Ðu gbɛ víví káká sɔ́yi! sín akpáxwé ɖagbe ɖé lɛ́

Video kpó nǔkanbyɔ́ e nɔ sísɛ́ nǔkplɔ́ntɔ́ ɔ b’ɛ ná ɖɔ linlin tɔn lɛ́ tɔ́n, bɔ yě ɖo wěma Ðu gbɛ víví káká sɔ́yi! mɛ lɛ́ é zínzán ka nɔ víví nú we a? Bɔ akpáxwé “Mɛɖé lɛ́ ɖɔ,” “Nǔ e gbé a sixú nya é,” kpó “Kíjé” kpó ka ló? Akpáxwé ɖěvo tɛ́ lɛ́ ka sixú d’alɔ we hwenu e a ná ɖo Biblu kplɔ́n xá nǔkplɔ́ntɔ́ ɖé wɛ é?—Mt 28:19, 20.

Video lɛ́ kpó ɖiɖe lɛ́ kpó: Ényí wěma ɔ, éé ɖo zǐnzín lɔ jí é wɛ jlǒ we bɔ a ná nɔ dó kplɔ́n Biblu xá mɛ ná ɔ, nɛ̌ a ka sixú yá wǔ mɔ video kpó ɖiɖe ɖěvo lɛ́ kpó bǐ ɖo fí ɖokpó gbɔn? Ðo wěma ɔ, éé ɖo alǒkan alǒ tablɛ́ti lɔ jí é mɛ ɔ, sɔ́ ɖokpó ɖo mǐmámɛ tají ɛnɛ lɛ́ mɛ. Ényí a kpɔ́n xóta nǔkplɔ́nkplɔ́n lɛ́ tɔn sín vivɔnu ɖo do bǐ ɔ, a ná mɔ nǔ e zɔn kpɔ́ xá mǐmámɛ tají énɛ́ lɛ́ é bǐ ɖo fínɛ́, bɔ a sixú sɔ́ éé jló we é. (Kpɔ́n ɖiɖe 1.)

“Wěma ɔ, éé ɖo zǐnzín lɔ jí é”: Ényí alǒkan alǒ tablɛ́ti wɛ a dó ɖo nǔ kplɔ́n xá mɛɖé ná wɛ ɔ, a sixú mɔ ɖɔ éé ɖo zǐnzín lɔ jí é zínzán sín hweɖénu jɛ hweɖénu ɖo nǔkplɔ́nkplɔ́n ɔ hwenu nɔ d’alɔ. Ényí a ɖo nǔkplɔ́nkplɔ́n ɔ mɛ hǔn, zǐn nǔ tínwún tínwún atɔn e ɖo aga lɛ́ é, bo sɔ́ “Éé ɖo zǐnzín lɔ jí é (Mode image).” Lěe è sɔ́ nǔ ná gbɔn é sixú d’alɔ we bɔ a ná tuun lěe nǔ e jí ɖɔ xó dó wɛ mi ɖe é cá kan xá xóta nǔkplɔ́nkplɔ́n ɔ tɔn blěbú gbɔn é. Ényí a jló ná lɛ́ kɔ yi éé ɖo alǒkan alǒ tablɛ́ti lɔ jí é jí hǔn, lɛ̌ zín nǔ tínwún tínwún atɔn lɛ́, bo sɔ́ “Éé ɖo alǒkan alǒ tablɛ́ti lɔ jí é (Mode texte).”

“Un ka ɖo gbesisɔmɛ a?”: Gbǎví énɛ́ lɛ́ e ɖo ɖibla yi vivɔnu wěma ɔ tɔn lɛ́ é tɛɖɛ̌ nǔ tají ɖěɖěe è ɖó ná wa bá jɛxá bo ná nyí wɛnjlátɔ́, bo lɛ́ bló batɛ́mu lɛ́ é jí. (Kpɔ́n ɖiɖe 2.)

Tínmɛ e ɖo vivɔnu lɛ́ é: Tínmɛ e ɖo vivɔnu lɛ́ é nɔ ná mɔ jɛ mɛ dó xóta tají ɖé lɛ́ jí. Wěma ɔ, éé ɖo alǒkan alǒ tablɛ́ti lɔ jí é ɖó adlɛsi ɖé ɖo fífónu tínmɛ e ɖo vivɔnu é ɖokpó ɖokpó tɔn, bɔ nú a tɛ alɔ jí ɔ, é ná kplá we yi fí e a nɔ te ɖó ɖo nǔkplɔ́nkplɔ́n ɔ mɛ é. (Kpɔ́n ɖiɖe 2.)