Nùkanbyɔ Mitɔn Lɛ Sín Xósin
▪ Wɛnjlatɔ́ lɛ ka ɖó na zán Ɛntɛnɛti dó ɖekúnnu nú jonɔ e nɔ nɔ tò ɖevo mɛ lɛ é alǒ dó kplɔ́n Biblu xá ye wɛ à?
Wɛnjlatɔ́ ɖé lɛ ko zán Ɛntɛnɛti dó jɛ Biblu kplɔ́n xá mɛ lɛ jí ɖò tò ɖěɖee mɛ è gbɛ́ azɔ̌ mǐtɔn ɖé lɛ ɖè alǒ wɛnjlatɔ́ ma sukpɔ́ ɖè ǎ lɛ é. Ðò ninɔmɛ ɖé lɛ mɛ ɔ, nǔ enɛ ko hɛn lè ɖagbe lɛ wá. É ɖò mɔ̌ có, enyi wɛnjlatɔ́ lɛ nɔ ɖɔ xó ɖó kpɔ́ xá mɛ e ye ma tuùn ǎ lɛ é alǒ wlan wema sɛ́dó ye gbɔn Ɛntɛnɛti jí ɔ, é sixu dɔn akoba wá. (Kpɔ́n Sinsɛnzɔ́ Axɔsuɖuto ɔ Tɔn Mǐtɔn (Gungbe) juillet 2007 tɔn, wex. 3.) Linlin ɔ wɛ nyí ɖɔ è na dó wɛn Axɔsuɖuto ɔ tɔn ayijlɔjlɔnɔ lɛ, amɔ̌, xóɖɔɖókpɔ́ mɔhun lɛ sixu zɔ́n bɔ nɔví sunnu ɖé alǒ nɔví nyɔnu ɖé yì kpé dó gbɛ̌ nyanya lɛ nu, kaka jɛ gǔfɔndómawujitɔ́ lɛ jí. (1 Kɔ. 1:19-25; Kolo. 2:8) Gɔ́ na ɔ, ɖò tò ɖěɖee mɛ è gbɛ́ azɔ̌ Axɔsuɖuto ɔ tɔn ɖé lɛ ɖè alǒ bǐ ɖè lɛ é ɔ, acɛkpikpa lɛ sixu gbéjé wema-sɛ́dó-mɛ lɛ kpɔ́n. Xóɖɔɖókpɔ́ mɔhun lɛ sixu dɔn akoba wá nú nɔví sunnu kpo nɔví nyɔnu kpo e ɖò xá ɔ mɛ lɛ é. Enɛ wu ɔ, wɛnjlatɔ́ lɛ ɖó na yì Ɛntɛnɛti jí bo ba toɖevomɛnu e ye na jla wɛnɖagbe ɔ lɛ é ǎ.
Enyi mǐ ɖekúnnu e ma nyí aca tɔn ǎ é nú mɛɖé, bɔ mɛ ɔ nyí toɖevomɛnu bo ɖisa wá tò mǐtɔn mɛ wɛ ɔ, mǐ ɖó na tɛnkpɔn bo dó afɔ nú jlǒ e é ɖexlɛ́ é hwenu e é na lɛkɔ yì tò tɔn mɛ é ǎ, afi nú alaxɔ mǐtɔn na alixlɛ́mɛ lɛ mǐ ɔ nɛ. É nyɔ́ wà ɔ, mǐ sixu xlɛ́ ɛ lee é sixu zán jw.org gbɔn bo na mɔ nǔ ɖevo lɛ é alǒ lee é na mɔ alaxɔ e ɖò tò tɔn mɛ é gbɔn é. Mǐ sixu lɛ́ dó wusyɛn lanmɛ n’i ɖɔ é ni yì Kpléxɔ Axɔsuɖuto ɔ Tɔn e sɛkpɔ xwé tɔn é ɖé mɛ. É ɖò wɛn ɖɔ Kpléxɔ Axɔsuɖuto ɔ Tɔn kún ɖò tò ɖé lɛ mɛ ó. Enyi é jló bonu Kúnnuɖetɔ́ e ɖò xá tɔn mɛ é ɖé ni wá ba ɛ kpɔ́n ɔ, mǐ ɖó na wlan nǔ dó Veuillez suivre l’intérêt (S-43) mɛ, bo zé jó nú wěgbojinɔtɔ́ agun ɔ tɔn, bɔ éyɛ na wá zán jw.org bo na sɛ́dó. Alaxɔ e nɔ kpé nukún dó azɔ̌ ɔ wu ɖò tò e mɛ mɛ ɔ nɔ nɔ é mɔ nukúnnú jɛ ninɔmɛ ayǐ ɔ jí tɔn lɛ wu, bo na sixu d’alɔ mɛ mɔhun ɖò gbigbɔ lixo.—Kpɔ́n Sinsɛnzɔ́ Axɔsuɖuto ɔ Tɔn Mǐtɔn (Flansegbe) juin 2014 tɔn, wex. 7, kpo Sinsɛnzɔ́ Axɔsuɖuto ɔ Tɔn Mǐtɔn (Gungbe) novembre 2011 tɔn, wex. 2 kpo.
Enyi mɛ e mǐ nɔ ba kpɔ́n dìn é ɖé sɛ̀ tɛn yì tò ɖevo mɛ alǒ enyi mǐ ɖò nǔ kplɔ́n xá mɛɖé wɛ dìn, bɔ mɛ ɔ nɔ nɔ tò ɖevo mɛ bonu Ɛntɛnɛti jí kɛɖɛ jɛn mǐ tuùn mǐɖée ɖè ɔ, mǐ ɖó na xwedó alixlɛ́mɛ e xó è ɖɔ ɖò aga lɛ é. É ɖò mɔ̌ có, mǐ sixu kpó ɖò afɔ dó nú jlǒ e é ɖexlɛ́ é wɛ kaka jɛ hwenu e wɛnjlatɔ́ e ɖò xá tɔn mɛ lɛ é na wá mɔ ɛ é. Amɔ̌ lóò, enyi mɛ ɔ nɔ nɔ tò e mɛ è gbɛ́ azɔ̌ mǐtɔn ɖé lɛ ɖè alǒ bǐ ɖè é ɔ, mǐ ɖó na nɔ acéjí tawun hwenu e mǐ ɖò xó ɖɔ dó xota Biblu tɔn lɛ jí wɛ gbɔn wema-sɛ́dó-mɛ, alokan, alǒ Ɛntɛnɛti gblamɛ é.—Mat. 10:16.