‘Nɔ Gbɛ̀ Gbɔn Nùɖiɖi Gblamɛ, Ni Ma Nyí Gbɔn Mimɔ Gblamɛ Ó’

É kpò kpɛɖé bɔ è na lɛlɛ̌ dó Jeluzalɛmu bo na wá sú kún tɔn dó ɖò gudo mɛ é ɔ, mɛsɛ́dó Pɔlu wlan ɖɔ ɖó Klisanwun lɛ nyí ahwanfuntɔ́ ɖagbe Klisu tɔn lɛ wutu ɔ, ye ɖó na ɖó nukún wuvɛ̌ lɛ, ɖɔ ye ni ma sɔ́ vivomɛninɔ kpo gbɛɖuɖu kpo ɖó tɛn nukɔntɔn mɛ ó. (2 Tim. 2:3, 4) Ðó adǎn e ko ɖò gbɛ̀ elɔ e ɖò zɔ nú Mawu é na gbò wɛ é wutu ɔ, mǐ ɖó hudo nùɖiɖi e lidǒ é tɔn bo na dó sixu sɔ́ ayi mǐtɔn bǐ ɖó nǔ gbigbɔ tɔn lɛ jí. (2 Kɔ. 4:18; 5:7) Kpɔ́n video ‘Marchons par la foi, non par la vue’ (‘Nɔ Gbɛ̀ Gbɔn Nùɖiɖi Gblamɛ, Ni Ma Nyí Gbɔn Mimɔ Gblamɛ Ó’) ɔ. (Yì jw.org/fr jí, bo kpɔ́n PUBLICATIONS > VIDÉOS glɔ.) Ðǒ ayǐ lee wǎn yí nú nǔ agbaza tɔn lɛ zɛ xwé wu huzu kú sín fɛ́cá nú Naham kpo Abital kpo gbɔn é wu. Enɛ gudo hǔn, gbějé nùkanbyɔ elɔ lɛ kpɔ́n.

(1) Etɛ ka nyí “suɖunú baɖabaɖa e . . . ɖò tɛn mímɛ́ ɔ mɛ” ɖò xwè kanweko nukɔntɔn ɔ mɛ é? Nǔ taji tɛ Klisanwun e ɖò Jeluzalɛmu lɛ é ka ɖó na wà? (Mat. 24:15, 16) (2) Etɛwu é ka byɔ nùɖiɖi cobɔ è na hɔn sín toxo ɔ mɛ? (3) Vɔsisa tɛ lɛ hinhɔn ɔ ka byɔ? (4) Etɛwu Naham kpo Abital kpo ka dán lɛkanlɛkan? (5) Hwenu e Rachel ɖò Jeluzalɛmu gosin wɛ é ɔ, nǔ ɖevo tɛ ka tɛ́n nùɖiɖi tɔn kpɔ́n? (Mat. 10:34-37; Mak. 10:29, 30) (6) Nùɖiɖi kpo jiɖiɖe dó Jehovah wu kpo sín kpɔ́ndéwú ɖagbe tɛ Ethan ka sɔ́ ɖ’ayǐ? (7) Wuvɛ̌ tɛ lɛ Klisanwun lɛ ka mɔ ɖò Pella? (8) Nɛ̌ nùɖiɖi Naham kpo Abital kpo tɔn ka ɖekpo kpɛɖé kpɛɖé gbɔn? (9) Nɛ̌ Jehovah ka kpé nukún dó Klisanwun e ɖò Pella lɛ é wu gbɔn? (Mat. 6:33; 1 Tim. 6:6-8) (10) Ðó mǐ ko ɖò azǎn gudogudo tɔn gbɛ̀ elɔ tɔn lɛ mɛ wutu ɔ, nɛ̌ mǐ ka sixu wà nǔ Ablaxamu kpo Sala kpo ɖɔhun gbɔn? (Ebl. 11:8-10) (11) Hwɛjijɔ tɛ lɛ wu Naham kpo Abital kpo ka kanɖeji bo na lɛkɔ yì Jeluzalɛmu? Etɛwu linlin yetɔn ma ka sɔgbe ǎ? (Luk. 21:21) (12) Hwenu e Naham kpo Abital kpo lɛkɔ yì Jeluzalɛmu é ɔ, nɛ̌ nǔ lɛ ka ɖè gbɔn nugbǒ nugbǒ? (13) Etɛwu mǐ ka ɖó na hɛn nùɖiɖi mǐtɔn lidǒ dìn cobonu gbɛ̀ elɔ sín vivɔ ni wá?—Luk. 17:31, 32; 21:34-36.

Gbɛ̀ ninɔ gbɔn nùɖiɖi gblamɛ wɛ nyí ɖɔ (1) è ni nɔ ɖeji dó alixlɛ́mɛ Jehovah tɔn wu, (2) è ni nɔ wà nǔ sɔgbe xá alixlɛ́mɛ tɔn, (3) è ni nɔ xlɛ́ ɖɔ gbigbɔ sín nǔ lɛ xɔ akwɛ ɖò nukún mɛtɔn mɛ hú agbaza sín nǔ lɛ. Mi nú mǐ ni bo kanɖeji bo na nɔ gbɛ̀ gbɔn nùɖiɖi gblamɛ, lobo ɖeji ɖɔ “gbɛ̀ elɔ ɔ, wiwayi wɛ é ɖè, bɔ mɛ e nɔ bló jlǒ gbɛ̀ elɔ tɔn lɛ lɔ ɖò wiwayi wɛ; mɛ e nɔ bló jlǒ Mawu tɔn ɔ ka nɔ nɔ gbɛ̀ kaka sɔyi.”—1 Jaan 2:17.