A ka ɖó nǔɖiɖi a?

Mǐ ɖó ná ɖó nǔɖiɖi cóbɔ nǔ mǐtɔn ná nyɔ́ Jexóva nukúnmɛ. Nǔ ɖo mɔ̌ có, Biblu ɖɔ ɖɔ ‘nǔɖiɖi kún nyí mɛ bǐ sín nǔ ó.’ (2 Tɛ. 3:2) Hwenu e mɛsɛ́dó Pɔ́lu ɖɔ xó énɛ́ lɛ́ é ɔ, “mɛdídá lɛ́ kpó mɛ nyanya lɛ́ kpó” e ɖo ya dó n’i wɛ, bɔ é ba ɖɔ è ní hwlɛ́n émí ɖo yě lɔ mɛ é dó gesí wɛ é ɖe. Amɔ̌, nǔ e é ɖɔ dó nǔɖiɖi wú é lɛ́ kunkplá mɛ ɖěvo lɛ́. Mɛɖé lɛ́ nɔ wá gbeta ɔ kɔn bo nɔ wɔn ya nú kúnnuɖenú ɖěɖěe ɖo wɛn bo xlɛ́ ɖɔ Gbɛɖótɔ́ ɖé tíin, é wɛ nyí Mawu é. (Hlɔ̌. 1:20) Mɛ ɖěvo lɛ́ sixú ɖɔ ɖɔ émí ɖi nǔ nú nǔɖé, alǒ mɛ e ɖ’agbɔ̌n tawun é ɖé. Amɔ̌, nǔɖiɖi énɛ́ kɛ́ɖɛ́ ko kpé bónú nǔ mɛtɔn ná nyɔ́ Jexóva nukúnmɛ ǎ.

Mǐ ɖó ná kú d’é jí ɖɔ Jexóva tíin, bo nɔ dó ajɔ mɛ e ɖó nǔɖiɖi adodwé n’i lɛ́ é. (Ebl. 11:6) Bo ná dó ɖó nǔɖiɖi mɔ̌hun ɔ, mǐ ɖó hudó alɔdó gbigbɔ mímɛ́ Mawu tɔn tɔn. Ðɛ xixo sɛ́dó Jexóva wɛ ka sixú zɔ́n bɔ mɛɖé ná mɔ gbigbɔ mímɛ́ Mawu tɔn yí. (Luk. 11:9, 10, 13) Ali tají e nu è nɔ mɔ gbigbɔ énɛ́ yí ɖe é ɖokpó wɛ nyí gbɔn Xó e Mawu sɔ́ d’ayi mɛ nú mɛ lɛ́ bɔ yě wlán é, énɛ́ wɛ nyí Biblu xixa gblamɛ. Énɛ́ gúdo ɔ, mǐ sixú lin tamɛ dó nǔ e mǐ xa é jí, bo tɛ́n kpɔ́n bo zán nǔ e mǐ kplɔ́n é. Ényí mǐ nɔ wa nǔ énɛ́ lɛ́ hǔn, tɛn ná gbigbɔ mímɛ́ Jexóva tɔn wɛ mǐ ɖe bónú é ná w’azɔ̌ ɖo gbɛzán mǐtɔn mɛ, bo lɛ́ d’alɔ mǐ bónú mǐ ná ɖó nǔɖiɖi e ná zɔ́n bɔ nǔ mǐtɔn ná nyɔ́ Jexóva nukúnmɛ é nɛ́.