tɔn e ná kpo ɖo ayǐkúngban ɔ jí lɛ́ é. (Mat. 25:34-36, 40) É ɖo wɛn ɖɔ ali énɛ́ e hun bɔ è ná ylɔ́ mɛɖé ɖɔ lɛ̌ngbɔ́ é ná sú táan kpɛɖé jɛ nukɔn nú Aamagedɔ́ni, hwenu e mɛ e gbigbɔ sɔ́ bɔ yě kpo ɖo ayǐkúngban jí lɛ́ é ná ko mɔ ajɔ yětɔn jǐxwé tɔn ɔ gúdo é.

Nukúnnúmɔjɛnǔmɛ yɔ̌yɔ́ énɛ́ e mǐ ɖó é ɖe wǎnyíyí kpó nǔbláwǔkúnúmɛ kpó ɖaxó Jexóva tɔn xlɛ́. Ɛɛn, é “jló ɖɔ è ní sú mɛ ɖěbǔ sín kún dó ǎ, loɔ, é jló ɖɔ ali ní hun nú mɛ lɛ́ bǐ, bónú hwɛ yětɔn lɛ́ ní vɛ́ nú yě.”—2 Pi. 3:9.